ປະທານ ສນຊ ຕ້ອນຮັບຄະນະຜູ້ແທນ ສະພາສັນຕິພາບໂລກ

27.11.2019 9:26     

   ໃນວັນທີ 26 ພະຈິກ ນີ້ ທີ່ສູນກາງແນວລາວສ້າງຊາດ, ທ່ານ ໄຊສົມພອນ ພົມວິຫານກຳມະການກົມການເມືອງສູນກາງພັກ ປະທານສູນກາງແນວລາວສ້າງຊາດ (ສນຊ) ໄດ້ໃຫ້ກຽດຕ້ອນຮັບການເຂົ້າຢ້ຽມຂ່ຳນັບ ຂອງ ທ່ານ ນາງ ໂຊໂກໂຣ ໂກເມສ ປະທານສະພາສັນຕິພາບໂລກ ພ້ອມດ້ວຍຄະນະຜູ້ແທນອົງການສັນຕິພາບໃນພາກພື້ນອາຊີ- ປາຊີຟິກ ໃນໂອກາດທີ່ຄະນະຜູ້ແທນດັ່ງກ່າວ ມາຮ່ວມກອງປະຊຸມຂົງເຂດອາຊີ-ປາຊີຟິກ ແລະ ກອງປະຊຸມ ຄະນະເລຂາ ຂອງສະພາສັນຕິພາບໂລກ ທີ່ ຄະນະສັນຕິພາບ ແລະ ສາ ມັກຄີ ຂອງ ລາວ ເປັນເຈົ້າພາບຈັດ ຂຶ້ນຢູ່ນະຄອນຫຼວງວຽງຈັນ, ສປປ ລາວ ແຕ່ວັນທີ 24-26 ພະຈິກ 2019. ໃນໂອກາດດັ່ງກ່າວ ທ່ານ ໄຊສົມພອນ ພົມວິຫານ ໄດ້ສະແດງຄວາມຍິນດີຕ້ອນຮັບຢ່າງອົບອຸ່ນ ພ້ອມທັງສະແດງຄວາມຂອບໃຈຕໍ່ສະພາສັນຕິ ພາບໂລກ ແລະ ອົງການຈັດຕັ້ງສັນຕິພາບຂົງເຂດ ແລະ ພາກພື້ນ ທີ່ໄວ້ເນື້ອເຊື່ອໃຈ ແລະ ເລືອກເອົາ ສປປ ລາວ ເປັນບ່ອນຈັດກອງປະຊຸມທີ່ສຳຄັນຂອງ ສະພາສັນຕິພາບໂລກໃນຄັ້ງນີ້, ຊຶ່ງເປັນການປະກອບສ່ວນສຳຄັນ ເຂົ້າໃນການເຄື່ອນໄຫວວຽກງານລວມຂອງ ສະພາສັນຕິພາບໂລກ ກໍຄືການປະກອບສ່ວນເສີມສ້າງສັນຕິພາບໃນພາກພື້ນ ແລະ ໃນໂລກ. ທ່ານໄດ້ກ່າວຕື່ມວ່າ: ປະຊາຊົນລາວ ເຄີຍໄດ້ຮັບຜົນກະທົບອັນໜັກໜ່ວງ ຈາກສົງຄາມທຳລາຍຂອງ ພວກຮຸກຮານຕ່າງດ້າວມາເປັນເວລາຫຼາຍທົດສະວັດ, ສປປ ລາວ ໄດ້ຮັບຮູ້ຢ່າງເລິກເຊິ່ງເຖິງຄຸນຄ່າຂອງສັນຕິພາບ, ອິດສະຫຼະພາບ ແລະ ພ້ອມທີ່ຈະປະກອບສ່ວນຕາມເງື່ອນໄຂ, ກຳລັງ ແລະ ຄວາມສາມາດຂອງຕົນ ຮ່ວມກັບປະຊາຄົມໂລກ ໃນການປົກປັກຮັກສາສັນຕິພາບ, ຄວາມໝັ້ນຄົງ ແລະ ເສີມຂະຫຍາຍຄວາມສາມັກຄີສາກົນ ເພື່ອການດຳລົງຊີວິດໃນເງື່ອນໄຂສັນຕິພາບ. ພ້ອມນີ້, ຍັງໄດ້ສະແດງຄວາມຊົມເຊີຍ ແລະ ຕີລາຄາສູງຕໍ່ບົດບາດ ແລະ ການເຄື່ອນໄຫວຂອງສະພາສັນຕິພາບໂລກ ໃນໄລຍະຜ່ານມາ, ເປັນເຈົ້າການນຳພາບັນດາອົງການຈັດຕັ້ງສັນຕິພາບໃນຂົງເຂດ, ພາກພື້ນ ທີ່ເຄື່ອນໄຫວປະກອບສ່ວນເສີມສ້າງ ສັນຕິພາບ ແລະ ຄວາມໝັ້ນ ຄົງໃນສາກົນ ແລະ ຍັງໄດ້ຊົມເຊີຍຕໍ່ບັນດາອົງການຈັດຕັ້ງສັນຕິພາບຂອງແຕ່ລະປະເທດ ທີ່ໄດ້ປະກອບສ່ວນໃນການເຄື່ອນໄຫວຕາມຈຸດພິເສດ ແລະ ເງື່ອນໄຂຕົວຈິງຂອງຕົນ, ຊຶ່ງໄດ້ເປັນກຳລັງແຮງສັງລວມເພື່ອປົກປ້ອງສັນຕິພາບ. ທ່ານ ນາງ ໂຊໂກໂຣ ໂກເມສ ໄດ້ຕາງໜ້າໃຫ້ຄະນະຜູ້ແທນ ກ່າວສະແດງຄວາມຂອບໃຈ ຕໍ່ ທ່ານ ໄຊສົມພອນ ພົມວິຫານ ທີ່ໄດ້ໃຫ້ການຕ້ອນຮັບຄະນະຢ່າງອົບອຸ່ນ ແລະ ໄດ້ລາຍງານກ່ຽວກັບຜົນສຳເລັດການຈັດຕັ້ງກອງປະຊຸມຂອງສະພາສັນຕິພາບໂລກ ຢູ່ນະຄອນຫຼວງວຽງຈັນ ພ້ອມທັງການເຄື່ອນໄຫວຂອງສະພາສັນຕິພາບໂລກ ແລະ ອົງການສັນຕິພາບພາກພື້ນໃນໄລຍະຜ່ານມາ ຊຶ່ງເປັນການປະກອບສ່ວນເສີມສ້າງສັນຕິພາບ ແລະ ຄວາມໝັ້ນຄົງຕາມພາລະບົດບາດ. ພ້ອມນີ້ ຍັງໄດ້ສະແດງຄວາມຂອບໃຈ ສປປ ລາວ ທີ່ໄດ້ເປັນເຈົ້າພາບຈັດກອງປະຊຸມສຳຄັນຂອງ ສະພາສັນຕິພາບໂລກໃນຄັ້ງນີ້ ຖືເປັນການປະກອບສ່ວນສຳຄັນຕໍ່ວຽກງານລວມຂອງສະພາສັນຕິພາບໂລກ ແລະ ໄດ້ອວຍພອນໃຫ້ປະຊາ ຊົນລາວມີຜົນສຳເລັດໃນການພັດທະນາປະເທດຊາດ. (ພາບ - ຂ່າວ: ສຸກສະຫວັນ)