ລາວ-ບຣາຊິນ ສືບຕໍ່ພົວພັນຮ່ວມມື

28.11.2019 9:27     

   ທ່ານ ນາງ ສູນທອນ ໄຊຍະຈັກ ກໍາມະການສູນກາງພັກ ຫົວໜ້າຄະນະພົວພັນການຕ່າງປະເທດສູນກາງພັກ ໄດ້ຕ້ອນຮັບການເຂົ້າຢ້ຽມຂາໍ່ນັບຂອງທ່ານນາງ ມາເຣຍ ໂດ ໂຊໂກໂຣ ໂກເມັສ ໂກເອໂລ ກໍາມະການຄະນະບໍລິຫານງານສູນກາງພັກກອມມູນິດບຣາຊິນ ປະທານສະພາສັນຕິພາບໂລກ ໃນວັນທີ 27 ພະຈິກນີ້ ທີ່ສຳນັກງານຄະນະພົວພັນການຕ່າງປະເທດສູນກາງພັກ ເນື່ອງໃນໂອກາດທີ່ມາເຂົ້າຮ່ວມກອງປະຊຸມສະພາສັນຕິພາບໂລກ ລະຫວ່າງວັນທີ 24-26 ພະຈິກ ທີ່ ສປປ ລາວ ເປັນເຈົ້າພາບ. ໃນໂອກາດດັ່ງກ່າວ, ທ່ານນາງ ສູນທອນ ໄຊຍະຈັກ ໄດ້ສະແດງຄວາມຊົມເຊີຍ ແລະ ຕີລາຄາສູງຕໍ່ການມາຢ້ຽມຢາມແລະ ເຂົ້າຮ່ວມກອງປະຊຸມໃນຄັ້ງນີ້ ຂອງທ່ານນາງມາເຣຍ ໂດ ໂຊໂກໂຣ ໂກເມັສ ໂກເອໂລ ພ້ອມທັງໄດ້ຊົມເຊີຍຕໍ່ຜົນສໍາເລັດອັນຈົບງາມໃນການດໍາເນີນກອງປະຊຸມ ສະພາສັນຕິພາບໂລກ ພາກພື້ນອາຊີ-ປາຊີຟິກ ແລະກອງປະຊຸມຂອງກອງເລຂາສະພາສັນຕິພາບໂລກ. ທ່ານ ນາງ ສູນທອນ ໄຊຍະຈັກ ຍັງໄດ້ສະແດງຄວາມປິຕິຍິນດີ ທີ່ມີໂອກາດພົບປະກັບ ທ່ານນາງມາເຣຍ ໂດ ໂຊໂກໂຣ ໂກເມັສ ໂກເອໂລ ຊຶ່ງເປັນການປະກອບສ່ວນສໍາຄັນ ໃນການຊຸກຍູ້ ແລະ ສົ່ງເສີມສາຍພົວພັນລະຫວ່າງ ສອງພັກ,ສອງລັດ ກໍຄື ປະຊາຊົນທັງສອງປະເທດ ລາວ-ບຣາຊິນ ໃຫ້ນັບມື້ນັບແໜ້ນແຟ້ນ; ຈາກນັ້ນ, ໄດ້ແຈ້ງສະພາບການທີ່ພົ້ນເດັ່ນຂອງສປປ ລາວ ໃນໄລຍະມໍ່ໆນີ້ ໃຫ້ກັບຄະນະຜູ້ແທນໄດ້ຮັບຊາບ ໂດຍສະເພາະແມ່ນການຈັດຕັ້ງປະຕິບັດກອງປະຊຸມໃຫຍ່ ຄັ້ງທີ X ຂອງພັກ ແລະ ການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມແຫ່ງຊາດ 5 ປີ ຄັ້ງທີ VII ແລະ ໄດ້ແລກປ່ຽນ ທັດສະນະຕໍ່ສະຖານະການພາກພື້ນ ແລະ ສາກົນ ທີ່ສອງຝ່າຍໃຫ້ຄວາມສົນໃຈ ພ້ອມທັງໄດ້ຕີລາຄາສູງມູນເຊື້ອແຫ່ງການພົວພັນ ລະຫວ່າງ ສອງພັກ ໃນຕະຫຼອດໄລຍະຫຼາຍປີຜ່ານມາ ແລະ ສະແດງຄວາມຫວັງວ່າ ສອງພັກ ຈະສືບຕໍ່ຮ່ວມມືກັນໃນເວທີພາກພື້ນ ແລະ ສາກົນ ເພື່ອນໍາເອົາຜົນປະໂຫຍດຂອງສອງພັກ, ສອງປະເທດລາວ-ບຣາຊິນ ກໍຄື ເພື່ອສັນຕິພາບ ແລະ ການຮ່ວມມືໃນພາກພື້ນ ແລະ ສາກົນ. ທ່ານນາງ ມາເຣຍ ໂດ ໂຊໂກໂຣ ໂກເມັສ ໂກເອໂລ,ໄດ້ສະແດງຄວາມຂອບໃຈຢ່າງຈິງໃຈມາຍັງ ທ່ານນາງສູນທອນ ໄຊຍະຈັກ ທີ່ໄດ້ໃຫ້ການຕ້ອນຮັບອັນອົບອຸ່ນ, ສະແດງຄວາມດີໃຈທີ່ໄດ້ມີໂອກາດຢ້ຽມຢາມ ແລະເຂົ້າຮ່ວມກອງປະຊຸມສາກົນຂອງສະພາສັນຕິພາບໂລກຢູ່ ສປປ ລາວ ແລະ ໄດ້ມາເຫັນບັນດາຜົນສໍາເລັດອັນໃຫຍ່ຫຼວງຂອງປະຊາຊົນລາວ ໃນຕະຫຼອດຫຼາຍປີຜ່ານມາ ພ້ອມທັງໄດ້ແຈ້ງໃຫ້ຊາບກ່ຽວກັບຜົນສໍາເລັດອັນພົ້ນເດັ່ນຂອງພັກກອມມູນິດບຣາຊິນ ໃນໄລຍະທ້າຍຊຸມປີຫຼັງໆມານີ້ ໂດຍສະເພາະແມ່ນຜົນສໍາເລັດ ໃນການຈັດຕັ້ງປະຕິບັດ ກອງປະຊຸມໃຫຍ່ ຄັ້ງທີ 14 ຂອງພັກ, ໄດ້ຕີລາຄາສູງມູນເຊື້ອການພົວພັນລະຫວ່າງພັກກອມມູນິດບຣາຊິນ ແລະ ພັກປະຊາຊົນປະຕິວັດລາວ ໃນໄລຍະຜ່ານມາ ແລະ ໄດ້ອວຍພອນໃຫ້ພັກ,ລັດກໍຄືປະຊາຊົນລາວ ຈົ່ງໄດ້ຮັບຜົນສໍາເລັດໃໝ່ໃຫຍ່ຫຼວງກວ່າເກົ່າ ໃນພາລະກິດປົກປັກຮັກສາ ແລະສ້າງສາພັດທະນາປະເທດຊາດ ແລະ ຈັດຕັ້ງປະຕິບັດມະຕິກອງປະຊຸມໃຫຍ່ຄັ້ງທີ X ຂອງພັກໃຫ້ປະກົດຜົນເປັນຈິງ ແລະ ກ້າວເຂົ້າສູ່ກອງປະຊຸມໃຫຍ່ຄັ້ງທີ XI ຂອງພັກຢ່າງມີຜົນສຳເລັດ. (ຂ່າວ: ຄຕພ-ພາບ: ພູວຽງຄຳ)