ວຽກງານຖະແຫຼງຂ່າວ ແລະ ວັດທະນະທຳ ນັບມື້ຂະຫຍາຍຕົວ


...

05.11.2018 15:58     

   ກະຊວງຖະແຫຼງຂ່າວ ວັດທະນະທຳ ແລະ ທ່ອງທ່ຽວ (ຖວທ) ໄດ້ຕັ້ງໜ້າຊີ້ນຳຂົງເຂດສື່ມວນຊົນ ສຸມໃສ່ໂຄສະນາເຫດການຕ່າງໆທີ່ເກີດຂຶ້ນຢູ່ພາຍໃນ ແລະ ຕ່າງປະເທດ ເປັນຕົ້ນ ໄພພິບັດນ້ຳຖ້ວມທີ່ເກີດຂຶ້ນໃນທົ່ວປະເທດ ເພື່ອສ້າງຄວາມເຂົ້າໃຈທີ່ຖືກຕ້ອງໃຫ້ປະຊາຊົນ ຕອບຕ້ານການໂຄສະນາບິດເບືອນ.
   ທ່ານ ບໍ່ແສງຄຳ ວົງດາລາ ລັດຖະມົນຕີກະຊວງ ຖວທ ໄດ້ໃຫ້ສຳພາດໃນໂອກາດເຂົ້າຮ່ວມກອງປະຊຸມລັດຖະບານເປີດກວ້າງ ຄັ້ງທີ II ວ່າ: ໃນໄລຍະ 6 ເດືອນຜ່ານມາ ຂະແໜງຖະແຫຼງຂ່າວ ແລະ ວັດທະນະທຳ ສາມາດຍາດໄດ້ຜົນສຳເລັດຫຼາຍດ້ານ ເປັນຕົ້ນ ດ້ານວຽກງານຖະແຫຼງຂ່າວ ໄດ້ສຸມໃສ່ຮັບໃຊ້ໂຄສະນາເຫດການຕ່າງໆເຊັ່ນ: ວຽກດີຄົນເດັ່ນ ໄພພິບັດທີ່ໄດ້ເກີດຂຶ້ນຢູ່ເມືອງສະໜາມໄຊ ແຂວງອັດຕະປື ແລະ ເຫດການໄພນ້ຳຖ້ວມທີ່ເກີດຂຶ້ນຢູ່ແຂວງຕ່າງໆໃນທົ່ວປະເທດ ພ້ອມນັ້ນ ຍັງໄດ້ໂຄສະນາວິທີການແກ້ໄຂໄພພິບັດນ້ຳຖ້ວມຕ່າງໆ ທັງຜົນສຳເລັດໃນການແກ້ໄຂເຮັດໃຫ້ປະຊາຊົນກັບຄືນ ມາດຳລົງຊີວິດຕາມປົກກະຕິ ແລະ ໄດ້ໂຄສະນາອອກຂ່າວກ່ຽວກັບຜູ້ທີ່ມີຈິດໃຈດີງາມມາຊ່ວຍເຫຼືອປະຊາຊົນລາວ ໃນເວລາທີ່ພົບກັບຄວາມຫຍຸ້ງຍາກ ໂດຍສະເພາະແມ່ນການຊ່ວຍເຫຼືອຈາກສຳນັກງານ ອົງການ, ບໍລິສັດຫ້າງຮ້ານ ແລະ ທຸກພາກສ່ວນໃນສັງຄົມ ຕະຫຼອດຮອດປະເທດເພື່ອນມິດສາກົນ ອື່ນໆ ຊຶ່ງສື່ມວນຊົນຂອງພວກເຮົາກໍໄດ້ນຳສະເໜີຂ່າວກ່ຽວກັບການຊ່ວຍເຫຼືອດັ່ງກ່າວນັ້ນຢ່າງຕໍ່ເນື່ອງ ທີ່ສຳຄັນຍັງໄດ້ແກ້ຂ່າວບິດເບືອນຄວາມເປັນຈິງຈາກກຸ່ມຄົນບໍ່ຫວັງດີທີ່ອາໄສໄພພິບັດເກີດຂຶ້ນແລ້ວ ເວົ້າໄປໃນທາງທີ່ບໍ່ຖືກຕ້ອງ ຊຶ່ງສື່ມວນຊົນຂອງພວກເຮົາ ໄດ້ເພີ່ມທະວີຕອບໂຕ້ຖ້ອຍທຳນອງທີ່ຄົນບໍ່ດີສ້າງກະແສຂຶ້ນມາເພື່ອເຮັດໃຫ້ປະຊາຊົນ ໄດ້ເຂົ້າໃຈຢ່າງຖືກຕ້ອງຕາມຄວາມເປັນຈິງ ເວົ້າລວມແລ້ວ ໄດ້ຮັບການເຫັນດີເຫັນພ້ອມກັບຜູ້ທີ່ບໍລິໂພກຂ່າວຫຼາຍສົມຄວນ.
    ນອກນັ້ນ ໄດ້ສືບຕໍ່ຕິດຕັ້ງໂທລະໂຄ່ງຕາມບ້ານຕ່າງໆທີ່ປະສົບໄພພິບັດນ້ຳຖ້ວມ ຊ່ວຍການປະຊາສຳພັນແຈ້ງຂ່າວເຕືອນໄພຕ່າງໆໄດ້ດີຂຶ້ນ ວິທະຍຸ ໜັງສືພິມ ໂທລະພາບ ໄດ້ມີຫຼາຍພາກສ່ວນລາຍງານພິເສດ ກໍ່ຄື ຄໍລຳພິເສດສຳລັບໂຄສະນາກ່ຽວກັບໄພພິບັດທີ່ເກີດຂຶ້ນ ແລະ ໄດ້ອອກຂ່າວເປັນປະຈຳ ເພື່ອແຈ້ງຂ່າວໃຫ້ປະຊາຊົນໄດ້ຮັບຊາບຢ່າງວ່ອງໄວ ທັນເຫດການ ນອກຈາກວຽກດັ່ງກ່າວ ຍັງໄດ້ສືບຕໍ່ສ້າງຕັ້ງສະຖານີວິທະຍຸຊຸມຊົນ ຕິດຕັ້ງສະຖານີໂທລະພາບຢູ່ແຂວງຕ່າງໆ ໂດຍຫັນຈາກລະບົບອະນາລ໋ອກໄປເປັນລະບົບດີຈີຕ໋ອນເທື່ອລະກ້າວ ຊຶ່ງໄດ້ທົດລອງຈັດຕັ້ງປະຕິບັດຢູ່ 4 ແຂວງເຫັນໄດ້ວ່າມີຄວາມຄືບໜ້າ ພ້ອມທັງໄດ້ຊຸກຍູ້ໃຫ້ໜັງສືພິມຂະຫຍາຍໄປສູ່ຮາກຖານຫຼາຍຂຶ້ນ.
   ສ່ວນວຽກງານວັດທະ ນະທຳ ໄດ້ສືບຕໍ່ສົ່ງເສີມການປົກປັກຮັກສາອະນຸລັກວັດທະນະທຳຂອງຊາດຂອງປະຊາຊົນບັນດາເຜົ່າ ຫຼັງຈາກທີ່ສຽງແຄນລາວໄດ້ຮັບຮອງຈາກອົງການອຸຍແນັສໂກ ໃຫ້ເປັນມໍລະດົກທາງດ້ານວັດທະນະທຳ ນາມມະທຳຂອງມວນມະນຸດໃນໂລກ ໂດຍໄດ້ໂຄສະນາຢ່າງກວ້າງຂວາງ ເຮັດໃຫ້ປະຊາຊົນພາກພູມໃຈໃນມູນເຊື້ອວັດທະນະທຳຂອງຕົນເອງ ແລະ ສືບຕໍ່ສະເໜີໂຄງການຕ່າງໆໄປຫາອົງການອຸຍແນັສ ໂກ ເພື່ອຈະໄດ້ຮັບຮອງເອົາເປັນມໍລະດົກໂລກເຊັ່ນ: ທົ່ງໄຫຫີນ ເຂດພູຫີນໜາມໜໍ່ ແລະ ມໍລະດົກທາງວັດທະນະທຳນາມມະທຳຈຳນວນໜຶ່ງ ປັດ ຈຸບັນ ໄດ້ປະກອບເອກະສານສົ່ງຫາອົງການດັ່ງກ່າວເປັນທີ່ຮຽບຮ້ອຍແລ້ວ.
(ຂ່າວ: ຄັດຈາກໜັງສືພິມວຽງຈັນໃໝ່)