ນາຍົກເຮົາ ເຂົ້າຮ່ວມກອງປະຊຸມສຸດຍອດ ເພື່ອສະຫຼອງການພົວພັນອາຊຽນ-ສ.ເກົາຫຼີ ຄົບຮອບ 30 ປີ

28.11.2019 9:27     

   ໃນວັນທີ 26 ພະຈິກຜ່ານມາ ພະນະທ່ານ ທອງລຸນ ສີສຸລິດ ນາຍົກລັດຖະມົນຕີ ແຫ່ງ ສປປ ລາວ ໄດ້ສືບຕໍ່ນຳພາຄະນະເຂົ້າຮ່ວມກອງປະຊຸມສຸດຍອດ ເພື່ອສະເຫຼີມສະຫຼອງການພົວພັນອາຊຽນ-ສ.ເກົາຫຼີ ຄົບຮອບ 30 ປີ ທີ່ປູຊານ ສ.ເກົາຫຼີ ພາຍໃຕ້ການເປັນປະທານຮ່ວມຂອງພະນະທ່ານ ມູນ ແຈ ອິນ ປະທານາທິບໍດີ ສ.ເກົາຫຼີ ແລະ ພະນະທ່ານ ພົນເອກ ປຣະຢຸດ ຈັນໂອຊາ ນາຍົກລັດຖະມົນຕີ ແຫ່ງ ຣາຊະອານາຈັກໄທ. ກອງປະຊຸມຄັ້ງນີ້, ຜູ້ນຳອາຊຽນ ແລະ ສ.ເກົາຫຼີ ໄດ້ລົງເລິກປຶກສາຫາລືກັນ 3 ຫົວຂໍ້: ທົບທວນຄືນການຮ່ວມມື 30 ປີຜ່ານມາ ແລະ ທິດທາງໃນ ຕໍ່ໜ້າ; ຮັດແໜ້ນການເຊື່ອມຈອດ ເພື່ອຄວາມສົມບູນພູນສຸກ ແລະ ຍືນຍົງ ແລະ ບັນຫາແຫຼມເກົາຫຼີ. ບັນດາຜູ້ນຳໄດ້ຕີລາຄາສູງຕໍ່ຜົນການຮ່ວມມືອາຊຽນ- ສ. ເກົາຫຼີ ໄລຍະ 30 ປີ ຜ່ານມາ, ຊຶ່ງສະແດງອອກ ໃນຜົນສຳເລັດຂອງການຈັດຕັ້ງປະຕິບັດແຜນປະຕິບັດງານອາຊຽນ-ສ.ເກົາຫຼີ ໄລຍະ 2016-2020 ແລະ ການເຊື່ອມສານລະຫວ່າງແຜນວິ ໄສທັດອາຊຽນ 2025 ແລະ ແຜນນະ ໂຍບາຍສູ່ໃຕ້ໃໝ່ຂອງ ສ.ເກົາຫຼີ ອັນໄດ້ເຮັດໃຫ້ການ ຮ່ວມມືກ້າວເຂົ້າສູ່ລວງເລິກ ແລະ ກວມເອົາ 3 ເສົາຄ້ຳປະຊາຄົມອາຊຽນ (ການເມືອງ-ຄວາມໝັ້ນຄົງ, ເສດຖະກິດ ແລະ ວັດທະນະທຳ-ສັງຄົມ). ສຳລັບທິດທາງໃນຕໍ່ໜ້າຜູ້ນຳອາຊຽນ ແລະ ສ.ເກົາຫຼີ ຕົກລົງ: ເສົາຄ້ຳການເມືອງ-ຄວາມໝັ້ນຄົງ, ສ.ເກົາຫຼີ ຢືນຢັນຈະສືບຕໍ່ສະໜັບສະໜູນຄວາມເປັນແກນກາງຂອງອາຊຽນ ແລະ ບັນດາກົນໄກທີ່ອາຊຽນເປັນຜູ້ນຳພາເຊັ່ນ: ອາຊຽນ+1, ອາຊຽນ+3, ເອອາເອັຟ, ອີເອເອັສ ແລະ ອື່ນໆ. ພ້ອມນີ້, ຍັງເຫັນດີຕໍ່ການກະກຽມຮ່າງແຜນປະຕິບັດງານການຮ່ວມມືອາຊຽນ -ສ.ເກົາຫຼີ ສະບັບໃໝ່ 2021-2025 ເພື່ອໃຫ້ສາມາດຮັບຮອງເອົາໃນປີ 2020. ເສົາຄ້ຳເສດຖະກິດ, ສ.ເກົາຫຼີ ຍິນດີຈະສືບຕໍ່ຊ່ວຍເຫຼືອການ ຈັດຕັ້ງແຜນແມ່ບົດການເຊື່ອມຈອດອາຊຽນ 2025 (MPAC 2025) ໂດຍສະເພາະການກໍ່ສ້າງພື້ນຖານໂຄງລ່າງ ແລະ ລະບຽບການລວມທັງການເຊື່ອມຈອດທາງອາກາດ ແລະ ແຜນປະຕິບັດງານໄອເອໄອ ສະ ບັບທີ 3 ເລັ່ງໃສ່ຫຼຸດຜ່ອນຄວາມແຕກໂຕນດ້ານການພັດທະນາພາຍໃນອາຊຽນ ພ້ອມນີ້, ໄດ້ເຫັນດີໃນການສືບຕໍ່ຮັດແໜ້ນການຮ່ວມມືດ້ານການຄ້າ, ການລົງທຶນ ແລະ ການທ່ອງທ່ຽວ ດ້ວຍການຈັດຕັ້ງປະຕິບັດເຂດການຄ້າເສລີ ອາຊຽນ-ສ.ເກົາຫຼີ ເພື່ອໃຫ້ສາມາດບັນລຸໄດ້ມູນຄ່າການຄ້າ 200 ຕື້ໂດລາ ໃນປີ 2020 ແລະ ສືບຕໍ່ເຈລະຈາສັນຍາການເປັນຄູ່ຮ່ວມເສດຖະ ກິດຮອບດ້ານຢູ່ລະດັບພາກພື້ນ ຫຼື ອາຊີອີພີ ໃຫ້ສຳເລັດ ແລະ ສາມາດລົງນາມນຳກັນໄດ້ໃນຕົ້ນປີ 2020. ນອກຈາກນີ້, ບັນດາຜູ້ນຳໄດ້ເຫັນດີຈະສືບຕໍ່ຮ່ວມມືກັນໃນບາງບັນດາຂົງເຂດບຸລິມະສິດຄື: ກະກຽມທາງດ້ານບຸກຄະລາກອນ ແລະ ໂຄງລ່າງຂໍ້ມູນຂ່າວສານກໍຄືຈຸລະທຸລະກິດ, ທຸລະກິດຂະໜາດນ້ອຍ ແລະ ກາງ ເພື່ອຮັບມືກັບຄວາມກ້າວໜ້າທາງດ້ານເຕັກໂນໂລຊີ ແລະ ເພື່ອກ້າວໄປສູ່ ເສດຖະກິດດີຈີຕອນ, ການປະ ຕິວັດອຸດສາຫະກຳ 4.0, ການຄ້າອີເລັກໂຕຣນິກ ແລະ ທຸລະກິດ ແລະ ນະວັດຕະກຳໃໝ່ (Startups ແລະ Innovation). ເສົາຄ້ຳວັດທະນະທຳ-ສັງ ຄົມ, ບັນດາຜູ້ນຳຈະສືບຕໍ່ຮັດແໜ້ນການຮ່ວມມືດ້ານການ ໄປມາຫາສູ່ລະຫວ່າງປະຊາຊົນ ກັບປະຊາຊົນ ແນໃສ່ສົ່ງເສີມການທ່ອງທ່ຽວ (ໃຫ້ບັນລຸໄດ້ ຈຳນວນນັກທ່ອງທ່ຽວໄປຢ້ຽມ ຢາມຊຶ່ງກັນ ແລະ ກັນ 15 ລ້ານຄົນ ໃນປີ 2020), ການແລກປ່ຽນວັດທະນະທຳ, ໂຄງການແລກ ປ່ຽນລະຫວ່າງຊາວໜຸ່ມ ແລະ ການສະໜອງທຶນການສຶກສາໄລຍະຍາວ (ຈະເພີ່ມຂຶ້ນສອງເທົ່າໃນປີ 2022). ພ້ອມນີ້, ຈະສືບຕໍ່ຮ່ວມມືກັນ ເພື່ອຮັບມືກັບສະພາບການປ່ຽນແປງດິນຟ້າອາກາດ, ໄພທຳມະຊາດ, ການກໍ່ການຮ້າຍ, ອາຊະຍາກຳຂ້າມຊາດ ແລະ ຄວາມໝັ້ນຄົງທາງໄຊເບີ. ຄຽງຄູ່ກັນນີ້, ບັນດາຜູ້ນຳໄດ້ແລກປ່ຽນຄຳຄິດຄຳເຫັນຕໍ່ບັນຫາແຫຼມເກົາຫຼີ ຊຶ່ງໄດ້ເຫັນດີຈະສືບຕໍ່ຮ່ວມມື ແລະ ແກ້ໄຂບັນຫາແຫຼມເກົາຫຼີດ້ວຍສັນຕິວິທີ ແລະ ການເຈລະຈາທາງການທູດ ແນໃສ່ສ້າງຄວາມເຊື່ອໝັ້ນ ແລະ ຄວາມໝັ້ນໃຈຂອງບັນດາຝ່າຍທີ່ກ່ຽວຂ້ອງ ແລະ ຜັນຂະຫຍາຍຍັດຕິຂອງສະພາຄວາມໝັ້ນຄົງ ສປຊ ພ້ອມນີ້, ໄດ້ສະເໜີໃຫ້ສືບຕໍ່ດຶງດູດ ສປປ ເກົາຫຼີ ເຂົ້າຮ່ວມກົນໄກທີ່ອາຊຽນນຳພາ ເປັນຕົ້ນເວທີປຶກສາຫາລືພາກພື້ນອາຊຽນ (ເອອາເອັຟ). ກອງປະຊຸມສຸດຍອດສະ ເຫຼີມສະຫຼອງການພົວພັນອາຊຽນ-ສ.ເກົາຫຼີ ຄົບຮອບ 30 ປີ ຄັ້ງນີ້, ບັນດາຜູ້ນຳອາຊຽນໄດ້ຮັບຮອງເອົາ 2 ເອກະສານຄື: ຖະແຫຼງການຮ່ວມຜູ້ນຳອາຊຽນ -ສ.ເກົາຫຼີ ສະເຫຼີມສະຫຼອງ 30 ປີ ແລະ ຖະແຫຼງການປະທານຮ່ວມ. (ຂ່າວ: ກົມການຂ່າວ)