ຮອງເຈົ້າແຂວງໆຊຽງຂວາງລົງກວດກາຜົນເສຍຫາຍ ຈາກນ້ຳຖ້ວມຢູ່ເຂດລາດບວກ


...

09.08.2019 9:52     

   ທ່ານ ບົວສອນ ສີນວນທອງ ຮອງເຈົ້າແຂວງໆຊຽງຂວາງ ພ້ອມດ້ວຍຄະນະ ໄດ້ລົງກວດກາ ແລະ ໃຫ້ກຳລັງໃຈປະຊາຊົນ ທີ່ໄດ້ຮັບຜົນກະທົບຈາກນຳ້ຖ້ວມ ເຂດບ້ານລາດບວກ ເມືອງແປກ ແຂວງຊຽງຂວາງ ໃນຕອນເຊົ້າວັນທີ 7 ສິງຫານີ້ ພາຍຫຼັງນຳ້ຖ້ວມໄດ້ຫຼຸດລະດັບລົງ ເນື່ອງຈາກປະຊາຊົນເຂດນີ້ ໄດ້ຮຽກຮ້ອງວ່າ ໄດ້ຮັບຜົນກະທົບຈາກນຳ້ຖ້ວມ, ຈາກການກໍ່ສ້າງເຂື່ອນໄຟຟ້າແກ້ງຄວນ (ນຳ້ງື່ມ) ຊຶ່ງທ່ານໄດ້ໂອ້ລົມປະຊາຊົນເຂດດັ່ງກ່າວ ໃຫ້ມີສະຕິເຝົ້າລະວັງ ແລະ ຕິດຕາມຢ່າງໃກ້ຊິດ ເນື່ອງຈາກສະພາບດິນອາກາດມີ ການປ່ຽນແປງ, ໃຫ້ຄວາມຊ່ວຍ ເຫຼືອຊຶ່ງກັນ ແລະ ກັນ, ມີຄວາມສາມັກຄີແໜ້ນແຟ້ນ, ພ້ອມທັງຮຽກຮ້ອງໃຫ້ພາກ ສ່ວນກ່ຽວຂ້ອງຕ້ອງລົງກວດ ກາ ປະເມີນຜົນເສຍຫາຍໂດຍໄວ, ປະຊາຊົນຕ້ອງຮີບຮ້ອນອະນາໄມເຮືອນ, ທົ່ງນາ, ເສັ້ນທາງ, ປັກດຳເຂົ້ານາປີຄືນໃໝ່ ຫຼື ປູກພືດຊະນິດອື່ນທົດແທນ. ນອກຈາກນີ້ ທ່ານ ຮອງເຈົ້າແຂວງ ຍັງໄດ້ສະເໜີໃຫ້ພາກສ່ວນກ່ຽວຂ້ອງຕ້ອງໄດ້ເຝົ້າລະວັງການລະບາດຂອງພະຍາດ ເປັນຕົ້ນແມ່ນ: ພະຍາດຕາແດງ, ຖອກທ້ອງ, ໄຂ້ຍຸງ. ສຳລັບເຫດການນ້ຳຖ້ວມເຂດລາດບວກ, ປະຊາຊົນສົງໄສວ່າ ເກີດຈາກເຂື່ອນໄຟຟ້າແກ້ງຄວນ ດັ່ງນັ້ນ ຮອງເຈົ້າແຂວງຈຶ່ງຢ້ໍາວ່າ ແຂວງກັບປະຊາຊົນ ແລະ ບໍລິສັດ ກໍ່ສ້າງເຂື່ອນໄຟ ຟ້າຕ້ອງຊອກຫາວິທີທາງອອກ ໃນການແກ້ໄຂບັນຫາດັ່ງກ່າວ. ໂອກາດນີ້ການນຳແຂວງກໍໄດ້ມອບອາຫານແຫ້ງ 4 ແກັດໃຫຍ່, ປ໋ອງປາ 2 ແກັດ ລວມມູນຄ່າ 1,6 ລ້ານກວ່າກີບ ໃຫ້ປະຊາຊົນຜູ້ໄດ້ຮັບຜົນກະທົບຈາກໄພນ້ຳຖ້ວມ ເພື່ອບັນເທົາທຸກ ນອກນີ້ຄະນະການນຳແຂວງຍັງໄດ້ໄປກວດກາ ເບິ່ງເນື້ອທີ່ນາຂອງປະຊາຊົນທີ່ໄດ້ຮັບຄວາມເສຍຫາຍ ແລະ ກວດກາເບິ່ງເຂື່ອນໄຟຟ້າ (ເຂື່ອນດິນ) ແກ້ງຄວນ. ຢູ່ກຸ່ມລາດບວກ ຊຶິ່ງມີຄວາມເສຍຫາຍຫຼາຍສົມຄວນ ມູນຄ່າຄວາມເສຍຫາຍຍັງບໍ່ສາມາດເກັບກຳໄດ້ລະອຽດເທື່ອ. (ຂ່າວ: ບຸນມີ ແສງທຸມມີ)