ທ່ານຮອງນາຍົກຢ້ຽມຢາມໂຮງໝໍ ມິດຕະພາບ ຫຼັງໃໝ່


...

29.07.2019 8:43     

   ໃນວັນທີ 26 ກໍລະກົດ ນີ້, ທ່ານ ສອນໄຊ ສີພັນດອນ ຮອງນາຍົກລັດຖະມົນຕີໄດ້ຢ້ຽມຢາມໂຮງໝໍມິດຕະພາບຫຼັງໃໝ່ 150 ຕຽງ ໂດຍການ ຕ້ອນຮັບຂອງທ່ານ ບຸນກອງ ສີຫາວົງ ລັດຖະມົນຕີກະຊວງສາທາລະນະສຸກ, ພ້ອມດ້ວຍ ພະນັກງານແພດໝໍເຂົ້າຮ່ວມ. ທ່ານ ສະໜອງ ທອງຊະ ນະ ຜູ້ອໍານວຍການໂຮງໝໍມິດ ຕະພາບໄດ້ລາຍງານສະພາບຂອງໂຮງໝໍມິດຕະພາບຫຼັງ ໃໝ່ ໂດຍຫຍໍ້ໃຫ້ ທ່ານ ສອນ ໄຊ ສີພັນດອນ ໄດ້ຮັບຊາບວ່າ: ໂຮງໝໍມິດຕະພາບຫຼັງໃໝ່ແມ່ນ ໄດ້ເຊັນສັນຍາເລີ່ມຕົ້ນກໍ່ສ້າງ ໃນປີ 2015, ສ້າງສໍາເລັດໃນ ປີ 2018 ໂດຍແມ່ນທຶນຂອງ ລັດຖະບານລາວ ໄດ້ກູ້ຢືມເງິນຈາກລັດຖະບານໂອຕຣິດ ຊຶ່ງແມ່ນບໍລິສັດແວັມແມດ (VAMED) ເປັນຜູ້ປະສານງານຫຼັກອອກແບບສໍາປະທານການກໍ່ສ້າງການຕອບສະໜອງການຕິດຕັ້ງເຄື່ອງຕ່າງໆດ້ວຍທຶນກູ້ຢືມມູນຄ່າ 112 ລ້ານກວ່າເອີໂຣ ຫຼື ປະມານ 1 ພັນກວ່າຕື້ກີບ, ພື້ນທີ່ໂຮງໝໍດັ່ງກ່າວແມ່ນ 21 ພັນກວ່າຕາແມັດ ແລະ ນໍາໃຊ້ເຂົ້າໃນການກໍ່ສ້າງອາຄານແມ່ນ 17 ພັນກວ່າຕາແມັດ, ເປັນອາຄານ 4 ຊັ້ນ ໃນນັ້ນຊັ້ນທີ 1 ແລະ 2 ແມ່ນສໍາລັບວຽກງານວິຊາການ, ສ່ວນຊັ້ນທີ 3 ແລະ 4 ແມ່ນຕຶກນອນ ແລະ ມີຕຶກພິເສດ ພ້ອມດ້ວຍຕຶກສະໜັບສະໜູນ ຊຶ່ງແມ່ນຕຶກທີ່ມີຫ້ອງອາຫານ, ຫ້ອງຊັກເຄື່ອງ, ຫ້ອງສ້ອມແປງ ແລະເຮືອນເຢັນ; ໂຮງໝໍດັ່ງກ່າວປະກອບດ້ວຍອຸປະກອນການແພດທີ່ທັນສະໄໜເຊັ່ນ: ຫ້ອງຜ່າຕັດ ປະສູດຍິງ, ຫ້ອງທີຊີສະແກນ, ຫ້ອງວິເຄາະ, ຫ້ອງເຄມີບໍາບັດ, ຫ້ອງແຍ່ຫົວໃຈ, ຫ້ອງສ່ອງກະເພາະລໍາໄສ້, ມີຫ້ອງນອນສໍາລັບຄົນເຈັບ 308 ຕຽງ; ປັດຈຸບັນມີພະນັກງານແພດໝໍ ປະຈໍາຢູ່ 100 ຄົນ ໃນຄວາມຕ້ອງການບຸກຄະລາກອນຕົວຈິງແມ່ນ 450 ຄົນ. ປັດຈຸບັນນີ້ໂຮງໝໍມິດ ຕະພາບຫຼັງໃໝ່ແມ່ນໄດ້ຮັບ ການກວດຄົນເຈັບເຂດນອກ ຈາກໂຮງໝໍມິດຕະພາບຕຶກເກົ່າສົ່ງມາ 100 ຄົນຕໍ່ມື້; ໃນໂອກາດດັ່ງກ່າວນີ້, ທ່ານຮອງນາຍົກລັດຖະມົນຕີ ກໍໄດ້ຢ້ຽມຊົມບາງຫ້ອງກວດພະຍາດແລະ ໄດ້ເນັ້ນໃຫ້ຄະນະນໍາຂອງໂຮງໝໍມິດຕະພາບໄດ້ກຽມຄວາມພ້ອມທາງດ້ານບຸກຄະລາກອນທຸກດ້ານ ພ້ອມທັງຝຶກອົບຮົມໃຫ້ແກ່ພະນັກງານແພດໝໍໃຫ້ມີຄວາມຊ່ຽວຊານໃນການນໍາໃຊ້ອຸປະກອນເຄື່ອງ ມືການແພດທີ່ທັນສະໄໝ ແລະ ການບໍາລຸງຮັກສາເພື່ອຕອບສະໜອງ ແລະ ໃຫ້ບໍລິການກັບຄົນເຈັບທີ່ເຂົ້າມາຮັກສາແລະ ປິ່ນປົວສຸຂະພາບ, ເພື່ອຫຼຸດຜ່ອນຄົນເຈັບທີ່ໄປປິ່ນປົວຢູ່ຕ່າງປະເທດຫັນມາປິ່ນປົວຢູ່ພາຍໃນປະເທດເ ພື່ອບໍ່ໃຫ້ເງິນຕາໄຫຼອອກນອກປະເທດ; ແລະ ໃນເດືອນຕຸລາປີ 2019 ທີ່ຈະມາເຖິງນີ້ທາງໂຮງໝໍມິດ ຕະພາບແມ່ນຈະໄດ້ເປີດທົດລອງນໍາໃຊ້ລະບົບທຸກຢ່າງທີ່ເປັນສະໄໝຢ່າງເປັນທາງການ. (ຂ່າວ-ພາບ: ຍຸພິນທອງ)