ຫວຽດ­ນາມ ໃຫ້­ການ​ຊ່ວຍ­ເຫຼືອ​ບຳ­ລຸງບຸກ​ຄະ­ລາ​ກອນ​ສື່​ມວນ​ຊົນ​ລາວ

17.10.2019 9:07     

   (ຂປລ) ສະ​ຖາ​ບັນ​ສື່​ມວນ​ຊົນ ແລະ ໂຄສະນາ, ສະ​ຖາ​ບັນ​ການເມືອງ​ແຫ່ງ​ຊາດ ໂຮ່​ຈິມິນ ສສ ຫວຽດນາມ ຮ່ວມ​ກັບສະ​ຖາ​ບັນ​ສື່​ມວນ​ຊົນ, ວັດທະນະທຳ ແລະ ທ່ອງ​ທ່ຽວ ກະຊວງ ຖະແຫຼງ​ຂ່າວ, ວັດທະນະທຳ ແລະ ທ່ອງ​ທ່ຽວ (ຖວທ) ແຫ່ງ ສປປ ລາວ ໄດ້​ເປີດ​ຊຸດ​ຝຶກ​ອົບຮົມ​ກ່ຽວ​ກັບ​ການ​ຄຸ້ມ​ຄອງ​ສື່​ມວນ​ຊົນ ຊຸດ​ທຳອິດ ຢູ່ ສສ ຫວຽດນາມ ຂຶ້ນ​ໃນ​ລະຫວ່າງ​ວັນ​ທີ 13 ຕຸລາ ຫາ 13 ທັນວາ 2019 ທີ່​ສະ ຖາ​ບັນ​ການເມືອງ​ແຫ່ງ​ຊາດ​ຫວຽດນາມ, ນະຄອນຫຼວງ​ຮ່າ​ໂນ້ຍ ໂດຍ​ມີ​ສຳ​ມະ​ນາ​ກອນ​ທີ່​ເປັນ​ພະນັກ​ງານ​ນໍາ​ພາ​ຈາກ​ສື່​ມວນ​ຊົນ​ຫຼັກ ແລະ ພາກສ່ວນ​ຕ່າງໆ​ທີ່​ກ່ຽວຂ້ອງ​ຂອງ​ລາວ ເຂົ້າ​ຮ່ວມ.

   ພິທີ​ເປີດ​ຊຸດ​ອົບຮົມດັ່ງ ກ່າວ ໄດ້​ຖືກ​ຈັດ​ຂຶ້ນ​ຢ່າງເປັນ​ ທາງ​ການຢູ່​ສະ​ຖາ​ບັນ​ການ ເມືອງ​ແຫ່ງ​ຊາດ​ໂຮ່​ຈິມິນ ໃນ​ວັນ​ທີ 14 ຕຸ​ລາ 2019 ຜ່ານ​ມາ ໂດຍ​ມີ ທ່ານ ສະຫວັນ​ຄອນ ຣາ​ຊ​ມຸນ​ຕຣີ ຮອງ​ລັດຖະມົນຕີ ກະຊວງ ຖວ​ທ, ທ່ານ ຫງວຽນ​ຫວຽດ​ທາວ ຮອງ​ອຳນວຍການ​ສະ​ຖາ​ບັນ​ການເມືອງ​ແຫ່ງ​ຊາດ​ໂຮ່​ຈິມິນ, ທ່ານ ລິວ​ວັນ​ອານ ອຳນວຍ​ການ​ສະ​ຖາ​ບັນ​ສື່ສານ​ມວນ​ຊົນ ແລະ ໂຄສະນາ ແລະ ພາກສ່ວນ​ກ່ຽວຂ້ອງ​ເຂົ້າ​ຮ່ວມ .

   ໃນ​ໂອກາດ​ນີ້, ທ່ານ ສະ ຫວັນ​ຄອນ ຣາ​ຊ​ມຸນ​ຕຣີ ໄດ້​ກ່າວ​ສະແດງ​ຄວາມ​ຂອບໃຈ​ເປັນ​ຢ່າງ​ສູງຕໍ່​ການ​ນຳ, ຄູ​-​ອາ ຈານ ຢູ່​ສະ​ຖາ​ບັນ​ສື່​ມວນ​ຊົນ ແລະ ໂຄສະນາ, ສະ​ຖາ​ບັນ​ການເມືອງ​ແຫ່ງ​ຊາດ ໂຮ່​ຈິ​ມິນ ທີ່​ໄດ້​ຊ່ວຍເຫຼືອ​ທາງ​ດ້ານ​ທຶນຮອນ, ແບ່ງປັນ​ຄວາມ​ຮູ້ ແລະ ປະສົບ​ການ​ອັນ​ລໍ້າ​ຄ່າ, ເປີດ​ຊຸດ​ອົບຮົມ​ພະນັກງານ​ຂົງເຂດ​ສື່​ມວນ​ຊົນ​ລາວ ໃນ​ໄລຍະ​ຜ່ານ​ມາ ກໍຄືປັດ​ຈຸ​ບັນ.

   ການ​ເປີດ​ຊຸດ​ອົບຮົມວຽກ​ ງານ​ຄຸ້ມ​ຄອງ​ສື່​ມວນ​ຊົນ ໄລຍະ 2 ເດືອນ​ໃນ​ຄັ້ງ​ນີ້ ແມ່ນ​ເຫດການ​ໃໝ່ ໃນ​ການ​ສ້າງ​ບຸກ​ຄະລາ​ກອນ​ດ້ານ​ສື່​ມວນ​ຊົນ ລະຫວ່າງ ລາວ​-​ຫວຽດນາມ ຊຶ່ງ​ຈະ​ເປັນ​ຊ່ອງ​ທາງ​ອັນ​ດີ ໃນ​ການ​ນຳເອົາ​ ຄວາມ​ຮູ້​ຈາກ​ຄູ​-​ອາຈານ, ການ​ແລກປ່ຽນ​ປະສົບ​ການລະຫວ່າງ ​ສື່​ມວນ​ຊົນ​ລາວ ແລະ ຫວຽດ​ນາມ​ ທັງ​ຢູ່​ສູນ​ກາງ ແລະ ທ້ອງ ຖິ່ນ ຊຶ່ງ​ຈະ​ເປັນ​ພື້ນຖານ​ອັນ​ໜັກ​ແໜ້ນ​ໃຫ້​ແກ່​ການ​ກ້າວ​ໄປ​ຂ້າງ​ໜ້າ​ຂອງສື່​ມວນ​ຊົນ​ລາວ.

   ຊຸດ​ອົບຮົມ​ຄັ້ງ​ນີ້ ແມ່ນ​ຈະ​ເນັ້ນ​ໜັກ​ບັນຫາ​ໃໝ່ໆ​ທີ່​ສຳຄັນ​ໃນ​ສະພາບ​ປັດຈຸບັນ, ຊຶ່ງ​ນອກ ຈາກ​ຮຽນ​ທິດ​ສະ​ດີ​ແລ້ວ ຍັງ​ຈະ​ໄດ້​ລົງ​ພາກ​ປະຕິບັດ​ຕົວ​ຈິງ ແລະ ໄປ​ເຄື່ອນ​ໄຫວ​ທັດ​ສະ​ນະ​ສຶກສາ, ແລກປ່ຽນ​ບົດຮຽນ​ຢູ່​ບັນດາ​ສຳນັກງານ​ຂອງ​ສື່​ມວນ​ຊົນ​ຢູ່​ຮ່າ​ໂນ້ຍ ແລະ ບາງ​ແຂວງ​ຢູ່​ທ້ອງຖິ່ນຕື່ມ​ອີກ.

   ອີງ​ຕາມ​ແຜນ​ຮ່ວມ​ມື​ແລ້ວ, ສະ​ຖາ​ບັນ​ການເມືອງ​ແຫ່ງ​ຊາດ​ໂຮ່​ຈິມິນ ເຫັນ​ດີ​ຊ່ວຍ​ບໍາ​ລຸງ​ສ້າງ​ບຸກ​ຄະລາ​ກອນ​ສື່​ມວນ​ຊົນ​ໃຫ້​ແກ່​ລາວ ປີ​ລະ​ຊຸດ ແຕ່​ປີ 2019-2023.