ເມືອງ​ພູ​ວົງ​-​ເມືອງ​ງັອກ​ໂຮ່ຍ ຫາ­ລື​ດ້ານ​ການ­ທ່ອງ­ທ່ຽວ

31.10.2019 8:53     

   ເມືອງ​ພູ​ວົງ ​ແຂວງ​ອັດ​ຕະ​ປື​ໄດ້​ເປັນ​ເຈົ້າພາບ​ຈັດ​ກອງ​ປະຊຸມ​ຮອບ​ວຽນ​ຄັ້ງ​ທີ 16 ປີ 2019 ກັບ​ເມືອງ ງັອກ​ໂຮ່ຍ ແຂວງ ກອນ​ຕູມ ສສ. ຫວຽດນາມ ຂຶ້ນ​ເມື່ອບໍ່​ດົນ​ມານີ້ ໂດຍ​ມີ​ທ່ານ ເຈົາ ງັອກ​ເລີນ ຮອງ​ເລຂາ​ພັກ​ເມືອງ ເມືອງ​ງັອກ​ໂຮ່ຍ​ພ້ອມ​ຄະນະ ​ແລະ ທ່ານ ບຸນ​ນາວ ຈັນ​ດອນ ເລຂາ​ພັກເມືອງ ພູ​ວົງ ພ້ອມ​ດ້ວຍ​ຄະນະ ເຂົ້າ​ຮ່ວມ.

   ໃນ​ໂອກາດ​ດັ່ງກ່າວ​ທັງ​ສອງ​ເມືອງ​ໄດ້​ຜ່ານ​ບົດ​ລາຍ​ງານສະພາບ​ການ​ພັດທະນາ​ເສດ​ຖະ​ກິດ​-​ສັງຄົມ ວຽກ​ງານ ປກຊ-ປກສ ພ້ອມ​ທັງ​ວາງ​ທິດ​ທາງ​ແຜນການ ​ການ​ຮ່ວມ​ມື​ຮອບດ້ານ​ເພື່ອ​ຍົກ​ສູງ​ຄວາມ​ຮັບ​ຮູ້ ແລະ ເຂົ້າໃຈ​ກ່ຽວ​ກັບ​ມູນເຊື້ອ​ຄວາມ​ສາ​ມັກ​ຄີ​ນໍາ້​ໃຈ​ມິດຕະພາບ​ລາວ​-ຫວຽດນາມ​ທີ່​ເຄີຍ​ມີ​ມາ​ແຕ່​ດົນ​ນານ ແລະ ທັງ​ເປັນ​ການ​ຍົກ​ສູງ​ຄວາມ​ຮັບ​ຮູ້​ກ່ຽວ​ກັບ​ລະບຽບ​ກົດໝາຍ​ຂອງ​ສອງ​ປະເທດ​ເປັນຕົ້ນ ກົດໝາຍ​ການ​ເຂົ້າ​-​ອອກ​ເມືອງ​-​ກົດໝາຍ​ແຮງ​ງານ ແລະ ອື່ນໆ.

   ສຳລັບ​ທິດ​ທາງ​ແຜນການ​ໃນຕໍ່ໜ້າ​ຍັງ​ຈະ​ໄດ້​ສືບຕໍ່​ຊຸກຍູ້​ສົ່ງເສີມ​ການ​ປະສານ​ສົມທົບ​ຮ່ວມ​ມື​ຈັດການທ່ອງທ່ຽວ​ຜ່ານ​ດ່ານ​ສາກົນ​ພູ​ເກືອ​ລະຫວ່າງ​ສອງ​ຝ່າຍ​ ເພື່ອ​ເຊື່ອມ​ໂຍງ​ການທ່ອງທ່ຽວ​ລະ​ຫວ່າ​ສອງ​ປະເທດ​ລາວ​-​ຫວຽດນາມ, ສ້າງ​ເງື່ອນໄຂ​ອຳນວຍ​ຄວາມ​ສະດວກ​ໃຫ້​ປະຊາຊົນ​ເມືອງ​ພູ​ວົງ​ໄປ​ປິ​ນ​ປົວ​ພະຍາດ  ແລະ ຫົວໜ່ວຍ​ທຸລະ​ກິດ​ອື່ນໆ​ຂອງ​ສປປ ລາວ​ໄປ​ລົງທຶນ ແລະ ດຳເນີນ​ທຸລະ​ກິດ​ທີ່​ເມືອງ ງັອກ​ໂຮ່ຍ,  ອຳນວຍ​ຄວາມ​ສະດວກ​ໃຫ້​ນັກທຸລະກິດ​ເມືອງ​ງັອກ​ໂຮ່ຍ, ນັກທຸລະກິດ ສສ ຫວຽດນາມ​ເຂົ້າ​ມາ​ລົງທຶນ ແລະ ດຳເນີນ​ທຸລະ​ກິດ​ຢູ່ ເມືອງ ພູ​ວົງ, ສ້າງ​ເງື່ອນໄຂ​ໃຫ້​ຊາວ​ກະສິກອນ​ໄປ​ຮຽນ​ຮູ້​ການ​ຜະລິດ​ກະສິກຳ​ທີ່​ເມືອງ​ງັອກ​ໂຮ່ຍ,  ສືບຕໍ່​ຮ່ວມ​ມື​ສ້າງ​ສວນ​ມິດຕະພາບ​ພູ​ວົງ​-​ງັອກ​ໂຮ່ຍ ໃຫ້​ບັນລຸ​ຕາມ​ແຜນ ແລະ ສ້າງ​ໃຫ້​ບ້ານ​ພູ​ເກືອ, ບ້ານ​ພູ​ຍາງ ເມືອງ ພູ​ວົງ ແລະ ບ້ານ​ດັກ​ລັກ ຕາແສງ​ເບີ​ອີ ເມືອງ​ງັອກ​ໂຮ່ຍ​ໃຫ້​ໄດ້​ຈັດ​ງານ​ພົບ​ປະ​ຮອບ​ວຽນ​ທີ່​ເມືອງ ງັອກ​ໂຮ່ຍ​ໃນ​ຕົ້ນ​ເດືອນ​ຕຸລາ 2020 ແລະ ອຳນວຍ​ຄວາມ​ສະດວກ​ໃຫ້​ໂຮງຮຽນ ມສ ນາງ​ແຮ່​ວ​ໄດ້​ພົບ​ປະ​ແລກປ່ຽນ​ບົດຮຽນ ຫຼັກສູດ​ການ​ຮຽນ​ການ​ສອນ ວິທີ​ການ​ດຳລົງ​ຊີວິດ​ກັບ​ໂຮງຮຽນ ມຕ ເບີ​ອີ ໃນ​ເດືອນ ພະຈິກ 2020 ແລະ ເພີ່ມ​ທະວີ​ວຽກ​ງານ​ການ​ຮ່ວມ​ມື​ຕ້ານ ແລະ ສະກັດ​ກັ້ນ​ກຸ່ມ​ຄົນ​ບໍ່​ດີ ແລະ ກຸ່ມ​ຄົນ​ເຂົ້າ​ອອກ​ເມືອງ​ຜິດ​ກົດໝາຍ, ການ​ລັກລອບ​ເຂົ້າ​ຊາຍ​ແດນ, ສະກັດ​ກັ້ນ​ຂະບວນ​ການ​ຄ້າຂາຍ​ເຖື່ອນ, ສິນຄ້າ​ທີ່​ຜິດ​ກົດໝາຍ ແລະ ອື່ນໆ.

   ພ້ອມ​ດຽວ​ກັນ​ກໍໄດ້​ເຊັນ​ບົດ​ບັນທຶກ​ຊ່ວຍ​ຈຳ​ກ່ຽວ​ກັບ​ການ​ຮ່ວມ​ມື​ລະຫວ່າງ​ເມືອງ​ພູ​ວົງ ແຂວງ​ອັດ​ຕະ​ປື ກັບ ເມືອງ​ງັອກ​ໂຮ່ຍ ແຂວງ​ກອນ​ຕູມ​ອີກ​ດ້ວຍ.
(ຂ່າວ: ຈັນ​ສະໄໝ)