ລາວ-ສີລັງກາ ເສີມສ້າງສາຍພົວພັນ ມິດຕະພາບ

29.11.2019 9:50     

   ສະຫາຍ ນາງ ສູນທອນ ໄຊຍະຈັກ ກຳມະການສູນກາງພັກ ຫົວໜ້າຄະນະພົວພັນຕ່າງປະເທດສູນກາງພັກ ໄດ້ຕ້ອນຮັບ ສະຫາຍ ບິມານ ຣັດນາຢາເກີ (Bimal Rathnayake) ກໍາມະການກົມການເມືອງ ຜູ້ສ້າງຕັ້ງແຫ່ງຊາດຂອງພັກແນວໂຮມປົດປ່ອຍປະຊາຊົນສີລັງກາ (People's Liberation Front (JVP), ໃນວັນທີ 27 ພະ ຈິກຜ່ານມາ ທີ່ຄະນະພົວພັນການຕ່າງປະເທດສູນກາງພັກ, ໃນໂອກາດມາເຄື່ອນໄຫວເຂົ້າຮ່ວມກອງປະຊຸມ ຂົງເຂດອາຊີ - ປາຊີຟິກ ແລະ ກອງປະຊຸມກອງເລຂາສະພາສັນຕິພາບໂລກ ທີ່ ສປປ ລາວ ເປັນເຈົ້າພາບແຕ່ວັນທີ 24 - 26 ພະຈິກ 2019 . ໃນການພົບປະຄັ້ງນີ້, ສະຫາຍ ນາງ ສູນທອນ ໄຊຍະຈັກ ໄດ້ຕາງໜ້າໃຫ້ສູນກາງພັກ ປປ ລາວ ສະແດງຄວາມຍິນດີຕ້ອນຮັບ ແລະ ຕີລາຄາສູງຕໍ່ການມາຢ້ຽມຢາມ ສປປ ລາວ ຂອງ ສະຫາຍ ບິມານ ຣັດນາຢາເກີ ຊຶ່ງເປັນການປະກອບສ່ວນອັນສຳຄັນເຂົ້າໃນການ ເພີ່ມພູນຄູນສ້າງສາຍພົວພັນມິດ ຕະພາບ ແລະ ການຮ່ວມມື ລະຫວ່າງ ສອງພັກ, ສອງລັດ ແລະ ປະຊາຊົນສອງຊາດ ສປປ ລາວ-ສີລັງກາ ໃຫ້ນັບມື້ນັບເລິກເຊິ່ງ ແລະ ກ້ວາງຂວາງຂື້ນ, ພ້ອມທັງໄດ້ແຈ້ງສະພາບການໂດຍຫຍໍ້ ຂອງ ພັກ ປປ ລາວ ແລະ ຜົນສຳເລັດການພັດທະນາເສດຖະກິດ - ສັງຄົມ ຂອງ ສປປ ລາວ ໃນປັດຈຸບັນ ແລະ ໄດ້ຕີລາຄາມູນເຊື້ອການພົວພັນສາຍພົວພັນລະຫວ່າງ ພັກປປ ລາວ ກັບ ພັກແນວໂຮມປົດປ່ອຍປະຊາຊົນສີລັງກາ ໃນໄລຍະຜ່ານມາ ແລະ ສະແດງຄວາມຫວັງວ່າການພົວພັນສອງຝ່າຍຈະສືບຕໍ່ເສີມຂະຫຍາຍໃນຕໍ່ໜ້າ. ທ່ານ ບິມານ ຣັດນາຢາເກີ ໄດ້ສະແດງຄວາມຂອບໃຈຢ່າງສູງຕໍ່ການຕ້ອນຮັບອັນອົບອຸ່ນ, ສະໜິດສະໜົມຂອງ ສະຫາຍຫົວໜ້າ ຄະນະພົວພັນຕ່າງປະເທດສູນກາງພັກ ພ້ອມທັງໄດ້ສະແດງຄວາມຊົມເຊີຍຕໍ່ຜົນສຳເລັດອັນໃຫຍ່ຫຼວງຮອບດ້ານ ທີ່ປະຊາຊົນລາວ ຍາດ ມາໄດ້ ຕະຫຼອດໄລຍະທີ່ຜ່ານມາ ແລະ ສະແດງຄວາມ ເຊື່ອໝັ້ນວ່າ ພາຍໃຕ້ການ ນຳພາອັນສະຫຼາດສ່ອງໃສ ຂອງພັກ ປປ ລາວ ອັນມີ ສະຫາຍ ບຸນຍັງ ວໍລະຈິດ ເປັນຜູ້ນຳໜ້ານັ້ນ, ປະຊາຊົນລາວ ຈະສາມາດຍາດໄດ້ຜົນສຳເລັດອັນໃໝ່ໃຫຍ່ຫລວງກວ່າເກົ່າ ໃນພາລະກິດແຫ່ງການປົກປັກຮັກສາ ແລະ ສ້າງສາພັດທະນາປະເທດຊາດຂອງຕົນ ແລະ ສະຫາຍຍັງໄດ້ແຈ້ງໃຫ້ຝ່າຍລາວຊາບສະພາບການອັນພົ້ນເດັ່ນຂອງ ປະເທດ ສີລັງກາ ກໍຄືການເຄື່ອນໄຫວຂອງພັກແນວໂຮມປົດປ່ອຍປະຊາຊົນສີລັງກາ. (ຂ່າວ: ຄຕພ - ພາບ: ພູວຽງຄຳ)