ປະທານ ສນຊ ເຂົ້າຮ່ວມປູກຕົ້ນໄມ້ ທີ່ສວນພຶກສາດ່ານຊີ


...

04.06.2019 9:42     

   ທ່ານ ໄຊສົມພອນ ພົມວິ ຫານ ກໍາມະການກົມການເມືອງສູນກາງພັກ, ປະທານ ສູນກາງແນວລາວສ້າງຊາດ (ສນຊ) ໄດ້ເຂົ້າຮ່ວມພິທີປູກຕົ້ນໄມ້ເນື່ອງໃນໂອກາດວັນປູກຕົ້ນໄມ້ແຫ່ງຊາດ ໃນວັນທີ 1 ມິຖຸນາ 2019 ນີ້, ທີ່ສວນພຶກສາ ບ້ານດ່ານຊີ ເມືອງນາຊາຍທອງ ນະຄອນຫຼວງວຽງຈັນ, ໂດຍມີທ່ານ ພວງປະຣິສັກ ປຣະວົງວຽງຄໍາ ຮອງລັດຖະມົນຕີກະຊວງກະສິກໍາ ແລະ ປ່າໄມ້, ທ່ານ ພູວົງ ພະມິສິດ ຜູ້ລົງທຶນພັດທະນາສວນພຶກສາ ພ້ອມດ້ວຍຄະນະບັນດາການນໍາເມືອງ ຕະຫຼອດຮອດພະນັກງານ-ມວນຊົນເຂົ້າຮ່ວມເປັນຈໍານວນ 565 ຄົນ, ຍິງ 310 ຄົນ. ທັງນີ້, ຜູ້ລົງທຶນພັດທະນາສວນພຶກສາ ໄດ້ໃຫ້ຮູ້ວ່າ: ເນື່ອງໃນໂອກາດວັນເດັກນ້ອຍສາກົນ ແລະ ວັນປູກຕົ້ນໄມ້ແຫ່ງຊາດ (ວັນທີ 1 ມິຖຸນາ ) ໄດ້ໝູນວຽນມາບັນຈົບຄົບຮອບມາອີກວາ ລະໜຶ່ງ ເພື່ອສ້າງຂະບວນການຕ້ອນຮັບວັນສໍາຄັນ ຈຶ່ງມີການຈັດກິດຈະກໍາປູກຕົ້ນໄມ້ຮ່ວມກັບອົງການຈັດຕັ້ງຕ່າງໆ ພ້ອມດ້ວຍຊາວບ້ານ ໂດຍໄດ້ກະກຽມພື້ນທີ່ປູກໄມ້ 7 ເຮັກຕາ ເພື່ອປູກປ່າໃຫ້ເປັນຮົ່ມ ພ້ອມນີ້ກໍເພື່ອປູກຈິດສໍານຶກໃຫ້ນ້ອງນ້ອຍເຍົາວະຊົນ ແລະ ຊາວໜຸ່ມລາວຮູ້ຮັກທໍາມະຊາດ, ຮັກຕົ້ນໄມ້ ແລະ ມີສ່ວນຮ່ວມໃນວິໄສທັດຂອງລັດຖະບານໃນການສ້າງພື້ນທີ່ປ່າສີຂຽວ ຫຼື ເພິ່ມເນື້ອທີ່ປົກຫຸ້ມປ່າໄມ້ໃຫ້ໄດ້ 70% ໃນປີ 2020 ສໍາລັບສະຖານທີ່ດັ່ງກ່າວນອກຈາກຈະພັດທະນາໃຫ້ເປັນແຫຼ່ງທ່ອງທ່ຽວແລ້ວຍັງສ້າງໃຫ້ເປັນບ່ອນຝຶກອົບຮົມວິຊາຊີບໃຫ້ກັບປະຊາຊົນໄດ້ເຮັດການຜະລິດສິນຄ້າຕ່າງໆ ເຊັ່ນ: ນໍ້າຢາລ້າງຈານ, ສະບູ, ນໍ້າຫອມ ແລະ ອື່ນໆ ວິຊາການຈາກຕ່າງປະເທດມາຝຶກອົບຮົມທັງພາກທິດສະດີ ແລະ ປະຕິບັດຕົວຈິງໃຫ້ແກ່ພະນັກງານພາຍໃນສວນ, ການຈັດກິດຈະກໍາຄັ້ງນີ້, ປະກອບມີການສະແດງສິລະປະວັນະຄະດີຟ້ອນ, ການແຂ່ງຂັນກິລາ ພ້ອນນັ້ນ ກໍ່ໄດ້ ມອບອຸປະກອບການຮຽນ ຕ່າງໆໃຫ້ນ້ອງໆທີ່ເຂົ້າຮ່ວມງານອີກດ້ວຍ. ( ຂ່າວ: ສນຊ)