ຄະນະກວດກາສູນກາງພັກ ປາຖະກະຖາວັນສຳຄັນຂອງຊາດ - ສາກົນ


...

08.08.2019 10:03     

   ຄະນະກວດກາສູນກາງ ພັກ-ອົງການກວດກາລັດຖະບານ ໄດ້ຈັດພິທີປາຖະກະຖາຫວນຄືນມູນເຊື້ອສໍາຄັນຂອງພັກ-ຂອງຊາດ ແລະ ສາກົນຄື: ວັນເກີດປະທານ ສຸພານຸວົງ ຄົບຮອບ 110 ປີ (13 ກໍລະກົດ 1909-13 ກໍລະກົດ 2019), ວັນເຊັນສົນທິສັນຍາມິດຕະ ພາບ ແລະ ການຮ່ວມມື ລາວ-ຫວຽດນາມ ຄົບຮອບ 42 ປີ (18/7/1977-18/7/2019) ແລະ ວັນສ້າງຕັ້ງສາຍພົວພັນການທູດລາວ-ຫວຽດນາມຄົບ ຮອບ 57 ປີ (5/9/1962 - 5/9/2019) ຂຶ້ນໃນວັນທີ 7 ສິງຫານີ້ ທີ່ສະໂມສອນຄະນະດັ່ງກ່າວ ພາຍໃຕ້ການເປັນປະທານ ແລະ ໃຫ້ກຽດບັນລະຍາຍເອກະສານ ຂອງທ່ານ ສີໄນ ມຽງລາວັນ ຮອງປະທານຄະນະກວດກາສູນກາງພັກ ແລະ ອົງການກວດກາລັດຖະບານ, ມີພະນັກງານທີ່ກ່ຽວຂ້ອງເຂົ້າຮ່ວມຮັບຟັງ.
ໃນພິທີ ທ່ານ ສີໄນ ມຽງລາວັນ ໄດ້ຍົກໃຫ້ເຫັນເຖິງຊີວິດ ແລະ ການເຄື່ອນໄຫວປະຕິວັດຂອງປະທານ ສຸພານຸວົງ ໃນແຕ່ລະໄລຍະ ຊຶ່ງປະທານ ສຸພານຸວົງ ເປັນໃຈກາງແຫ່ງການເຕົ້າໂຮມຄວາມສາມັກຄີຂອງປວງຊົນລາວບັນດາເຜົ່າ,ທຸກຊັ້ນຄົນ,ສາສະໜາ ແລະ ເພດໄວ ປຸກລະດົມຂົນຂວາຍປະຊາຊົນ ໃຫ້ໂຮມເຂົ້າກັນເປັນກ້ອນກໍາລັງສາມັກຄີອັນໜຶ່ງອັນດຽວກັນ ໃນແນວໂຮມເອກະພາບແຫ່ງຊາດ ເພື່ອຕໍ່ສູ້ ຕ້ານສັດຕູຜູ້ຮຸກຮານ ແລະ ລູກແຫຼ້ງຕີນມືຂອງພວກເຂົາ, ຕະຫຼອດໄລຍະຂອງຂະບວນວິວັດແຫ່ງການຕໍ່ສູ້ກູ້ຊາດ, ປົກປັກຮັກສາ ແລະ ສ້າງສາພັດທະນາປະເທດຊາດ, ປະທານສຸພານຸວົງ ໄດ້ສຸມໝົດສະຕິປັນຍາ ແລະ ກໍາລັງວັງຊາ ຢ່າງບໍ່ຮູ້ອິດຮູ້ເມື່ອຍ ປະກອບສ່ວນເຂົ້າໃນພາລະກິດຂອງຊາດ ເພື່ອຄວາມເປັນເອກະລາດ, ອິດສະຫຼະພາບ ແລະ ຄວາມສົມບູນພູນສຸກຂອງປະຊາຊົນລາວບັນດາເຜົ່າ.
ຈາກນັ້ນ, ໃນພິທີ ຍັງໄດ້ຮັບຟັງ ການບັນລະຍາຍວັນເຊັນສົນທິສັນຍາມິດຕະພາບແລະການຮ່ວມມື ລາວ-ຫວຽດນາມ, ວັນສ້າງຕັ້ງສາຍພົວພັນການທູດລາວ-ຫວຽດນາມ ຊຶ່ງໃນປີ 1962 ເມື່ອລັດຖະບານປະສົມ 3 ຝ່າຍຂອງລາວ ໄດ້ຮັບການສ້າງຕັ້ງຂຶ້ນ, ລັດຖະບານຫວຽດນາມ ກໍໄດ້ສ້າງສາຍພົວພັນການທູດກັບປະເທດລາວວັນທີ 5/9/1962 ຊຶ່ງເປັນຂີດໝາຍແຫ່ງການພົວພັນຢ່າງເປັນທາງການທີ່ຖືກຕ້ອງຕາມກົດໝາຍ.
ໃນວັນທີ 18/7/1977 ລາວ-ຫວຽດນາມ ໄດ້ເຊັນສົນທິສັນຍາມິດຕະພາບ ແລະ ການຮ່ວມມືນໍາກັນ ໂດຍແມ່ນປະທານໄກສອນ ພົມວິຫານ ປະທານສະພາລັດຖະມົນຕີ ແລະ ທ່ານ ຟ້າມ ວັນ ດົງ ນາຍົກ ລັດຖະມົນຕີ ຂອງຫວຽດນາມ ເປັນຜູ້ລົງນາມ. ຕັ້ງແຕ່ນັ້ນມາ, ການຮ່ວມມືຮອບດ້ານ ລະຫວ່າງ ລາວ-ຫວຽດນາມ ແລະ ຫວຽດນາມ-ລາວ ໄດ້ເລີ່ມຕົ້ນສັກກະລາດໃໝ່ໃນເງື່ອນໄຂໃໝ່.
ໝາກຜົນອັນພົ້ນເດັ່ນຂອງການພົວພັນມິດຕະພາບ ແລະ ການຮ່ວມມືຮອບດ້ານ ລະຫວ່າງ ລາວ-ຫວຽດນາມ ແມ່ນດ້ານການເມືອງ, ການຕ່າງປະເທດໄດ້ຮັບການປັບປຸງ ແລະ ເສີມຂະຫຍາຍຢ່າງໜັກແໜ້ນ, ສ້າງຄວາມໄວ້ເນື້ອເຊື່ອໃຈຊຶ່ງກັນ ແລະ ກັນ, ຄວາມຜູກພັນລະຫວ່າງການນຳ ແລະ ປະຊາຊົນສອງຊາດໄດ້ມີຄວາມເລິກເຊິ່ງກວ່າເກົ່າ.
ການຮ່ວມມືໃນການພັດທະນາຊັບພະຍາກອນມະນຸດ ໄດ້ຮັບການເປີດກວ້າງດ້ວຍຫຼາຍຮູບການ, ຕອບສະໜອງກັບຄວາມຮຽກຮ້ອງຕ້ອງການໃນການປົກປັກຮັກສາ ແລະ ພັດທະນາປະເທດຊາດ.
ວຽກງານປ້ອງກັນຊາດ-ປ້ອງກັນຄວາມສະຫງົບ ໄດ້ສືບຕໍ່ປະສານສົມທົບກັນຢ່າງແໜ້ນແຟ້ນ, ໃນຂະນະທີ່ ການຮ່ວມມືດ້ານເສດຖະກິດ ມີວິສາຫະກິດຂອງຫວຽດນາມມາລົງທຶນຢູ່ລາວ 408 ໂຄງການ ມູນຄ່າ 3,7 ຕື້ໂດລາ ຈັດຢູ່ອັນດັບທີ 3 ຂອງການລົງທຶນຂອງຕ່າງປະເທດຢູ່ລາວ, ສ່ວນມູນຄ່າການຄ້າກໍເພີ່ມຂຶ້ນທຸກໆປີ. ສຳລັບການຊ່ວຍເຫຼືອຂອງຫວຽດນາມໃຫ້ແກ່ລາວ, ຫວຽດນາມໄດ້ຊ່ວຍສ້າງພື້ນ ຖານໂຄງລ່າງດ້ານຄົມມະນາ ຄົມ, ການສຶກສາ, ສາທາ ລະນະສຸກ, ວັດທະນະທຳ-ສັງຄົມ ແລະ ອື່ນໆໃຫ້ແກ່ ສປປ ລາວ.
ໄດ້ສືບຕໍ່ເສີມຂະຫຍາຍສາຍພົວພັນມິດຕະພາບອັນຍິ່ງໃຫຍ່, ຄວາມສາມັກຄີພິ ເສດ ແລະ ການຮ່ວມມືຮອບ ດ້ານລະຫວ່າງລາວ-ຫວຽດ ນາມ ໂດຍໄດ້ເພີ່ມທະວີການໂຄສະນາສຶກສາອົບຮົມໃຫ້ພະນັກງານ-ລັດຖະກອນ, ທະ ຫານ, ຕຳຫຼວດ ຕະຫຼອດຮອດປະຊາຊົນບັນດາເຜົ່າ ໂດຍສະ ເພາະແມ່ນຄົນຮຸ່ນໜຸ່ມໃຫ້ຮັບຮູ້ເຂົ້າໃຈຢ່າງເລິກເຊິ່ງ ກ່ຽວກັບມູນເຊື້ອຄວາມສາມັກຄີພິເສດ ແລະ ການຮ່ວມມືຮອບດ້ານລະ ຫວ່າງ ລາວ-ຫວຽດນາມ.
(ຂ່າວ: ແສງຈັນ)