ສຳມະນາວຽກງານສະກັດກັ້ນ ແລະ ປ້ອງກັນ ຕ້ານການຄ້າມະນຸດ


...

02.08.2019 9:26     

   ກອງປະຊຸມສຳມະນາວຽກງານສະກັດກັ້ນ ແລະ ປ້ອງກັນຕ້ານການຄ້າມະນຸດໄດ້ຈັດ ຂຶ້ນໃນລະຫວ່າງວັນທີ 1-3 ສິງຫານີ້ ທີ່ແຂວງສາລະວັນ ໂດຍການເຂົ້າຮ່ວມຂອງທ່ານ ສະຫວັນຄອນ ຣາຊມຸນຕຣີ ຮອງລັດຖະມົນຕີກະຊວງຖະແຫຼງຂ່າວ, ວັດທະນະທຳ ແລະ ທ່ອງທ່ຽວ (ຖວທ), ມີບັນດາຫົວໜ້າກົມ, ຮອງກົມ, ແຂກຖືກເຊີນ ແລະ ພາກສ່ວນກ່ຽວຂ້ອງຈາກສູນກາງ ແລະ ທ້ອງຖິ່ນເຂົ້າຮ່ວມ.
ທ່ານ ສະຫວັນຄອນ ຣາຊມຸນຕຣີ ໄດ້ກ່າວເປີດກອງປະຊຸມບາງຕອນວ່າ: ໃນໄລຍະທີ່ຜ່ານມາ ພັກ ແລະ ລັດຖະບານ ແລະ ບັນດາຂະແໜງການ ຍາມໃດກໍໃຫ້ຄວາມສຳຄັນ ແລະ ເອົາໃຈໃສ່ຢ່າງຕັ້ງໜ້າໃນການຊຸກຍູ້ ແລະ ສະໜັບສະໜູນວຽກງານສະກັດກັ້ນ ແລະ ປ້ອງກັນຕ້ານການຄ້າມະນຸດໃນ ສປປ ລາວ ຊຶ່ງບັນຫາການຄ້າມະນຸດແມ່ນເກີດຂຶ້ນຢູ່ບັນດາແຂວງຕ່າງໆ ເວົ້າລວມ ເວົ້າສະເພາະ ແຂວງທີ່ມີຊາຍແດນເຊື່ອມຈອດກັບປະເທດໃກ້ຄຽງແມ່ນມີຄວາມສ່ຽງສູງ. ສາເຫດຕົ້ນຕໍແມ່ນການດຳລົງຊີວິດຂອງປະຊາຊົນເຮົາ ຈຳນວນໜຶ່ງຍັງພົບຄວາມຫຍຸ້ງຍາກ, ຄອບຄົວທຸກຍາກ, ຄວາມແຕກໂຕນລະຫວ່າງຊົນນະບົດ ແລະ ຕົວເມືອງ, ບັນຫາເສດຖະກິດ, ການສຶກສາ, ຄວາມສາມາດທາງດ້ານສີມືແຮງງານບໍ່ຕອບ ສະໜອງໄດ້ຕາມຄວາມຕ້ອງ ການຂອງຕະຫຼາດແຮງງານ, ບັນຫາໃນຄອບຄົວ, ສິ່ງດັ່ງກ່າວເລົ່ານີ້ເປັນປັດໄຈໜຶ່ງທີ່ສົ່ງຜົນກະທົບ ແລະ ເປັນອຸປະສັກຕໍ່ໄວໜຸ່ມ, ຊາວໜຸ່ມ, ແມ່ຍິງຈຳນວນໜຶ່ງທີ່ມີຄວາມຕ້ອງການຢາກມີຊີວິດຄວາມເປັນຢູ່ທີ່ດີ ຢາກຊ່ວຍເຫຼືອຄອບຄົວຂອງເຂົາເຈົ້າ ແລະ ມີເດັກນ້ອຍ ທີ່ຍັງບໍ່ທັນບັນລຸນິຕິພາວະ, ຊຶ່ງພວກເຂົາເຫຼົ່ານັ້ນຖືກຕົວຍົວະ, ຖືກຫຼອກໄປເຮັດວຽກຢູ່ຕ່າງປະເທດ ດ້ວຍຫຼາຍຮູບການ ແລະ ໄປຊອກຫາວຽກເຮັດງານທຳຢູ່ໃນຕົວເມືອງ ແລະ ປະເທດໃກ້ຄຽງ, ເພື່ອຫາລາຍໄດ້ມາຈຸນເຈືອຄອບຄົວ, ຈຳນວນໜຶ່ງ ແມ່ນສະໝັກໃຈໄປເພື່ອຊອກຫາປະສົບການຊີວິດດ້ວຍຕົນເອງ ເພື່ອປັບປຸງຊີວິດຂອງຕົນເອງໃຫ້ດີຂຶ້ນ.
ເດັກນ້ອຍເພດຍິງຈຳນວນໜຶ່ງຖືກຫຼອກ ແລະ ບັງຄັບໃຫ້ໄປຂາຍຕົວ ແລະ ໄປບໍລິການຢູ່ຫ້າງຮ້ານຕ່າງໆໃນຕົວເມືອງ, ຈຳນວນໜຶ່ງຖືກຫຼອກໄປໃຊ້ແຮງງານໜັກ ແລະ ບັນຫາອື່ນໆ. ຈາກສະພາບຄວາມເປັນຈິງດັ່ງກ່າວ ຈຶ່ງຈຳເປັນຕ້ອງໄດ້ມີການຝຶກອົບຮົມໃຫ້ຄວາມຮັບຮູ້ ແລະ ເຂົ້າໃຈແກ່ຕົນເອງກ່ອນຈະມີການເດີນທາງໄປທ່ອງທ່ຽວ ແລະ ການໄປຊອກຫາວຽກເຮັດງານທຳຢູ່ຕ່າງປະເທດ ຕ້ອງສຶກສາຂໍ້ມູນ, ກຳໄດ້ເນື້ອໃນຢ່າງເລິກເຊິ່ງ ເພື່ອສາມາດຊ່ວຍ ແລະ ປ້ອງກັນຕົນເອງໄດ້. ການໂຄສະນາເຜີຍແຜ່ຂໍ້ມູນແມ່ນປັດໄຈອັນສຳຄັນ ໃນການສ້າງຄວາມເຂົ້າໃຈ ໃຫ້ຄອບຄົວ, ຊຸມຊົນໃນທ້ອງຖິ່ນ, ສັງຄົມ, ປະຊາຊົນລາວບັນດາເຜົ່າເຂດຫ່າງໄກສອກຫຼີກແມ່ນຕ້ອງໄດ້ເອົາໃຈໃສ່ເປັນພິເສດ, ສຳລັບກອງປະຊຸມໃນມື້ນີ້ບັນດາທ່ານໄດ້ພ້ອມກັນຍົກສູງຄວາມເອົາໃຈໃສ່ຕໍ່ບັນຫາດັ່ງກ່າວນີ້.
ດ້ວຍຄວາມພະຍາຍາມເພື່ອເຮັດໃຫ້ແຜນງານວຽກງານສະກັດກັ້ນ ແລະ ປ້ອງກັນ ຕ້ານການຄ້າມະນຸດໄດ້ຮັບຜົນ ສຳເລັດຄືດັ່ງກ່າວແມ່ນໄດ້ຮັບການຈັດຕັ້ງຜັນຂະຫຍາຍໃນແຕ່ລະຂະແໜງການຂອງຕົນຢ່າງກວ້າງຂວາງ ແລະ ເປັນລະບົບຕໍ່ເນື່ອງ ແຕ່ສູນກາງລົງຮອດທ້ອງຖິ່ນ, ກະຊວງ ຖວທ ໄດ້ຈັດກອງປະຊຸມສຳມະນາໃຫ້ທຸກພາກສ່ວນໄດ້ຮັບຮູ້ ແລະ ເຂົ້າໃຈຕໍ່ບັນຫາ ແລະ ການມີ ສ່ວນຮ່ວມ ໃນການຈັດຕັ້ງປະ ຕິບັດແນວທາງ ແລະ ກົດໝາຍ, ບັນດານິຕິກຳທີ່ຕິດພັນກັບແຜນງານສະກັດກັ້ນ ແລະ ປ້ອງກັນຕ້ານການຄ້າມະນຸດ ໃນສາກົນ, ພາກພື້ນ ແລະ ໃນ ສປປ ລາວ; ກ່ຽວກັບບັນຫາການເຄື່ອນຍ້າຍແຮງງານທີ່ຖືກກົດໝາຍ ແລະ ບໍ່ຖືກກົດໝາຍ, ກ່ຽວກັບການຕ້ານອາດຊະຍາກຳຂ້າມຊາດ.
ກອງປະຊຸມຄັ້ງນີ້, ບັນດາທ່ານໄດ້ຮັບຮູ້ບົດຮຽນ ແລະ ມີການແລກປ່ຽນບົດຮຽນທາງດ້ານທິດສະດີ ແລະ ພາກປະຕິ ບັດຕົວຈິງຈາກບັນດາວິທະຍາ ກອນ ໃນຂະແໜງການທີ່ກ່ຽວ ຂ້ອງ ຊຶ່ງສະທ້ອນໃຫ້ເຫັນຜົນກະທົບຂອງການຄ້າມະນຸດໃນສັງຄົມເຮົາ ໃນປັດຈຸບັນແມ່ນ ຮ່ວມມືກັນຫຼາຍພາກສ່ວນເພື່ອຊ່ວຍປ້ອງກັນ ແລະ ເຮັດໃຫ້ສະ ພາບການຄ້າມະນຸດໃນ ສປປ ລາວ ຫຼຸດໜ້ອຍລົງເທື່ອລະກ້າວ.
(ຂ່າວ: ບຸນທົງ)