ເປີດ​ຊຸດ​ຝຶກ​ອົບ­ຮົມ ຊ່ວຍ​ຍົກ​ສູງ​ຄວາມ​ສາ­ມາດ​ຂອງ​ສື່​ມວນ​ຊົນ​ລາວ

29.10.2019 8:53     

   ໃນ​ຍຸກ​ໂລກາ​ພິ​ວັດ ແລະ ການ​ຫັນ​ເປັນ​ທັນ​ສະໄໝ ​ໃນ​ຍຸກ​ຂໍ້​ມູນ​ຂ່າວສານ, ສື່​ມວນ​ຊົນ ຈໍາ​ເປັນ​ຕ້ອງ​ມີ​ການ​ພັດທະນາ​ເຕັກນິກ​ວິຊາ​ການ​ໃໝ່ ເພື່ອ​ຕອບ​ສະໜອງ ແລະ ກະ​ຕຸ້ນ​ໃຫ້​ຜູ້​ບໍລິໂພກ​ຂໍ້​ມູນ​ຂ່າວສານ ໄດ້​ມີ​ທາງ​ເລືອກ​ທີ່​ຫຼາຍ​ຂຶ້ນ, ເພື່ອ​ຄົ້ນຄວ້າ​ສະພາບ​ການ​ໃໝ່, ບັນຫາ​ໃໝ່ ທີ່​ສື່​ມວນ​ຊົນ​ເຮົາ​ກໍາ​ລັງ​ປະ​ເຊີນ, ຊອກ​ຫາ​ເຕັກນິກ​ປະດິດ​ສ້າງ​ໃໝ່. ເພື່ອ​ຮ່ວມ​ກັນ​ພັດທະນາ​ວຽກ​ງານ​ດັ່ງກ່າວ ລະຫວ່າງ ສປ ຈີນ ແລະ ສປປ ລາວ, ກະ ຊວງ​ການ​ຄ້າ ສປ ຈີນ ໄດ້​ເປັນເຈົ້າພາບ​ຈັດ​ຊຸດ​ຝຶກ​ອົບຮົມ ພາຍ​ໃຕ້​ຫົວຂໍ້: "ວຽກ​ງານ​ສື່​ມວນ​ຊົນ, ສື່​ໂຄສະນາ ແລະ ການ​ນໍາ​ໃຊ້​ເຕັກນິກ​ທັນ​ສະໄໝ ໃນ​ຍຸກ​ປັດຈຸບັນ​ ສຳລັບ​ປະເທດລາວ ປະຈຳ ປີ 2019" ຂຶ້ນ.

   ພິທີ​ເປີດ​ຊຸດ​ຝຶກ​ອົບຮົມ​ດັ່ງກ່າວ ໄດ້​ຈັດ​ຂຶ້ນ​ໃນ​ອາທິດ​ຜ່ານ​ມາ​ນີ້ ທີ່​ສະ​ຖາ​ບັນ​ຄົ້ນ ຄວ້າ ແລະ ຝຶກ​ອົບຮົມ​ວິທະຍຸ - ໂທລະພາບ​ແຫ່ງ​ຊາດ​ຈີນ ນະຄອນຫຼວງ​ປັກ​ກິ່ງ ສປ​ຈີນ ໂດຍ​ການ​ເຂົ້າ​ຮ່ວມ​ຂອງທ່ານ ຫຼົວ ຢຸນ​ຫຼົງ ຮອງ​ຫົວໜ້າ​ຫ້ອງ ການ​ພົວພັນ​ສາກົນ ສະ​ຖາ​ບັນ​ຄົ້ນຄວ້າ ແລະ ຝຶກ​ອົບຮົມ​ວິ​ທະ​ຍຸ - ​ໂທລະພາບ​ ແຫ່ງ​ຊາດ​ຈີນ, ມີ​ບັນດາ​ຄູ​-​ອາຈານ​ຜູ້​ຮັບຜິດຊອບ​ຊຸດ​ຝຶກ​ອົບຮົມ​ຈາກ​ສະ​ຖາ​ບັນ​ຄົ້ນຄວ້າ ແລະ ຝຶກ​ອົບຮົມ​ວິ​ທະ​ຍຸ​-​ໂທລະພາບ​ແຫ່ງ​ຊາດ​ຈີນ.

   ຊຸດ​ຝຶກ​ອົບຮົມ​ຄັ້ງ​ນີ້ ຈະ​ດຳເນີນ​ໄປ​ເປັນ​ເວລາ 1 ເດືອນ ຊຶ່ງ​ຜູ້​ເຂົ້າ​ຮ່ວມ​ຈະ​ໄດ້​ຄົ້ນຄວ້າ, ແລກປ່ຽນ​ບົດຮຽນ​ຫຼາຍ​ຢ່າງ ເປັນຕົ້ນ​ແມ່ນ​ສະພາບ​ການ​ພື້ນຖານ ແລະ ການ​ແລກປ່ຽນ​ການ​ຮ່ວມ​ມື​ສາກົນ​ຂອງ​ວິທະຍຸ - ໂທລະພາບ​ແຫ່ງ​ຊາດ​ຈີນ, ລາຍການ​ໂທລະພາບ ແລະ ການ​ເຜີຍແຜ່​ຂໍ້​ມູນ​ຂ່າວສານ​ສາກົນ​ຂອງ​ຈີນ, ເຄືອ​ຂ່າຍ 5 G ວິທະຍຸ - ໂທລະພາບ​ຈີນ, ປະສົບ​ການ​ເຮັດ​ລາຍການ​ພາ ສາ​ລາວ​ວິທະຍຸ​ສາກົນ​ແຫ່ງ​ປະເທດ​ຈີນ ແລະ ອື່ນໆ.

   ຊຸດ​ຝຶກ​ອົບຮົມຍັງ​ຈະ​ໄດ້​ໄປ​ທັດສະນະ​ສຶກສາ​ໃນ​ຫຼາຍ​ສະຖານທີ່ ເປັນຕົ້ນ​ແມ່ນ​ວິທະຍຸ​ກະຈາຍສຽງ​ປະຊາຊົນ​ກວາງຊີ, ໂທລະພາບ​ກວາງຊີ, ກຸ່ມ​ບໍລິສັດ​ໜັງສືພິມ​ກວາງຊີ, ບໍລິສັດ​ເຄືອ​ຂ່າຍ​ວິທະຍຸ - ໂທລະພາບ​ກວາງຊີ ແລະ ບັນດາ​ສະຖານ​ທີ່​ສໍາ​ຄັນ​ຂອງ​ຈີນ.

   ທ່ານ ຫຼົວ ຢຸນ​ຫຼົງ ໄດ້​ກ່າວ​ວ່າ: ປີ 2019 ແມ່ນ​ປີ​ແລກປ່ຽນ​ສື່​ມວນ​ຊົນ ຈີນ - ອາ​ຊຽນ, ການ​ຈັດ​ຊຸດ​ຝຶກ​ອົບຮົມ​ຄັ້ງ​ນີ້​ເປັນ​ໂອກາດ​ອັນ​ລໍ້າ​ຄ່າ ເພື່ອ​ສ້າງ​ຄວາມ​ເຂົ້າໃຈ​ອັນ​ເລິກເຊິ່ງ ໃນ​ສະພາບ​ປັດຈຸບັນ​ຂອງ​ຂະແໜງ​ໂທລະພາບ ແລະ ວິທະຍຸ​ຈີນ ໃຫ້​ແກ່​ເພື່ອນ​ມິດ​ສື່​ມວນ​ຊົນ​ລາວ, ຊຸກຍູ້​ການ​ແລກປ່ຽນ​ບົດຮຽນ, ການ​ນໍາ​ໃຊ້​ທ່າແຮງ​ຂອງ​ເຕັກນິກ​ສື່ສານ​ໃໝ່ ທີ່​ໄດ້​ເຊື່ອມ​ໂຍງ​ເຂົ້າກັນ, ກະ​ຕຸ້ນ​ໃຫ້​ສື່​ມວນ​ຊົນຄົ້ນຄວ້າ​ສະພາບ​ການ​ໃໝ່, ບັນຫາ​ໃໝ່ ທີ່​ຂະແໜງ​ໂທລະພາບ, ວິທະຍຸ ແລະ ສື່​ອື່ນໆ ກຳລັງ​ປະ​ເຊີນ​ໜ້າ ພາຍ​ໃຕ້​ສະພາບ​ສື່​ມວນ​ຊົນ​ເຊື່ອມ​ໂຍງ​ເຂົ້າກັນ, ຊອກ​ຫາ​ເຕັກນິກ​ການ​ປະດິດ​ສ້າງ​ໃໝ່ ແນໃສ່​ຍົກ​ສູງ​ຄວາມ​ສາມາດ ແລະ ຮ່ວມ​ພັດທະນາ​ສ້າງ​ຊ່ອງ​ທາງ​ໃໝ່ ໃນ​ການ​ພັດທະນາ​ວຽກ​ງານ​ສື່​ມວນ​ຊົນ.
(ຂ່າວ - ພາບ: ສຸກ​ສະຫວັນ)