ນາ­ຍົກ­ລັດ­ຖະ­ມົນ­ຕີ ແຫ່ງ ສປປ ລາວ ສືບ­ຕໍ່​ພົບ​ປະບັນ­ດາ​ການ​ນຳ ແຫ່ງ ສສ ຫວຽດ­ນາມ

03.10.2019 8:39     

   ວັນ​ທີ 2 ຕຸລາ 2019, ທີ່ນະຄອນຫຼວງ​ຮ່າ​ໂນ້ຍ, ສະ ຫາຍ ທອງ​ລຸນ ສີ​ສຸ​ລິດ ນາຍົກ ລັດຖະມົນຕີ ແຫ່ງ ສປປ ລາວ ພ້ອມ​ດ້ວຍ​ຄະນະ​ຜູ້​ແທນ​ຂັ້ນ​ສູງ​ຂອງ​ລາວ ໄດ້​ສືບຕໍ່​ເຄື່ອນ​ໄຫວ​ຢ້ຽມຢາມ ສາທາລະນະ​ລັດ ສັງຄົມ​ນິຍົມ​ຫວຽດນາມ ໂດຍ​ໄດ້ເຂົ້າ​ຢ້ຽມ​ຂໍ່າ​ນັບສະຫາຍ ຫ​ງວຽນ ຝູ ຈ້ອງ ເລຂາທິການ​ໃຫຍ່ ປະທານ​ປະເທດ ແຫ່ງ ສສ ຫວຽດນາມ ທີ່ຫ້ອງ​ວ່າການ​ສູນ​ກາງ​ພັກ ແລະ ເຂົ້າ​ຢ້ຽມ​ພົບ​ປະ​ສະຫາຍ ​ນາງ ຫງວຽນ ທິ ກິມ ເງິນ ປະທານ​ສະພາ​ແຫ່ງ​ຊາດ ແຫ່ງ ສສ ຫວຽດນາມ ທີ່ສະພາ​ແຫ່ງ​ຊາດ. ການ​ພົບ​ປະ​ໃນ​ຄັ້ງ​ນີ້ສະຫາຍ ທອງ​ລຸນ ສີ​ສຸ​ລິດ ໄດ້​ ສະແດງ​ຄວາມ​ຂອບໃຈເປັນ ​ຢ່າງ​ສູງ​ຕໍ່​ບັນດາ​ການ​ນຳແຫ່ງ ສສ ຫວຽດນາມ ທີ່​ໄດ້​ໃຫ້ການ​ຕ້ອນຮັບ​ຢ່າງ​ອົບ​ອຸ່ນ, ນຳເອົາ​ ຄວາມ​ຢື້​ຢາມ​ຖາມ​ຂ່າວຈາກ​ການ​ນຳ​ຂັ້ນ​ສູງ​ຂອງລາວ ເຖິງ ບັນດາ​ການ​ນຳ​ຂັ້ນ​ສູງ​ຫວຽດ ນາມ ແລະ ໄດ້​ແຈ້ງ​ໃຫ້​ຊາບ​ເຖິງ​ຈຸດປະສົງ​ຂອງ​ການ​ຢ້ຽມຢາມ ກໍ​ຄື​ຜົນ​ການ​ພົບ​ປະ​ເຮັດ​ວຽກ​ກັບ ສະຫາຍ ຫ​ງວຽນ ຊວັນ ຟຸກ ຊຶ່ງ​ທັງ​ສອງ​ຝ່າຍ​ໄດ້​ທົບ​ທວນຄືນ​ການ​ຮ່ວມ​ມື​ກໍ​ຄື​ການຈັດຕັ້ງ​ປະ ຕິບັດ​ບັນດາ​ເອກະສານ​ຮ່ວມ​ມື​ສອງ​ຝ່າຍ​ໄລຍະ​ຜ່ານ​ມາ, ຊຸກຍູ້​ການ​ແກ້​ໄຂ​ບັນຫາ​ທີ່​ຄົງ​ຄ້າງ ແລະ ວາງ​ທິດ​ທາງ​ແຜນການ​ໃນຕໍ່ໜ້າ​ຮ່ວມ​ກັນ. ການ​ນໍາ​ຂັ້ນ​ສູງ ແຫ່ງ ສສ ຫວຽດນາມ ກໍ​ໄດ້​ສະແດງ​ຄວາມ​ຊົມເຊີຍ ແລະ ຕີ​ລາຄາ​ສູງ ໃນ​ການ​ເຮັດ​ ວຽກ​ຮ່ວມ​ກັນ​ຂອງ​ສອງລັດຖະ ບານ ໂດຍ​ສະເພາະ​ແມ່ນສອງ ​ນາຍົກລັດຖະມົນຕີ ລາວ​- ຫວຽດນາມ ທີ່​ໄດ້​ເຮັດ​ວຽກ​ຮ່ວມ​ກັນ​ຢ່າງ​ໃກ້ຊິດ ແລະ ເອົາ​ຈິງ​ເອົາ​ຈັງ ຊຶ່ງ​ເຮັດ​ໃຫ້ການ​ພົວພັນ​ຮ່ວມ​ມື​ລະຫວ່າງ​ສອງ​ປະເທດ​ຖືກ​ຫັນ​ເປັນ​ຮູບ​ປະ​ທຳ ເພື່ອ​ຜົນ​ປະໂຫຍດ​ຂອງ​ສອງ​ຊາດ​ຢ່າງ​ແທ້​ຈິງ. ສອງ​ພັກ, ລັດຖະບານ ກໍ​ຄື​ສອງ​ສະພາ​ແຫ່ງ​ຊາດ ລາວ-ຫວຽດນາມ ກໍ​ຈະ​ເຮັດ​ວຽກ​ຮ່ວມ​ກັນ ເພື່ອ​ສ້າງ​ເງື່ອນໄຂ​ອຳນວຍ​ຄວາມ​ສະດວກ​ຢ່າງ​ເຕັມທີ່​ຕໍ່​ການ​ປະຕິບັດ​ວຽກ​ງານ​ໃຫ້​ໄດ້​ຮັບ​ປະສິດ​ທິ​ຜົນ​ສູງ​ສຸດ.

   ໃນ​ວັນ​ດຽວ​ກັນ, ສະຫາຍ ທອງ​ລຸນ ສີ​ສຸ​ລິດ ຍັງ​ໄດ້​ນຳພາ​ຄະນະ​ຜູ້​ແທນ​ຂັ້ນ​ສູງ​ຂອງ​ລາວ ເດີນທາງ​ໄປ​ວາງ​ພວງມະລາ ທີ່ ສຸສານ ປະທານ ໂຮ່​ຈິ​ມິນ ແລະ ອະ​ນຸ​ສອນ​ສະຖານ​ນັກຮົບ​ວິລະ​ຊົນ ຫວຽດນາມ. ນອກ​ນັ້ນ, ຍັງ​ໄດ້​ຕ້ອນຮັບ​ການ​ເຂົ້າ​ຢ້ຽມ​ຂໍ່າ​ນັບ​ຂອງກຸ່ມ​ບໍລິສັດ​ເອກະຊົນ​ໃຫຍ່​ຂອງ​ຫວຽດນາມ​ຈຳນວນ​ໜຶ່ງ​ທີ່​ໃຫ້​ຄວາມ​ສົນໃຈ ໃນ​ການ​ເຂົ້າ​ມາ​ລົງທຶນຢູ່ ສປປ ລາວ.ໃນ​ຕອນ​ບ່າຍ, ສະຫາຍ ທອງລຸນ ສີ​ສຸ​ລິດ ​ພ້ອມ​ດ້ວຍ​ຄະນະ​ຜູ້​ແທນ​ຂັ້ນ​ສູງ​ຂອງ​ລາວ ຍັງ​ໄດ້​ສືບຕໍ່​ເດີນທາງ​ໄປ​ຢ້ຽມຢາມ ເຮັດວຽກ ຢູ່ນະຄອນ​ດາໜັງ ສສ ຫວຽດນາມ.
(ຂ່າວ-ພາບ: ກະ​ຊວງກ​ານຕ່າງ ປະ​ເທດ)