ຄະ­ນະ​ຜູ້​ແທນ​ລາວ ເຂົ້າ​ຮ່ວມ​ກອງ​ປະ­ຊຸມສຸດ​ຍອດ​ຂະ­ບວນ​ການ​ບໍ່​ຮ່ວມ​ກຸ່ມ

...

30.10.2019 8:44     

  ກອງ​ປະຊຸມສຸດ​ຍອດ​ຂະ ບວນ​ການ​ບໍ່​ຮ່ວມ​ກຸ່ມ ຄັ້ງ​ທີ 18 (18th NAM Summit) ໄດ້ຈັດ​ຂຶ້ນ​ທີ່ບາ​ກູ ປະເທດອາ​ແຊັກ​ໄບ​ຊານ ໃນ​ວັນ​ທີ 25 -26 ຕຸລາ 2019 ພາຍ​ໃຕ້​ຫົວຂໍ້ "​ຢຶດ​ຖື​ຫຼັກ ການ​ບັນ​ດຸ​ງ​ ເພື່ອສາມາດຮັບ​ມື​ກັບ​ສິ່ງທ້າທາຍ​ ໃນ​ຍຸກ​ປັດຈຸ ບັນ ພາຍ​ໃຕ້​ການ​ເປັນ​ປະທານ​ ຂອງທ່ານ ອີ​ລ​ຮາມ ອາລີ​ເຢັບ (Ilham Aliyev) ປະທານາທິ ບໍດີອາ​ແຊັກ​ໄບ​ຊານ ໂດຍ​ມີ​ ຄະນະ​ຜູ້​ແທນ​ຈາກ​ປະເທດ​ສະ ມາຊິກ​ຂອງ​ຂະບວນ​ການ​ບໍ່​ຮ່ວມ​ກຸ່ມ​ເຂົ້າ​ຮ່ວມ ທັງ​ໝົດ 91 ປະເທດ ໃນ​ນີ້ ມີ​ລະດັບ​ປະມຸກ​ລັດ ແລະ ຫົວໜ້າ​ລັດຖະບານ 16 ປະເທດ, ມີ​ພາກສ່ວນ​ກ່ຽວ ຂ້ອງ​ເຂົ້າ​ຮ່ວມ.

  ກອງ​ປະຊຸມ​ສຸດ​ຍອດ​ຂອງ​ຂະບວນ​ການ​ບໍ່​ຮ່ວມ​ກຸ່ມຈັດ​ຂຶ້ນ​ທຸກໆ 3 ປີ ເພື່ອ​ພ້ອມ​ກັນ​ທົບ​ທວນບັນດາ​ສິ່ງ​ທ້າທາຍ​ຕໍ່​ສັນຕິພາບ ແລະ ຄວາມ​ໝັ້ນຄົງ​ສາກົນ, ການ​ພັດທະນາ ແລະ ການ​ລະເມີດ​ສິດທິ​ມະນຸດ​ທີ່​ຮ້າຍ​ແຮງ ແລະ ຮ່ວມກັນ​ຮັບຮອງ​ເອົາ​ຖະແຫຼງການ ​ແນໃສ່​ແກ້​ໄຂ​ບັນຫາ​ເຫຼົ່າ​ນັ້ນ. ກອງ​ປະຊຸມ​ ຄັ້ງ​ນີ້ໄດ້​ສຸມ​ໃສ່​ອະພິປາຍກ່ຽວ​ກັບ​ຄວາມສຳຄັນ​ຂອງ​ຫຼັກການ​ພື້ນຖານ 10 ຂໍ້ ຂອງ​ຂະບວນ​ການ​ບໍ່​ຮ່ວມ​ກຸ່ມກໍ​ຄື​ຫຼັກການ​ບັນ​ດຸງ ຊຶ່ງ​ບັນດາ​ຄະນະ​ຜູ້​ແທນ ລ້ວນແລ້ວແຕ່​ເຫັນ​ພ້ອມ​ນຳ​ກັນ​ວ່າ ຫຼັກການ​ບັນ​ດຸງ ໂດຍ​ສະເພາະຫຼັກການ​ເຄົາລົບ​ອຳນາດ​ອະທິປະ​ໄຕ ແລະ ຜືນ​ແຜ່ນດິນອັນ​ຄົບ​ຖ້ວນ​ຂອງ​ທຸກ​ປະເທດ, ຄວາມ​ສະເໝີພາບ, ບໍ່​ແຊກ​ແຊງ​ເຂົ້າ​ໃນ​ວຽກ​ງານ​ພາຍ​ໃນ​ຂອງ​ກັນ ແລະ ກັນ, ບໍ່​ຮຸກ​ຮານ​ກັນ ແລະ ເຄົາລົບ​ສິດ​ຕັດສິນ​ຊາ​ຕາ​ກຳ​ດ້ວຍ​ຕົນ​ເອງຍັງ​ມີ​ຄວາມ​ສຳຄັນ ແລະ ແທດເໝາະ​ກັບ​ສະພາບການ​ສາກົນ​ໃນ​ປັດຈຸບັນ ທັງນີ້ເນື່ອງ​ຈາກ​ວ່າ ໃນ​ປັດຈຸບັນ​ນີ້ຍັງ​ມີ​ການ​ລະເມີດ​ອຳນາດ​ອະທິປະ​ໄຕ, ມີ​ການ​ຮຸກ​ຮານ ແລະ ແຊກ​ແຊງ​ກິດຈະການ​ພາຍ​ໃນ​ຂອງ​ປະເທດ​ສະ​ມາ​ຊິກ. ບັນດາ​ປະເທດລ້ວນ​ແລ້ວ​ແຕ່​ຢໍ້າ​ຄືນ​ວ່າ ສັນຕິພາບແມ່ນ​ປັດ​ໄຈ​ສຳຄັນ ​ເພື່ອ​ການພັດທະນາ ແລະ ເຄົາລົບ​ສິດທິ​ມະນຸດ ຈຶ່ງ​ຮຽກຮ້ອງ​ໃຫ້​ປະເທດ​ສະມາຊິກ ສາມັກຄີ​ກັນ ແລະ ຮ່ວມ​ແຮງ​ກັນ ໃນການ​ນຳ​ໃຊ້​ຫຼັກການ​ບັນ​ດຸງ ເພື່ອ​ສ້າງ​ໃຫ້ໂລກນີ້ມີ​ ສັນຕິພາບ, ປົກ​ປ້ອງ​ລັດທິ​ຫຼາຍ​ຝ່າຍ, ກໍຄື​ບົດບາດອົງ ການ​ສະຫະ​ປະຊາຊາດ ແລະ ຄັດຄ້ານ​ລັດທິ​ຝ່າຍ​ດຽວທີ່​ເປັນ​ຂົ່ມ​ຕໍ່​ສັນຕິພາບ ແລະ ຄວາມ​ໝັ້ນຄົງ​ສາ​ກົນ. ກອງ​ປະຊຸມໄດ້​ຮຽກຮ້ອງໃຫ້​ຢຸດຕິ ການ​ຂວ້ຳ​ບາດ​ຕໍ່ກູ​ບາທີ່​ແກ່ ຍາວ​ມາ​ໄດ້​ຫຼາຍທົດ​ສະ​ວັດ​ແລ້ວ ແລະ ຮຽກຮ້ອງ​ໃຫ້​ເພີ່ມ ຄວາມພະຍາຍາມ ໃນ​ການ​ແກ້​ໄຂ​ບັນຫາ​ປາ​ແລັ​ສ​ຕິນໃຫ້​ບັນລຸຄວາມ​ເປັນ​ລັດ​ເອກະ​ລາດ ກອງ​ປະຊຸມ​ຄັ້ງນີ້ໄດ້ຮັບ ຮອງ​ເອົາ​ເອກະສານ 4 ສະບັບ​ຄື: ເອກະສານ​ຜົນ​ກອງ​ປະ ຊຸມ, ຖະແຫຼງການບາ​ກູ, ຖະ ແຫຼງການ ​ວ່າ​ດ້ວຍ​ບັນຫາ​ປາ​ແ​ລັສ​ຕິນ ແລະ ໜັງສື​ຂອບໃຈ​ປະເທດ​ເຈົ້າ​ພາບ.

  ທ່ານ ອາ​ລຸນ​ແກ້ວ ກິດ​ຕິ​ຄຸນ ລັດຖະມົນຕີ​ປະຈຳ​ສຳນັກງານ​ນາຍົກລັດຖະມົນຕີ, ຜູ້ຕາງໜ້າ​ພິເສດ​ຂອງ​ປະທານ ປະເທດ​ແຫ່ງ ສປປ ລາວ ໄດ້​ນຳພາ​ຄະນະ​ຜູ້​ແທນ​ເຮົາ ເຂົ້າ​ຮ່ວມ​ກອງ​ປະຊຸມ​ດັ່ງກ່າວ ແລະ ໄດ້​ຂຶ້ນ​ກ່າວ​ຄຳ​ເຫັນ​ ຊຶ່ງ​ມີ​ເນື້ອ​ໃນ​ສຳຄັນ ໃນ​ການ​ຍົກ​ໃຫ້​ເຫັນ​ເຖິງ​ຄວາມ​ສຳຄັນ​ຂອງ​​ຫຼັກການ​ບັນ​ດຸງ ໃນ​ສະພາບ​ປັດຈຸບັນ, ຍົກ​ໃຫ້​ເຫັນສິ່ງ​ທ້າ​ທາຍ​ທີ່​ສຳຄັນ​ຕ່າງໆ ແລະ ຮຽກຮ້ອງໃຫ້​ປະເທດ​ສະມາຊິກ ຂະບວນ​ການ​ບໍ່​ຮ່ວມ​ກຸ່ມຕ້ອງ​ເພີ່ມ​ທະວີການ​ຮັດແໜ້ນ​ຄວາມ​ສາມັກຄີ, ຮ່ວມ​ມື​ກັນ ເພື່ອ​ຮ່ວມ​ກັນ​ປົກ​ປັກ​ຮັກສາ​ສັນຕິພາບ, ຄວາມ​ໝັ້ນຄົງ ເພື່ອ​ສ້າງ​ສະພາບ​ແວດລ້ອມ​ທີ່​ເອື້ອ ອຳນວຍ​ໃຫ້ການ​ພັດທະນາ​ເສດ​ຖະ​ກິດ​-​ສັງ​ຄົມ ນອກ​ນັ້ນ ກໍໄດ້​ຢ້ຳ​ຄືນ​ທັດສະນະອັນ​ສະເໝີ​ຕົ້ນ​ສະເໝີປາຍຂອງ​ປະເທດ​ເຮົາ ໃນ​ການ​ສະໜັບສະໜູນ​ການ​ແກ້​ໄຂ​ບັນຫາ​ປາ​ແລັສ​ຕິນ ໂດຍ​ການ​ສ້າງຕັ້ງ​ສອງ​ລັດ ເອກະລາດ, ລັດ​ອິສສະ​ລາ​ແອນ ແລະ ປາ​ແລັສ​ຕິນ ດຳລົງ​ຄົງ​ຢູ່​ຮ່ວມ​ກັນ​ຢ່າງ​ສັນຕິ ແລະ ຮຽກຮ້ອງ​ໃຫ້​ຍົກເລີກ ການ​ຂວ້ຳ​ບາດ ກູ​ບາ ທີ່​ແກ່ຍາວ​ມາ​ໄດ້​ຫຼາຍ​ທົດ​ສະ​ວັດ​ແລ້ວ.

  ນອກຈາກ​ນີ້, ໃນ​ໂອກາດ​ເຂົ້າ​ຮ່ວມ​ກອງ​ປະຊຸມ​ດັ່ງກ່າວ, ຄະນະ​ຜູ​້ແທນ​ເຮົາ ຍັງ​ໄດ້​ມີ​ການ​ພົບ​ປະ​ສອງ​ຝ່າຍ​ກັບ​ຄະນະ​ຜູ້​ແທນ ເຄນ​ຢາ, ມານ​ດິບ ແລະ ສປປ ເກົາຫຼີ ເພື່ອ​ປຶກສາ​ຫາລື ກ່ຽວ​ກັບ​ການ​ເສີມ​ຂະຫຍາຍ ແລະ ຮັດ​ແໜ້ນ​ການ​ພົວພັນ​ສອງ​ຝ່າຍ.

  ຂະບວນ​ການ​ບໍ່​ຮ່ວມ​ກຸ່ມ ໄດ້​ຮັບ​ການ​ສ້າງຕັ້ງ​ຂຶ້ນ​ໃນ​ປີ 1961 ໂດຍ​ບັນດາ​ປະເທດ​ທີ່​ຫາກໍໄດ້​ຮັບ​ເອກະລາດ​ໃໝ່ ໂດຍ​ມີ​ຈຸດປະສົງ​ສຳຄັນ​ໃນ​ການ​ຕໍ່ຕ້ານ​ລັດທິ​ລ່າ​​ເມືອງ​ຂຶ້ນ ທັງ​ແບບ​ເກົ່າ ແລະ ໃໝ່ ແລະ ໄດ້​ກຳນົດ 10 ຫຼັກການ ວ່າ​ດ້ວຍ​ການ​ສົ່ງເສີມ​ສັນຕິພາບ ແລະ ການ​ຮ່ວມ​ມື​ສາກົນ ຫຼື ເອີ້ນ​ວ່າ ຫຼັກການ​ບັນ​ດຸງ ເພື່ອ​ເປັນ​ພື້ນຖານ​ໃນ​ການເຄື່ອນໄຫວ​ຂອງ​ບັນດາ​ປະເທດ​ສະ​ມາ​ຊິກ. ປັດຈຸບັນ ຂະບວນ​ການ​ບໍ່​ຮ່ວມ​ກຸ່ມ ມີ​ສະມາຊິກ​ທັງ​ໝົດ 120 ປະເທດ ແລະ 17 ປະເທດ​ສັງເກດ​ການ. (ຂ່າວ​-​ພາບ: ກະຊວງ​ການ​ຕ່າງປະເທດ)