ເຊີນເຂົ້າຮ່ວມສະຫຼອງວັນຜູ້ບໍລິຈາກ ເລືອດໂລກ 2019


...

13.06.2019 9:39     

   ພິທີຖະແຫຼງຂ່າວ ສະເຫຼີມ ສະຫຼອງວັນຜູ້ບໍລິຈາກເລືອດໂລກ 14 ມິຖຸນາ 2019 ພາຍໃຕ້ຫົວຂໍ້"ເລືອດປອດໄພເພື່ອໝົດທຸກຄົນ"ໄດ້ຈັດຂຶ້ນເມື່ອວັນທີ 11 ມິຖຸນາ ຜ່ານມາ ທີ່ສູນເລືອດແຫ່ງຊາດ ຊຶ່ງມີ ທ່ານ ສິງ ເມໂນລາດ ຮອງປະທານອົງການກາແດງລາວ,ແຂກຖືກເຊີນ,ພາກສ່ວນທີ່ກ່ຽວຂ້ອງ ແລະ ສື່ມວນຊົນເຂົ້າຮ່ວມ ທ່ານ ຈັນທະລາ ສຸກສາ ຄອນ ຫົວໜ້າສູນເລືອດແຫ່ງຊາດ ອົງການກາແດງລາວໃຫ້ຮູ້ວ່າ: ວັນ ທີ14 ມິຖຸນາຂອງທຸກໆປີແມ່ນວັນຜູ້ບໍລິຈາກເລືອດໂລກ ຊຶ່ງຢູ່ປະເທດຕ່າງໆໃນທົ່ວໂລກໄດ້ພ້ອມກັນຈັດຕັ້ງສະເຫຼີມສະຫຼອງວັນດັ່ງກ່າວເພື່ອເປັນການສະແດງຄວາມຂອບໃຈຕໍ່ຜູ້ບໍລິຈາກເລືອດທີ່ເຂົາເຈົ້າໄດ້ມອບຂອງຂວັນທີ່ມີຄ່າທີ່ສຸດຕໍ່ຊີວິດນັ້ນຄືການບໍລິຈາກເລືອດດ້ວຍຄວາມສະ ໝັກໃຈ ເພື່ອຊ່ວຍຄົນເຈັບ ແລະ ສ້າງຄວາມສຳນຶກໃນເລື່ອງ ຄວາມຈຳເປັນຂອງການບໍລິ ຈາກເລືອດທີ່ຈຳເປັນ ແລະ ສະ ໝໍ່າສະເໝີ, ຊຶ່ງເລືອດ ແລະ ຜະລິດຕະພັນເລືອດທີ່ໄດ້ຮັບບໍລິຈາກແຕ່ລະປີຢູ່ທົ່ວໂລກສາມາດຊ່ວຍຊີວິດຄົນເຈັບໄດ້ນັບລ້ານຄົນ ແລະ ຢູ່ ສປປ ລາວພວກເຮົາຕາມສະຖິຕິ ປີ 2018 ມີຄົນເຈັບທີ່ໃຊ້ເລືອດເຂົ້າໃນການປິ່ນປົວກວມເອົາ 32.678 ເທື່ອຄົນ ທ່ານໃຫ້ຮູ້ຕື່ມວ່າ: ເພື່ອສະເຫຼີມສະຫຼອງວັນດັ່ງກ່າວໃຫ້ກວ້າງຂວາງນອກຈາກຈັດກິດຈະກຳຢູ່ແຂວງຊຽງຂວາງໃນວັນທີ 6 ມິຖຸນາ 2019 ຜ່ານມາ,ວັນທີ 12 ມິຖຸນາ 2019 ຈະຈັດງານສະເຫຼີມສະຫຼອງວັນດັ່ງກ່າວ ທີ່ແຂວງບໍລິຄຳໄຊແລະ ໃນວັນທີ 14 ມິຖຸນາ 2019 ຈະຈັດຢູ່ຫຼາຍແຂວງຕື່ມ ອີກເຊັ່ນ: ຢູ່ສູນການຄ້າລາວ -ໄອເຕັກ ນະຄອນຫຼວງວຽງຈັນ, ແຂວງສະຫວັນນະເຂດ ແລະ ໃນວັນທີ 19 ມິຖຸນາ ທີ່ ແຂວງຈຳປາສັກ ແລະ ແຂວງ ອື່ນໆ. ດັ່ງນັ້ນ, ຈຶ່ງຂໍເຊີນຊວນ ພະນັກງານ-ລັດຖະກອນ, ທະ ຫານ, ຕຳຫຼວດ, ນັກຮຽນ, ນັກ ສຶກສາ, ພໍ່ຄ້າຊາວຂາຍຕະ ຫຼອດເຖິງພໍ່ແມ່ປະຊາຊົນທົ່ວນະຄອນຫຼວງວຽງຈັນ ຫຼື ບັນດາແຂວງທົ່ວປະເທດເຂົ້າຮ່ວມກິດຈະກຳດັ່ງກ່າວ ໃນນັ້ນ ຫາກທ່ານມີເງື່ອນໄຂອາຍຸ 17-60 ປີ, ນໍ້າໜັກ 45 ກິໂລຂຶ້ນໄປມີສຸຂະພາບແຂງແຮງແມ່ນຂໍ ເຊີນຊວນໄປຮ່ວມບໍລິຈາກເລືອດນຳພວກເຮົາທີ່ສູນການຄ້າລາວ-ໄອເຕັກ ຕຶກຫຼັງໃໝ່ຊັ້ນ 4 ໃນວັນທີ 14 ມິຖຸນາ 2019 ເລີ່ມແຕ່ເວລາ 8:30 ໂມງ ຫາ 16:00 ໂມງ ໂດຍທາງສູນ ເລືອດແຫ່ງຊາດຈະມີກິດຈະກຳຫຼາຍຢ່າງ ນອກຈາກນັ້ນ, ທ່ານສາມາດມາບໍລິຈາກເລືອດໄດ້ທີ່ສູນເລືອດແຫ່ງຊາດ ເລີ່ມແຕ່ເວລາ 8:30 ໂມງ-15:30 ໂມງ ທຸກມື້ເປີດຮັບບໍລິຈາກປະຈຳບໍ່ເວັ້ນວັນພັກທາງລັດຖະການ. (ຂ່າວ: ສຳນານ + ພາບ: ຍຸພິນທອງ)