ກົມຊັ້ນຄົນ ແລະ ການຈັດຕັ້ງສັງຄົມ ສນຊ ພົບປະແລກປ່ຽນບົດຮຽນ


...

08.08.2019 10:04     

   ກົມຊັ້ນຄົນ ແລະ ການຈັດ ຕັ້ງສັງຄົມ ສູນກາງແນວລາວສ້າງຊາດ (ສນຊ) ໄດ້ຈັດກອງປະຊຸມພົບປະແລກປ່ຽນບົດ ຮຽນບັນດາການຈັດຕັ້ງສັງ ຄົມ ອ້ອມຂ້າງສູນກາງ ແລະ ນະຄອນຫຼວງວຽງຈັນ ຂຶ້ນໃນວັນທີ 6 ສິງຫາຜ່ານມາ ທີ່ ສນຊໂດຍການເປັນປະທານຂອງທ່ານ ໄຊສົມພອນ ພົມວິຫານ ກຳມະການກົມການເມືອງສູນກາງພັກ ປະທານສູນກາງແນວລາວສ້າງຊາດ, ມີຮອງປະທານ ສນຊ , ສະມາຄົມ, ມູນນິທິ ພ້ອມດ້ວຍແຂກຖືກເຊີນເຂົ້າຮ່ວມ.
ທ່ານ ໄທລໍ ຫວາເຊັ້ງ ຫົວໜ້າກົມຊັ້ນຄົນ-ການຈັດ ຕັ້ງສັງຄົມ ໄດ້ລາຍງານການ ເຄື່ອນໄຫວການ ຈັດຕັ້ງ ສັງຄົມໃນ 1 ປີຜ່ານມາວ່າ: ກົມຊັ້ນຄົນ-ການຈັດຕັ້ງສັງຄົມ ໄດ້ເຄື່ອນໄຫວຕາມພາລະບົດບາດຂອງຕົນໃນການປະກອບສ່ວນພັດທະນາເສດຖະກິດ- ສັງ ຄົມ ມາເຖິງປັດຈຸບັນທົ່ວປະ ເທດມີສະມາຊິກທັງໝົດ 155 ສະມາຄົມ,ໃນນັ້ນສະມາຄົມທີ່ຂຶ້ນກັບສູນກາງຄຸ້ມຄອງ (ກະຊວງພາຍໃນ) 46 ສະມາ ຄົມ ແລະ 1 ກຸ່ມການຜະລິດ, ມີສະມາຄົມທີ່ຂຶ້ນກັບທ້ອງຖິ່ນ ( ແຂວງ- ນະຄອນຫຼວງ ) ມີ 109 ສະມາຄົມ, ມູນນິທິມີທັງໝົດ 25 ມູນນິທິ ຂຶ້ນກັບສູນກາງຄຸ້ມຄອງມີ 18 ມູນນິທິ, ຢູ່ຂັ້ນແຂວງ, ນະຄອນຫຼວງ 7 ມູນນິທິ, ຕະຫຼອດໄລຍະ 1 ປີຜ່ານມາກົມຊັ້ນຄົນ ແລະ ການຈັດຕັ້ງສັງຄົມໄດ້ເຮັດໜ້າທີ່ເປັນເສນາທິການພົວພັນປະສານງານລະຫວ່າງສູນກາງແນວລາວສ້າງຊາດ, ກະຊວງພາຍໃນ ແລະ ບັນດາສະມາຄົມ, ມູນນິທິເປັນປົກກະຕິ, ເປັນເຈົ້າການປຸກລະດົມຮັບເຄື່ອງຊ່ວຍເຫຼືອ ເພື່ອນໍາໄປຊ່ວຍເຫຼືອສັງຄົມ.
ທ່ານ ໄຊສົມພອນ ພົມ ວິຫານ ໄດ້ໃຫ້ກຽດໂອ້ລົມຕໍ່ ກອງປະຊຸມຊຶ່ງກ່ອນອື່ນທ່ານ ໄດ້ກ່າວສະແດງຄວາມຍ້ອງ ຍໍຊົມເຊີຍຕໍ່ຜົນງານການປະກອບສ່ວນຂອງບັນດາສະມາຄົມ ມູນນິທິທີ່ໄດ້ປະ ກອບສ່ວນຢ່າງຫ້າວຫັນ ແລະ ຫຼວງຫຼາຍ ພ້ອມນັ້ນ ທ່ານຍັງໄດ້ເນັ້ນໃຫ້ຄະນະສະມາຄົມ,ມູນນິທິທັງຫຼາຍຈົ່ງກຳແໜ້ນແນວທາງນະໂຍບາຍຂອງພັກ, ລະບຽບກົດໝາຍຂອງລັດ ແລະ ລະບຽບການສະເພາະຂອງຕົນ, ເສີມຂະຫຍາຍມູນເຊື້ອສາມັກຄີປອງດອງຄວາມເປັນເອກະລາດ ເປັນເຈົ້າຕົນເອງ ແລະ ສ້າງຄວາມເຂັ້ມແຂງດ້ວຍຕົນເອງ, ເພີ່ມທະວີການເຂົ້າຮ່ວມຂອງບັນດາການຈັດຕັ້ງສະມາຄົມ, ມູນນິທິເພື່ອເຂົ້າຮ່ວມຂະບວນການປົກປັກຮັກສາສິ່ງແວດລ້ອມຂອງປະເທດໃຫ້ມີຄວາມຍືນຍົງ, ເອົາໃຈໃສ່ສ້າງຂະບວນການຕ່າງໆຕາມພາລະບົດບາດ ແລະ ໜ້າທີ່ຂອງແຕ່ລະການຈັດຕັ້ງສະມາຄົມ, ມູນນິທິພ້ອມກັນສ້າງຄ່ານິຍົມທີ່ຖືກຕ້ອງ ເຊີດຊູກຽດສັກສີ, ຮັກສາເອກະລັກ ແລະ ມີຄວາມພາກພູມໃຈໃນຄວາມເປັນຊາດລາວ.
(ຂ່າວ: ບຸຸນອູ້ມ, ພາບ: ພູວັນ)