ກອງປະຊຸມພົບປະລະຫວ່າງ ສທໜຊ ແລະ ສນຊ


...

05.07.2019 11:19     

   ສາມະຄົມນັກທຸລະກິດໜຸ່ມແຫ່ງຊາດລາວ (ສທໜຊ)ໄດ້ຈັດກອງປະຊຸມພົບປະແລກ ປ່ຽນຄວາມຄິດເຫັນຮ່ວມກັບສູນກາງແນວລາວສ້າງຊາດ (ສນຊ) ຂຶ້ນໃນວັນທີ 3 ກໍລະກົດຜ່ານມາ ທີ່ ສນຊ ໂດຍເປັນກຽດເຂົ້າຮ່ວມຂອງທ່ານ ໄຊສົມພອນ ພົມວິຫານ ກຳມະການກົມການເມືອງສູນກາງພັກ ປະ ທານສູນກາງແນວລາວສ້າງຊາດ, ມີທ່ານ ອາລຸນໄຊ ສູນນະລາດ ກຳມະການສຳຮອງສູນກາງພັກ ເລຂາຄະນະບໍລິ ຫານງານ ສຊປລ, ມີແຂກຖືກເຊີນ ແລະ ນັກທຸລະກິດໜຸ່ມເຂົ້າຮ່ວມ.
ໃນພິທີ, ທ່ານ ຄຳແສນ ສີສະວົງ ກຳມະການບໍລິຫານງານ ສຊປລ ປະທານ ສທໜຊ ໄດ້ກ່າວລາຍງານການເຄື່ອນໄຫວໂດຍຫຍໍ້ກ່ຽວກັບຜົນງານໃນໄລຍະຜ່ານມາວ່າ: ນັກທຸລະກິດໜຸ່ມ(ສທໜ) ໄດ້ສ້າງ ແລະ ປັບປຸງນິຕິກຳຕ່າງໆເຊັ່ນ: ສ້າງຂໍ້ຕົກລົງວ່າດ້ວຍພາລະບົດບາດ ແລະ ຂອບເຂດການເຄື່ອນໄຫວ ສທໜຊ, ປັບປຸງການຄຸ້ມຄອງບໍລິຫານ, ສ້າງແຜນຍຸດທະສາດການພັດທະນາ ສທໜ ທີ່ຕິດພັນກັບແຜນພັດທະນາເສດຖະກິດ-ສັງຄົມ. ສທໜຊ ໄດ້ຈັດຊຸດອົມຮົມດ້ານການຄຸ້ມຄອງທຸລະກິດຫຼາຍຫົວຂໍ້ໃຫ້ແກ່ສະມາຊິກຫຼາຍຄັ້ງ, ຈັດກອງປະຊຸມພົບປະທຸລະກິດຫຼາຍຄັ້ງທັງພາຍໃນ ແລະ ຕ່າງປະເທດ, ຈັດງານວາງສະແດງສິນຄ້າເພື່ອສົ່ງເສີມການພະລິດສິນຄ້າ ແລະ ການບໍລິການ ແລະ ຜົນງານດ້ານອື່ນໆ. ພ້ອມນີ້, ສທໜ ຍັງໄດ້ປະກອບສ່ວນໃນການເສຍພາສີ-ອາກອນເປັນຈຳນວນຫຼາຍຕື້ກີບຕໍ່ປີ.
ໃນໂອກາດນີ້, ທ່ານ ໄຊສົມພອນ ພົມວິຫານ ໄດ້ພົບປະໂອ້ລົມຕໍ່ກອງປະຊຸມຊຶ່ງກ່ອນອື່ນ ທ່ານ ໄດ້ກ່າວຍ້ອງຍໍຜົນງານທີ່ ສທໜ ຍາດມາໄດ້ໃນໄລຍະຜ່ານມາ ຊຶ່ງລ້ວນແລ້ວແຕ່ເປັນການປະກອນສ່ວນໃນການພັດທະນາ ແລະ ສ້າງສາປະເທດຊາດ, ພ້ອມດຽວກັນນັ້ນທ່ານ ຍັງໄດ້ເນັ້ນໃຫ້ ສທໜຊ ສືບຕໍ່ປັບປຸງຄວາມເຂັ້ມແຂງ, ສິດໜ້າທີ່ວິທີການເຮັດວຽກຊ່ວຍເຫຼືອຊຶ່ງກັນ ແລະ ກັນ, ສຶກສາອົບຮົມການເມືອງແນວຄິດໃຫ້ໄປຕາມແນວທາງນະໂຍບາຍຂອງພັກ-ລັດ; ປັບປຸງລົງຮາກຖານ ຊ່ວຍເຫຼືອສັງຄົມ, ພ້ອມກັນລົງພັດທະນາຊົນນະບົດແກ້ໄຂຄວາມທຸກຍາກຂອງປະຊາຊົນ; ພ້ອມກັນແກ້ໄຂລະບຽບຫຼັກການ ການເຮັດວຽກຊ່ວຍເຫຼືອຊຶ່ງກັນ ແລະ ກັນ; ເອົາໃຈໃສ່ໃນການຄົ້ນຄວ້າ ຮຽນຮູ້ເຕັກໂນໂລຊີທີ່ທັນສະໄໝ ມາພັດທະນາປະເທດຊາດ ແລະ ທຸລະກິດ ກໍຄືສິນຄ້າໃຫ້ສາມາດແຂ່ງ ຂັນກັບສາກົນໄດ້ ແລະ ໃຫ້ ສທໜຊ ສູ້ຊົນບຸກບືນສ້າງໃຫ້ມີນັກທຸລະກິດທີ່ເປັນນັກຮົບທາງເສດຖະກິດຂອງພັກ-ລັດໃນການແຂ່ງຂັນກັບປະເທດອື່ນໃນໂລກ.