ພິ­ທີ​ເຊັນ​ບົດ​ບັນ­ທຶກ​ຄວາມ​ເຂົ້າ­ໃຈ​ໂຄງ­ການ​ພັດ­ທະ­ນາບຸກ​ຄະ­ລາ​ກອນ​ສຸ­ຂະ­ພາບ​ຕາ

18.10.2019 9:33     

   ປັດຈຸບັນ ສປປ ລາວ ຍັງ​ ຂາດ​ບຸກ​ຄະລາ​ກອນການແພດ ດ້ານ​ສຸຂະພາບ​ຕາ ຍ້ອນຫຼັກ ສູດ​ການ​ຮຽນ​ຍັງ​ບໍ່​ໄດ້​ຮັບ​ການ​ພັດທະນາ​ຕາມ​ມາດຕະຖານ​ສາກົນ ສະນັ້ນ, ​ຈຶ່ງ​ໄດ້​ຮັບ​ການ​ຊ່ວຍເຫຼືອ​ຈາກ​ລັດຖະບານ ແລະ ປະຊາຊົນ​ອົສ​ຕຣາ​ລີ ຜ່ານ​ກະຊວງ​ການ​ຕ່າງປະເທດອົສ ​ຕຣາ​ລີ ມູນ​ຄ່າ 971 ຕື້​ກີບ. ດັ່ງນັ້ນ ​ເມື່ອ​ວັນ​ທີ 15 ຕຸລາ ຜ່ານ​ມາ ທີ່​ມະຫາວິທະຍາໄລ​ວິທະຍາສາດ​ສຸຂະພາບ (ມວສ) ຈຶ່ງ​ໄດ້ມີພິທີ​ເຊັນ​ບົດ​ບັນທຶກ​ຄວາມ​ເຂົ້າໃຈໂຄງການ​ພັດ ທະນາ​ບຸກ​ຄະລາ​ກອນດ້ານສຸ ຂະພາບ​ຕາ ​ຢູ່ ສປປ ລາວ ລະ ຫວ່າງ ມວສ ແລະ ມູນ​ນິທິ​ເຟຣດ​ຮາ​ໂລ ຮ່ວມ​ລົງນາມ​ໂດຍ ​ທ່ານ ພູທອນ ວັງ​ກອນ​ວິໄລ ອະທິການ​ບໍດີ​ມະຫາວິທະຍາໄລ​ວິທະຍາ ສາດ​ສຸຂະພາບ ແລະ ທ່ານ ຟຸກ ຫ​ງວຽນ ຕັນ ອໍາ​ນວຍ​ການ​ມູນ​ນິທິ​ເຟຣດ​ຮາ​ໂລ ​ປະ​ຈໍາ​ພາກ​ພື້ນ​ອາຊີ​ຕາເວັນ​ອອກ ຊຶ່ງ​ມີ​ທ່ານນາງ ເຈນ ແຊັນ​ເລີ ຮອງ​ເອກ​ອັກ​ຄະ​ລັດ​ຖະທູດ​ອົສຕຣາ​ລີ ປະ​ຈໍາລາວ ພ້ອມ​ດ້ວຍ​ພາກ ສ່ວນ​ກ່ຽວຂ້ອງ​ເຂົ້າ​ຮ່ວມ.

   ໂຄງການ​ດັ່ງກ່າວ​ມີຈຸດ ປະສົງ ​ເພື່ອ​ສ້າງ​ບຸກ​ຄະລາ​ກອນ​ໃຫ້​ມີ​ຄຸນນະພາບ​ດ້ານ​ສຸຂະພາບ​ຕາ​ໃຫ້​ຫຼາຍ​ຂຶ້ນ ປະ ກອບສ່ວນ​ເຂົ້າ​ໃນ​ການ​ພັດທະ ນາ​ເສດ​ຖະ​ກິດ​-​ສັງຄົມ​ ຂອງ ສປປ ລາວ ພ້ອມ​ນັ້ນ​ເພື່ອ​ສ້າງ​ຫຼັກສູດ​ການ​ຮຽນທີ່​ເຊື່ອມ​ສານ​ກັບ​ລະບົບ​ການ​ສຶກສາ​ຊັ້ນ​ສູງ ແນໃສ່​ເພີ່ມ​ຈໍາ​ນວນ​ບຸກ​ຄະລາ​ກອນ​ດ້ານ​ສຸຂະພາບ​ຕາ​ໃຫ້​ແກ່​ພາກ​ລັດ ເພື່ອ​ຊ່ວຍ​ຫຼຸດຜ່ອນ​ບັນຫາ​ຕາບອດ​ທີ່​ຫຼີກ​ລ່ຽງ​ໄດ້​ຢູ່ ສປປ ລາວ ຊຶ່ງ​ກິດ​ຈະ​ກໍາ ຫຼັກແມ່ນ​ພັດທະນາ​ຫຼັກສູດ​ທີ່​ອີງໃສ່​ທັກ​ສະ​ຄວາມ​ສາມາດປະ ​ເມີນ​ຜົນ ແລະ ຈັດ​ຕັ້ງ​ປະຕິບັດ ໂດຍ​ປຶກສາ​ຫາລື​ກັບພາກສ່ວນ ​ກ່ຽວຂ້ອງ​ກັບ​ວຽກ​ງານ​ສຸຂະ ພາບ​ຕາ ປັບປຸງ​ການ​ຮຽນ​-​ການ​ສອນ​ກ່ຽວ​ກັບ​ການ​ສຶກສາ​ຈັກຂຸ​ວິທະຍາ ແລະ ນໍາ​ພາໃນ​ການ​ໂຄສະນາ​ປະ​ຊາ​ສໍາ​ພັນ​ກ່ຽວກັບວຽກ​ງານ​ສຸຂະພາບຕາ. ປັດຈຸບັນ​ແພດ​ຊ່ຽວ​ຊານ​ຕາ​ ​ມີປະມານ 30 ຄົນ ຖ້າ​ສົມ​ທຽບ​ເປັນ​ຕົວ​ເລກທົ່ວປະ ເທດ​ກັບ​ລັກສະນະ​ຂອງ​ປະເທດ​ລາວ​ມີ​ປະຊາກອນກະ​ແຈກກະ ຈາຍຢູ່​ຕາມ​ເຂດ​ຫ່າງ​ໄກ​ສອກ ຫຼີກ​ແມ່ນ​ບໍ່​ພຽງ​ພໍ​ສໍາ​ລັບ​ຄວາມ​ຕ້ອງການ ແລະ ບໍລິການ​ໃຫ້​ປະຊາຊົນ​ເຂົ້າ​ເຖິງ​ການ​ປິ່ນປົວ​ສຸຂະພາບ​ຕາ. (ຂ່າວ: ນ .ນ້ອຍ)