ຄະ­ນະ​ຜູ້​ແທນ​ຂັ້ນ​ສູງ​ກະ­ຊວງ ຖວທ ສຳ­ເລັດການ​ເຂົ້າ​ຮ່ວມ​ກອງ​ປະ­ຊຸມ​ລັດ­ຖະ­ມົນ­ຕີ​ສິ­ລະ​ປະວັດ­ທະ­ນະ­ທຳ​ອາ​ຊຽ​ນ-ສ.ເກົາ­ຫຼີ

28.10.2019 9:00     

   ກອງ​ປະຊຸມ​ລັດຖະມົນຕີ​ສິລະ​ປະວັດ​ທະ​ນະ​ທໍາ​ອາ​ຊຽນ -ສ.ເກົາຫຼີ ວາລະ​ພິເສດ ປະ​ຈໍາ​ປີ 2019 ໄດ້​ຈັດ​ຂຶ້ນ​ໃນ​ວັນ​ທີ 24 ຕຸລາ​ຜ່ານ​ມາ ທີ່ ສ.ເກົາຫຼີ ໂດຍ​ການ​ເປັນ​ເຈົ້າພາບ​ຂອງ​ກະຊວງ​ວັດ​ທະ​ນະ​ທໍາ, ກິລາ ແລະ ທ່ອງ​ທ່ຽວ ສ.ເກົາຫຼີ ຊຶ່ງ​ມີ​ບັນດາ​ປະເທດ​ສະມາຊິກ​ອາ​ຊຽນ, ກອງ​ເລຂາ​ອາ​ຊຽນ ແລະ ປະເທດ​ເຈົ້າພາບ​ເຂົ້າ​ຮ່ວມ.

   ກອງ​ປະຊຸມ​ຄັ້ງ​ນີ້, ແມ່ນ​ກະກຽມ​ໃຫ້​ກອງ​ປະຊຸມ​ສຸດ​ຍອດ​ອາ​ຊຽ​ນ-ສ.ເກົາຫຼີ ທີິ່​ຈະ​ມີ​ຂຶ້ນ​ໃນ​ເດືອນ​ພະຈິກ 2019 ນີ້, ຄະນະ​ຜູ້​ແທນ​ຝ່າຍ​ລາວ ນໍາ​ໂດຍ ທ່ານ ບໍ່​ແສງ​ຄໍາ ວົງ​ດາລາ ລັດຖະມົນຕີ​ກະຊວງ ຖະແຫຼງ​ຂ່າວ, ວັດ​ທະ​ນະ​ທໍາ ແລະ ທ່ອງ​ທ່ຽວ (ຖວທ) ພ້ອມ​ດ້ວຍ​ຄະນະ ເດີນທາງ​ເຂົ້າ​ຮ່ວມ​ກອງ​ປະຊຸມ​ດັ່ງກ່າວ ເພື່ອ​ປຶກສາ​ຫາລື ແລະ ພິຈາລະນາ​ບັນດາ​ກິດ​ຈະ​ກໍາ​ໂຄງການ​ຮ່ວມ​ມື ໃນ​ຂົງເຂດ​ວຽກ​ງານ​ສິລະ​ປະວັດ​ທະ​ນະ​ທໍາ​ລະຫວ່າງ​ອາ​ຊຽ​ນ-ສ.ເກົາຫຼີ ເພື່ອ​ພ້ອມ​ກັນ​ອະນຸລັກ, ປົກ​ປັກ​ຮັກສາ ແລະ ໂຄສະນາ​ສົ່ງເສີມ ລວມ​ທັງ​ການ​ເຜີຍແຜ່​ສິລະ​ປະວັດ​ທະ​ນະ​ທໍາ​ທີ່​ມີ​ຄວາມ​ຫຼາກ​ຫຼາຍ ແລະ ເປັນ​ເອກະລັກ​ຂອງ​ແຕ່​ລະ​ປະເທດ ອອກ​ສູ່​ເວທີ​ສາກົນ​ໃຫ້​ນັບ​ມື້​ກວ້າງຂວາງ, ທັງ​ເປັນ​ການ​ເສີມ​ສ້າງ​ຄວາມ​ເຂົ້າໃຈ ແລະ ຊຸກຍູ້​ສົ່ງເສີມ​ການ​ໄປມາຫາສູ່​ລະຫວ່າງ​ປະຊາຊົນ​ອາ​ຊຽນ ແລະ ສ.ເກົາຫຼີ​ ດ້ວຍ​ກັນ, ປະກອບສ່ວນ​ຮັດ​ແໜ້ນ​ຄວາມ​ສາມັກຄີ​ອັນ​ດີງາມ​ໃຫ້​ນັບ​ມື້​ດີ​ຂຶ້ນ ພ້ອມ​ທັງ​ສະເຫຼີມສະຫຼອງ ຄົບຮອບ 30 ປີ ການ​ຮ່ວມ​ມື​ອາ​ຊຽ​ນ-ສ.ເກົາຫຼີ ໃນ​ຖານະ​ເປັນ​ຄູ່​ຮ່ວມ​ເຈລະຈາ​ໃຫ້​ມີ​ບັນຍາກາດ​ຟົດ​ຟື້ນ​ຍິິ່ງ​ຂຶ້ນ. ໃນ​ວາ​ລະ​ດໍາ​ເນີນ​ກອງ​ປະຊຸມ​ຄັ້ງ​ນີ້, ຄະນະ​ຜູ້​ແທນ​ຝ່າຍ​ລາວ​ໄດ້​ສະແດງ​ຄວາມ​ຂອບໃຈ​ມາ​ຍັງ​ລັດຖະບານ ສ.ເກົາຫຼີ​ໂດຍ​ສະເພາະ​ກະຊວງ​ວັດ​ທະ​ນະ​ທໍາ, ກິລາ ແລະ ທ່ອງ​ທ່ຽວ ພ້ອມ​ທັງ​ຕີ​ລາຄາ​ສູງ​ຕໍ່​ການ ສະໜັບສະໜູນ​ຊ່ວຍເຫຼືອ​ປະເທດ​ລາວ​ໃນ​ຫຼາຍ​ດ້ານ​ໃນ​ໄລຍະ​ຜ່ານ​ມາ​ເວົ້າ​ລວມ, ເວົ້າ​ສະເພາະ​ແມ່ນ​ດ້ານ ສິລະ​ປະວັດ​ທະ​ນະ​ທໍາ​ເຊັ່ນ: ໂຄງການ​ປະຕິສັງຂອນ​ໂຮງ​ນາງ​ ສີດາ ​ທີ່​ວັດ​ພູ​ຈໍາ​ປາ​ສັກ, ການ​ຈັດ​ງານ​ສະແດງ​ໜ້າ​ກາກ​ສາກົນ​ຮ່ວມ​ກັນ ທີ່​ນະຄອນຫຼວງ​ວຽງ​ຈັນ, ການ​ມີ​ສ່ວນ​ຮ່ວມ​ໃນ​ການສະແດງ​ຄອນເສີດ​ດົນຕີ​ພື້ນເມືອງ​ອາຊີ ຕະຫຼອດ​ຮອດ​ການ​ຈັດ​ສໍາ​ມະ​ນາ​ດ້ານ​ວິຊາ​ການ ເພື່ອ​ຍົກ​ລະດັບ​ຂີດ​ຄວາມ​ສາມາດ​ໃຫ້​ບຸກ​ຄະລາ​ກອນ​ແກ່ ສປປ ລາວ ກໍ​ຄື​ອາ​ຊຽນ​ດ້ວຍ​ກັນ ຖື​ວ່າ​ເປັນ​ໝາກຜົນ​ອັນ​ໜຶ່ງ​ທີິ່ ສປປ ລາວ​ໄດ້​ປະກອບສ່ວນ​ດ້ວຍ​ຄວາມເອົາໃຈໃສ່​ຢ່າງ​ມີ​ຮູບ​ປະ​ທໍາ. ຕໍ່​ມາ​ຕອນ​ບ່າຍ​ຂອງ​ວັນ​ດຽວ​ກັນ​ນີ້, ຄະນະ​ຜູ້​ແທນ​ຝ່າຍ​ລາວ ໄດ້​ມີ​ໂອກາດ​ພົບ​ປະ​ສອງ​ຝ່າຍ​ຮ່ວມ​ກັບ​ສ.ເກົາຫຼີ ເພື່ອ​ພ້ອມ​ກັນ​ທົບ​ທວນຄືນ​ໝາກຜົນ​ການ​ຮ່ວມ​ມື​ຂອງ ສອງ​ຝ່າຍ​ໃນ​ຂົງເຂດ​ວັດ​ທະ​ນະ​ທໍາ ແລະ ທ່ອງ​ທ່ຽວ​ໃນ​ໄລຍະ​ຜ່ານ​ມາ ແລະ ປຶກສາ​ຫາລື​ ເພື່ອ​ສືບ​ຕໍ່​ແຜນການ​ຮ່ວມ​ມື​ຮ່ວມ​ກັນ​ໃນຕໍ່ໜ້າ ຊຶ່ງ​ໃນ​ນັ້ນ, ສອງ​ຝ່າຍ​ຈະ​ສົມທົບ​ກັນ​ຕື່ມ ພະຍາຍາມ​ໂຄສະນາ​ກະຕຸກ​ຊຸກຍູ້​ໃຫ້​ນັກ​ທ່ອງ​ທ່ຽວ​ສອງ​ປະເທດ​ໄປມາຫາສູ່​ກັນ​ໃຫ້​ນັບ​ມື້​ນັບ​ຫຼາຍ​ຂຶ້ນ​ກວ່າ​ເກົ່າ​ໂດຍ ສະເພາະ​ນັກ​ທ່ອງ​ທ່ຽວ​ເກົາຫຼີ​ໃຫ້​ມາ​ທ່ຽວ​ລາວ​ໃຫ້​ຫຼາຍ​ຂຶ້ນ.