ປະທານ ສນຊ ເຄື່ອນໄຫວຢ້ຽມຢາມ ແລະ ເຮັດວຽກຢູ່ຫຼວງນ້ຳທາ


...

26.07.2019 9:45     

   ທ່ານ ໄຊສົມພອນ ພົມວິຫານ ກໍາມະການກົມການເມືອງສູນກາງພັກ ປະ ທານສູນກາງແນວລາວສ້າງຊາດ (ສນຊ) ພ້ອມດ້ວຍຄະນະ ໄດ້ເຄື່ອນໄຫວຢ້ຽມຢາມ ແລະ ເຮັດວຽກຢູ່ແຂວງຫຼວງນໍ້າທາ ໂດຍການຕ້ອນຮັບຂອງ ທ່ານ ເພັດຖາວອນ ພິລາວັນ ເລຂາພັກແຂວງ ເຈົ້າແຂວງໆຫຼວງນໍ້າທາ ໃນລະຫວ່າງວັນທີ 23-24 ກໍລະກົດຜ່ານມາ ທີ່ສະໂມສອນແຂວງຫຼວງນໍ້າທາ; ໃນໄລຍະການເຄື່ອນໄຫວ ທ່ານປະທານ ສູນກາງແນວລາວສ້າງຊາດໄດ້ພົບປະ ແລະ ເຮັດວຽກກັັບຄະນະນຳຂັ້ນແຂວງ, ແນວລາວສ້າງຊາດ ແລະ ອົງການຈັດຕັ້ງມະຫາຊົນແຂວງ.
ໃນການເຄື່ອນໄຫວເຮັດວຽກໃນຄັ້ງນີ້ ທ່ານ ປະທານ ສນຊ ໄດ້ຮັບຟັງບົດລາຍງານສະພາບລວມຂອງແຂວງໂດຍຫຍໍ້ ຈາກທ່ານ ເຈົ້າແຂວງໆຫຼວງນໍ້າທາ ໂດຍສະເພາະວຽກງານການເມືອງ, ພື້ນຖານໂຄ່ງລ່າງເສດຖະກິດ, ວຽກງານວັດທະນະທໍາ-ສັງຄົມ ແລະ ວຽກງານອື່ນໆທີ່ກ່ຽວຂ້ອງ ທັງຈຸດດີ, ຈຸດອ່ອນ, ຂໍ້ຄົງຄ້າງຕ່າງໆໃຫ້ປະທານ ສນຊ ໄດ້ຮັບຊາບ. ພ້ອມກັນນີ້ ກໍໄດ້ມີການແລກປ່ຽນຄວາມຄິດຄວາມເຫັນກ່ຽວກັບວຽກງານຕ່າງໆພາຍໃນແຂວງ ເວົ້າລວມ, ເວົ້າສະເພາະ ວຽກງານການກະກຽມກອງປະຊຸມໃຫຍ່ 3 ຂັ້ນຂອງແຂວງ, ວຽກງານແນວລາວສ້າງຊາດ ແລະ ວຽກງານອົງການຈັດຕັ້ງມະຫາຊົນ.
ຫຼັງຈາກນັ້ນ, ທ່ານປະທານ ສນຊ ໄດ້ເຂົ້າຮ່ວມ ແລະ ໂອ້ລົມຕໍ່ກອງປະຊຸມ ຄົບຄະນະກໍາມະການແນວລາວສ້າງຊາດແຂວງ ຫຼວງນໍ້າທາ ຄັ້ງທີ 9 ສະໄໝທີ VI ມີທ່ານ ນາງ ລັດສະໝີ ມິ່ງບຸບຜາ ກໍາມະການພັກແຂວງ ປະທານແນວລາວສ້າງຊາດແຂວງ, ມີບັນດາທ່ານຮອງປະທານແນວລາວສ້າງຊາດແຂວງ, ບັນດາຕາງໜ້າພະແນກການອ້ອມຂ້າງ, ອົງການຈັດຕັ້ງມະຫາຊົນ ແລະ ພະນັກງານແນວລາວສ້າງຊາດແຂວງເຂົ້າຮ່ວມຮັບຟັງ ຊຶ່ງກ່ອນອື່ນ ທ່ານປະທານ ສນຊ ໄດ້ຮັບຟັງບົດສະຫຼຸບວຽກງານຮອບດ້ານປະຈໍາປີ 2018 ແລະ ທິດທາງແຜນການ ປີ 2019; ບົດສະຫຼຸບວຽກງານສ້າງຄອບຄົວ ແລະ ບ້ານສາມັກຄີປອງດອງຂອງແນວລາວສ້າງຊາດ ຈາກທ່ານ ບຸນລິວັນ ຮອງປະທານແນວລາວສ້າງຊາດແຂວງ ແລະ ວຽກອື່ນໆທີ່ກ່ຽວຂ້ອງ. ໃນໂອກາດນີ້ ທ່ານ ໄຊສົມພອນ ພົມວິຫານ ກໍໄດ້ເນັ້ນບາງບັນຫາຄື: ໃຫ້ແນວລາວສ້າງຊາດແຂວງ ຫຼວງນໍ້າທາ ຈົ່ງເພີ່ມທະວີກ້ອນກຳລັງມະຫາສາມັກຄີທຸກຊົນເຜົ່າ, ຊັ້ນຄົນ, ສາສະໜາ, ເພດ, ໄວ ໃຫ້ໜັກແໜ້ນ ຄຽງຄູ່ກັນນັ້ນຕ້ອງຮັບປະກັນສະຖຽນລະພາບທາງດ້ານການເມືອງ, ຄວາມສະຫງົບສຸກຂອງສັງຄົມ; ເອົາໃຈໃສ່ບຸກທະລຸທາງດ້ານຈິນຕະນາການ, ປັບປຸງແບບແຜນວິທີເຮັດວຽກຂອງຕົນ, ບຸກທະລຸຢ່າງແຂງແຮງທາງດ້ານການພັດທະນາຊັບພະຍາກອນມະນຸດ ໂດຍສະເພາະແມ່ນການບໍາລຸງສ້າງ ແລະ ຍົກລະດັບຄວາມຮູ້ ຄວາມສາມາດຂອງພະນັກງານວິຊາການ; ເອົາໃຈໃສ່ຊຸກຍູ້ປະຊາຊົນໃນການສ້າງຄອບຄົວ ແລະ ບ້ານສາມັກຄີປອງດອງຕິດພັນກັບການແກ້ໄຂຄວາມທຸກຍາກຂອງປະຊາຊົນ ໂດຍການສ້າງກອງທຶນພັດທະຂັ້ນບ້ານໃຫ້ເກີດດອກອອກຜົນ; ພ້ອມດຽວກັນນັ້ນ ຕ້ອງສົມທົບກັບພະແນກພາຍໃນແຂວງ, ພາກສ່ວນທີ່ກ່ຽວຂ້ອງ ເອົາໃຈໃສ່ຈັດຕັ້ງປະຕິບັດການແກ້ໄຂປະກົດການຫຍໍ້ທໍ້ໃນສັງຄົມ ບໍ່ວ່າຈະເປັນການສະກັດກັ້ນການຄ້າຂາຍເຖື່ອນ, ການຄ້າຢາເສບຕິດ, ບັນຫາການຄ້າມະນຸດ ແລະ ບັນຫາອື່ນໆໃຫ້ໝົດໄປ, ຄຽງຄູ່ກັນນັ້ນ ຕ້ອງມີສະຕິລະວັງຕົວຕໍ່ການເຄື່ອນໄຫວຂອງກຸ່ມຄົນທີ່ບໍ່ຫວັງດີສວຍໃຊ້ວຽກງານຊົນເຜົ່າ, ສາສະໜາ ເພື່ອແບ່ງແຍກຄວາມສາມັກຄີ. ເວົ້າລວມ ເວົ້າສະເພາະ ຄະນະກໍາມະການແນວລາວສ້າງຊາດແຕ່ລະຂັ້ນ, ພະນັກງານຫຼັກແຫຼ່ງ, ຜູ້ຊົງຄຸນວຸດທິ, ພະນັກງານປະຕິວັດ, ທະຫານ, ຕໍາຫຼວດ ຈົ່ງເຊີດຊູຄວາມຮັບຜິດຊອບໃນໜ້າທີ່ການເມືອງຂອງຕົນ, ເຕົ້າໂຮມຄວາມສາມັກຄີເປັນປຶກແຜ່ນ ແລະ ຕັ້ງໜ້າປຸກລະດົມຂົນ ຂວາຍປະຊາຊົນບັນດາເຜົ່າ ໃນການເຂົ້າຮ່ວມຂະບວນການຕ່າງໆທີ່ສຳຄັນຂອງຊາດ ແລະ ປະກອບສ່ວນຢ່າງຕັ້ງໜ້າຈັດຕັ້ງແຜນພັດທະນາເສດຖະກິດ-ສັງຄົມ ຂອງແຂວງໃຫ້ບັນລຸຕາມຄາດໝາຍ ກໍຄືວຽກງານແນວລາວສ້າງຊາດໃຫ້ມີການປ່ຽນແປງໃໝ່ທີ່ຕັ້ງໜ້າ ແລະ ນັບມື້ດີຂຶ້ນເທື່ອລະກ້າວ.
(ຂ່າວ-ພາບ: ສນຊ)