ທ່ານລັດຖະມົນຕີ ກະຊວງ ຖວທ ຕ້ອນຮັບ ທ່ານທູດສິງກະໂປ


...

29.07.2019 8:59     

   ທ່ານ ບໍ່ແສງຄໍາ ວົງດາລາ ລັດຖະມົນຕີກະຊວງຖະແຫຼງຂ່າວ, ວັດທະນະທໍາ ແລະ ທ່ອງທ່ຽວ (ຖວທ) ໄດ້ຕ້ອນຮັບການ ເຂົ້າຢ້ຽມອຳລາຂອງ ທ່ານ ໂດມີນິກ ໂກ (Dominic Goh) ເອກອັກຄະລັດຖະທູດ ສິງກະ ໂປ ປະຈຳ ສປປ ລາວ ໃນວັນທີ 26 ກໍລະກົດນີ້, ທີ່ໂຮງແຮມລາວພລາຊາ, ພາຍຫຼັງສໍາເລັດການປະຕິບັດໜ້າທີ່ການທູດ ຢູ່ ສປປ ລາວ. ໃນໂອ-ກາດນີ້, ທ່ານ ບໍ່ແສງຄໍາ ວົງດາລາ ໄດ້ສະ ແດງຄວາມຊົມເຊີຍຕໍ່ຜົນງານການເຄື່ອນໄຫວຢ່າງຫ້າວຫັນຂອງທ່ານທູດ ໃນການປະກອບສ່ວນຢ່າງຕັ້ງໜ້າຂອງ ທ່ານທູດ ທີ່ໄດ້ເປັນຂົວຕໍ່ໃຫ້ແກ່ການພົວພັນຮ່ວມມືໃນຫຼາຍດ້ານໂດຍສະເພາະແມ່ນດ້ານການພັດທະນາເສດຖະກິດສັງຄົມຂອງລາວ ໃຫ້ມີປະສິດທິຜົນ ແລະ ການຂະຫຍາຍຕົວຢ່າງຕໍ່ ເນື່ອງ, ນອກຈາກນີ້, ທ່ານລັດຖະມົນຕີ ຍັງໄດ້ກ່າວຍ້ອງຍໍຊົມເຊີຍຕໍ່ທ່ານທູດ ທີ່ໄດ້ ໃຫ້ການຊ່ວຍເຫຼືອໃນວຽກງານ ຖະແຫຼງຂ່າວ, ວັດທະນະທໍາ ແລະ ທ່ອງທ່ຽວຂອງ ສປປ ລາວ. ທ່ານ ບໍ່ແສງຄໍາ ວົງດາລາ ໄດ້ຖືໂອກາດນີ້ຕາງໜ້າໃຫ້ລັດຖະບານແຫ່ງ ສປປ ລາວ ປະດັບຫຼຽນໄຊມິດຕະພາບ ໃຫ້ທ່ານ ນາງ ໂກຊີລິນ ຊາລອນລູອິສ ( Goh Siu Lin Sharon Louise ) ຊ່ຽວຊານຄູສອນ, ວິຊາຟ້ອນບັນເລ້ ຈາກປະເທດສິງກະໂປ ທີ່ມີຜົນງານດີ ເດັ່ນປະກອບສ່ວນຊ່ວຍເຫຼືອອຸປະກອນການຮຽນ-ການສອນ ເຂົ້າໃນວຽກງານພັດທະນາການສຶກສາໃຫ້ແກ່ນັກຮຽນລາວ ນັບແຕ່ວັນທີ 1 ກັນຍາ 2015 ທີ່ໂຮງຮຽນສິລະປະແຫ່ງຊາດ. ພ້ອມນັ້ນ, ທ່ານ ລັດຖະມົນຕີ ກໍໄດ້ສະແດງຄວາມເຊື່ອໝັ້ນວ່າ ທ່ານທູດ ພ້ອມຄະນະ ຈະສືບຕໍ່ໃຫ້ການຮ່ວມມືໃນການສົ່ງເສີມສາຍພົວພັນອັນດີ ລະຫວ່າງສອງປະເທດ ລາວ-ສິງກະໂປ ໃຫ້ຈະເລີນງອກງາມຍິ່ງໆຂຶ້ນ. ທ່ານລັດຖະມົນຕີ ກໍໄດ້ອວຍພອນໃຫ້ ທ່ານທູດ ຈົ່ງມີສຸຂະ ພາບເຂັ້ມແຂງ, ມີຄວາມຜາສຸກ ແລະ ປະສົບຜົນສໍາເລັດໃນໜ້າທີ່ອັນໃໝ່ຍິ່ງໃຫຍ່ກວ່າເກົ່າ. ໃນໂອ-ກາດດຽວກັນ, ທ່ານທູດ ກໍໄດ້ສະແດງຄວາມຂອບ ໃຈຕໍ່ການຕ້ອນຮັບອັນອົບອຸ່ນໃນຄັ້ງນີ້ ແລະ ໄດ້ສະແດງຄວາມຂອບໃຈຕໍ່ລັດຖະບານ ແຫ່ງ ສປປ ລາວ ທີ່ໄດ້ອໍານວຍຄວາມສະດວກ ແລະ ໃຫ້ການຮ່ວມມືທີ່ດີຕະຫຼອດໄລຍະທີ່ປະຕິບັດໜ້າທີ່ ທີ່ຖືກມອບໝາຍຈົນສາມາດປະສົບຜົນສໍາເລັດຢ່າງຈົບງາມ. (ຂ່າວ-ພາບ: ພູວັນ)