ທ່ານ ບຸນ​ທອງ ຈິດ​ມະ­ນີ ຕ້ອນ­ຮັບ​ຄະ­ນະ​ຜູ້​ແທນ​ສຳ­ນັກ­ງານກວດ​ສອບ​ແຫ່ງ​ຊາດ ສປ ຈີນ

01.11.2019 8:52     

   ທ່ານ ບຸນ​ທອງ ຈິດ​ມະນີ ກໍາ​ມະ​ການ​ກົມ​ການເມືອງສູນ​ ກາງ​ພັກ ຄະນະເລຂາທິການ ​ສູນ​ກາງ​ພັກ ຮອງ​ນາຍົກລັດ ຖະມົນຕີ ປະທານ​ຄະນະ​ກວດ ກາ​ສູນ​ກາງ​ພັກ ແລະ ອົງການ​ກວດກາ​ລັດຖະບານ ຫົວໜ້າ​ອົງການ​ຕ້ານ​ການ​ສໍ້​ລາດ​ບັງ​ຫຼວງ​ຂັ້ນ​ສູນ​ກາງ ໄດ້​ຕ້ອນຮັບ​ການ​ເຂົ້າ​ຢ້ຽມ​ຂໍ່າ​ນັບຂອງ​ທ່ານ ຫ້າວ ຊູ່​ເຊີນ ຮອງ​ປະທານສໍາ​ນັກ​ງານ​ກວດ​ສອບ​ແຫ່ງ​ຊາດ ສປ ຈີນ ພ້ອມ​ດ້ວຍ​ຄະນະໃນຕອນ​ ແລງ​ວັນ​ທີ 31 ຕຸລາ​ຜ່ານ​ມາ ໃນ​ໂອກາດ​ທີ່​ເດີນທາງ​ມາ​ຢ້ຽມ ຢາມ​ ແລະ ​ເຮັດ​ວຽກ​ຢູ່ ສປປ ລາວ ໃນ​ລະຫວ່າງ​ວັນ​ທີ 30 ຕຸລາ ຫາ ວັນ​ທີ 2 ພະຈິກ​ ເພື່ອ​ຈັດ​ຕັ້ງ​ຜັນ​ຂະຫຍາຍ​ເນື້ອ​ໃນ​ບົດ​ບັນທຶກ​ຄວາມ​ເຂົ້າໃຈ​ການ​ຮ່ວມ​ມື​ສອງ​ຝ່າຍ ລະຫວ່າງ​ອົງການ​ກວດ​ສອບ​ແຫ່ງ​ລັດ ສປປ ລາວ ແລະ ສໍາ​ນັກ​ງານ​ກວດ​ສອບ​ແຫ່ງ​ຊາດ ສປ ຈີນ. ໃນ​ໂອກາດ​ເຂົ້າ​ຢ້ຽມ​ຂາໍ່ນັບ​ຄັ້ງ​ນີ້ ຊຶ່ງ​ກ່ອນ​ອື່ນ​ທ່ານ ຫ້າວ ຊູ່​ເຊີນ ໄດ້​ລາຍ​ງານ​ການເຄື່ອນໄຫວ​ເຮັດ​ວຽກ​ຮ່ວມ​ກັບ​ອົງການ​ກວດ​ສອບ​ແຫ່ງ​ລັດ ສປປ ລາວ ຊຶ່ງ​ຈຸດ​ປະ​ສົງ ເພື່ອ​ເປັນ​ການ​ເສີມ​ຂະຫຍາຍ​ສາຍ​ພົວພັນ, ເປັນ​ການ​ທົບ​ທວນ​ການ​ປະຕິບັດ​ວຽກ​ງານ​ຮ່ວມ​ມື​ໄລຍະ​ຜ່ານ​ມາ ລວມ​ທັງ​ປຶກສາ​ຫາລື ກ່ຽວ​ກັບ​ທິດ​ທາງ​ແຜນການ​ຮ່ວມ​ມື​ ໃນ​ຂົງເຂດ​ວຽກ​ງານ​ການ​ກວດ​ສອບຂອງ​ທັງ​ສອງ​ຝ່າຍ​ໃນຕໍ່ໜ້າ ໂດຍສະເພາະແມ່ນ​ການ​ຍົກ​ລະດັບ​ຂີດ​ຄວາມ​ສາ ມາດຂອງ​ພະນັກ​ງານ​-​ນັກ​ກວດ​ສອບ ອົງການ​ກວດ​ສອບ​ແຫ່ງ​ລັດໃຫ້​ທ່ານ​ຮອງ​ນາຍົກ​ໄດ້​ຮັບ​ຊາບ.

   ຈາກ​ນັ້ນ ທ່ານ ບຸນ​ທອງ ຈິດ​ມະນີ ກໍໄດ້​ສະແດງ​ຄວາມ​ຍ້ອງຍໍ​ຊົມເຊີຍ ຕໍ່ຄະນະຜູ້ແທນ ສໍາ​ນັກ​ງານ​​ກວດ​ສອບແຫ່ງ ​ຊາດ ສປ ຈີນ ທີ່​ໄດ້ເດີນທາງ​ມາ​ເຄື່ອນ​ໄຫວ​ເຮັດ​ວຽກຢູ່ ສປປ ລາວ ອັນ​ເປັນ​ການ​ປະກອບ ສ່ວນ​ທີ່​ສໍາ​ຄັນ ​ໃນ​ການ​ເສີມ​ຂະ ຫຍາຍ​ສາຍ​ພົວພັນ​ແບບ​ຮ່ວມ​ມື​ຍຸດ​ທະ​ສາດ​ຮອບດ້ານ, ໝັ້ນຄົງ​ຍາວ​ນານໃຫ້​ແກ່ສອງ​ພັກ​-​ສອງ​ລັດ, ກໍ​ຄື​ປະຊາຊົນ 2 ຊາດ ລາວ-ຈີນ ໂດຍ​ສະເພາະແມ່ນ​ການ​ເພີ່ມ​ທະວີ​ສາຍ​ພົວພັນມິດ ຕະພາບ ແລະ ການ​ຮ່ວມ​ມື ລະຫວ່າງ​ອົງການ​ກວດ​ສອບ​ແຫ່ງ​ລັດ ສປປ ລາວ ແລະ ສໍາ​ນັກ​ງານ​ກວດ​ສອບ​ແຫ່ງ​ຊາດ ສປ ຈີນ ໃຫ້​ໄດ້​ຮັບ​ໝາກຜົນ​ອັນ​ດີ​ງາມ. (ຂ່າວ: ມີນາ)