ຊາວເມືອງນານ ເລັ່ງອະນາໄມເຮືອນຊານ ຫຼັງນ້ຳແຫ້ງລົງ


...

01.08.2019 8:55     

   ກຳລັງ ປກສ-ປກຊ ລວມທັງຊາວໜຸ່ມ ໄດ້ລະດົມກັນເຂົ້າໄປອະນາໄມຕາມແຄມທາງ ແລະ ເຮືອນຊານບ້ານຊ່ອງຂອງປະຊາຊົນເມືອງນານ ແຂວງຫຼວງພະບາງ ທີ່ຖືກຜົນກະທົບຈາກເຫດການນຳ້ຖ້ວມໃນຕອນເຊົ້າຂອງວັນທີ 30 ກໍລະກົດຜ່ານມາ, ໃນຂະນະທີ່ຄວາມເສຍຫາຍ ຍັງຢູ່ໃນຂັ້ນຕອນການປະເມີນ. ທ່ານ ແສງເພັດ ເພັດດວງຈັນ ຫົວໜ້າຫ້ອງການຖະແຫຼງຂ່າວ, ວັດທະນະທໍາ ແລະ ທ່ອງທຽ່ວ ເມືອງນານ ໄດ້ລາຍງານ ເມື່ອວັນທີ 31 ກໍລະກົດນີ້ ໃຫ້ຮູ້ວ່າ: ເຫດການນຳ້ຖ້ວມຄັ້ງນີ້ ເກີດຈາກຝົນຕົກໜັກຕັ້ງແຕ່ເວລາປະມານ 3:00 ໂມງ ຂອງວັນທີ 30 ກໍລະກົດ, ເຮັດໃຫ້ນຳ້ປ່າໄຫຼຊຸລົງຫ້ວຍນຳ້ລຳເຊ ແລ້ວໄຫຼລົງສູ່ແມ່ນຳ້ນານ, ກ່ອນຈະໄຫຼເຂົ້າຖ້ວມບ້ານ ເຮືອນ ແລະ ເນື້ອທີ່ການຜະລິດຂອງປະຊາຊົນ ໃນຕອນເຊົ້າຂອງວັນດຽວກັນ ແຕ່ຍັງໂຊກດີບໍ່ມີຜູ້ເສຍຊີວິດ. ທ່ານກ່າວອີກວ່າ: ເຫດ ການນ້ຳຖ້ວມຄັ້ງນີ້ ມີທັງໝົດ 9 ບ້ານທີ່ຕັ້ງຢູ່ແຄມນໍ້ານານ ແຕ່ 7 ບ້ານໄດ້ຮັບຜົນກະທົບຈາກນຳ້ຖ້ວມໃນຄັ້ງນີ້ ແລະ ບ້ານທີ່ໄດ້ຮັບຜົນກະທົບໜັກກວ່າໝູ່ແມ່ນບ້ານ ສີບຸນເຮືອງ ຊຶ່ງເຮັດໃຫ້ເຮືອນປະຊາຊົນ 10 ກວ່າຫຼັງຄາຍຸບລົງ ແລະ ເປ່ເພ ຈາກນຳ້ໄຫຼຊຸແຮງ, ຫຼາຍຫຼັງຄາເຮືອນຖືກນຳ້ເຊາະຝາ ເປ່ເພ, ໃນຂະນະທີ່ບ້ານອື່ນໆຍັງບໍ່ສາມາດສະຫຼຸບໄດ້, ນອກນັ້ນຍັງມີເນື້ອທີ່ນາທີ່ຫາກໍປັກດໍາແລ້ວໃໝ່ຖືກນໍ້າຖ້ວມຊຸ ແລະ ພືດກະສິກໍາຈຳນວນໜຶ່ງໄຫຼໄປຕາມກະແສນຳ້. ທ່ານ ແສງເພັດ ເພັດດວງຈັນ ຍັງໄດ້ກ່າວຕື່ມອີກວ່າ: ນຳ້ ຖ້ວມກະທັນຫັນໃນຄັ້ງນີ້ແມ່ນ ຖ້ວມແບບໄຫຼຊຸແຮງ ສະນັ້ນພຽງແຕ່ສອງສາມຊົ່ວໂມງກໍບົກແຫ້ງລົງ ແລະ ເຂົ້າສູ່ສະພາບປົກກະຕິ. ປັດຈຸບັນ ທາງພາກສ່ວນກ່ຽວຂ້ອງກຳລັງເກັບກຳຂໍ້ມູນຜົນເສຍຫາຍ, ສ່ວນປະຊາຊົນກຳລັງເລັ່ງອະນາໄມເຮືອນຊານຂອງພວກເຂົາ ແລະ ມີກຳລັງທະຫານ, ຕຳຫຼວດ ລວມທັງຊາວໜຸ່ມໄດ້ສຸມໃສ່ ອະນາໄມສິ່ງກີດຂວາງຕາມຫົນທາງ ແລະ ເຮືອນຊານຂອງປະຊາຊົນ. ສຳລັບການຊ່ວຍເຫຼືອ ປັດຈຸບັນ ມີຫຼາຍພາກສ່ວນໄດ້ເຂົ້າໄປຊ່ວຍເຫຼືອເບື້ອງຕົ້ນແລ້ວ ໂດຍສະເພາະແມ່ນນ້ຳດື່ມ, ເຂົ້າສານອາຫານແຫ້ງ ແລະ ເຄື່ອງໃຊ້ຈຳເປັນຈຳນວນໜຶ່ງ ແຕ່ກໍຍັງບໍ່ພຽງພໍກັບຄວາມຕ້ອງການ. (ຂ່າວ: ຄຳເຮືອງ-ພາບ: ປກສ)