ຄາລາວານຊາວໜຸ່ມທົ່ວປະເທດເດີນຕາມຮອຍວິລະຊົນ ກອງພັນທີ ສອງ ສູ່ເຂດທີ່ໝັ້ນໄດ້ຢ່າງມີໄຊ


...

13.06.2019 9:40     

   ເພື່ອເປັນການລະນຶກເຖິງບຸນຄຸນຂອງບັນດາຜູ້ນຳພັກ-ລັດ ທີ່ເສຍສະຫຼະເລືອດເນື້ອຊີວິດ ເພື່ອຍາດເອົາເອກະລາດມາສູ່ປວງຊົນລາວທັງຊາດ ສູນກາງ ຊປລ ໄດ້ຈັດກິດຈະກຳຂະບວນການຄາລາວານຊາວໜຸ່ມທົ່ວປະເທດເດີນຕາມຮອຍ ກອງພັນທີ 2 ວິລະຊົນຜ່າວົງ ປິດລ້ອມຂອງສັດຕູຢ່າງມີໄຊພາຍໃຕ້ຫົວຂໍ້ "ບໍ່ມີວັນນັ້ນ ບໍ່ມີວັນນີ້". ໃນວັນທີ 10 ມິຖຸນາ ຜ່ານມານີ້, ຂະບວນຄາລາວານຊາວໜຸ່ມໄດ້ນໍາເອົາກະຕາດອກໄມ້ໄປວາງຕໍ່ໜ້າຮູບຫຼໍ່ຂອງປະທານໄກສອນ ພົມວິຫານ ຜູ້ນຳທີ່ແສນເຄົາລົບຮັກ ເພື່ອສະແດງຄວາມກະຕັນຍູ້ຮູ້ບຸນຄຸນຢູ່ທີ່ອະນຸສອນສະຖານປະທານໄກສອນ ພົມວິຫານ ນໍາພາໂດຍ ທ່ານ ອາລຸນໄຊ ສູນນະລາດ ກຳມະການສຳຮອງສູນກາງພັກ ເລຂາຄະນະບໍລິຫານງານສູນກາງ ຊປລ, ພາຍຫຼັງສຳເລັດພິທີຂະບວນດັ່ງກ່າວໄດ້ອອກເດີນທາງສູ່ແຂວງຊຽງຂວາງ ຊຶ່ງໄດ້ຮັບການຕ້ອນຮັບຈາກ ທ່ານ ຄຳແສງ ພົມມະວັນ ຄະນະປະຈຳພັກແຂວງຫົວໜ້າຄະນະຈັດຕັ້ງແຂວງຊຽງຂວາງ ຜູ້ຊີ້ນໍາອົງການຈັດຕັ້ງມະຫາຊົນ, ມີຄະນະບໍລິຫານງານຊາວໜຸ່ມແຂວງ ພ້ອມດ້ວຍຕົວແທນຊາວໜຸ່ມອ້ອມຂ້າງແຂວງ, ເມືອງ, ບ້ານ ແລະ ເຍົາວະຊົນເຂົ້າຮ່ວມຕ້ອນຮັບຢ່າງເປັນຂະບວນຟົດຟືນ. ໃນວັນດຽວກັນນີ້, ກໍໄດ້ຈັດພິທີເປີດຂະບວນການຄາລາວານຊາວໜຸ່ມທົ່ວປະເທດທີ່ສະໜາມກິລາແຂວງຊຽງຂວາງ ໂດຍແມ່ນທ່ານ ອາລຸນໄຊ ສູນນະລາດ ໄດ້ກ່າວເປີດງານຢ່າງເປັນທາງການ, ເປັນກຽດເຂົ້າຮ່ວມຂອງທ່ານ ທອງສະຫວັດ ໄຂ ຄຳພິທູນ ອະດີດວິລະຊົນກອງພັນທີ 2 ທັງເປັນເລຂາຄະນະບໍລິຫານງານຊາວໜຸ່ມສະໄໝທີ I, ທ່ານ ຄໍາແສງ ພົມມະວັນ, ພະແນກການອ້ອມຂ້າງແຂວງ ແລະ ຊາວໜຸ່ມ-ເຍົາວະຊົນ. ໃນພິທີຍັງໄດ້ຮັບຟັງການເລົ່າມູນເຊື້ອປະຫວັດຄວາມເປັນມາຂອງກອງພັນທີ 2 ຈາກ ທ່ານ ທອງສະຫວັດ ໄຂຄໍາພິທູນ ພະນັກງານອາວຸໂສບຳນານ ຊຶ່ງທ່ານໄດ້ຍົກໃຫ້ເຫັນກ່ຽວກັບແບບແຜນການນໍາພາ, ການສູ້ຮົບການວາງແຜນອັນສະຫຼາດສ່ອງໃສເຮັດໃຫ້ຊາວໜຸ່ມເຫັນໄດ້ຄວາມອົງອາດກ້າຫານຕໍ່ສູ້ບໍ່ຍອມຈຳນົນ, ເສຍສະລະຜ່ານຜ່າພາຍຸລົມແດງ ຜ່າວົງປິດລ້ອມຂອງສັດຕູໄດ້ຢ່າງປອດໄພ ພ້ອມນັ້ນຄອບຄົວຂອງທ່ານກໍໄດ້ຍົກໃຫ້ເຫັນການເສຍສະລະຄຽງບ່າຄຽງໄຫຼ່ກັບຄອບຄົວ ເພື່ອປຸກລະດົມກໍາລັງໃຈໃຫ້ອ້າຍນ້ອງທຸກຄົນມີມະນະຈິດ. ຂະບວນຄາລາວານຍັງຈະໄດ້ສືບຕໍ່ເຄື່ອນໄຫວຈົນເຖິງວັນທີ 14 ມິຖຸນາ ເພື່ອຈັດຕັ້ງປະຕິບັດກິດຈະກໍາຕ່າງໆເຊັ່ນ: ວາງກະຕາດອກໄມ້ລະນຶກເຖິງຜູ້ນຳຢູ່ໜ້າຮູບປັ້ນຂອງທ່ານ ຕູ້ຢາ ໄຊຈູ, ທ່ານປະທານ ໄກສອນ ພົມວິຫານ, ທ່ານ ພູມີ ວົງວິຈິດ, ຊົມການບັນລະຍາຍສູນບັນຊາເສັ້ນທາງເຄື່ອນທັບ, ກິດຈະກຳກິລາແບບພື້ນເມືອງ, ກິດຈະກໍາທາສີຂົວ, ມອບ-ຮັບຫ້ອງສະໝຸດຢູ່ໂຮງຮຽນນ້າຢວກ, ກິດຈະກໍາເປີດປ້າຍຕັ້ງທັບ, ກິດຈະກໍາປູກຕົ້ນໄມ້ທີ່ລະນຶກ, ກິດຈະກໍາເລົ່າມູນເຊື້ອກອງພັນທີ 2, ມອບອຸປະກອນການສຶກສາຊຸກຍູ້ຂະບວນການເຄື່ອນໄຫວຂອງອ້າຍນ້ອງທະຫານ, ຍ່າງເດີນຕາມຮອຍກອງພັນທີ 2. ຈາກນັ້ນຍັງຈະໄດ້ທັດ ສະນະສຶກສາມູນເຊື້ອທາງປະຫວັດສາດ, ເຂົ້າຮ່ວມຊຸມນຸມໄຟຂອງຊາວໜຸ່ມ-ເຍົາວະຊົນ. ການຈັດຂະບວນຄາລາວານໃນຄັ້ງນີ້, ນອກຈາກຈະເຮັດໃຫ້ຊາວໜຸ່ມເຫັນໄດ້ມູນເຊື້ອພິລາດອາດຫານການຕໍ່ສູ້ບໍ່ຍອມຈໍານົນຂອງຜູ້ນໍາພັກ-ລັດ, ປະຊາຊົນບັນດາເຜົ່າແລ້ວຍັງໄດ້ສ້າງສາຍສໍາພັນອັນດີ ຄວາມສາມັກຄີປຶກແຜ່ນປູກຈິດສໍານຶກໃຫ້ແກ່ເຍົາວະຊົນຮູ້ມູນເຊື້ອການປະຕິວັດ ເຫັນໄດ້ຄວາມກະຕັນຍູ້ຮູ້ບຸນຄຸນຕໍ່ບັນພະບຸລຸດລາວທີ່ໄດ້ປະໄວໃຫ້ຮຸ່ນຄົນໄດ້ສືບທອດ. (ຂ່າວ: ບົວໂຮມ ສົມວິຈິດ)