ງານວາງສະແດງເສດຖະກິດເຕັກນິກການຮ່ວມມື ແມ່ນ້ຳຂອງ - ແມ່ນຳ້ລ້ານຊ້າງ

26.11.2019 10:10     

   ພິທີເປີດງານວາງສະແດງເສດຖະກິດເຕັກນິກການຮ່ວມມືແມ່ນໍ້າຂອງ - ແມ່ນໍ້າລ້ານຊ້າງ ໄດ້ຈັດຂຶ້ນຢ່າງເປັນທາງການໃນວັນທີ 25 ພະຈິກ ນີ້ ທີ່ສູນການຄ້າລາວ-ໄອເຕັກ ໂດຍການເຂົ້າຮ່ວມຂອງ ທ່ານ ບຸນມີ ມະນີວົງ ຮອງລັດຖະມົນຕີກະຊວງອຸດສາຫະກຳ ແລະ ການຄ້າ ພ້ອມດ້ວຍທຸກພາກ ສ່ວນກ່ຽວຂ້ອງເຂົ້າຮ່ວມ. ທ່ານ ໄຊສົມເພັດ ນໍລະສິງ ຫົວໜ້າກົມສົ່ງເສີມການຄ້າ ໄດ້ຕາງໜ້າໃຫ້ກະຊວງອຸດສາຫະກຳ ແລະ ການຄ້າກ່າວເປີດງານວາງສະແດງວ່າ: ງານວາງສະແດງຄັ້ງນີ້ໄດ້ຈັດຂຶ້ນໃນລະຫວ່າງວັນທີ 25-28 ພະຈິກ ນີ້ ໂດຍການຮ່ວມມືລະຫວ່າງ ກົມສົ່ງເສີມການຄ້າ ກະຊວງອຸດສາຫະກຳ ແລະ ການຄ້າ, ສະພາສົ່ງເສີມການຄ້າສາກົນຈີນ, ສະພາການຄ້າ ແລະ ອຸດສາຫະກຳແຫ່ງຊາດລາວ ແລະ ສະພາການຄ້າສາກົນຈີນ ເພື່ອຜັນຂະຫຍາຍຍຸດທະສາດການເຊື່ອມໂຍງ ໃນກອບການຮ່ວມມື ແມ່ນໍ້າຂອງ - ແມ່ນໍ້າລ້ານຊ້າງ ແລະ ຕາມທິດໜຶ່ງແລວ ໜຶ່ງເສັ້ນທາງໃຫ້ປະກົດຜົນເປັນຮູບປະທໍາ ໂດຍມີເປົ້າໝາຍຫຼັກຂອງການຈັດງານເພື່ອສືບຕໍ່ເສີມສ້າງສາຍພົວພັນການຮ່ວມມືດ້ານເສດຖະກິດຂອງບັນດາປະເທດໃນກອບການຮ່ວມມື ແມ່ນໍ້າຂອງ - ແມ່ນໍ້າລ້ານຊ້າງ. ສະເພາະລາວ - ຈີນ ແລ້ວ, ງານຄັ້ງນີ້ ເປັນການສົ່ງເສີມການຄ້າໃຫ້ຂະຫຍາຍຕົວຢ່າງຕໍ່ເນື່ອງ, ເປີດໂອກາດໃຫ້ກັບພາກສ່ວນທຸລະກິດຂອງສອງປະເທດ ໄດ້ມີການສືບຕໍ່ແລກປ່ຽນຂໍ້ມູນຂ່າວສານຕ່າງໆ ເພື່ອຊຸກຍູ້ທາງດ້ານການຄ້າ, ການເຊື່ອມໂຍງ, ການຮ່ວມມືໃນປັດຈຸບັນ ແລະ ສຶກສາຄວາມເປັນໄປໄດ້ໃນການລົງທຶນຮ່ວມກັນໃນອະນາຄົດ. ທ່ານ ໄຊສົມເພັດ ນໍລະສິງ ຍັງກ່າວອີກວ່າ: ພາຍໃນງານໄດ້ເນັ້ນຄວາມເປັນເອກະລັກຂອງທຸລະກິດ ແລະ ການຄ້າ, ພິເສດແຕກຕ່າງຈາກງານອື່ນທີ່ຜ່ານມາ ເນື່ອງຈາກພາກສ່ວນທີ່ມາວາງສະແດງ ເນັ້ນສະເພາະມາຊອກຫາຄູ່ຮ່ວມລົງທຶນດ້ານການຄ້າ ແລະ ອຸດສາຫະກໍາທັນສະໄໝ, ງານດັ່ງກ່າວເນັ້ນໜັກໃສ່ການນໍາສະເໜີໝາກຜົນການຮ່ວມມືຂອງບັນດາບໍລິສັດ ແລະ ໂຄງການຈາກ ສປ ຈີນ ໄດ້ມາລົງທຶນໃນບັນດາປະເທດຕາມລຳແມ່ນໍ້າຂອງ ໂດຍສະ ເພາະແມ່ນ ສປປ ລາວ ໃນໄລ ຍະຜ່ານມາ ພ້ອມກັນນັ້ນ ໄດ້ວາງສະແດງຫຼາຍຜະລິດຕະພັນທີ່ໂດດເດັ່ນ, ມີຊື່ສຽງ ແລະ ມີຄວາມນໍາໜ້າທາງດ້ານເຕັກໂນໂລຊີໃໝ່ໆ. ທ່ານ ນາງ ສື ຕົງຫຼີ ຮອງຫົວໜ້າກົມສົ່ງເສີມການຄ້າ ແລະ ການລົງທຶນ ສະພາສົ່ງ ເສີມການຄ້າສາກົນ ສປ ຈີນ ກໍໄດ້ຂຶ້ນກ່າວໃນງານວາງສະ ແດງດັ່ງກ່າວວ່າ: ງານວາງສະ ແດງການຮ່ວມມືແມ່ນຳ້ຂອງ - ແມ່ນໍ້າລ້ານຊ້າງ ໄດ້ຈັດຂຶ້ນທຸກປີ ໂດຍໝູນວຽນການເປັນເຈົ້າພາບຂອງ 6 ປະເທດໃນກອບການຮ່ວມມື ຄື: ສປ ຈີນ, ມຽນມາ, ໄທ, ສປປ ລາວ, ກຳປູເຈຍ ແລະ ຫວຽດນາມ ຊຶ່ງປີນີ້ເປັນປີທີ 4 ແລະ ປີນີ້ສ່ວນຫຼາຍແມ່ນພາກທຸລະກິດທີ່ມີຊື່ສຽງຂອງຈີນເຂົ້າຮ່ວມວາງສະແດງເຊັ່ນ: ດາວທຽມ, ພື້ນຖານໂຄງລາງ, ການຄົມມະນາຄົມ, ພະລັງງານ, ໄຟຟ້າ, ເຄື່ອງກໍ່ສ້າງ ແລະ ອື່ນໆ ຖືວ່າງານຄັ້ງນີ້ເປັນໂອກາດສຳຄັນໃນການແລກປ່ຽນເພື່ອຊອກຫາໂອກາດການຮ່ວມມືຊຶ່ງກັນ ແລະ ກັນ ເພື່ອຍາດແຍ່ງເອົາໝາກຜົນຂອງການຮ່ວມ ມືໃຫ້ໄດ້ຫຼາຍທີ່ສຸດ. (ພາບ - ຂ່າວ: ສຸກສະຫວັນ)