ກອງປະຊຸມລັດຖະມົນຕີປະຊາຄົມວັດທະນະທຳ-ສັງຄົມອາຊຽນ ຄັ້ງທີ 20


...

05.11.2018 16:27     

   ວັນທີ 3 ຕຸລາ 2018 ທີ່ ໂຮງແຮມສັງກຣີລາ (Shangri -La) ທີ່ສິງກະໂປ ໄດ້ຈັດກອງປະຊຸມລັດຖະມົນຕີສະພາປະຊາຄົມວັດທະນະທຳ-ສັງຄົມອາຊຽນ 20 ແລະ ບັນດາກອງປະຊຸມປິ່ນອ້ອມ ພາຍໃຕ້ຫົວຂໍ້ການເປັນປະທານອາຊຽນຂອງສິງກະໂປ ປີ 2018, ເຂັ້ມແຂງ ແລະ ທັນສະໄໝ ຊຶ່ງມີບັນດາລັດຖະມົນຕີ-ຮອງລັດຖະມົນຕີ, ເຈົ້າໜ້າທີ່ອາວຸໂສ ແລະ ບັນດາຜູ້ແທນກ່ຽວຂ້ອງຈາກບັນດາປະ ເທດສະມາຊິກອາຊຽນ ພ້ອມ ດ້ວຍທ່ານເລຂາທິການໃຫຍ່ ອາຊຽນ Lim Jock Hoi ເຂົ້າ ຮ່ວມກອງປະຊຸມດັ່ງກ່າວ. ສໍາລັບຄະນະຜູ້ແທນຝ່າຍລາວນຳ ໂດຍທ່ານ ບໍ່ແສງຄຳ ວົງດາລາ ລັດຖະມົນຕີກະຊວງຖະແຫຼງຂ່າວ, ວັດທະນະທຳ ແລະ ທ່ອງທ່ຽວ ພ້ອມດ້ວຍຄະ ນະເຂົ້າຮ່ວມ. ກ່ອນກອງປະຊຸມລັດຖະ ມົນຕີສະພາປະຊາຄົມວັດທະ ນະທຳ-ສັງຄົມອາຊຽນ ຄັ້ງທີ 20 ໄດ້ຈັດກອງປະຊຸມວົງແຄບ ຄັ້ງທີ 2 ຂອງລັດຖະມົນຕີສະ ພາວັດທະນະທຳສັງຄົມອາຊຽນກ່ຽວກັບແຜນແມ່ບົດອາຊຽນ 2025, ການເຊື່ອມສານສິດທິຂອງຄົນພິການ. ແຜນວຽກດັ່ງກ່າວນີ້ໄດ້ຖືກນຳສະເໜີເພື່ອຫາລືສະເພາະກ່ຽວກັບການສືບຕໍ່ການຮ່ວມມືກັນ ແລະ ຄົ້ນຄວ້າບັນດານະໂຍບາຍຍຸດ ທະສາດ ແລະ ກິດຈະກຳຈັດຕັ້ງຕົວຈິງຕ່າງໆ ເພື່ອຜັນຂະຫຍາຍໄດ້ເອກະສານດັ່ງກ່າວທີ່ຈະຖືກຮັບຮອງໂດຍບັນດາຜູ້ນຳອາຊຽນທີ່ກອງປະຊຸມສຸດຍອດ ອາຊຽນຄັ້ງທີ 33 ໃນເດືອນພະ ຈິກ, ທີ່ປະເທດສິງກະໂປ. ຫຼັງຈາກນັ້ນ, ບັນດາລັດຖະມົນຕີສະພາວັດທະນະທຳ - ສັງຄົມອາຊຽນກໍໄດ້ສືບຕໍ່ກອງປະຊຸມສະພາປະຊາຄົມວັດທະນະທຳ - ສັງຄົມອາຊຽນຄັ້ງທີ 20, ເພື່ອຮັບຟັງລາຍງານກ່ຽວກັບການຈັດຕັ້ງວຽກງານຂອງບັນດາຂະແໜງການພາຍໃຕ້ເສົາຄໍ້າວັດທະນະທຳ-ສັງຄົມອາຊຽນ ແລະ ຮັບຊາບ ວຽກງານບຸລິມະສິດພາຍໃຕ້ ການເປັນປະທານອາຊຽນຂອງ ສິງກະໂປ 2018, ວິໄສທັດຜູ້ນຳອາຊຽນ ວ່າດ້ວຍອາຊຽນເຂັ້ມແຂງ ແລະ ທັນສະໄໝ, ແລະ ເຄືອຄ່າຍເມືອງທັນສະໄໝອາຊຽນ "ASEAN Leaders' Vision for a Resilient and Innovative ASEAN and the ASEAN Smart Cities Network". ກອງປະຊຸມຄັ້ງນີ້ ໄດ້ເຫັນດີຮັບຮອງເອົາບັນດາເອກະສານຕ່າງໆ ເພື່ອສະເໜີໃຫ້ບັນດາຜູ້ນຳອາຊຽນຮັບຮອງ ແລະ ຮັບຊາບໃນກອງປະຊຸມສຸດຍອດອາຊຽນຄັ້ງທີ 33 ນີ້. (ຂ່າວ: ພູວັນ ກົມສື່ມວນຊົນ ກະຊວງ ຖວທ)