ສະເຫຼີມສະຫຼອງວັນສ້າງຕັ້ງອົງການກວດສອບ ແຫ່ງລັດ ຄົບຮອບ 21 ປີ


...

06.08.2019 10:43     

   ອົງການກວດສອບແຫ່ງລັດ ໄດ້ຈັດພິທີສະເຫຼີມສະຫຼອງວັນສ້າງຕັ້ງຄົບຮອບ 21 ປີ (5 ສິງຫາ1998-5 ສິງຫາ 2019), ພ້ອມທັງລາຍງານການເຕີບໃຫຍ່ຂະຫຍາຍຕົວຂອງອົງການດັ່ງກ່າວຕະຫຼອດ 21 ປີຜ່ານມາ, ໃນຂະນະທີ່ 6 ເດືອນຕົ້ນປີນີ້ ໄດ້ດຳເນີນກວດສອບ 65 ເປົ້າໝາຍ. ພິທີສະເຫຼີມສະຫຼອງດັ່ງ ກ່າວ ໄດ້ຈັດຂຶ້ນໃນວັນທີ 5 ສິງຫານີ້ ທີ່ຫ້ອງປະຊຸມຂອງອົງການດັ່ງກ່າວ ພາຍໃຕ້ການເປັນປະທານຂອງທ່ານ ນາງວຽງທອງ ສີພັນດອນ ປະທານອົງການກວດສອບແຫ່ງລັດ, ມີຮອງປະທານ, ຫົວໜ້າກົມ, ຮອງກົມ ພ້ອມດ້ວຍພະນັກງານ-ລັດຖະກອນເຂົ້າຮ່ວມຢ່າງພ້ອມພຽງ.ທ່ານ ຕ້ອຍ ພົນທິລາດ, ຫົວໜ້າຫ້ອງການອົງການກວດສອບແຫ່ງລັດ ໄດ້ຂຶ້ນສະເໜີ ປະຫວັດຄວາມເປັນມາຂອງອົງການກວດສອບແຫ່ງລັດ ຊຶ່ງໄດ້ຍົກໃຫ້ເຫັນຄວາມຈໍາເປັນພາວະວິໄສ ໃນການສ້າງຕັ້ງອົງ ການລວມທັງການເຕີບໃຫຍ່ ຂະຫຍາຍຕົວຂອງອົງການກວດສອບແຫ່ງລັດຕະຫຼອດ ໄລຍະ 21 ປີຜ່ານມາ ຊຶ່ງໄດ້ຍົກ ໃຫ້ເຫັນເຖິງຜົນງານອັນໃຫຍ່ຫຼວງທີ່ອົງການດັ່ງກ່າວຍາດມາໄດ້ຕະຫຼອດໄລຍະທີ່ຜ່ານມາ ພ້ອມທັງລາຍງານຜົນສໍາເລັດໃນການເຄື່ອນໄຫວວຽກງານປະຈໍາ 6 ເດືອນຕົ້ນປີ ແລະ ທິດທາງແຜນການ 6 ເດືອນທ້າຍປີ 2019.
ສຳລັບການເຄື່ອນໄຫວວຽກງານວິຊາສະເພາະ ນັບແຕ່ຕົ້ນປີ 2019 ມາຮອດປັດຈຸບັນ ອົງການກວດສອບແຫ່ງລັດໄດ້ເຄື່ອນໄຫວວຽກງານກວດສອບ ຕາມມະຕິກອງປະຊຸມສະພາແຫ່ງຊາດ ແລະ ກອງປະຊຸມຄະນະປະຈໍາສະພາແຫ່ງຊາດ ຊຶ່ງສາມາດດໍາເນີນການກວດສອບໄດ້ 65 ເປົ້າໝາຍ ໃນນັ້ນມີ ກະຊວງ-ອົງການ, ແຂວງ-ນະຄອນຫຼວງ ຈໍານວນ 32 ເປົ້າໝາຍ; ໂຄງການເງິນກູ້ຢືມ ແລະ ຊ່ວຍເຫຼືອ ຈາກຕ່າງປະເທດ ຈໍານວນ 16 ເປົ້າໝາຍ, ໂຄງການຈັດສັນພູມລໍາເນົາ ແລະ ແກ້ໄຂຄວາມທຸກຍາກ 1 ເປົ້າໝາຍ, ໂຄງການຈັດສັນພູມລໍາເນົາ ແລະ ບ່ອນທໍາມາຫາກິນຖາວອນ 1 ເປົ້າໝາຍ, ວິສາຫະກິດລັດ 11 ເປົ້າໝາຍ, ໂຄງການລົງທຶນຂອງລັດ 1 ເປົ້າໝາຍ, ທະນາຄານລັດ 1 ເປົ້າໝາຍ, ວຽກງານ 3 ສ້າງ ແລະ ຈັດຊື້-ຈັດຈ້າງຂອງທະນາຄານລັດ 2 ເປົ້າໝາຍ. ພ້ອມນັ້ນ ໄດ້ສໍາເລັດການອອກບົດແຈ້ງຜົນການກວດສອບ 51 ເປົ້າໝາຍ ເພື່ອສົ່ງໃຫ້ເປົ້າໝາຍຖືກກວດສອບ, ສໍາເລັດບົດລາຍງານຜົນການກວດສອບເອກະສານລາຍງານການເງິນ ຂອງວິສາຫະກິດລັດ ແລະ ທະນາຄານ ປະຈໍາປີ 2018 ເພື່ອລາຍງານຕໍ່ຄະນະປະຈໍາສະພາແຫ່ງຊາດ, ໄດ້ສໍາເລັດການຈັດກອງປະຊຸມເປີດກວ້າງວຽກງານກວດສອບງົບປະມານແຫ່ງລັດ ປະຈໍາປີ 2018 ຢູ່ແຂວງຄໍາມ່ວນ.
ຈາກນັ້ນ, ພິທີຍັງໄດ້ມອບໃບຍ້ອງຍໍຂອງປະທານອົງການກວດສອບໃຫ້ແກ່ພະນັກງານ-ລັດຖະກອນຂອງອົງການກວດສອບແຫ່ງລັດ ແລະ ອົງການກວດສອບປະຈໍາ 3 ພາກ ທີ່ມີຜົນງານດີເດັ່ນ ໃນການເຄື່ອນໄຫວວຽກງານໄລຍະຜ່ານມາ ຊຶ່ງມີຈໍານວນ 100 ທ່ານ ຍິງ 42 ທ່ານ.
ທ່ານ ນາງ ວຽງທອງ ສີພັນດອນ ໄດ້ສະແດງຄວາມຍ້ອງຍໍ ຊົມເຊີຍຕໍ່ຜົນງານທີ່ພະນັກງານ-ລັດຖະກອນຍາດມາໄດ້ ພ້ອມທັງຮຽກຮ້ອງມາຍັງຄະນະພັກ-ຄະນະນໍາທຸກຂັ້ນ ພ້ອມ ດ້ວຍພະນັກງານ-ລັດຖະກອນ ຈົ່ງສືບຕໍ່ເອົາໃຈໃສ່ເພີ່ມທະວີ ວຽກງານສຶກສາອົບຮົມການ ເມືອງ-ແນວຄິດຢ່າງເປັນປົກ ກະຕິ, ສືບຕໍ່ປັບປຸງກົງຈັກການ ຈັດຕັ້ງໃຫ້ມີຄວາມເຂັ້ມແຂງ ຕາມທິດກະທັດຮັດ ສົມເຫດສົມຜົນ ເພື່ອຕອບສະໜອງຕາມຄວາມຮຽກຮ້ອງຕ້ອງການຂອງໜ້າທີ່ວຽກງານ, ສືບຕໍ່ຍົກລະດັບທາງດ້ານວິຊາສະເພາະໃຫ້ພະນັກງານ-ນັກກວດສອບ ເພື່ອຫັນເປັນມືອາຊີບເທື່ອລະກ້າວ, ສືບຕໍ່ສ້າງ ແລະ ປັບປຸງນິຕິກໍາລຸ່ມກົດໝາຍໃຫ້ຄົບຖ້ວນ ເພື່ອເປັນເຄື່ອງມື ໃຫ້ແກ່ການກວດສອບ, ເອົາໃຈໃສ່ຈັດຕັ້ງປະຕິບັດວຽກງານວິຊາສະເພາະກວດສອບ ໃຫ້ມີຄຸນນະພາບ ແລະ ສໍາເລັດຕາມແຜນການ ແນໃສ່ແກ້ໄຂປະກົດການຫຍໍ້ທໍ້ຕ່າງໆ ໂດຍສະເພາະແມ່ນດ້ານງົບປະມານ-ການເງິນ ເພື່ອປະກອບສ່ວນໃນການພັດທະນາເສດຖະກິດ-ສັງຄົມຂອງປະເທດ.
( ຂ່າວ: ແສງຈັນ)