ກະກຽມສະເຫຼີມສະຫຼອງວັນສ້າງຕັ້ງ ແນວລາວສ້າງຊາດ ຄົບຮອບ 69 ປີ


...

09.08.2019 9:52     

   ເນື່ອງໃນໂອກາດກະກຽມສະເຫຼີມສະຫຼອງວັນສ້າງຕັ້ງ ແນວລາວສ້າງຊາດ (ສນຊ) ຄົບຮອບ 69 ປີ (13/8/1950-13/8/2019 ) ໃນວັນທີ 7 ສິງຫານີ້, ທີ່ ສນຊ, ທ່ານ ຈັນທະວົງ ແສນອາມາດມົນຕີ ຮອງປະ ທານ ສນຊ ໄດ້ໃຫ້ກຽດຖະແຫຼງຂ່າວຕໍ່ສື່ມວນຊົນວ່າ: ເນື່ອງ ໃນໂອກາດກະກຽມສະເຫຼີມ ສະຫຼອງວັນສ້າງຕັ້ງ ສນຊ 13 ສິງຫາ 1950 ທີ່ໃກ້ຈະມາເຖິງ ນີ້, ໃນແຕ່ລະປີແນວລາວ ສ້າງຊາດແຕ່ລະຂັ້ນຮ່ວມກັບ ປະຊາຊົນ ລາວບັນດາເຜົ່າ ແລະ ຊັ້ນຄົນຕ່າງໆໄດ້ຈັດຕັ້ງພິທີສະເຫຼີມສະຫຼອງວັນສຳຄັນດັ່ງກ່າວ ເພື່ອເພີ່ມທະວີຄວາມສາມັກຄີປອງດອງທົ່ວປວງຊົນ ຫວນຄືນເຖິງມູນເຊື້ອປະຫວັດສາດອັນສະຫງ່າອົງອາດ ແລະ ຜົນງານຂອງຕົນ ຄືດັ່ງທີ່ພວກເຮົາໄດ້ຮັບຮູ້ນຳກັນແລ້ວວ່າແນວລາວສ້າງຊາດໄດ້ກຳເນີດ ແລະ ເຕີບໃຫຍ່ຂະຫຍາຍຕົວ ໂດຍຜ່ານ 3 ໄລຍະທີ່ມີຊື່ເອີ້ນແຕກຕ່າງກັນຄື: ແນວລາວອິດສະຫຼະ, ແນວລາວຮັກຊາດ ແລະ ແນວລາວສ້າງຊາດ. ແນວລາວສ້າງຊາດໄດ້ສືບຕໍ່ປະຕິບັດບົດບາດໃນການເປັນຄັນທຸງເຕົ້າໂຮມຄວາມສາມັກຄີປອງດອງປະ ຊາຊົນລາວບັນດາເຜົ່າ, ສ້າງຄວາມເຂັ້ມແຂງ ແລະ ປັບປຸງກຳລັງແຮງທົ່ວປວງຊົນ, ສຶກສາອົບຮົມປຸກລະດົມ ປະຊາຊົນລາວບັນດາເຜົ່າເຂົ້າຮ່ວມໃນພາລະກິດປົກປັກຮັກສາ ແລະ ສ້າງສາພັດທະນາປະເທດຊາດ. ເພື່ອເປັນການສ້າງຂະ ບວນການຂໍ່ານັບຮັບຕ້ອນວັນສ້າງຕັ້ງແນວລາວສ້າງຊາດຄົບຮອບ 69 ປີ ແລະ ວັນສຳຄັນຕ່າງໆຂອງຊາດເຊັ່ນ: ວັນສ້າງຕັ້ງສື່ມວນຊົນແຫ່ງຊາດ, ວັນລັດຖະທຳມະນູນແຫ່ງຊາດ ວັນທີ 15 ສິງຫາ, ວັນຢຶດອຳນາດທົ່ວປະເທດ 23 ສິງຫາ 1945, ເພື່ອໃຫ້ເຫັນໄດ້ຄວາມໝາຍ ຄວາມສຳຄັນ ຂອງວັນດັ່ງກ່າວ, ສູນກາງແນວລາວສ້າງຊາດຈຶ່ງໄດ້ອອກແຈ້ງການແນະນຳເຖິງແນວລາວສ້າງຊາດນະຄອນຫຼວງ ແລະ ບັນດາແຂວງທົ່ວປະເທດເພື່ອຈັດຕັ້ງກິດຈະກຳຕ່າງໆ ຕາມຄວາມເໝາະສົມ, ສ່ວນສູນກາງແນວລາວສ້າງຊາດຈະໄດ້ຈັດບາງກິດຈະກຳຈຳນວນໜຶ່ງດັ່ງນີ້: ວາງພວງມາລາຢູ່ອະນຸສາວະລີນັກຮົບນິລະນາມ ແລະ ອະນຸສອນສະຖານການນຳພັກ-ລັດ, ຈັດຕັ້ງປາຖະກະຖາຫວນຄືນມູນເຊື້ອວັນສ້າງຕັ້ງແນວລາວສ້າງຊາດ ຄົບຮອບ 69 ປີ, ແຂ່ງຂັນກິລາບານເຕະ ແລະ ເປຕັງມິດຕະພາບຍິງ - ຊາຍ, ຈັດຕັ້ງແຂ່ງຂັນມວຍສາກົນ ມິດຕະພາບ ຊີງຊະນະເລີດຍິງ-ຊາຍທົ່ວປະເທດ ຄັ້ງທີ XIII, ນອກຈາກນັ້ນຍັງ ຈະມີກິດຈະກຳອື່ນໆອີກຈຳນວນໜຶ່ງ. (ຂ່າວ: ພູວັນ-ພາບ: ສຳນານ)