ປະທານສະພາແຫ່ງຊາດ ເຄື່ອນໄຫວ ຊີ້ນຳວຽກງານຢູ່ອຸດົມໄຊ


...

23.07.2019 9:16     

   (ສພຊ) ຕອນບ່າຍທີ19 ກໍລະກົດຜ່ານມາ, ທ່ານນາງ ປານີ ຢາທໍ່ຕູ້ ປະທານສະພາແຫ່ງຊາດ ພ້ອມດ້ວຍຄະນະໄດ້ເຮັດວຽກກັບ ອົງການປົກຄອງແຂວງອຸດົມໄຊ ໂດຍໃຫ້ການຕ້ອນຮັບຂອງທ່ານ ຄຳພັນ ເຜີຍຍະວົງ ເລຂາພັກແຂວງ ເຈົ້າແຂວງອຸດົມໄຊ; ມີການນຳແຂວງເຂົ້າຮ່ວມ. ທ່ານ ຄຳພັນ ເຜີຍຍະວົງ ໄດ້ລາຍງານສະພາບການຈັດ ຕັ້ງປະຕິບັດ ແຜນພັດທະນາເສດຖະກິດ-ສັງຄົມ 6 ເດືອນຕົ້ນປີ ແລະ ທິດທາງຈຸດສຸມ 6 ເດືອນທ້າຍປີ 2019 ຂອງແຂວງອຸດົມໄຊ; ໃນໄລຍະຜ່ານມາເຖິງວ່າແຂວງອຸດົມໄຊຈະປະເຊີນກັບໄພພິບັດທາງດ້ານທໍາມະຊາດ, ພະຍາດສັດລະບາດ ແລະ ສັດ ຕູພືດທໍາລາຍຜົນລະປູກ, ແຕ່ໂດຍພາຍໃຕ້ການຊີ້ນໍາ-ນໍາພາຂອງກົມການເມືອງສູນກາງພັກກໍຄືອົງຄະນະພັກແຂວງ,ເມືອງແລະ ການສູ້ຊົນພະຍາຍາມຂອງບັນດາພະແນກການຕະຫຼອດຮອດປະຊາຊົນບັນ ດາເຜົ່າ ເຮັດໃຫ້ແຂວງອຸດົມໄຊສາມາດຜ່ານຜ່າບັນດາຄວາມຫຍຸ້ງຍາກຕ່າງໆ ສະແດງອອກໃນການສາມາດດຶງດູດການລົງທຶນຢ່າງສະໝໍ່າສະເໝີ, ເສດຖະກິດຂະຫຍາຍຕົວຢ່າງຕໍ່ເນື່ອງ 6,8% (ແຜນການ 7%), ມີສະຖານລະພາບທາງດ້ານການເມືອງ ການປ້ອງກັນຊາດ-ປ້ອງກັນຄວາມສະຫງົບ ຮັກສາໄດ້ຄວາມສະຫງົບພາຍໃນແຂວງ. ທ່ານເຈົ້າແຂວງ ຍັງໄດ້ມີຂໍ້ສະເໜີ ກ່ຽວກັບທຶນຮອນໃນການຍົກຍ້າຍ ຈັດສັນປະຊາຊົນ ຈໍານວນ 4 ບ້ານ ປະມານ 300 ຄອບຄົວ, ບັນຫາປະຊາຊົນຂາດເຂົ້າກິນ ແລະ ການຊົດເຊີຍຜູ້ໄດ້ຮັບຜົນກະທົບຈາກໂຄງການກໍ່ສ້າງເສັ້ນທາງລົດໄຟລາວ-ຈີນ. ຈາກນັ້ນທ່ານປະທານສະພາແຫ່ງຊາດ ກໍໄດ້ສະແດງຄວາມຊົມເຊີຍທີ່ແຂວງອຸດົມໄຊມີຄວາມພະຍາຍາມຜ່ານຜ່າ ຄວາມຫຍຸ້ງຍາກຕ່າງໆ ໂດຍການແກ້ໄຂບັນຫາຢ່າງມີຈຸດສຸມ; ກ່ຽວກັບການກະກຽມເນື້ອໃນກອງປະຊຸມສະໄໝສາມັນເທື່ອທີ 7 ຂອງສະພາປະຊາຊົນແຂວງອຸດົມໄຊ ຊຸດທີ I ຢາກໃຫ້ມີການປະສານສົມທົບກັນແໜ້ນລະຫວ່າງບັນດາພະ ແນກການຂອງແຂວງ ກັບບັນດາກໍາມະການຂອງສະພາປະຊາຊົນແຂວງ, ກວດກາເບິ່ງຄືນສາເຫດທີ່ພາໃຫ້ບໍ່ສາມາດບັນລຸໄດ້ບັນດາຄາດໝາຍ ໂດຍສະເພາະການບໍ່ບັນລຸໄດ້ ບັນດາຕົວຊີ້ວັດ ທາງດ້ານສາທາລະນະສຸກ, ສຶກສາທິການ ແລະ ກິລາ ຕະຫຼອດຮອດການພັດທະນາຊົນນະບົດ ການລຶບລ້າງຄວາມ ທຸກຍາກ ເພື່ອໃຫ້ມີຈຸດສຸມໃນການແກ້ໄຂໃນ 6 ເດືອນທ້າຍປີນີ້; ວຽກງານແຮງງານ ເຖິງຈະມີໂຮງຮຽນວິຊາຊີບ ແຕ່ເຫັນວ່າອັດຕາການປະລະການຮຽນຍັງມີສູງ, ສະນັ້ນ ສະເໜີໃຫ້ອົງການຈັດຕັ້ງມະຫາຊົນ ກໍຄືແນວລາວສ້າງຊາດ ຊ່ວຍໃນການປຸກລະດົມລູກຫຼານບໍ່ໃຫ້ປະລະການຮຽນ ແລະ ເຂົ້າຮຽນວິຊາຊີບຫຼາຍຂຶ້ນ, ມີການສ້າງບຸກຄະລາກອນຢ່າງມີຈຸດສຸມ ອີງໃສ່ຄວາມຮຽກຮ້ອງຕ້ອງການຕົວຈິງທາງດ້ານແຮງງານ; ໃນການດຶງດູດ ການລົງທຶນ ຄວນມີກົນໄກ ມີນະໂຍບາຍທີ່ດີ ໃຫ້ສາມາດແກ້ໄຂໄດ້ບັນດາສິ່ງກີດຂວາງຕ່າງໆ ສອດຄ່ອງກັບ ນະໂຍບາຍ 3 ເປີດ ຂອງລັດຖະບານ; ນອກຈາກນັ້ນ ທ່ານຍັງໄດ້ຊີ້ນໍາກ່ຽວກັບການກະກຽມບຸກຄະລາກອນ ຜູ້ອອກສະໝັກຮັບເລືອກຕັ້ງສະມາຊິກສະພາປະຊາຊົນແຂວງ ຊຶ່ງຕິດພັນກັບກອງປະຊຸມອົງຄະນະພັກເມືອງ. (ໂດຍ: ບຸນເກີດ ວົງໄຊຍາ)