ນາ­ຍົກ­ລັດ­ຖະ­ມົນ­ຕີ ເຂົ້າ​ຮ່ວມ​ກອງ​ປະ­ຊຸມ​ສຸດ​ຍອດ​ອາ​ຊຽນ ຄັ້ງ​ທີ 35 ທີ່​ປະ­ເທດ​ໄທ

04.11.2019 8:52     

   ທ່ານ ທອງ​ລຸນ ສີ​ສຸ​ລິດ ນາຍົກລັດຖະມົນຕີ​ ແຫ່ງ ສປປ ລາວ ໄດ້​ນຳພາ​ຄະນະ​ຜູ້​ແທນ​ລາວ​ເຂົ້າ​ຮ່ວມ​ກອງ​ປະຊຸມ​ສຸດ​ຍອດ​ອາ​ຊຽນ ​ຄັ້ງ​ທີ 35 ແລະ ກອງ​ປະຊຸມ​ສຸດ​ຍອດ​ກັບ​ບັນດາ​ຄູ່​ເຈລະຈາ​ອາ​ຊຽນ ທີ່​ບາງກອກ ປະເທດ​ໄທ ໃນ​ລະຫວ່າງ​ວັນ​ທີ 2-4 ພະຈິກ 2019.

   ກອງ​ປະຊຸມ​ສຸດ​ຍອດ​ອາ​ຊຽນ​ ຄັ້ງ​ທີ 35 ແບບ​ຄົບ​ຄະນະ​ໄດ້​ມີ​ຂຶ້ນ​ໃນ​ຕອນ​ແລງ​ຂອງ​ວັນ​ທີ 2 ພະຈິກ 2019 ຊຶ່ງ​ບັນດາ ​ຜູ້ນຳ​ອາ​ຊຽນ​ໄດ້​ພ້ອມ​ກັນ​ປຶກ ສາ​ຫາລື ແລະ ແລກປ່ຽນຄຳ​ ຄິດ​ຄຳ​ເຫັນ​ກ່ຽວ​ກັບ​ຄວາມ​ພະ ຍາຍາມ ​ໃນ​ການ​ສືບຕໍ່​ສ້າງ​ປະຊາ​ຄົມ​ອາ​ຊຽນ​ໃຫ້​ເຂັ້ມແຂງ​ມີ​ເສດຖະກິດ​ຂະຫຍາຍຕົວ​ໄປ​ຄຽງ​ຄູ່​ກັບ​ການ​ພັດທະນາ​ແບບ​ຍືນ​ຍົງແລະ ບໍ່​ປະປ່ອຍ​ຜູ້​ໃດ​ໄວ້​ທາງ​ຫຼັງ ພາຍ​ໃຕ້​ຄຳ​ຂວັນ: "ຮ່ວມ​ແຮງ​ຮ່ວມ​ໃຈ ກ້າວ​ໄກ​ຍືນ​ຍົງ" ໃນ​ນີ້, ຜູ້ນຳ​ອາ​ຊຽນ​ໄດ້​ຕີ​ລາຄາ​ສູງ​ຕໍ່​ຄວາມ​ຄືບ​ໜ້າ​ ໃນ​ການຈັດຕັ້ງ​ປະຕິບັດ​ວິໄສ​ທັດ​ອາ​ຊຽນ 2025 ທີ່ກຳລັງ​ຢູ່​ ໃນ​ໄລຍະ​ກາງຂອງ​ການຈັດຕັ້ງ​ປະຕິບັດ ຊຶ່ງ​ກວມ​ເອົາ​ສາມ​ເສົາຄ້ຳ​ຄື: ການ​ເມືອງ​-​ຄວາມ​ໝັ້ນຄົງ, ເສດຖະກິດ ແລະ ສັງ​ຄົມ​-​ວັດທະນະທຳ ແລະ ປຶກສາ​ຫາລື​ກັນ​ກ່ຽວ​ກັບ​ທິດ​ທາງ​ໃນຕໍ່ໜ້າ​ຂອງ​ອາ​ຊຽນ.

   ທ່ານນາຍົກລັດຖະມົນຕີ ທອງ​ລຸນ ສີ​ສຸ​ລິດ ໄດ້​ຕີ​ລາຄາ​ສູງ​ກ່ຽວ​ກັບ​ຜົນສຳເລັດ​ຂອງ​ອາ​ຊຽນ​ຜ່ານ​ມາ ແລະ ສະເໜີ​ໃຫ້​ສືບຕໍ່​ຮ່ວມ​ມື ແລະ ເພີ່ມ​ທະວີ​ຄວາມ​ເປັນ​ເຈົ້າ​ການ​ ໃນ​ການ​ຮັດ​ແຄບ​ຄວາມ​ແຕກ​ໂຕນ​ດ້ານ​ການ​ພັດທະນາ, ຮັດ​ແໜ້ນ​ການ​ເຊື່ອມ​ໂຍງ​ເສດຖະກິດ​ອາ​ຊຽນ ແລະ ການ​ເຊື່ອມ​ຈອດ​ພາກ​ພື້ນ, ເສີມ​ຂະຫຍາຍ​ການ​ຄ້າ ການ​ລົງ ທຶນ ແລະ ການທ່ອງທ່ຽວ​ພາຍ​ໃນ​ອາ​ຊຽນ, ສ້າງ​ເງື່ອນໄຂ​ເອື້ອ​ອຳນວຍ​ໃຫ້​ແກ່ຈຸນ​ລະວິ​ສາ​ຫະ​ກິດ, ວິ​ສາ​ຫະ​ກິດ​ຂະໜາດ​ນ້ອຍ ແລະ ກາງ ໃຫ້​ສາມາດ​ເຂົ້າ​ເຖິງ​ຕະຫຼາດ​ພາກ​ພື້ນ ແລະ ສາກົນ​ໄດ້​ຢ່າງຮອບດ້ານ ແລະ ກ້າວ​ໄປ​ສູ່​ການ​ຫັນ​ເປັນດີຈີຕອນ​ກໍ​ຄື​ການ​ຄ້າ​ອີ​ເລັກ​ໂຕ​ຣນິກ ແລະ ເພີ່ມ​ທະວີ​ການ​ຮ່ວມ​ມື​ ໃນ​ຂະ ແໜງການ​ທີ່ ສປປ ລາວ ມີ​ທ່າ ແຮງເຊັ່ນ: ການ​ຜະລິດ​ກະສິກຳ, ອຸດສາຫະກຳ​ປຸງ​ແຕ່ງ ແລະ ພະ ລັງງານ​ທີ່​ບໍ່​ບົກ​ແຫ້ງ.

   ໃນ​ວັນ​ດຽວ​ກັນ, ທ່ານນາ ຍົກລັດຖະມົນຕີໄດ້​ເຂົ້າ​ຮ່ວມ​ເປັນ​ສັກຂີ​ພິຍານ ​ໃນ​ພິທີ​ລົງ​ນາມ​ບົດ​ບັນທຶກ​ຄວາມ​ເຂົ້າໃຈ​ລະຫວ່າງ ເລຂາທິການ​ໃຫຍ່ອາ​ ຊຽນ, ໃນ​ນາມ​ອາຊຽນ ແລະ ປະທານ​ສະຫະພັນ​ບານເຕະ​ໂລກ (FIFA) ເພື່ອ​ສົ່ງເສີມ​ການ​ຮ່ວມ​ມື ແລະ ພັດທະນາ​ຂົງເຂດ​ບານເຕະ​ອາ​ຊຽນ​ໃຫ້​ນັບ​ມື້​ນັບ​ເຂັ້ມແຂງ ລວມ​ທັງ​ເພື່ອ​ກະກຽມ​ໃຫ້​ແກ່​ການ​ເປັນ​ເຈົ້າພາບ​ການ​ແຂ່ງຂັນ​ບານເຕະ​ໂລກຂອງ​ອາ​ຊຽນ ໃນ​ປີ 2034.
(ຂ່າວ-ພາບ: ກະຊວງ​ການ​ຕ່າງ ປະເທດ)