ປຶກສາຫາລືການສ້າງນິຕິກຳລຸ່ມກົດໝາຍສື່ມວນຊົນ


...

05.09.2019 8:15     

   ກົມສື່ມວນຊົນກະຊວງຖະແຫຼງຂ່າວ, ວັດທະນະທຳ ແລະ ທ່ອງທ່ຽວ (ຖວທ) ໄດ້ຈັດກອງປະຊຸມປຶກສາຫາລືການສ້າງນິຕິກຳລຸ່ມກົດໝາຍວ່າດ້ວຍສື່ມວນຊົນ (ສະບັບປັບປຸງ) ຂຶ້ນເມື່ອວັນທີ 4 ກັນຍານີ້ ທີ່ກະຊວງ ຖວທ ພາຍໃຕ້ການເປັນປະທານຂອງທ່ານ ສະຫວັນຄອນ ລາຊມຸນຕຣີ ຮອງລັດຖະມົນຕີກະຊວງ ຖວທ ປະທານສະມາຄົມນັກຂ່າວ ແຫ່ງ ສປປ ລາວ ໂດຍມີການນຳສື່ມວນຊົນຈາກພາກສ່ວນຕ່າງໆເຂົ້າຮ່ວມ. ໃນພິທີ ທ່ານ ປິ່ນປາຖະໜາ ພັນທະມາລີ ຫົວໜ້າກົມສື່ມວນຊົນໄດ້ຜ່ານຮ່າງຂໍ້ຕົກລົງວ່າ ດ້ວຍການຄຸ້ມຄອງການບໍລິ ການຂອງສື່ມວນຊົນ ຊຶ່ງປະ ກອບມີ 12 ໝວດ ແລະ 35 ມາດຕາ, ທ່ານຫົວໜ້າສື່ມວນຊົນກ່າວວ່າ: ຮ່າງຂໍ້ຕົກລົງສະ ບັບນີ້ແມ່ນສ້າງຂຶ້ນເພື່ອຈັດ ຕັ້ງຜັນຂະຫຍາຍມາດຕາ 50 (ປັບປຸງ) ຂອງກົດໝາຍວ່າດ້ວຍສື່ມວນຊົນ(ສະບັບປັບປຸງ) ຊຶ່ງຈຸດປະສົງໜຶ່ງແມ່ນເພື່ອຄວາມເປັນລະບຽບ ແລະ ເປັນເອກະພາບໃນຂອບເຂດທົ່ວປະເທດໃນການຄຸ້ມຄອງການໂຄສະນາສິນຄ້າຜ່ານສື່ມວນຊົນ ແລະ ສອດຄ່ອງກັບການພັດທະນາເສດຖະກິດ-ສັງຄົມຂອງ ສປປ ລາວ,ສອງເພື່ອແບ່ງຄວາມຮັບຜິດຊອບລະຫວ່າງຂະແໜງຂ່າວ-ສື່ມວນຊົນກັບຂະແໜງການອື່ນທີ່ກ່ຽວຂ້ອງກັບການອະນຸຍາດໃນແຕ່ລະດ້ານເຊັ່ນ:ດ້ານເນື້ອໃນ, ຮູບແບບ, ການເຜີຍແຜ່ ແລະ ດ້ານອື່ນທີ່ກ່ຽວຂ້ອງກັບການໂຄສະນາສິນຄ້າ, ສາມ ເພື່ອປົກປ້ອງຜູ້ບໍລິໂພກສິນຄ້າຈາກການໂຄສະນາສິນຄ້າຜ່ານສື່ມວນຊົນປະເພດຕ່າງໆ. ໃນການປະກອບຄຳເຫັນ ຜູ້ເຂົ້າຮ່ວມໄດ້ລົງເລິກ ວິເຄາະ, ວິໄຈ ແຕ່ມາດຕາ 1 ຈົນຮອດມາດຕາສຸດທ້າຍຢ່າງລະອຽດຮັດກຸມ ແລະ ຈະແຈ້ງ ແນໃສ່ເຮັດໃຫ້ຮ່າງຂໍ້ຕົກລົງດັ່ງກ່າວສົມບູນຄົບຖ້ວນ ແລະ ເມື່ອປະກາດໃຊ້ແລ້ວໃຫ້ໄດ້ຮັບການ ຈັດຕັ້ງປະຕິບັດຢ່າງມີຜົນສຳເລັດ. (ພາບ-ຂ່າວ: ບຸນອູ້ມ)