ສນຊ ຕ້ອນ­ຮັບ​ຄະ​ນະ​ຜູ້​ແທນ​ສາ­ສະ­ໜາ ແຫ່ງ ລັດ­ຖະ­ບານ ສສ ຫວຽດ­ນາມ

08.11.2019 8:33     

   ທ່ານ ຄະນອງ​ລິດ ສີ​ສົມບູນ ຫົວໜ້າ​ກົມ​ສາສະໜາສູນ​ກາງ​ແນວ​ລາວ​ສ້າງ​ຊາດ (ສນຊ) ພ້ອມ​ດ້ວຍ​ຄະນະ​ໄດ້​ຕ້ອນຮັບ​ຄະ​ນະ​ກໍາ​ມະ​ການ​ສາສະໜາ ແຫ່ງ​ລັດຖະບານ ສສ ຫວຽດ ນາມ ໃນ​ວັນ​ທີ 4 ພະຈິກ​ຜ່ານ​ມາ​ ໃນ​ໂອກາດ​ທີ່​ຄະນະ​ຜູ້​ແທນ​ເດີນທາງ​ມາ​ເຮັດ​ວຽກ​ຢູ່ ສປປ ລາວ ນໍາ​ໂດຍ​ທ່ານ ນາງ ເຈີ່ນ ທິມິ​ງງາ ຮອງ​ຫົວໜ້າ​ຄະນະກໍາ​ ມະ​ການ​ສາສະໜາແຫ່ງ​ລັດຖະ ບານ ສສ ຫວຽດນາມ ພ້ອມ ​ດ້ວຍ​ຄະນະຢູ່​ທີ່​ສະໜາມ​ບິນ ວັດ​ໄຕ.

   ໃນ​ໂອກາດ​ນີ້, ທ່ານ ຄະ ນອງ​ລິດ ສີ​ສົມບູນ ໄດ້​ສະແດງ​ຄວາມ​ຍິນດີ​ຕ້ອນຮັບ ແລະ ຕີ​ລາຄາ​ສູງ​ຕໍ່ການ​ມາ​ເຮັດ​ວຽກ ແລະ ຢ້ຽມຢາມ​ຂອງ​ທ່ານ ນາງ ເຈີ່ນ ​ທິມິ​ງງາ ພ້ອມ​ດ້ວຍ​ຄະນະ ແລະ ທ່ານ ນາງ ເຈີ່ນ ທິມິງງາ ໄດ້​ສະແດງ​ຄວາມ​ຂອບໃຈ​ຢ່າງ​ຈິງ​ໃຈ​ຕໍ່​ການ​ຕ້ອນຮັບ​ອັນ​ອົບ​ອຸ່ນ​ຂອງ​ທ່ານ ຄະນອງ​ລິດ ສີ​ສົມບູນ ພ້ອມ​ທັງ​ໄດ້​ແຈ້ງ​ຈຸດ ປະສົງ​ ໃນ​ການ​ມາ​ເຮັດ​ວຽກຢູ່ ສປປ ລາວ ໃນ​ຄັ້ງ​ນີ້ ເພື່ອ​ເປັນ​ການ​ຜັນ​ຂະຫຍາຍ​ສາຍ​ພົວພັນ​ມິດຕະພາບ ແລະ ການ​ຮ່ວມມື ລະຫວ່າງ ຄະ​ນະ​ກໍາມະການ​ ສູນ​ ກາງ​ແນວ​ລາວ​ສ້າງ​ຊາດ ແລະ ຄະ​ນະ​ກໍາ​ມະ​ການສາສະໜາ ແຫ່ງ​ລັດຖະບານ ສສ ຫວຽດ ນາມ 2016-2020 ແລະ ເຊັນ​ບົດ​ບັນທຶກ​ການ​ຜັນຂະຫຍາຍ​ຂໍ້​ຕົກລົງ​ຮ່ວມ​ມື 2018-2020.

   ໃນ​ວັນ​ດຽວ​ກັນ​ນີ້, ໄດ້​ມີ​ພິທີ​ພົບ​ປະ​ສອງ​ຝ່າຍ​ລະຫວ່າງ ສູນ​ກາງ​ແນວ​ລາວ​ສ້າງ​ຊາດກັບ ຄະນະ​ສາສະໜາ​ແຫ່ງ​ລັດຖະ ບານ ສສ ຫວຽດນາມ ໂດຍ​ເປັນ​ກຽດ​ເຂົ້າ​ຮ່ວມ​ຂອງ​ທ່ານ ສົມອົກ ກິ່ງ​ສະ​ດາ ຮອງ​ປະທານ ສນຊ ຊຶ່ງ​ທັງ​ສອງ​ຝ່າຍ​ໄດ້ລາຍງານ​ ສະພາບ​ການຂອງສາສະໜາ​ ຕ່າງໆ​ຂອງ​ສອງ​ປະເທດ ລາວ - ຫວຽດນາມໄດ້​ຮັບ​ຊາບ. ພ້ອມ ກັນ​ນີ້, ທ່ານ ນາງ ເຈີ່ນ ທິມິງງາ ໄດ້​ແຈ້ງ​ວາລະການເຄື່ອນໄຫວ ​ເຮັດ​ວຽກ​ຢູ່ ສປປ ລາວ ໃຫ້ທ່ານ ຮອງ​ປະທານ ສນຊ ໄດ້ຮັບ​ຊາບ.
(ຂ່າວ​-​ພາບ: ສນຊ)