ສູນກາງຊາວໜຸ່ມສະຫຼອງວັນເດັກ ແລະ ປູກຕົ້ນໄມ້


...

04.06.2019 9:43     

   ສູນກາງຊາວໜຸ່ມ ປະຊາ ຊົນປະຕິວັດລາວ ໄດ້ຈັດພິທີສະເຫຼີມສະຫຼອງວັນເດັກນ້ອຍສາກົນ ແລະ ວັນປູກຕົ້ນໄມ້ແຫ່ງຊາດ 1 ມິຖຸນາ 2019 ຂຶ້ນໃນວັນທີ 31 ພຶດສະພາຜ່ານມາ ທີ່ ວັງເຍົາວະຊົນ-ອະນຸຊົນທັນວາ ໃຫ້ກຽດເຂົ້າຮ່ວມຂອງທ່ານ ພົນເອກ ຈັນສະໝອນ ຈັນຍາລາດ ກຳມະການກົມການເມືອງສູນກາງພັກ, ລັດຖະມົນຕີກະຊວງປ້ອງກັນປະເທດ, ທ່ານ ອາລຸນໄຊ ສູນນະລາດ ເລຂາຄະນະບໍລິຫານງານ ສູນກາງຊາວໜຸ່ມປະຊາຊົນປະຕິວັດລາວ, ບັນດາສະຫາຍການນຳພັກ-ລັດ, ອົງການຈັດຕັ້ງສາກົນ, ຄະນະຊາວໜຸ່ມກະຊວງ, ອົງ ການ ແລະ ນະຄອນຫຼວງວຽງຈັນ, ຄູ-ອາຈານ, ຜູ້ປົກຄອງເດັກ ແລະ ຫຼານນ້ອຍເຍົາວະຊົນ-ອະນຸຊົນເຂົ້າຮ່ວມຢ່າງຫຼວງ ຫຼາຍ. ໃນໂອກາດນີ້ ທ່ານ ພົນເອກ ຈັນສະໝອນ ຈັນຍາລາດ ໄດ້ມີຄຳເຫັນຕໍ່ພິທີດັ່ງກ່າວວ່າ: ພິທີສະເຫຼີມສະຫຼອງວັນເດັກນ້ອຍສາກົນ ແລະ ວັນປູກຕົ້ນໄມ້ແຫ່ງຊາດ ທີ່ສູນກາງຊາວໜຸ່ມປະຊາຊົນ ປະຕິວັດລາວ ຈັດຂຶ້ນຢູ່ທີ່ວັງເຍົາວະຊົນ ແລະ ຫໍມູນເຊື້ອຊາວໜຸ່ມຄັ້ງນີ້ ຖືວ່າເປັນກິດຈະກຳໜຶ່ງທີ່ມີຄວາມໝາຍ, ຄວາມສຳຄັນຍິ່ງເພາະເປັນການສ້າງໂອກາດໃຫ້ແກ່ບັນດານ້ອງນ້ອຍເຍົາວະຊົນ-ອະນຸຊົນ ແລະ ພະນັກງານຜູ້ທີ່ຮັບຜິດຊອບວຽກງານນີ້ໄດ້ພົບປະແລກປ່ຽນບົດຮຽນ, ແຂ່ງຂັນຄວາມຮູ້ ຄວາມສາມາດ ແລະ ພອນສະຫວັນຂອງຕົນທັງເປັນການປູກຈິດສຳນຶກໃຫ້ສັງຄົມຮັບຮູ້ ແລະ ເຂົ້າໃຈເຖິງບົດບາດຄວາມສຳຄັນຂອງເດັກນ້ອຍ, ເພາະເດັກໃນວັນນີ້ຄືຜູ້ໃຫຍ່ໃນວັນໜ້າ, ເດັກນ້ອຍແມ່ນຊັບພະ ຍາກອນອັນລ້ຳຄ່າຂອງຊາດ, ແມ່ນຊັບພະຍາກອນມະນຸດທີ່ປະເສີດ, ເປັນຮຸ່ນຄົນທີ່ສືບທອດພາລະກິດໃນອະນາຄົດ ນັບແຕ່ມື້ມີພັກນຳພາ, ພັກປະຊາຊົນປະຕິວັດລາວ ໄດ້ຖືເອົາວຽກງານປັບປຸງ ແລະ ກໍ່ສ້າງຄະນະຊາວໜຸ່ມປະຊາຊົນປະຕິວັດລາວ ແລະ ກອງເຍົາວະຊົນທັນວາ, ພ້ອມກັນນັ້ນກໍໄດ້ມອບ ໝາຍໃຫ້ຄະນະຊາວໜຸ່ມປະຊາຊົນປະຕິວັດລາວ ເປັນຜູ້ຈັດຕັ້ງ, ຊີ້ນຳ, ນຳພາໂດຍກົງ ແລະ ຮອບດ້ານຕໍ່ກອງເຍົາວະຊົນ-ອະນຸຊົນທັນວາ. ທ່ານຍັງໄດ້ກ່າວຕື່ມອີກວ່າ: ເດັກນ້ອຍປຽບເໝືອນໃບເຈ້ຍຂາວສະອາດ, ຖ້າພວກເຮົາສຶກສາອົບຮົມສັ່ງສອນ ແລະ ເປັນແບບຢ່າງ, ເປັນແວ່ນແຍງທີ່ດີເດັກກໍຈະປະພຶດດີ ແລະ ກົງກັນຂ້າມ. ປະທານ ໄກສອນ ພົມວິຫານ ໄດ້ເຄີຍເວົ້າວ່າ: ພວກເຮົາບໍ່ສາມາດຝາກຝັງປະເທດຊາດອັນແສນຮັກຂອງພວກເຮົາໄວ້ນຳຄົນທີ່ໄຮ້ຄຸນ ສົມບັດ ແລະ ຂາດຄວາມສາມາດ. ດັ່ງນັ້ນ, ໃນເງື່ອນໄຂໃໝ່ນີ້ ຍິ່ງມີຄວາມຈຳເປັນທີ່ສຸດຕໍ່ການພັດທະນາຊັບພະຍາກອນມະນຸດຮຸ່ນສືບທອດໃຫ້ມີຄວາມເຂັ້ມແຂງ, ສ້າງພູມຄຸ້ມກັນຕ້ານພາຍຸລົມແດງເຊັ່ນ: ຄວາມທຸກຍາກ, ຄວາມລ້າຫຼັງ, ໄພວ່າງງານ, ຄ່ານິຍົມທີ່ບໍ່ຖືກຕ້ອງ, ສິ່ງເສບຕິດ, ໂລກລະບາດ ແລະ ອື່ນໆ. ດັ່ງນັ້ນ, ນະໂອກາດນີ້ ຂ້າພະເຂົ້າຈຶ່ງຮຽກຮ້ອງມາຍັງທົ່ວສັງຄົມຈົ່ງສ້າງສະພາບແວດລ້ອມອັນສົດໃສ ແລະ ເອົາໃຈໃສ່ພັດທະນາຮຸ່ນຄົນສືບທອດໃຫ້ເຂັ້ມແຂງດ້ວຍການມອບໝາຍຄວາມຮັບຜິດຊອບມີຄື: 1./ ອົງການຈັດຕັ້ງພັກ-ລັດ ແຕ່ລະຂັ້ນ ຕ້ອງເພີ່ມທະວີຄວາມເປັນເຈົ້າການໃນການນຳພາສຶກສາອົບຮົມເດັກນ້ອຍໃນແຕ່ລະຂົງເຂດທີ່ຢູ່ໃນຄວາມຮັບຜິດຊອບຂອງຕົນ ເພາະເຂົາປຽບເໝືອນເຈ້ຍທີ່ຂາວສະອາດ ຖ້າເຮົາສຶກສາເຂົາເຈົ້າໄປທາງທີ່ດີເຂົາເຈົ້າກະກາຍເປັນຄົນດີຂອງສັງຄົມ, 2./ ພໍ່ແມ່ຜູ້ປົກຄອງຕ້ອງເປັນແບບຢ່າງໃນການຫັນປ່ຽນພຶດຕິກຳ ເພື່ອປູກຈິດສຳນຶກໃຫ້ແກ່ລູກຕັ້ງແຕ່ເຍົາໄວ ເພາະພໍ່ແມ່ເປັນຜູ້ທີ່ໃກ້ສິດ ແລະ ຮູ້ດີຕໍ່ກັບແນວຄິດຈິດໃຈຂອງລູກຫຼານທີ່ສຸດ, 3./ ຄູ-ອາຈານ, ອ້າຍ, ເອື້ອຍ, ລຸງ, ປ້າ, ອາວ, ອາ ຕ້ອງເປັນຜູ້ນຳທີ່ເປັນແບບຢ່າງໃຫ້ແກ່ເດັກ, ດ້ວຍການນຳເອົາເນື້ອໃນຄຳສອນ 6 ຮັກ 3 ຊັງ ແລະ ຂໍ້ແຂ່ງຂັນ 3 ດີ 4 ຮູ້ ຂອງທ່ານ ປະທານ ສຸພານຸວົງ ໄດ້ມອບໃຫ້ແກ່ເຍົາວະຊົນ-ອານຸຊົນທັນວາ ຂອງພວກເຮົາ ນຳໄປສຶກສາຮ່ຳຮຽນທາງດ້ານຄຸນສົມບັດສິນທຳປະຕິວັດ ເພື່ອໃຫ້ກາຍເປັນລູກທີ່ດີຂອງພໍ່ແມ່, ເປັນນັກຮຽນທີ່ດີຂອງຄູ-ອາຈານ ແລະ ເປັນພົນລະເມືອງທີ່ດີຂອງຊາດ. (ຂ່າວ-ພາບ: ນາງ ສະຫວັນຄຳ)