ງານ​ລ້ຽງ​ສະ­ຫຼອງ​ວັນ­ຊາດ ສ.ເກົາ­ຫຼີ

07.10.2019 9:15     

   ທ່ານ ຊິນ​ ຊຸງ ​​ຊູນ ເອກ​ອັກ​ຄະ​ລັດ​ຖະ​ທູດ ສາ​ທາ​ລະ​​ນະ​ລັດ ເກົາຫຼີ ປະຈຳ​ລາວ ​ໄດ້​ຈັດ​ງານ​ລ້ຽງ​ສະຫຼອງ​ວັນ​ຊາດ​ຕົນ​ຂຶ້ນ​ໃນ​ຕອນ​ຄ່ຳ​ວັນທີ 3 ຕຸລາ​ຜ່ານ​ມາ ​ທີ່​ນະຄອນຫຼວງ​ວຽງ​ຈັນ​ໂດຍ​ການ​ເຂົ້າ​ຮ່ວມ​ຂອງ​ທ່ານ ທອງ​ຜ່ານ ສະຫວັນ​ເພັດ ຮອງ​ລັດ​ຖະມົນຕີ​ກະຊວງ​ການ​ຕ່າງປະເທດ ​ພ້ອມ​ດ້ວຍ​ບັນດາ​ທ່ານ​ລັດຖະມົນຕີ​ ແລະ​ແຂກ​ຖືກ​ເຊີນ​ເຂົ້າ​ຮ່ວມ. ໃນ​ພິທີ ທ່ານ​ທູດ​ໄດ້​ກ່າວ​ສະແດງ​ຄວາມ​ຂອບໃຈ​ຕໍ່​ບັນດາ​ທ່ານ​ການ​ນຳ​ຂັ້ນ​ສູງ​ຂອງ​ລາວ ​ກໍ​ຄື​ບັນດາ​ທ່ານ​ທູດ ​ພ້ອມ​ດ້ວຍ​ແຂກ​ຖືກ​ເຊີນ​ທີ່​ເຂົ້າຮ່ວມ​ງານ​ລ້ຽງ​ໃນ​ຄັ້ງ​ນີ້, ຕະຫຼອດ​ໄລຍະ​ທີ່​ຜ່ານ​ມາ​ນັບ​ແຕ່​ສອງ​ປະເທດ​ໄດ້​ຮັບ​ການ​ສ້າງຕັ້ງ​ສາຍ​ພົວພັນ​ການ​ທູດ​ນຳ​ກັນ​ໃນ​ປີ 1995 ເປັນຕົ້ນ​ມາ​ການ​ພົວພັນ​ຮ່ວມ​ມື​ທີ່​ດີ​ລະຫວ່າງ ສ.ເກົາຫຼີ ແລະ ສປປ.ລາວ ​ໄດ້​ຮັບ​ການ​ພົວພັນ​ຊ່ວຍເຫຼືອ​ກັນ​ຕະຫຼອດ​ມາ​ ໂດຍ​ສະເພາະ​ໂຄງການ​ພັດທະນາ​ຊົນນະບົດ​ຢູ່​ໃນ ສປປ ລາວ ທີ່ ອົງການ KOICA ໃຫ້ການ ຊ່ວຍເຫຼືອ ແມ່ນ​ໄດ້​ສະເໜີໃຫ້​ຊາວບ້ານ ປະກອບສ່ວນ 30%. ຊຶ່ງ​ຕອນ​ທຳອິດ, ຊາວບ້ານ ສ່ວນ​ຫຼາຍ ໄດ້​ສະເໜີ​ວ່າ ເຂົາເຈົ້າເປັນ​ຄົນ​ທຸກ ໂດຍ​ບໍ່​ມີ​ຄວາມ​ສາມາດ ຈະ​ປະກອບສ່ວນເຂົ້າ​ໃນ​ໂຄງ ການ​ດັ່ງກ່າວ​ໄດ້. ແນວໃດ​ກໍ​ຕາມ, ແຕ່​ກໍມີຫຼາຍ​ບ້ານເຫັນ​ດີ​ປະກອບສ່ວນ​ຕາມ​ການ​ສະເໜີ​ຂອງ KOICA. ຈາກ​ການ​ປະກອບສ່ວນ 30% ເຂົ້າ​ໃນ ໂຄງການ ເຮັດ​ໃຫ້​ຊາວບ້ານ ໄດ້​ຮຽນ​ຮູ້​ເຖິງ​ການ​ສ້າງ​ຄວາມ​ກ້າວໜ້າ​ດ້ວຍ​ຕົນ​ເອງ ​ຊຶ່ງ​ເຮັດ​ໃຫ້​ຫຼາຍ​ບ້ານ​ສາມາດ​ປະສົບ​ຜົນສຳເລັດ​ໃນ​ການຈັດຕັ້ງ​ປະຕິບັດ​ໂຄງການ ​ໂດຍ​ນັບ​ຈາກ​ນັ້ນ​ມາ, ຊາວບ້ານ​ກໍເຫັນ​ດີ​ປະກອບສ່ວນ 30% ເຂົ້າ​ໃນ​ໂຄງການກໍ່ສ້າງ​ຂົວ​ໃໝ່, ໂຮງຮຽນ ແລະ ສຸກສາລາ ພາຍ​ໃນ​ບ້ານ. ໂຄງການ KOICA ໄດ້​ຮັບຜົນສຳເລັດ​ໃນ​ການ​ສ້າງ​ຄວາມ​ເຂັ້ມແຂງ​ໃຫ້​ຊາວບ້ານ​ເປັນ​ເຈົ້າ​ຕົນ​ເອງ ​ໃນ​ການຈັດຕັ້ງ​ປະຕິບັດໂຄງການພັດທະນາ​ຊົນ​ນະ​ບົດ. ຄວາມ​ເປັນເຈົ້າ​ຕົນ​ເອງ ແລະ ການຊ່ວຍເຫຼືອ​ຕົນ​ເອງ ຖື​ວ່າ​ເປັນ​ປັດ​ໄຈ​ທີ່​ສຳຄັນ​ທີ່​ສຸດ ໃນ​ການ​ຈັດຕັ້ງ​ປະຕິບັດ​ນະໂຍບາຍ​ສ້າງ​ຢູ່​ໃນ​ສປປ​ ລາວ, ທ່ານ​ທູດ​ໄດ້​ກ່າວ​ອີກ​ວ່າ: ໃນ​ເດືອນ​ກັນຍາ​ຜ່ານ​ມາ​ນີ້​ປະທານາທິບໍດີ ມູນ​ແຈ​ອິນ ​ຂອງ ສ.ເກົາຫຼີ​ ໄດ້​ມາ​ຢ້ຽມຢາມ ສປປ ລາວ​ ຊຶ່ງ​ຖື​ວ່າ​ເປັນ​ຄັ້ງ​ທຳ ອິດ​ສຳລັບ​ການ​ຢ້ຽມຢາມ​ທາງ​ລັດ​ຖະ​ກິດ​ຂອງປະທານາທິບໍດີ ສ.ເກົາຫຼີ​. ໃນ​ໂອກາດ​ດັ່ງກ່າວ​ ທ່ານ​ ບຸນ​ຍັງ​ ວໍລະ​ຈິດ ປະທານ​ປະເທດແຫ່ງ ສ​ປ​ປ ລາວ ແລະ​ ທ່ານ ມູນ​ແຈ​ອິນ ປະທານາທິບໍດີ ສ. ເກົາຫຼີ ​ໄດ້​ຢືນຢັນ​ຄືນ​ເຖິງ​ການເພີ່ມ​ທະວີ​ສາຍ​ພົວພັນ ແລະ ​ທັງ​ການ​ຮ່ວມ​ມື​ສອງ​ຝ່າຍ ​ແລະ​ ການ​ຮ່ວມ​ມື​ຫຼາຍ​ຝ່າຍ​ໃນ​ຂອບ​ອາ​ຊຽນ.
(ຂ່າວ: ພູ​ວຽງ​ຄຳ, ພາບ: ຄຳ​ພັນ​ ວຽງ​ຈັນ​ທາມ)