ຖະ­ແຫຼງ­ການ​ຮ່ວມ ລາວ​-​ຫວຽດນາມ ກ່ຽວ​ກັບ​ການ​ເພີ່ມ​ທະວີ​ສາຍ​ພົວ­ພັນມິດຕະພາບ​ທີ່​ຍິ່ງ​ໃຫຍ່

ຄວາມ​ສາມັກຄີ​ພິເສດ ແລະ ການ​ຮ່ວມ​ມື​ຮອບດ້ານ ໃນ​ສະພາບ​ການ​ໃໝ່

02.10.2019 14:17     

    ໂດຍ​ຕອບ​ສະໜອງ​ຕາມ​ການ​ເຊື້ອ​ເຊີນ​ຂອງ​ສະຫາຍ ຫ​ງວຽນ ຊວັນ ຟຸກ ນາຍົກລັດຖະມົນຕີ ແຫ່ງ ສາທາລະນະ​ລັດ ສັງຄົມ​ນິຍົມ​ຫວຽດນາມ ພ້ອມ​ດ້ວຍ​ພັນ​ລະ​ຍາ, ສະຫາຍ ທອງ​ລຸນ ສີ​ສຸ​ລິດ ນາຍົກລັດຖະມົນຕີ​ແຫ່ງ ສາທາລະນະ​ລັດ ປະຊາທິປະໄຕ ປະຊາຊົນ​ລາວ ​ພ້ອມ​ດ້ວຍ​ພັນ​ລະ​ຍາ ​ແລະ ຄະນະ​ຜູ້​ແທນ​ຂັ້ນ​ສູງ​ ດໍາ​ເນີນ​ການ​ຢ້ຽມຢາມ ສາທາລະນະ​ລັດ ສັງຄົມ​ນິຍົມ​ຫວຽດນາມ ຢ່າງ​ເປັນ​ທາງ​ການ ແຕ່​ວັນ​ທີ 1 - 3 ຕຸລາ 2019.
    ໃນ​ໄລຍະ​ຢ້ຽມຢາມ, ສະ​ຫາຍ ທອງ​ລຸນ ສີ​ສຸ​ລິດ ໄດ້​ເຂົ້າ​ຮ່ວມ​ພິທີ​ຕ້ອນຮັບ​ຢ່າງ​ເປັນ​ທາງ​ການ, ພົບ​ປະ​ສອງ​ຝ່າຍ ແລະ ເຂົ້າ​ຮ່ວມ​ງານ​ລ້ຽງ ຊຶ່ງ​ເປັນ​ກຽດ​ຈັດ​ໂດຍ ​ສະ​ຫາຍ ຫງວຽນ ຊັ​ວນ ຟຸກ; ເຂົ້າ​ຢ້ຽມ​ຂໍ່າ​ນັບ​ສະ​ຫາຍ ຫ​ງວຽນ ຝູ ຈ້ອງ ເລຂາທິການ​ໃຫຍ່ ປະທານ​ປະເທດ; ພົບ​ປະ​ ສະ​ຫາຍ ນາງ ​ຫ​ງວຽນ ທິ ກິມ ເງິນ ປະທານ​ສະພາ​ແຫ່ງ​ຊາດ; ວາງ​ພວງ​ມະ​ລາ​ຢູ່​ສຸສານ​ປະທານ ໂຮ່​ຈິມິນ ແລະ ອະນຸ​ສອນ​ສະຖານ​ນັກຮົບ​ວິລະ​ຊົນ; ຢ້ຽມຢາມ ແລະ ເຮັດ​ວຽກ ຢູ່​ບັນດາ​ພື້ນຖານ​ເສດຖະກິດ ແລະ ວັດທະນະທຳ​ຈຳນວນ​ໜຶ່ງ ທີ່​ນະຄອນ​ດາ​ໜັງ. ພ້ອມ​ນີ້, ນາຍົກລັດຖະມົນຕີ​ທັງ​ສອງ ໄດ້​ເປັນ​ສັກຂີ​ພິຍານ​ໃນ​ພິທີ​ລົງ​ນາມ​ ແລະ​ ມອບ​ຮັບ​ເອກະສານ​ຮ່ວມ​ມື ຈຳນວນ 8 ສະບັບ (ເອ ກະສານ​ຊ້ອນ​ທ້າຍ).

   ໃນ​ທ່າມກາງ​ບັນຍາ ກາດທີ່​ເຕັມ​ໄປ​ດ້ວຍ​ໄມຕີ​ຈິດ​ມິດຕະພາບ ແລະ ຄວາມ​ໄວ້​ເນື້ອ​ເຊື່ອ​ໃຈ​ກັນ, ການ​ນໍາ​ຂັ້ນ​ສູງ​ຂອງ​ສອງ​ປະເທດ​ໄດ້​ແຈ້ງ​ໃຫ້​ກັນ​ຊາບ ສະພາບ​ການ​ພັດທະນາ​ເສດ​ຖະ​ກິດ​-​ສັງຄົມ, ການຈັດຕັ້ງ​ປະຕິບັດ​ວຽກ​ງານ​ການ​ຕ່າງປະເທດ​ຂອງ​ຕົນ ໃນ​ໄລຍະ​ຜ່ານ​ມາ. ພ້ອມ​ດຽວ​ກັນ​ນັ້ນ, ໄດ້​ແລກປ່ຽນ​ຢ່າງ​ເລິກເຊິ່ງ, ກົງ​ໄປ​ກົງ​ມາ ກ່ຽວ​ກັບ​ບັນດາ​ທິດ​ທາງ, ມາດ​ຕະການ​ຕ່າງໆ ເພື່ອ​ແນໃສ່​ປັບປຸງ, ເພີ່ມ​ທະວີ​ສາຍ​ພົວພັນ​ມິດຕະພາບ​ທີ່​ຍິ່ງ​ໃຫຍ່, ຄວາມ​ສາມັກຄີ​ພິເສດ ແລະ ການ​ຮ່ວມ​ມື​ຮອບດ້ານ ລາວ​-​ຫວຽດນາມ ໃນ​ຕໍ່​ໜ້າ. ສອງ​ຝ່າຍ​ຢືນຢັນ​ຄືນ​ວ່າ ຈະ​ສືບຕໍ່​ຄຽງ​ບ່າ​ຄຽງ​ໄຫຼ່​ກັນ​ສະໜັບສະໜູນ​ຊ່ວຍເຫຼືອ​ຊຶ່ງ​ກັນ​ ແລະ​ ກັນ ບົນ​ເສັ້ນທາງ​ແຫ່ງ​ການ​ປົກ​ປັກ​ຮັກສາ ແລະ ສ້າງສາ​ພັດທະນາ​ປະເທດ​ຊາດ​ຂອງ​ຕົນ, ທັງ​ໃນ​ຂອບ​ສອງ​ຝ່າຍ ກໍຄື​ໃນ​ເວທີ​ພາກ​ພື້ນ ແລະ ສາ​ກົນ.

   ບັນດາ​ການ​ນຳ​ຂັ້ນ​ສູງ​ຂອງ​ຫວຽດນາມ ​ໄດ້​ສະແດງ​ຄວາມ​ຊົມເຊີຍ​ບັນດາ​ຜົນ ສຳເລັດ​ທີ່​ພັກ, ລັດຖະບານ​ແລະ​ ປະຊາຊົນ​ລາວ ອ້າຍ​ນ້ອງ ຍາດ​ມາ​ໄດ້​ໃນ​ໄລຍະ​ຜ່ານ​ມາ ພາຍ​ໃຕ້​ການ​ຊີ້​ນຳ ​ນຳພາ ຂອງ​ພັກ​ປະຊາຊົນ ປະຕິວັດ​ລາວ, ພິເສດ​ແມ່ນ​ຮັກສາ​ຈັງຫວະ​ການ​ເຕີບ​ໂຕ​ຢ່າງ​ໝັ້ນ​ທ່ຽງ, ເພີ່ມ​ທະວີ​ວຽກ​ງານ​ປ້ອງ​ກັນ​ຊາດ, ປ້ອງ​ກັນ​ຄວາມ​ສະຫງົບ, ແກ້​ໄຂ​ບັນຫາ​ໄພພິບັດ​ທາງ​ທຳ​ມະ​ຊາດ ​ແລະ ​ເສີມ​ຂະຫຍາຍ​ເອກະລັກ​ວັດທະນະທຳ​ທີ່​ດີງາມ​ຂອງ​ຊາດ ພ້ອມ​ທັງ ສະແດງ​ຄວາມ​ຂອບໃຈ​ຕໍ່​ພັກ, ລັດຖະບານ ແລະ ປະຊາຊົນ​ລາວ​ອ້າຍ​ນ້ອງ ທີ່​ໄດ້​ໃຫ້ການ​ຊ່ວຍເຫຼືອ​ປະຊາຊົນ​ຫວຽດນາມ ຢ່າງ​ທັນ​ເວລາ​ໃນ​ເວລາ​ທີ່​ຖືກ​ຜົນ​ກະທົບ​ຈາກ​ໄພພິບັດ​ທາງ​ທຳ​ມະ​ຊາດ​ໃນ​ໄລຍະ​ຜ່ານ​ມາ.

   ສະ​ຫາຍ ທອງ​ລຸນ​ ສີ​ສຸ​ລິດ ໄດ້​ຕີ​ລາຄາ​ສູງ​ບັນດາ​ຜົນສຳເລັດ​ທີ່ ພັກ, ລັດຖະບານ ແລະ ປະຊາຊົນ​ຫວຽດນາມ​ອ້າຍ​ນ້ອງ​ຍາດ​ມາ​ໄດ້​ຕະຫຼອດ​ໄລຍະ​ຜ່ານ​ມາ ພາຍ​ໃຕ້​ການ​ນຳພາ​ອັນ​ຖືກຕ້ອງ​ຂອງ​ພັກ​ກອມ​ມູ​ນິດ​ຫວຽດນາມ ທີ່​ສະແດງ​ອອກ​ໃນ​ການ​ພັດທະນາ​ເສດ​ຖະ​ກິດ​-​ສັງຄົມ, ຄວາມ​ກ້າວໜ້າ​ທາງ​ດ້ານ​ວິທະຍາ​ສາດ​-​ເຕັກ​ໂນ​ໂລ​ຊີ​ລວມ​ທັງ​ການ​ຍົກ​ສູງ​ຖານະ​ບົດບາດ​ຂອງ​ຫວຽດນາມ​ໃຫ້​ນັບ​ມື້​ນັບ​ສູງ​ຂຶ້ນ​ຢ່າງ​ບໍ່​ຢຸດ​ຢັ້ງ ໃນ​ເວທີ​ພາກ​ພື້ນ​ ແລະ​ ສາກົນ; ທັງ​ໄດ້​ສະແດງ​ຄວາມ​ຂອບໃຈ​ຕໍ່​ການ​ຊ່ວຍເຫຼືອ​ອັນ​ລໍ້າ​ຄ່າ​ຂອງ​ຫວຽດນາມ ຢ່າງ​ຕໍ່​ເນື່ອງ​ໃນ​ຫຼາຍ​ປີ​ຜ່ານ​ມາ. ນັບ​ທັງ​ການ​ຊ່ວຍເຫຼືອ​ສຸກ​ເສີນ​ອັນ​ລໍ້າ​ຄ່າ ແລະ ທັນ​ການ​ໃນ​ການ​ແກ້​ໄຂ​ບັນຫາ​ອຸ​ທົກ​ກະ​ໄພ​ໃນ​ໄລຍະ​ທີ່​ຜ່ານ​ມາ.

   ໃນ​ສະພາບ​ການ​ສາກົນ ແລະ ​ພາກ​ພື້ນ ມີ​ການ​ຜັນ​ແປ​ຢ່າງ​ສັບສົນ ແລະ ມີ​ຄວາມ​ທ້າ​ທາຍ, ສອງ​ຝ່າຍ​ໄດ້​ເນັ້ນ​ໜັກ​ຄວາມ​ສຳຄັນ ທີ່​ມີ​ຄວາມ​ໝາຍ​ເປັນ​ຕາຍ​ຂອງ​ສາຍ​ພົວພັນ​ມິດຕະພາບ​ອັນ​ຍິ່ງ​ໃຫຍ່, ຄວາມ​ສາມັກຄີ​ພິເສດ​ ແລະ ​ການ​ຮ່ວມ​ມື​ຮອບດ້ານ​ລາວ​-​ຫວຽດນາມ, ຊຶ່ງ​ຖື​ວ່າ​ເປັນ​ກົດເກນ​ທີ່​ບໍ່​ປ່ຽນແປງ, ເປັນ​ກຳລັງ​ແຮງ​ແຫ່ງ​ການ​ຄົງ​ຕົວ ​ແລະ​ ຂະຫຍາຍຕົວ​ຂອງ​ພາລະກິດ​ປະຕິວັດ​ຂອງ​ແຕ່​ລະ​ປະເທດ; ໃນ​ນັ້ນ, ບັນດາ​ຄົນ​ຮຸ່ນ​ສືບ​ທອດ​ຕ້ອງ​ມີ​ຄວາມ​ຮັບຜິດຊອບ​ໃນ​ການ​ປົກ​ປັກ​ຮັກສາ, ເພີ່ມ​ພູນ​ຄູນ​ສ້າງ ເພື່ອ​ເຮັດ​ໃຫ້​ສາຍ​ພົວພັນ​ພິເສດ​ອັນ​ບໍລິສຸດ​ຜຸດ​ຜ່ອງ, ຫາ​ໄດ້​ຍາກ​ນີ້ ກ້າວ​ຂຶ້ນ​ຈຸດ​ສຸດ​ຍອດ​ອັນ​ໃໝ່, ແລະ ນໍາ​ເອົາ​ຜົນ​ປະໂຫຍດ​ຕົວ​ຈິງ​ມາສູ່​ປະຊາຊົນ​ສອງ​ຊາດ.

   ບົນ​ພື້ນຖານ​ດັ່ງກ່າວ, ສອງ​ຝ່າຍ​ເປັນ​ເອກະ​ພາບ​ສືບຕໍ່​ຮັກສາ​ການ​ແລກປ່ຽນ​ຄະນະ​ຜູ້​ແທນ​ ແລະ ພົບ​ປະ​ຂັ້ນ​ການ​ນໍາ, ແຕ່​ລະ​ລະດັບ ແລະ ໃນ​ທຸກ​ຊ່ອງ​ທາງ​ຕາມ​ທິດ​ກະທັດ​ຮັດ, ມີ​ປະສິດ​ທິ​ຜົນ, ແທດເໝາະ​ຕົວ​ຈິງ​ແລະ​ເອົາໃຈໃສ່​ໃນ​ການ​ແບ່ງປັນ​ບົດຮຽນ​ປະສົບ​ການ​ ແລະ​ ຊອກ​ຫາ​ມາດ​ຕະການ​ແກ້​ໄຂ​ຂໍ້​ຫຍຸ້ງຍາກ, ຂໍ້ຄົງຄ້າງ; ຕິດຕາມ​ກວດກາ​ຢ່າງ​ປົກກະຕິ​ ແລະ​ເອົາໃຈໃສ່​ຜັນ​ຂະຫຍາຍ​ບັນດາ​ຂໍ້​ຕົກລົງ​ຂອງ​ຜູ້ນຳ​ຂັ້ນ​ສູງ ໂດຍ​ສະເພາະ​ແມ່ນ​ໝາກຜົນ​ການ​ຢ້ຽມຢາມ​ມິດຕະພາບ​ຢ່າງ​ເປັນ​ທາງ​ການ​ຂອງ​ສະ​ຫາຍ ຫງວຽນ ​ຝູ ຈ້ອງ ເລຂາທິການ​ໃຫຍ່ ປະທານ​ປະ​ເທດຫວຽດ​ນາມ​ (ເດືອນ​ກຸມພາ 2019) ແລະ ​ຜົນສຳເລັດ​ຂອງ​ກອງ​ປະຊຸມ​ຄະນະ​ກຳມະການ​ຮ່ວມ​ມື​ລະຫວ່າງ​ລັດຖະບານ​ຄັ້ງ​ທີ 41(ທີ່​ຮ່າ​ໂນ້ຍ, ເດືອນ ກຸມພາ 2019); ປັບປຸງ, ຍົກ​ສູງ​ປະສິດ​ທິ​ຜົນ​ຂອງ​ທຸກໆ​ກົນ​ໄກ​ຮ່ວມ​ມື. ສອງ​ຝ່າຍ​ເປັນ​ເອກະ​ພາບ ສືບຕໍ່​ຊຸກຍູ້​ບັນດາ​ກະຊວງ, ຂະແໜງການ ແລະ ທ້ອງຖິ່ນ​ໃຫ້​ເປີດ​ກວ້າງ​ການ​ຮ່ວມ​ມື​ ໂດຍ​ກົງ, ຊ່ວຍເຫຼືອ​ຊຶ່ງ​ກັນ​ ແລະ​ ກັນຢ່າງ​ທັນ​ການ ​ໃນ​ການ​ພັດທະນາ​ເສດ​ຖະ​ກິດ​-​ສັງຄົມ, ຮັກສາ​ຄວາມ​ສະຫງົບ, ຄວາມ​ມີ​ສະຖຽນ​ລະ​ພາບ​ ແລະ ຄວາມ​ເປັນ​ລະບຽບ​ຮຽບຮ້ອຍ,ແກ້​ໄຂ​ບັນຫາ​ຕ່າງໆ​ທີ່​ເກີດ​ຂຶ້ນ​ຢ່າງ​ທັນ​ການ​ບົນ​ພື້ນຖານ​ມິດຕະພາບ​ແລະ​ຄວາມ​ສາ​ມັກ​ຄີ.

   ສອງ​ຝ່າຍ​ໄດ້​ຢືນຢັນ​ຄືນ​ອີກ​ເທື່ອ​ໜຶ່ງ​ກ່ຽວ​ກັບ​ຄວາມ​ສໍາ​ຄັນ​ຂອງ​ການ​ຮ່ວມ​ມື​ດ້ານ​ການ​ປ້ອງ​ກັນ​ຊາດ, ປ້ອງ​ກັນ​ຄວາມ​ສະຫງົບ, ພະຍາຍາມ​ເປັນ​ບ່ອນ​ອີງ​ທີ່​ແໜ້ນ​ແກ່ນ​ຂອງ​ກັນ ແລະ ກັນ ເພື່ອ​ປະ​ເຊີນ​ໜ້າ​ກັບ​ສິ່ງ​ທ້າ​ທາຍ​ດ້ານ​ຄວາມ​ໝັ້ນຄົງ, ດ້ານ​ປ້ອງ​ກັນ​ຊາດ ຊຶ່ງ​ນັບ​ມື້​ນັບ​ມີ​ຫຼາກ​ຫຼາຍ​ຮູບ​ແບບ ແລະ ສັບ​ສົນ. ເປັນ​ເອກະ​ພາບ​ປະສານ​ສົມທົບ​ໃນ​ການຈັດຕັ້ງ​ປະຕິບັດ​ບັນດາ​ສັນຍາ ແລະ ຂໍ້​ຕົກລົງ​ສອງ​ຝ່າຍ ກ່ຽວ​ກັບ​ເສັ້ນ​ຊາຍ​ແດນ.

   ສອງ​ຝ່າຍ​ຮີບ​ຮ້ອນ​ຈັດຕັ້ງ​ກອງ​ປະຊຸມ​ສະຫຼຸບ ເພື່ອ​ຕີ​ລາຄາ​ໝາກຜົນ​ຂອງ​ການຈັດຕັ້ງ​ປະຕິບັດ​ທົດ​ລອງ​ຮູບ​ແບບ​ການ​ກວດກາ "ຈຸດ​ດຽວ, ຄັ້ງ​ດຽວ" ຢູ່​ດ່ານ​ສາກົນ​ແດນ​ສະຫວັນ (ລາວ) - ລາວ​ບາວ (ຫວຽດນາມ). ພ້ອມ​ທັງ​ຈັດ​ຕັ້ງ​ກອງ​ປະຊຸມ​ສະຫຼຸບ​ຕີ​ລາຄາ​ການ​ປະຕິບັດ​ຂໍ້​ຕົກລົງ​ຂອງ​ສອງ​ລັດຖະບານ​ວ່າ​ດ້ວຍ​ການ​ແກ້​ໄຂ​ຜູ້​ຍົກຍ້າຍ​ຕັ້ງ​ພູມ ລຳເນົາ​ຕາມ​ລຳພັງ​ໃຈ​ ແລະ​ສ້າງ​ຄອບຄົວ​ບໍ່​ຖືກ​ລະບຽບ​ຢູ່​ບໍລິເວນ​ຊາຍ​ແດນ (ລົງ​ນາມ​ວັນ​ທີ 8 ກໍລະກົດ 2013) ພາຍ​ໃນ​ໄຕ​ມາດ 4 ປີ 2019. ສອງ​ຝ່າຍ​ໄດ້​ເປັນ​ເອກະ​ພາບ​ນຳ​ກັນ​ໃນ​ການ​ສ້າງ​ເງື່ອນໄຂ​ສະດວກ​ໃຫ້​ຄົນ​ຫວຽດນາມ​ຢູ່​ລາວ ແລະ ຄົນ​ລາວ​ຢູ່​ຫວຽດນາມ ໄດ້​ດຳລົງ​ຊີວິດ, ທໍາ​ມາ​ຫາ​ກິນ, ສຶກສາ​ຮໍ່າ​ຮຽນ ຖືກຕ້ອງ​ຕາມ​ລະບຽບ​ການ ແລະ ກົດໝາຍ ຂອງ​ແຕ່​ລະ​ປະເທດ ແລະ ຕາມ​ປະເພນີ​ປະຕິບັດ​ຂອງ​ສາ​ກົນ. ສອງ​ຝ່າຍ​ເປັນ​ເອກະ​ພາບ​ປະສານ​ສົມທົບ​ຈັດ​ຕັ້ງ​ບັນດາ​ກິດຈະກຳ​ເພື່ອ​ສະເຫຼີມສະຫຼອງ​ວັນ​ມູນ ເຊື້ອ​ທະຫານ​ອາ​​ສາສະໝັກ ຫວຽດນາມ ແລະ ຊ່ຽວຊານ ຫວຽດນາມ ຊ່ວຍເຫຼືອ​ລາວ ຄົບຮອບ 70 ປີ (30 ຕຸລາ 1949 - 30 ຕຸລາ 2019) ໃຫ້​ປະສົບ​ຜົນ​ສໍາ​ເລັດ ເພື່ອ​ເປັນ​ການ​ຈົດ​ຈໍາ​ຄຸນງາມຄວາມດີ ແລະ ການ​ເສຍສະຫຼະ​ເລືອດ​ເນື້ອ​ຂອງ​ຄົນ​ຮຸ່ນ​ກ່ອນ ແລະ ປະກອບສ່ວນ​ສຶກສາ​ຄົນ​ຮຸ່ນ​ໃໝ່ ກ່ຽວ​ກັບ​ຄວາມ​ສາມັກຄີ​ພິເສດ​ທີ່​ສະໜິດ​ຕິດ​ພັນ​ລະຫວ່າງ​ສອງ​ຊາດ.

   ສອງ​ຝ່າຍ ເປັນ​ເອກະ​ພາບ​ກັນສືບຕໍ່​ຊຸກຍູ້ ແລະ ຍົກ​ສູງ​ປະສິດ​ທິ​ຜົນ​ຂອງ​ການ​ຮ່ວມ​ມື​ດ້ານ​ເສດຖະກິດ, ວັດທະນະທຳ, ວິທະຍາ​ສາດ​-​ເຕັກ​ໂນ​ໂລ​ຊີ ບົນ​ພື້ນຖານ​ເສີມ​ຂະຫຍາຍ​ທ່າແຮງ​ບົ່ມ​ຊ້ອນ​ຂອງ​ແຕ່​ລະ​ປະເທດ; ຊຸກຍູ້​ການ​ຜັນ​ຂະຫຍາຍ​ບັນດາ​ຂໍ້​ຕົກລົງ ແລະ ການ​ຕົກລົງ​ຂອງ​ການ​ນຳ​ຂັ້ນ​ສູງ, ເອກະສານ, ແຜນການ​ຮ່ວມ​ມື ລະຫວ່າງ​ສອງ​ລັດຖະບານ, ເອົາໃຈໃສ່​ຈັດ​ຕັ້ງ​ປະຕິບັດ ແລະ ມີ​ມາດ​ຕະການ​ ເພື່ອ​ຮັບປະກັນ​ຄວາມ​ຄືບ​ໜ້າ ແລະ ຄຸນ​ນະ​ພາບ ຂອງ​ບັນດາ​ໂຄງການ​ລົງທຶນ ຂອງ​ຫວຽດນາມ ຢູ່​ລາວ ກໍຄືຂອງ​ລາວ ຢູ່​ຫວຽດນາມ ແລະ ໂຄງການ​ຮ່ວມ​ມື​ສອງ​ຝ່າຍ​ອື່ນໆ ໂດຍ​ສະເພາະ​ແມ່ນ ບົດ​ບັນທຶກ​ລະຫວ່າງ ລັດຖະບານ​ລາວ ແລະ ລັດຖະບານ​ຫວຽດນາມ ກ່ຽວ​ກັບ​ການ​ຮ່ວມ​ມື​ພັດທະນາ​ບັນດາ​ໂຄງການ​ເຂື່ອນ​ໄຟຟ້າ ຢູ່​ລາວ, ການ​ເຊື່ອມ​ຕໍ່​ລະບົບ​ສາຍ​ສົ່ງ​ໄຟຟ້າ ແລະ ການ​ຊື້​-​ຂາຍ​ໄຟຟ້າ ຄັ້ງ​ວັນ​ທີ 5 ຕຸລາ 2016.

   ສອງ​ຝ່າຍ​ຕີ​ລາຄາ​ສູງ​ຕໍ່​ການ​ຮ່ວມ​ມື​ຢ່າງ​ຕັ້ງໜ້າ​ດ້ານ​ການ​ຄ້າ​ສອງ​ຝ່າຍ​ໃນ​ໄລຍະ​ຜ່ານ​ມາ; ເປັນ​ເອກະ​ພາບ​ເອົາໃຈໃສ່​ຊຸກຍູ້, ເປີດ​ກວ້າງ ແລະ ຍົກ​ສູງ​ປະສິດທິພາບ​ການ​ຮ່ວມ​ມື, ສູ້​ຊົນ​ເຮັດ​ໃຫ້​ມູນ​ຄ່າ​ການ​ຄ້າ​ຂະຫຍາຍ​ຕົວ​ຢ່າງ​ສະ​ໝໍ່າສະເໝີ ໃນ​ລະດັບ 10%-15% ຕໍ່​ປີ ຕາມ​ແຜນການ​ທີ່​ວາງ​ໄວ້; ເປີດ​ກວ້າງ ແລະ ສົ່ງເສີມ​ກິດ​ຈະ​ກໍາ​ການ​ຄ້າ​ດ້ວຍ​ຫຼາກ​ຫຼາຍ​ຮູບ​ແບບ; ຊຸກຍູ້​ການ​ຮ່າງ ແລະ ລົງ​ນາມ ໃນ​ບົດ​ບັນທຶກ ຂໍ້​ຕົກລົງ ວ່າ​ດ້ວຍ​ການ​ພັດທະນາ ແລະ ການ​ເຊື່ອມ​ໂຍງ​ໂຄງ​ລ່າງ​ພື້ນຖານ​ການ​ຄ້າ​ຊາຍ​ແດນ. ສະຫາຍ ທອງ​ລຸນ ສີ​ສຸ​ລິດ, ເປັນ​ເອກະ​ພາບ​ໃນ​ການ​ຈັດ​ກອງ​ປະຊຸມ​ພົບ​ປະ​ກັບ​ບັນດາ​ວິ​ສາ​ຫະ​ກິດ​ຫວຽດນາມ​ຄັ້ງ​ທີ 2 ໃນ​ປີ 2019 ຢູ່​ລາວ ແລະ ສະເໜີ​ໃຫ້​ພາກ​ທຸລະ​ກິດ​ຂອງ​ຫວຽດນາມ ໂດຍ​ສະເພາະ​ແມ່ນ​ບັນດາ​ທຸລະ​ກິດ​ຂະໜາດ​ໃຫຍ່ ແລະ ມີ​ທ່າແຮງ​ເອົາໃຈໃສ່​ເຂົ້າ​ຮ່ວມ.

   ສອງ​ຝ່າຍ​ຢືນຢັນ​ຄືນ​ເຖິງ​ຄວາມ​ສໍາ​ຄັນ​ຂອງ​ການ​ເຊື່ອມ​ຈອດ​ສອງ​ພື້ນຖານ​ເສດຖະກິດ ໂດຍ​ສະເພາະ​ແມ່ນ​ເຊື່ອມ​ຈອດ​ທາງ​ດ້ານ​ລະບຽບ​ກົນ​ໄກ​ຕ່າງໆ, ພື້ນຖານ​ໂຄງ​ລ່າງ​ຄົມມະນາຄົມ, ພະ​ລັງ​ງານ, ໂທລະ​ຄົມ, ທ່ອງ​ທ່ຽວ ແລະ ຈັດ​ຕັ້ງ​ຜັນ​ຂະຫຍາຍ​ບັນດາ​ໂຄງການ​ຮ່ວມ​ມື​ທີ່​ສຳຄັນ​ຢ່າງ​ມີ​ໝາກຜົນ, ໃຫ້​ບຸລິມະສິດ​ແກ່​ບັນດາ​ໂຄງການ​ຄົມ​ມະ​ນາ​ຄົມ​-​ຂົນສົ່ງ, ໃນ​ນັ້ນ​ມີ​ການ​ເຊື່ອມ​ຈອດ​ທາງ​ອາກາດ ແລະ ບັນດາ​ເສັ້ນທາງ​ຄົມມະນາຄົມ​ຕາມ​ແລວ​ເສດຖະກິດ​ຕາເວັນ​ອອກ​-​ຕາເວັນຕົກ (EWEC) ແລະ ​ເຊື່ອມ​ຕໍ່​ລົດ​ໂດຍສານ​ຫວຽດນາມ​-​ລາວ​-​ໄທ. ເປັນ​ເອກະ​ພາບ ກັນ​ມອບ​ໃຫ້​ບັນດາ​ກະຊວງ, ຂະແໜງການ ແລະ ທ້ອງຖິ່ນ ທີ່​ກ່ຽວຂ້ອງ​ຮີບ​ຮ້ອນ​ກວດກາ​ຄືນ, ລາຍ​ງານ​ການ​ນຳ​ຂັ້ນ​ສູງ ກ່ຽວ​ກັບ​ຄວາມ​ຄືບ​ໜ້າ ແລະ ຄຸນ​ນະ​ພາບ​ຂອງ​ບັນດາ​ໂຄງການ​ລົງທຶນ​ຂອງ​ຫວຽດນາມ​ຢູ່ ລາວ, ແກ້​ໄຂ​ຢ່າງ​ທັນ​ການ​ບັນດາ​ຂໍ້ຄົງຄ້າງ​ທີ່​ເກີດ​ຂຶ້ນ, ບໍ່​ປະ​ປ່ອຍ​ໃຫ້​ເກີດ​ຄວາມ​ຫຼ້າ​ຊ້າ​ທຽບໃສ່​ແຜນ​ການ.

   ສອງ​ຝ່າຍ ເປັນ​ເອກະ​ພາບ​ປະສານ​ສົມທົບ​ຊຸກ​ຍູ້​ການ​ຮ່ວມ​ມື ໃນ​ຂອບ​ສາມຫຼ່ຽມ​ພັດທະນາ ກໍາ​ປູ​ເຈຍ​-​ລາວ​-​ຫວຽດນາມ ແລະ ຈັດ​ຕັ້ງ​ຜັນ​ຂະຫຍາຍ​ຢ່າງ​ມີ​ໝາກຜົນ​ແຜນ​ປະຕິບັດ​ງານ​ການ​ເຊື່ອມ​ຈອດ​ເສດ​ຖະ​ກິດ​ກໍາ​ປູ​ເຈຍ​-​ລາວ​-​ຫວຽດນາມ ຮອດ​ປີ 2030 ຊຶ່ງ​ການ​ນໍາ​ຂອງ​ສາມ​ປະເທດ​ໄດ້​ຮັບຮອງ​ຢູ່​ກອງ​ປະຊຸມ​ສຸດ​ຍອດ CLV ຄັ້ງ​ທີ 10 (ທີ່​ຮ່າ​ໂນ້ຍ, ເດືອນ 3/2018).

   ສອງ​ຝ່າຍ​ໄດ້​ເອົາໃຈໃສ່​ເປັນ​ພິເສດ ຕໍ່​ການ​ຮ່ວມ​ມື​ດ້ານ​ການ​ສຶກສາ​-​ກໍ່ສ້າງ​ ແລະ ພັດທະນາ​ຊັບພະຍາກອນ​ມະນຸດ, ເປັນ​ເອກະ​ພາບ​ສືບຕໍ່​ປະສານ​ສົມທົບ​ໃນ​ການຈັດຕັ້ງ​ຜັນ​ຂະຫຍາຍ​ໝາກຜົນ​ຂອງ​ບັນດາ​ຂໍ້​ຕົກລົງ ກ່ຽວ​ກັບ​ການ​ຮ່ວມ​ມື​ດ້ານ​ການ​ສຶກສາ ແລະ ກໍ່ສ້າງ; ເປີດ​ກວ້າງ​ບັນດາ​ຂົງເຂດ​ການ​ຮ່ວມ​ມື​ພັດທະນາ​ຊັບພະຍາກອນ​ມະນຸດ, ໃນ​ນັ້ນ ເອົາໃຈໃສ່​ກໍ່ສ້າງ​ຊັບ ພະຍາກອນ​ມະນຸດ​ທີ່​ມີ​ຄຸນ​ນະ​ພາບ​ສູງ ໂດຍ​ສະເພາະ​ຢູ່​ບັນດາ​ຂະແໜງການ​ປາຍ​ແຫຼມ ເພື່ອ​ນໍາ​ທັນ​ການ​ພັດທະນາ​ຂອງ​ການ​ປະຕິວັດ​ອຸດສາຫະກຳ​ຄັ້ງ​ທີ​ສີ່.

   ສອງ​ຝ່າຍ​ໄດ້​ຕີ​ລາຄາ​ສູງ​ຕໍ່​ປະສິດທິພາບຂອງ​ ການເຄື່ອນໄຫວ​ໂຄສະນາ, ແລກປ່ຽນ​ສິ​ລະ​ປະ​-​ວັນນະ ຄະດີ, ສົ່ງເສີມ​ການທ່ອງ ທ່ຽວ ນັບ​ທັງ​ຂັ້ນ​ສູນກາງ ແລະ ທ້ອງຖິ່ນ; ເປັນ​ເອກະ​ພາບ​ໃນ​ການ​ເພີ່ມ​ທະວີ​ການ​ເຊື່ອມ​ຕໍ່​ຜະລິດ​ຕະ​ພັນ​ການທ່ອງທ່ຽວ, ໂດຍ​ສະເພາະ​ລະຫວ່າງ​ບັນດາ​ແຂວງ​ຊາຍ​ແດນ​ຢູ່​ພາກ​ໃຕ້​ຂອງ​ລາວ ແລະ ພາກ​ກາງຂອງ​ຫວຽດນາມ; ຕັ້ງໜ້າ​ເຂົ້າ​ຮ່ວມ​ບັນດາ​ກິດຈະກຳ​ທ່ອງ​ທ່ຽວ​ສາກົນ​ທີ່​ຈັດ​ຂຶ້ນ​ຢູ່​ສອງ​ປະ​ເທດ. ສອງ​ຝ່າຍ​ເນັ້ນ​ໜັກ​ເພີ່ມ​ທະວີ​ການ​ແລກປ່ຽນ​ຂໍ້​ມູນ​ຂ່າວສານ ໃນ​ການຈັດຕັ້ງ​ປະຕິບັດ​ສັນຍາ​ວ່າ​ດ້ວຍ​ການ​ຮ່ວມ​ມື​ດ້ານ​ແຮງ​ງານ​ລາວ​-​ຫວຽດນາມ. ຝ່າຍ​ລາວ​ຈະ​ສືບຕໍ່​ພິຈາລະນາ​ຢ່າງ​ເອົາໃຈໃສ່​ໃນ​ການ​ສ້າງ​ເງື່ອນໄຂ​ອຳນວຍ​ຄວາມ​ສະດວກ​ໃຫ້​ແກ່​ການ​ດຳເນີນ​ເອກະສານ ແລະ ການ​ເກັບ​ຄ່າ​ທຳນຽມ​ຕ່າງໆ ທີ່​ກ່ຽວ​ພັນ​ເຖິງ​ການ​ຂໍອະນຸຍາດ​ໃຫ້​ແກ່​ແຮງ​ງານ​ຂອງ​ຫວຽດນາມ, ໂດຍ​ສະເພາະ​ແມ່ນ​ແຮງ​ງານ ທີ່​ເຮັດ​ວຽກ​ຢູ່​ບັນດາ​ໂຄງການ​ສຳຄັນ ທີ່​ພົວພັນ​ໂດຍ​ກົງ​ກັບ​ການ​ພົວພັນ​ຂອງ​ສອງ​ປະ​ເທດ.

   ສອງ​ຝ່າຍ​ເປັນ​ເອກະ​ພາບ​ແລກປ່ຽນ​ຂໍ້​ມູນ​ຂ່າວສານ​ຢ່າງ​ທັນ​ການ ແລະ ປະສານ​ສົມທົບ​ກັນ​ຢ່າງ​ແໜ້ນ​ແຟ້ນ ກັບ​ປະເທດ​ອື່ນໆ ກໍຄືບັນດາ​ອົງການ​ຈັດ​ຕັ້ງ​ສາກົນ​ທີ່​ກ່ຽວຂ້ອງ ເພື່ອ​ຮັບປະກັນ​ການ​ຄຸ້ມ​ຄອງ ແລະ ນໍາ​ໃຊ້​ແມ່​ນໍ້າ​ຂອງ​ຢ່າງ​ຍືນ​ຍົງ ເພື່ອ​ຜົນ​ປະໂຫຍດ​ລວມ​ຂອງ​ປະຊາຊົນ​ບັນດາ​ປະເທດ​ລຸ່ມ​ແມ່ນ້ຳ​ຂອງ; ສືບຕໍ່​ປະສານ​ສົມທົບ​ຢ່າງ​ມີ​ປະສິດ​ທິ​ຜົນ ແລະ ຊ່ວຍເຫຼືອ​ຊຶ່ງ​ກັນ ແລະ ກັນ ໃນ​ຂອບ​ກົນ​ໄກ​ຮ່ວມ​ມື​ລະດັບ​ພາກ​ພື້ນ ແລະ ສາກົນ ໂດຍ​ສະເພາະ​ໃນ​ຂອບ​ອາ​ຊຽນ, ອົງການ​ສະຫະ​ປະຊາຊາດ, ອົງການ​ການ​ຄ້າ​ໂລກ, ອາ​ເຊັມ, ຂະບວນ​ການ​ບໍ່​ຮ່ວມ​ກຸ່ມ ແລະ ກົນ​ໄກ​ຮ່ວມ​ມື​ອະນຸ​ພາກ​ພື້ນ​ແມ່​ນໍ້າ​ຂອງ ໃນ​ນັ້ນ​ແມ່ນ​ໃນ​ຂອບ​ຂອງ​ຄະນະ​ກຳມະການ​ແມ່​ນໍ້າ​ຂອງ​ສາ​ກົນ. ສອງ​ຝ່າຍ​ຢືນຢັນ​ໃຫ້​ຄຳ​ໝັ້ນ​ສັນຍາ​ວ່າ​ຈະ​ພະຍາຍາມ​ຮ່ວມ​ກັບ​ບັນດາ​ປະເທດ​ສະມາຊິກ​ສ້າງ​ປະຊາ​ຄົມ ອາ​ຊຽນ​ໃຫ້​ເຂັ້ມແຂງ, ອີງໃສ່​ກົດໝາຍ, ຄວາມ​ສາມັກຄີ, ເອກະ​ພາບ, ຖື​ປະຊາຊົນ​ເປັນໃຈ​ກາງ​ ແລະ​ເສີມ​ຂະຫຍາຍ​ບົດບາດ​ເປັນ​ແກນ​ກາງຂອງ​ອາ​ຊຽນ ໃນ​ໂຄງ​ສ້າງ​ຂອງ​ພາກ​ພື້ນ​ໃຫ້​ເປັນ​ຮູບ​ປະ​ທຳ. ລາວ ຢືນຢັນ​ຈະ​ໃຫ້ການ​ສະໜັບສະໜູນ ແລະ ປະສານ​ສົມທົບ​ຢ່າງ​ແໜ້ນ​ແຟ້ນ​ໃນ​ເວລາ​ທີ່​ຫວຽດນາມ​ເປັນ​ປະທານ​ອາ​ຊຽນ​ໃນ​ປີ 2020 ແລະ ເປັນ​ສະມາຊິກ​ບໍ່​ຖາວອນ​ສະພາ​ຄວາມ​ໝັ້ນຄົງ​ແຫ່ງ​ສະຫະ​ປະຊາຊາດ ໃນ​ໄລຍະ 2020-2021. ສອງ​ຝ່າຍ​ໃຫ້​ຄຳ​ໝັ້ນ​ສັນຍາ ຈະ​ເພີ່ມ​ທະວີ​ການ​ຮ່ວມ​ມື, ສະໜັບສະໜູນ​ຊຶ່ງ​ກັນ ແລະ ກັນ ເພື່ອ​ຍູ້​ແຮງ​ການ​ເຊື່ອມ​ໂຍງ​ສາກົນ​ຢ່າງຮອບດ້ານ ແລະ ເລິກເຊິ່ງ ເພື່ອ​ຜົນ​ປະໂຫຍດ​ຂອງ​ປະຊາຊົນ​ສອງ​ຊາດ.

   ສອງ​ຝ່າຍ​ເປັນ​ເອກະ​ພາບ​ກັນ​ປະສານ​ສົມທົບ​ຢ່າງ​ໃກ້ຊິດ ກັບ​ບັນດາ​ປະເທດ​ທີ່​ກ່ຽວຂ້ອງ ເພື່ອ​ຊຸກຍູ້​ການ​ເຈລະຈາ​ສັນຍາ​ຄູ່​ຮ່ວມ​ເສດຖະກິດ​ຮອບດ້ານ​ຢູ່​ພາກ​ພື້ນ (RCEP) ໃຫ້​ສຳເລັດ​ໂດຍ​ພື້ນຖານ​ໃນ​ປີ 2019, ໂດຍ​ຮັບປະກັນ ມີ​ລັກສະນະ​ຮອບດ້ານ, ຄວາມ​ດຸ່ນ​ດ່ຽງ​ທາງ​ດ້ານ​ຜົນ​ປະໂຫຍດ ແລະ ຄວາມ​ແຕກ​ໂຕນ​ກັນ​ດ້ານ​ການ​ພັດທະນາ ລະຫວ່າງບັນດາ​ປະເທດ​ສະ​ມາ​ຊິກ.

   ສອງ​ຝ່າຍ​ຢືນຢັນ​ຄືນ​ເຖິງ​ຄວາມ​ສຳຄັນ​ຂອງ​ການ​ສືບຕໍ່​ປົກ​ປັກ​ຮັກສາ​ສັນຕິພາບ, ສະຖຽນ​ລະ​ພາບ, ເຄົາລົບ​ກົດໝາຍ, ຄວາມ​ໝັ້ນຄົງ, ຮັບປະກັນ​ຄວາມ​ປອດ​ໄພ, ເສລີພາບ​ຂອງ​ການ​ເດີນ​ເຮືອ ແລະ ການບິນ​ຜ່ານ ຢູ່​ທະເລ​ຈີນ​ໃຕ້; ແກ້​ໄຂ​ຂໍ້​ຂັດ​ແຍ່ງ​ຕ່າງໆ ຢູ່​ທະເລ​ຈີນ​ໃຕ້ ໂດຍ​ສັນຕິວິ ທີ, ບົນ​ພື້ນຖານ​ກົດໝາຍ​ສາ ກົນ, ລວມ​ທັງ​ສົນທິສັນຍາ​ຂອງ​ສະຫະ​ປະຊາຊາດ​ ວ່າ​ດ້ວຍ​ກົດໝາຍ​ທະເລ​ປີ 1982 (UNCLOS 1982). ສອງ​ຝ່າຍ​ຢືນຢັນ​ຄືນ​ບັນດາ​ຈຸດ​ຢືນ​ທີ່​ເປັນ​ຫຼັກການ​ຂອງ​ອາ​ຊຽນ ກ່ຽວ​ກັບ​ບັນຫາ​ທະເລ​ຈີນ​ໃຕ້ ທີ່​ລະບຸ​ຢູ່​ໃນ​ຖະແຫຼງການ ຂອງ​ອາ​ຊຽນ ໄລຍະ​ຫຼັງ​ນີ້ ໂດຍ​ສະເພາະ​ແມ່ນ​ຖະແຫຼງການ​ຮ່ວມ​ຂອງ​ກອງ​ປະຊຸມ​ສຸດ​ຍອດ ລັດຖະມົນຕີ​ຕ່າງປະເທດ​ອາ​ຊຽນ ຄັ້ງ​ທີ 52 (AMM 52) ທີ່​ບາງກອກ ປະ​ເທດ​ໄທ ເດືອນ​ກໍລະກົດ 2019.

   ສອງ​ຝ່າຍ​ຕີ​ລາຄາ​ສູງ​ຕໍ່​ໝາກຜົນ​ອັນ​ຈົບງາມ ແລະ ຄວາມ​ໝາຍ​ອັນ​ເລິກເຊິ່ງ ຂອງ​ການ​ຢ້ຽມຢາມຢ່າງ​ເປັນ​ທາງ​ການ ສາທາລະນະ​ລັດ ສັງຄົມ​ນິຍົມ ຫວຽດນາມ ຂອງ​ນາຍົກລັດຖະມົນຕີ ແຫ່ງ​ສາທາລະນະ​ລັດ ປະ ຊາທິປະໄຕ ປະຊາຊົນ​ລາວ, ອັນ​ເປັນ​ການ​ປະກອບສ່ວນ​ເຮັດ​ໃຫ້​ສາຍ​ພົວພັນ​ມິດຕະພາບ​ທີ່​ຍິ່ງ​ໃຫຍ່, ຄວາມ​ສາມັກຄີ​ພິເສດ ແລະ ການ​ຮ່ວມ​ມືຮອບດ້ານ ຫວຽດນາມ​-​ລາວ ນັບ​ມື້​ນັບ​ໄດ້​ຮັບ​ການ​ພັດທະນາ ເຂົ້າ​ສູ່​ລວງ​ເລິກ, ແທດເໝາະ​ກັບ​ຕົວ​ຈິງ ແລະ ມີ​ປະສິດ​ທິ​ຜົນ, ຕອບ​ສະໜອງ​ຄວາມ​ມຸ່ງ​ມາດ​ປາຖະໜາ​ຂອງ​ປະຊາຊົນ​ສອງ​ຊາດ ເພື່ອ​ສັນຕິພາບ, ສະຖຽນ​ລະ​ພາບ, ການ​ຮ່ວມ​ມື ແລະ ພັດທະນາ ຢູ່​ໃນ​ພາກ​ພື້ນ ແລະ ສາ​ກົນ.

   ສະ​ຫາຍ ທອງ​ລຸນ ສີ​ສຸ​ລິດ ສະແດງ​ຄວາມ​ຂອບໃຈ​ຢ່າງ​ຈິງ​ໃຈ ຕໍ່​ການ​ຕ້ອນຮັບ​ຢ່າງ​ສົມ​ກຽດ​ດ້ວຍ​ໄມຕີ​ຈິດ​ມິດຕະພາບ​ຖານ​ສະຫາຍ​ອ້າຍ​ນ້ອງ ຂອງ​ພັກ, ລັດຖະບານ ແລະ ປະຊາຊົນ ຫວຽດນາມ ທີ່​ມີ​ຕໍ່​ຄະນະ ແລະ ສົ່ງ​ຄວາມ​ຢື້​ຢາມ​ຖາມ​ຂ່າວ​ຂອງ ສະຫາຍ ບຸນ​ຍັງ ວໍລະ​ຈິດ ເລຂາທິການ​ໃຫຍ່ ປະທານ​ປະເທດ, ສະຫາຍ ນາງ ປານີ ຢາ​ທໍ່​ຕູ້ ປະທານ​ສະພາ​ແຫ່ງ​ຊາດ ເຖິງ ສະຫາຍ ຫ​ງວຽນ ຝູ ຈ້ອງ ເລຂາທິການ​ໃຫຍ່ ປະທານ​ປະເທດ, ສະ​ຫາຍ​ ນາງ ຫ​ງວຽນ ທິ ກິມ ເງິນ ປະທານ​ສະພາ​ແຫ່ງ​ຊາດ ແລະ ໄດ້​ເຊື້້ອ​ເຊີນ ສະຫາຍ ຫ​ງວຽນ ຊວັນ ຟຸກ ນາຍົກລັດຖະມົນຕີ ແຫ່ງ ສສ ຫວຽດນາມ ແລະ ພັນ​ລະ​ຍາ ຢ້ຽມຢາມ​ລາວ ຢ່າງ​ເປັນ​ທາງ​ການ ໃນ​ເວລາ​ທີ່​ເໝາະ​ສົມ ​ແລະ ສະ​ຫາຍ ຫ​ງວຽນ ຊວັນ ຟຸກ ໄດ້​ຕອບ​ຮັບ​ຄຳ​ເຊີນ​ດ້ວຍ​ຄວາມ​ຍິນ​ດີ.
(ຂ່າວ: ກະ​ຊວງ​ການ​ຕ່າງ​ປະ​ເທດ)