ຄະ­ນະ​ຜູ້​ແທນ​ຂັ້ນ​ສູງ​ຂອງ ສປປ ລາວ ເຂົ້າ​ຮ່ວມ​ກອງ​ປະ­ຊຸມລັດ­ຖະ­ມົນ­ຕີ​ຟຣັງ​ໂກ​ໂຟ​ນີ ຄັ້ງ​ທີ 36 ທີ່​ໂມ​ນາ​ໂກ

08.11.2019 8:26     

   ຄະນະ​ຜູ້​ແທນ​ຂັ້ນ​ສູງ ຂອງ ສປປ ລາວ ນຳ​ໂດຍ ທ່ານ ບຸນ​ເກີດ ສັງ​ສົມ​ສັກ ລັດ ຖະມົນຕີ ປະ​ຈໍາ​ສຳນັກງານ​ນາຍົກລັດຖະມົນຕີ ຜູ້​ຊີ້​ນຳ​ວຽກ​ງານ​ຟຣັງ​ໂກ​ໂຟ​ນີ ໄດ້​ເຂົ້າ​ຮ່ວມ​ກອງ​ປະຊຸມ​ລັດຖະມົນຕີ​ຟຣັງ​ໂກ​ໂຟ​ນີ ຄັ້ງ​ທີ 36, ໃນ​ວັນ​ທີ 30-31 ຕຸລາຜ່ານ​ມາ ທີ່ໂມ​ນາ​ໂກ. ເຂົ້າ​ຮ່ວມ​ໃນ​ກອງ​ປະຊຸມ​ດັ່ງກ່າວ ມີ​ບັນດາ​ລັດຖະມົນຕີ ແລະ ຜູ້ຕາງໜ້າ​ຈາກ​ປະເທດ​ສະມາຊິກ​ຟຣັງ​ໂກ​ໂຟ​ນີ ຈຳນວນ 88 ປະເທດ ຊຶ່ງ​ໃນ​ນັ້ນ​ມີ 54 ປະເທດ​ສະມາຊິກ​ສົມບູນ, 7 ປະເທດ​ສະມາຊິກ​ສົມທົບ ແລະ 27 ປະເທດ​ສັງເກດ​ການ ແລະ ມີ​ບັນດາ​ຜູ້ຕາງໜ້າ​ຈາກ​ອົງການ​ຈັດ​ຕັ້ງ​ຄູ່​ຮ່ວມ​ງານ​ທີ່​ກ່ຽວຂ້ອງ ເຂົ້າ​ຮ່ວມ.

   ກອງ​ປະຊຸມ​ດັ່ງກ່າວ ໄດ້​ດຳເນີນ​ພາຍ​ໃຕ້​ຫົວຂໍ້: "ຄວາມ​ກົມກຽວ​ກັນ ລະຫວ່າງ ມະນຸດ ແລະ ໂລກ; ວິໄສ​ທັດ​ຂອງ​ປະ ຊາ​ຄົມ​ຟຣັງ​ໂກ​ໂຟ​ນີ ໃນ​ວາລະ​ຂອງ​ການ​ຕ້ອນຮັບ​ວັນ​ສ້າງຕັ້ງ​ອົງການ​ຟຣັງ​ໂກ​ໂຟ​ນີ​ສາກົນ ຄົບຮອບ 50 ປີ". ໃນ​ໂອກາດ​ເຂົ້າ​ຮ່ວມ​ກອງ​ປະຊຸມ​ໃນ​ຄັ້ງ​ນີ້, ທ່ານ ລັດຖະມົນຕີ ຜູ້​ຊີ້​ນຳ​ວຽກ​ງານ​ຟຣັງ​ໂກ​ໂຟ​ນີ​ໄດ້​ສະເໜີ​ຂໍ້​ລິ​ເລີ່ມ​ໃໝ່ ທີ່​ເບິ່ງ​ກວ້າງ​ມອງ​ໄກ ຊຶ່ງ​ເປັນ​ແບບ​ການປະ ຕິ​ຮູບ​ອົງການ​ຟຣັງ​ໂກ​ໂຟ​ນີ ເພື່ອ​ໃຫ້​ສອດຄ່ອງ ແລະ ຕອບ​ສະໜອງ​ກັບ​ຄວາມ​ຮຽກຮ້ອງ​ຕ້ອງການ​ຂອງ​ໂລກ ໃນ​ຍຸກ​ໃໝ່. ທ່ານ​ ບຸນ​ເກີດ ສັງ​ສົມ​ສັກ ໄດ້​ປະກອບ​ຄຳ​ເຫັນ​ໃສ່​ຫົວຂໍ້​ຂ້າງ​ເທິງ ວ່າ: ພາຍຫຼັງ​ການ​ປະຕິວັດ​ອຸດສາຫະກຳ, ກ່ອນ 100 ກວ່າປີ​ຜ່ານ​ມາ ພວກ​ເຮົາ​ໄດ້​ສ້າງ​ຄວາມ​ຝັນ ໂດຍ​ສ້າງ​ໃຫ້​ໂລກ​ເຮົາ​ເປັນ​ໂລກ​ບໍ່​ມີ​ຄວາມທຸກ​ຍາກ, ເປັນ​ໂລກ​ທີ່​ສົມບູນ​ພູນ​ສຸກ ແລະ ເປັນ​ໂລກ​ທີ່​ມີ​ຄວາມ​ກ້າວ​ໜ້າ. ເພື່ອ​ບັນລຸ​ເປົ້າ​ໝາຍ​ດັ່ງກ່າວ ມີ​ຫຼາຍ​ຢ່າງ​ໄດ້​ສ້າງ​ຄວາມ​ມະຫັດສະຈັນ​ໃຫ້​ແກ່​ການ​ເຕີບ​ໂຕ​ເສດຖະກິດ​ແບບ​ກະໂດດ​ຂັ້ນ​ຢ່າງ​ໄວວາ ໂດຍ​ບໍ່​ນັບຖື​ຫຼັກ​ເກນ​ແຫ່ງ​ຄວາມ​ສົ​ມ​ດູນ ລະຫວ່າງ ມະນຸດ​ກັບ​ທຳ​ມະ​ຊາດ. ດັ່ງນັ້ນ, ຄວາມ​ຈະເລີນ ແລະ ຄວາມ​ກ້າວໜ້າ​ຕ່າງໆ ທີ່​ເກີດ​ຈາກ​ການ​ພັດທະນາ ໄດ້​ກາຍເປັນ​ໄພ​ຂົ່ມຂູ່​ອັນ​ຮ້າຍ​ແຮງ​ຕໍ່​ການ​ຢູ່​ລອດ ຂອງ​ໂລກ ແລະ ມວນ​ມະນຸດ ເປັນຕົ້ນ ບັນຫາ​ໂລກ​ຮ້ອນ, ການ​ເສື່ອມ​ໂຊມ​ຂອງ​ສະພາບ​ແວດ​ລ້ອມ, ການ​ປ່ຽນແປງ​ຂອງ​ດິນ​ຟ້າ​ອາກາດ, ປະຊາກອນ​ລົ້ນ​ໂລກ, ການ​ຂາດ​ນ້ຳ, ປ່າດົງ​ດິບ​ຫຼຸດ​ລົງ ແລະ ດິນ​ແຫ້ງແລ້ງ​ເປັນ​ທະເລຊາຍ ຊຶ່ງ​ສາເຫດ​ເຫຼົ່ານັ້ນ​ໄດ້​ກາຍເປັນ​ການ​ສ້າງ​ຄວາມ​ຈະເລີນ​ມາ​ໃຫ້​ມະນຸດ ບົນ​ການ​ທຳລາຍ​ຊັບພະຍາກອນ​ທຳ​ມະ​ຊາດ ອັນ​ຈະ​ພາໃຫ້​ໂລກ​ເຮົາ​ກ້າວ​ໄປ​ສູ່​ດັບ​ມອດ​ວອດ​ວາຍ.

   ແຕ່​ຕໍ່ໜ້າ​ໄພພິບັດ​ນີ້ ການ​ຮ່ວມ​ມື​ສາກົນ ບໍ່​ວ່າ​ແບບ​ສອງ​ຝ່າຍ ແລະ ຫຼາຍ​ຝ່າຍ ຍັງ​ຢູ່​ຫ່າງ​ໄກ​ຈາກ​ການ​ລໍຄອຍ ແລະ ຄວາມ​ມຸ້ງ​ຫວັງ​ຂອງ​ປະຊາ​ຄົມ​ສາກົນ​ເພາະ​ພວກ​ເຮົາ​ຍັງ​ສັບສົນ​ຫວຸ້ນ​ວາຍ, ສຸມ​ໃສ່​ການ​ແກ້​ໄຂ​ບັນຫາ​ວິ​ກິດ​ການ​ເສດຖະກິດ, ການ​ຂັດ​ແຍ້ງ​ທາງ​ທະຫານ, ການ​ກໍ່​ການ​ຮ້າຍ ແລະ ການ​ອົບພະຍົບ​ລີ້​ໄພ ຈົນ​ຫຼົງ​ລືມ​ໄພ​ອັນຕະລາຍ​ຂອງ​ສະພາບ​ແວດ​ລ້ອມ ແລະ ເບິ່ງ​ກາຍ​ຄວາມ​ຢູ່​ລອດ​ຂອງ​ມວນ​ມະ​ນຸດ.

   ລັດຖະບານ ສປປ ລາວ ໄດ້​ຕັ້ງໜ້າ​ຕໍ່ສູ້ ເພື່ອ​ຍົກ​ສູງ​ຊີວິດ​ການ​ເປັນ​ຢູ່ ຂອງ ປະຊາຊົນ ແລະ ເສັ້ນທາງ​ດຽວ​ທີ່​ຈະ​ບັນລຸ​ເປົ້າ​ໝາຍ​ນີ້​ແມ່ນ ການ​ພັດທະນາ​ທີ່​ຍືນ​ຍົງ. ໃນ​ນັ້ນ, ສິ່ງແວດລ້ອມ​ກໍ​ເປັນ​ສິ່ງ​ຈຳເປັນ ສຳລັບ​ການ​ຢູ່​ລອດ​ຂອງ​ພວກ​ເຮົາ ແລະ ການ​ພັດທະນາ ເປັນ​ປັດ​ໄຈ​ສຳຄັນ​ສຳລັບ​ການ​ດຳລົງ​ຄົງ​ຕົວ. ສະນັ້ນ, ລັດຖະບານ ສປປ ລາວ ຈຶ່ງ​ປະສານ​ສົມທົບ​ໃຫ້​ສອງ​ຢ່າງ​ນີ້​ເພີ່ມ​ເຕີມ​ໃຫ້​ແກ່​ກັນ ແຕ່​ບໍ່​ແມ່ນ​ເປັນ​ການ​ມ້າງເພ​ທຳລາຍ​ກັນ.

   ກອງ​ປະຊຸມ ໄດ້​ປຶກສາ​ຫາລື ກ່ຽວ​ກັບ ການ​ປັບປຸງ​ລະບົບ​ການ​ບໍລິຫານ​ງານ, ຮູບ​ແບບ​ການ​ນຳພາ​ກອງ​ປະຊຸມ​ສຸດ​ຍອດ, ກອງ​ປະຊຸມ​ລັດຖະມົນຕີ ແລະ ກອງ​ປະຊຸມ​ສະພາ​ຜູ້ຕາງໜ້າ​ຖາວອນ ຊຶ່ງ​ໃນ​ນີ້ ຫົວໜ້າ​ຄະນະ​ຜູ້​ແທນ ສປປ ລາວ ກໍ​ໄດ້​ປະກອບ​ຄຳ​ເຫັນ ເພື່ອ​ໃຫ້​ສາມ​ລະດັບ​ກອງ​ປະຊຸມ​ມີ​ປະສິດທິພາບ ແລະ ຄຸນ​ນະ​ພາບ.ນອກຈາກ​ນີ້, ກອງ​ປະຊຸມ​ຍັງ​ໄດ້​ຮັບຮອງ​ເອົາ​ຍັດຕິ​ຕ່າງໆ ຄື: ບົດບາດ​ຂອງ​ນະ​ວັດ​ຕະ​ກໍາ ແລະ ການ​ສົ່ງເສີມ​ວິທະຍາສາດ, ການ​ສຶກສາ ແລະ ເສດຖະກິດ ດີ​ຈີ​ຕອນ; ຄົບຮອບ 30 ປີ ຂອງ​ສົນທິສັນຍາ ສປຊ ວ່າ​ດ້ວຍ​ສິດທິ​ເດັກ; ຍັດຕິ ກ່ຽວ​ກັບ ມະຫາ​ສະໝຸດ; ການ​ສະເຫຼີມສະຫຼອງ​ວັນ​ສ້າງຕັ້ງ​ອົງການ​ຟຣັງ​ໂກ​ໂຟ​ນີ​ສາກົນ ຄົບຮອບ 50 ປີ ໃນ​ປີ 2020, ລວມ​ທັງ​ໄດ້​ຮັບຮອງ​ເອົາ​ແຜນ​ງົບປະມານ ສຳລັບ​ປີ 2020 ແລະ​ ຮັບຮອງ​ເອົາ​ຜົນ​ຂອງ​ກອງ​ປະຊຸມ ກ່ຽວ​ກັບທິດ​ທາງ ແລະ ການ​ບໍລິຫານ​ງານ ຂອງ​ອົງການ​ຟຣັງ​ໂກ​ໂຟ​ນີ​ສາ​ກົນ.

   ກອງ​ປະຊຸມ​ຄັ້ງ​ນີ້ ຍັງ​ໄດ້​ຮັບ​ຟັງ​ການ​ລາຍ​ງານ ກ່ຽວ​ກັບ ສະພາບ​ການ​ກະກຽມ​ໃຫ້​ແກ່​ກອງ​ປະຊຸມ​ສຸດ​ຍອດ​ຄັ້ງ​ທີ 18 ຊຶ່ງ​ຈະ​ຈັດ​ຂຶ້ນ ຢູ່​ປະເທດ​ຕຸຍ​ນີ​ຊີ ໃນ​ວັນ​ທີ 12-13 ທັນວາ 2020 ຊຶ່ງ ຄົບຮອບ 50 ປີ ຂອງ​ການ​ສ້າງຕັ້ງ​ອົງການ​ຟຣັງ​ໂກ​ໂຟ​ນີ​ສາ​ກົນ.