ປາຖະກະຖາວັນເກີດ ປະທານ ສຸພານຸວົງ ຄົບຮອບ 110 ປີ


...

11.07.2019 9:28     

   ເນື່ອງໃນໂອກາດ ວັນເກີດຂອງປະທານ ສຸພານຸວົງ, ຄະນະໂຄສະນາອົບຮົມສູນກາງພັກ ຮ່ວມກັບສູນກາງແນວລາວສ້າງຊາດ ໄດ້ຈັດພິທີປາຖະກະຖາວັນເກີດປະທານ ສຸພານຸວົງ ຄົບຮອບ 110 ປີ ຂຶ້ນໃນວັນທີ 10 ກໍລະກົດນີ້ ທີ່ສະໂມສອນຂອງຄະນະໂຄສະນາອົບຮົມສູນກາງພັກ, ທ່ານ ໄຊສົມພອນ ພົມວິຫານ ປະທານສູນກາງແນວລາວສ້າງຊາດ ໄດ້ໃຫ້ກຽດປາຖະກະຖາ ໂດຍມີ ທ່ານ ສີປະເສີດ ແສນສະຫວັດ ຮອງຫົວໜ້າຄະນະໂຄສະນາອົບຮົມສູນກາງພັກ, ມີບັນດາຜູ້ຕາງໜ້າທີ່ມາຈາກ ກະຊວງ, ອົງການ, ພະແນກການຕ່າງໆ ເຂົ້າຮ່ວມຮັບຟັງ. ທ່ານ ໄຊສົມພອນ ພົມ ວິຫານ ໄດ້ຍົກໃຫ້ເຫັນເຖິງ ຊີວິດ ແລະ ການເຄື່ອນໄຫວປະຕິວັດ, ຜົນງານ ແລະ ຄຸນ ງາມຄວາມດີ ຂອງປະທານສຸພານຸວົງ ຊຶ່ງປະທານສຸພານຸວົງ ເກີດເມື່ອວັນທີ 13/7/1909 ທີ່ຫຼວງພະບາງ ໃນຄອບຄົວເຊື້ອເຈົ້າ, ເປັນໂອຣົດຂອງເຈົ້າມະຫາອຸປະຣາດບຸນຄົງ ແລະ ໝ່ອມຄໍາອ້ວນ ມີເອື້ອຍ 2 ຄົນ ຄື: ເຈົ້າຍິງທະວີວັນ ແລະ ເຈົ້າຍິງ ຈິນດາຣັດສະໝີ, ມີອ້າຍຕ່າງມານດາ 2 ຄົນ ຄື: ເຈົ້າເພັດຊະຣາດ ແລະ ເຈົ້າສຸວັນນະພູມມາ. ເມື່ອອາຍຸທ່ານໄດ້ 7 ປີ ໄດ້ເຂົ້າຮຽນຢູ່ໂຮງຮຽນປະຖົມສຶກສາ ທີ່ຫຼວງພະບາງ, ເພິ່ນເປັນນັກຮຽນ-ນັກສຶກສາທີ່ມີຄວາມຂະຫຍັນໝັ່ນພຽນ ແລະ ມີພອນສະຫວັນ ໃນຫຼາຍດ້ານ ທັງຮຽນເກັ່ງ ແລະ ສອບເສັງໄດ້ຄະແນນດີມາໂດຍຕະຫຼອດ. ປີ 1920 ທ່ານໄດ້ໄປຮຽນຕໍ່ຊັ້ນມັດທະຍົມຮ່າໂນ້ຍ ແລະ ໄດ້ຖືກຄັດເລືອກເປັນນັກຮຽນເກັ່ງຂອງໂຮງຮຽນໂປຼເຕັກໂຕຣາ ແຫ່ງແຄວ້ນອິນດູຈີນ, ຫຼັງຈາກນັ້ນທ່ານໄດ້ໄປຮຽນຕໍ່ທີ່ມະຫາວິທະຍາໄລຂົວທາງແຫ່ງຊາດຝຣັ່ງ ປີ 1937 ປະທານສຸພານຸວົງ ໄດ້ຮັບໃບປະກາສະນີຍະບັດ ວິສາວະກອນຂົວທາງທີ່ ຝຣັ່ງ ເປັນຄົນທໍາອິດຂອງປະເທດລາວ. ຫຼັງຈາກນັ້ນເພິ່ນໄດ້ກັບຄືນສູ່ອິນດູຈີນ ໂດຍໄດ້ຮັບລາຊະການໃນຂະແໜງໂຍທາທິການປະຈຳຢູ່ ຍາຈາງ (ປະເທດຫວຽດນາມ). ໃນເວລາຮັບໜ້າທີ່ລາຊະ ການຢູ່ຫວຽດນາມ, ກຳປູເຈຍ ແລະ ລາວ, ປະທານສຸພານຸວົງ ໄດ້ສ້າງຜົນງານຫຼາຍຢ່າງ ອັນເປັນທີ່ຍອມຮັບໃນຖານະວິສະວະກອນທີ່ມີຄວາມຮູ້, ຄວາມສາມາດ ແລະ ເຮັດແທ້ທຳຈິງ, ສິ່ງສຳຄັນເພິ່ນໄດ້ສຳຜັດ, ໄດ້ເຫັນພຶດຕິກຳ ແລະ ການກະທຳຂອງພວກລ່າເມືອງຂຶ້ນຝຣັ່ງທີ່ມີຕໍ່ຄົນຂອງຊາດຫົວເມືອງຂຶ້ນ ຈຶ່ງຕັດສິນໃຈກ້າວສູ່ເສັ້ນທາງແຫ່ງການຕໍ່ສູ້ ເພື່ອກອບກູ້ເອົາເອກະລາດ ນຳເອົາອິດສະລະພາບ ແລະ ສິດເປັນເຈົ້າມາໃຫ້ປະຊາຊົນລາວບັນດາເຜົ່າ. ເດືອນຕຸລາ ປີ 1945 ປະ ທານ ສຸພານຸວົງໄດ້ກັບຄືນລາວ ຕາມສາຍທາງເລກ 9 ໂດຍໄດ້ຮັບການຕ້ອນຮັບອັນອົບອຸ່ນ ຈາກຊາວເຊໂປນທຸກຊັ້ນຄົນ ແລະ ກ່າວຄຳປາໄສຕໍ່ໜ້າປະ ຊາຊົນທີ່ມາໂຮມຊຸມນຸມວ່າ: "ແຜ່ນດິນລາວ ຕ້ອງແມ່ນຄົນລາວເປັນເຈົ້າຂອງ, ສະນັ້ນພວກເຮົາທຸກຄົນຕ້ອງສາມັກຄີກັນ ຮ່ວມແຮງຮ່ວມໃຈກັນຕໍ່ສູ້ ກູ້ຊາດອັນແສນຮັກຂອງພວກ ເຮົາຄືນມາໃຫ້ໄດ້". ນີ້ແມ່ນ ຈຸດ ເລີ່ມຕົ້ນແຫ່ງພາລະກິດ ປະຕິ ວັດອັນຍິ່ງໃຫຍ່ຂອງ ປະທານ ສຸພານຸວົງ. ທ່ານ ໄຊສົມພອນ ພົມ ວິຫານ ຍັງໄດ້ຍົກໃຫ້ເຫັນເຖິງການເຄື່ອນໄຫວ ແຕ່ລະໄລຍະໃນພາລະກິດປະຕິວັດຂອງປະທານສຸພານຸວົງ. ໃນວັນທີ 1-2 ທັນວາ 1975, ກອງປະຊຸມໃຫຍ່ຜູ້ແທນປະຊາຊົນທົ່ວປະເທດ ໄດ້ເປັນເອກະສັນກັນແຕ່ງຕັ້ງ ທ່ານ ປະທານສຸພານຸວົງ ເປັນປະທານປະເທດຄົນທໍາອິດຂອງ ສປປ ລາວ ແລະ ເປັນປະທານສະພາປະຊາຊົນສູງສຸດ. ພາຍຫຼັງສະຖາປະນາ ສປປ ລາວ, ປະທານສຸພານຸວົງ ໄດ້ສືບຕໍ່ເປັນຄັນທຸງຂອງແນວໂຮມມະຫາສາມັກຄີແຫ່ງຊາດ (ແນວລາວຮັກຊາດ); ໃນວັນທີ 20 ກຸມພາ ປີ 1979 ກອງປະຊຸມໃຫຍ່ແນວລາວຮັກຊາດ ໄດ້ປ່ຽນຊື່ເປັນ ແນວລາວສ້າງຊາດ, ເພິ່ນກໍໄດ້ຮັບເລືອກຕັ້ງເປັນປະທານຄະນະກໍາມະການສູນກາງແນວລາວສ້າງຊາດ; ໃນກອງປະຊຸມ ຄັ້ງທີ 3 ປີ 1982 ແລະ ກອງປະຊຸມໃຫຍ່ຄັ້ງທີ 4 ປີ 1986 ຂອງພັກປະຊາຊົນປະຕິວັດລາວ ເພິ່ນໄດ້ຮັບເລືອກຕັ້ງເຂົ້າໃນຄະນະບໍລິຫານງານສູນກາງພັກ ແລະ ກົມການເມືອງສູນກາງພັກ. ທຸກໆໄລຍະຂອງການປະຕິວັດ ປະທານສຸພານຸວົງ ໄດ້ສຸມສະຕິປັນຍາ ແລະ ເຫື່ອແຮງຂອງຕົນ ເພື່ອຊີ້ນໍາໆພາຂະບວນປະຕິວັດລາວ ຍາດເອົາໄຊຊະນະອັນຍິ່ງໃຫຍ່ ມາໃຫ້ແກ່ປະເທດຊາດ; ທ່ານປະທານ ສຸພານຸວົງ ແມ່ນປັນຍາຊົນ, ເປັນເຊື້ອເຈົ້າຜູ້ໜຶ່ງທີ່ມີນໍ້າໃຈຮັກຊາດອັນດູດດື່ມ,ມີຈິດໃຈຕໍ່ສູ້ທີ່ອົງອາດກ້າແກ່ນ, ມີທັດສະນະຫຼັກໝັ້ນອັນໜັກແໜ້ນ ແລະ ນຳ້ໃຈເສຍສະຫຼະອັນສູງສົງ ເພື່ອຊາດ ເພື່ອປະຊາຊົນ, ທ່ານ ໄດ້ເລີ່ມຈາກນັກຮັກຊາດທີ່ແທ້ຈິງ ກາຍເປັນນັກປະຕິວັດທີ່ກ້າແກ່ນ ເປັນໜຶ່ງໃນບັນດາຜູ້ນໍາທີ່ດີເດັ່ນ ແລະ ເຄົາລົບຮັກຂອງປະຊາຊົນລາວບັນດາເຜົ່າ; ຕະຫຼອດຊີວິດຂອງທ່ານ ບໍ່ວ່າຈະຢູ່ໃນຕໍາແໜ່ງໃດ, ຄວາມຮັບຜິດຊອບອັນໃດ ເພິ່ນກໍໄດ້ອຸທິດໝົດຈິດໝົດໃຈ, ໝົດຄວາມສາມາດ ແລະ ຫົວຄິດປະດິດສ້າງຂອງຕົນ ໃຫ້ແກ່ ພາລະກິດປົກປັກຮັກສາ ແລະ ສ້າງສາປະເທດຊາດ ເພື່ອເອກະລາດ,ອະທິປະໄຕຂອງຊາດ ແລະ ຄວາມສົມບູນພູນສຸກຂອງປະຊາຊົນເຮົາ. ( ຂ່າວ: ແສງຈັນ)