ທ່ານ​ປະ­ທານ​ປະ­ເທດ ຕ້ອນ­ຮັບ​ທູດ ສະ­ຫະ­ພັນ​ຣັດ​ເຊຍ ເຂົ້າ​ຍື່ນ​ສານ​ຕາ​ຕັ້ງ

31.10.2019 8:53     

   ທ່ານ ບຸນ​ຍັງ ວໍລະ​ຈິດ ປະທານ​ປະເທດ ໄດ້​ຕ້ອນຮັບ ທ່ານ ວາ​ລາ​ດີ​ເມຍ ກາລີ​ນິນ (Vladimir A.KALININ) ເຂົ້າ​ຍື່ນ​ສານ​ຕາ​ຕັ້ງ​ເປັນເອກ​ອັກ​ຄະ​ລັດ​ຖະ​ທູດ ວິສາມັນ​ຜູ້​ມີ​ອຳນາດ​ເຕັມ ແຫ່ງ​ສະຫະພັນ ຣັດ​ເຊຍ​ຄົນ​ໃໝ່​ປະຈຳ​ລາວ ໃນ​ຕອນ​ເຊົ້າ​ວັນທີ 30 ຕຸລາ​ນີ້ ທີ່​ທຳ​ນຽບ​ປະທານ​ປະ​ເທດ ຊຶ່ງ​ມີ​ສຳ ນັກງານ​ຕັ້ງ​ຢູ່​ນະຄອນຫຼວງ​ວຽງ​ຈັນ. ໃນ​ໂອກາດ​ດັ່ງກ່າວ ທ່ານ​ປະທານ​ປະເທດ​ເຮົາ​ ໄດ້​ກ່າວ​ສະແດງ​ຄວາມ​ຕ້ອນຮັບ​ ແລະ ​ຊົມເຊີຍ​ຕໍ່​ທ່ານ​ທູດ ​ທີ່​ໄດ້​ຖືກ​ແຕ່ງຕັ້ງ​ໃຫ້​ມາ​ດຳລົງ​ຕຳແໜ່ງ​ເປັນ​ເອກ​ອັກ​ຄະ​ລັດ​ຖະ​ທູດ​ສະຫະພັນ​ຣັດ​ເຊຍ​ຄົນໃໝ່​ປະຈຳ​ລາວ ເພື່ອ​ສືບຕໍ່​ຮັດ​ແໜ້ນ​ການ​ພົວພັນ​ຮ່ວມ​ມື​ທີ່​ດີ​ລະຫວ່າງ​ສອງ​ປະເທດ ສະຫະພັນ​ຣັດ​ເຊຍ ແລະ ສປປ ລາວ ທີ່​ມີ​ມາ​ແຕ່​ດົນ​ນານ​ໃຫ້​ນັບ​ມື້​ແໜ້ນ​ແຟ້ນ​ຍິ່ງ​ຂຶ້ນ ໂດຍ​ສະເພາະ​ພາຍຫຼັງ​ທີ່​ທັງ​ສອງ​ປະເທດ​ໄດ້​ຮັບ​ການ​ສ້າງຕັ້ງ​ສາຍ​ພົວພັນ​ການ​ທູດ​ນຳ​ກັນ​ໃນປີ 1960 ເປັນຕົ້ນ​ມາ​ ການ​ພົວພັນ​ຮ່ວມ​ມື​ທັງ​ສອງ​ປະເທດ​ແມ່ນ​ມີ​ບາດກ້າວ​ຂະຫຍາຍຕົວ​ດີ​ ແລະ ​ຕໍ່​ເນື່ອງ, ມີ​ຄວາມ​ເຊື່ອ​ໝັ້ນ​ໄວ້​ວາງໃຈ​ແລະ ​ສືບຕໍ່​ສະໜັບສະໜູນຊຶ່ງ​ກັນ ​ແລະ ​ກັນ​ໃນ​ເວທີ​ພາກ​ພື້ນ​ແລະ ​ສາກົນ ​ບົນ​ພື້ນຖານ​ການ​ເປັນ​ປະເທດ​ຄູ່​ຮ່ວມ​ຍຸດທະສາດ​ນຳ​ກັນ​ແຕ່​ປີ 2011 ເປັນຕົ້ນ​ມາ. ທ່ານ​ທູດໄດ້​ກ່າວ​ສະແດງ​ຄວາມ​ຂອບໃຈ​ຕໍ່​ທ່ານ​ປະທານ​ປະເທດ​ທີ່​ໄດ້​ຕ້ອນຮັບ​ອັນ​ອົບ​ອຸ່ນ ພ້ອມ​ທັງ​ກ່າວ​ຢືນຢັນ​ຈະ​ສືບຕໍ່​ເສີມ​ຂະຫຍາຍ​ສາຍ​ພົວພັນ​ຮ່ວມ​ມື​ທີ່​ມີ​ມາ​ແລ້ວ​ໃຫ້​ນັບ​ມື້​ແໜ້ນ​ແຟ້ນ​ຍິ່ງໆ​ຂຶ້ນ.
(ຂ່າວ: ພູ​ວຽງ​ຄຳ)