ນາຍົກ ເຂົ້າຮ່ວມບັນດາກິດຈະກຳໃນກອງປະຊຸມສຸດຍອດ ສະເຫຼີມສະຫຼອງອາຊຽນ - ສ.ເກົາຫຼີ

26.11.2019 10:09     

   ໃນວັນທີ 24 ພະຈິກ ທີ່ ປູຊານ, ສ. ເກົາຫຼີ, ໃນໂອກາດເຂົ້າຮ່ວມກອງປະຊຸມສຸດຍອດ ອາຊຽນ-ສ.ເກົາຫຼີ ເພື່ອສະເຫຼີມສະຫຼອງສາຍພົວພັນ ອາຊຽນ-ສ.ເກົາຫຼີ ຄົບຮອບ 30 ປີ, ທ່ານ ທອງລຸນ ສີສຸລິດ ນາຍົກລັດຖະມົນຕີ ແຫ່ງ ສປປ ລາວ ພ້ອມດ້ວຍຄະນະ ໄດ້ເຂົ້າຮ່ວມພິທີວາງສີລາລືກໂຄງການເມືອງອັດສະລິຍະປູຊານ ຊຶ່ງເປັນໜຶ່ງໃນໂຄງການທົດລອງລະດັບຊາດຕົວເມືອງອັດສະລິຍະຂອງ ສ.ເກົາຫຼີ ແນໃສ່ສ້າງຕົວເມືອງທັນສະໄໝ ແລະ ເປັນມິດກັບສິ່ງແວດລ້ອມ. ເຂົ້າຮ່ວມພິທີວາງສີລາລືກຄັ້ງນີ້ ຍັງມີປະທານາທິບໍດີ ສ.ເກົາຫຼີ ແລະ ນາຍົກລັດຖະມົນຕີ ແຫ່ງ ສສ. ຫວຽດນາມ ແລະ ໄທ. ໃນຕອນເຊົ້າຂອງວັນທີ 25 ພະຈິກ 2019, ທ່ານ ທອງລຸນ ສີສຸລິດ ນາຍົກລັດຖະມົນຕີ ໄດ້ນຳພາຄະນະຜູ້ແທນລາວ ເຂົ້າຮ່ວມພິທີເປີດກອງປະຊຸມສຸດຍອດຜູ້ບໍລິຫານພາກທຸລະກິດ ອາຊຽນ-ສ.ເກົາຫຼີ ພາຍໃຕ້ຫົວຂໍ້ "ການຮ່ວມມື ແລະ ໜ້າວຽກໃນການບັນລຸຄວາມສົມບູນພູນສຸກຮ່ວມກັນ" ຊຶ່ງໃນກອງປະຊຸມນີ້, ບັນດານັກ ທຸລະກິດຂອງ ອາຊຽນ-ສ.ເກົາຫຼີ ໄດ້ປຶກສາຫາລື ແລະ ແລກປ່ຽນຄຳຄິດຄຳເຫັນ ແນໃສ່ຜັນຂະ ຫຍາຍສັນຍາເຂດການຄ້າເສລີ ອາຊຽນ-ສ.ເກົາຫຼີ ເພື່ອປະກອບສ່ວນເຂົ້າໃນການເພີ່ມທະວີການຄ້າ, ການລົງທຶນ ແລະ ທ່ອງທ່ຽວ ອາຊຽນ-ສ. ເກົາຫຼີ ໃຫ້ນັບມື້ນັບເພີ່ມຂຶ້ນໃນທ່າມກາງທີ່ສະພາບເສດຖະກິດໂລກຖົດຖອຍ ອັນເນື່ອງມາຈາກລັດທິປົກປ້ອງພາຍໃນ ແລະ ສົງຄາມການຄ້າໃນປັດຈຸບັນ. ຫຼັງຈາກນັ້ນ, ທ່ານ ທອງລຸນ ສີສຸລິດ ນາຍົກລັດຖະມົນຕີ ໄດ້ສືບຕໍ່ເຂົ້າຮ່ວມກອງປະຊຸມສຸດຍອດນະວັດຕະກຳທາງດ້ານວັດທະນະທຳ ອາຊຽນ-ສ.ເກົາຫຼີ ທີ່ແນໃສ່ປຶກສາຫາລືກ່ຽວກັບ ການສ້າງຄວາມສົມບູນພູນສຸກຮ່ວມກັນ ໃນຂະແໜງວັດທະນະທໍາ-ສັງຄົມ ລະຫວ່າງ ອາຊຽນ, ສ.ເກົາຫຼີ ເປັນຕົ້ນຂະແໜງ ສິລະປະ, ບັນເທີງ, ຮູບເງົາ ແລະ ອື່ນໆ. (ພາບ-ຂ່າວ: ກະຊວງການຕ່າງປະເທດ)