ກອງທັບ ນຳໃຊ້ກຳລັງພົນ ແລະ ວັດຖຸ ອຸປະກອນຊ່ວຍປະຊາຊົນທີ່ຖືກຜົນກະທົບ ຈາກໄພນ້ຳຖ້ວມຢ່າງທັນການ


06.09.2019 9:08     

   ເນື່ອງຈາກພາຍຸໝຸນເຂດຮ້ອນໂພດູນ ແລະ ລົມພາຍຸດີເປຣເຊິນ ໄດ້ພັດເຂົ້າ ສປປ ລາວເຮົາ ເຮັດໃຫ້ທຸກພາກຂອງປະເທດເຮົາ ມີຝົນຕົກຕິດຕໍ່ກັນຫຼາຍວັນ ແລະ ເກີດມີໄພນ້ຳຖ້ວມຢູ່ 6 ແຂວງຄື: ຄຳມ່ວນ, ສະຫວັນນະເຂດ, ສາລະວັນ, ຈຳປາສັກ, ເຊກອງ ແລະ ອັດຕະປື ເຮັດໃຫ້ 37 ເມືອງ, 788 ບ້ານ, 54.207 ຄອບຄົວ ໄດ້ຮັບຜົນກະທົບ, ໃນນີ້ ມີຜູ້ເສຍຊີວິດ 2 ຄົນຢູ່ແຂວງສະຫວັນນະເຂດ ແລະ ຈຳປາສັກ ແລະ ສູນຫາຍ 2 ຄົນ ຢູ່ແຂວງຈຳປາສັກ.
ທ່ານ ພົນຕີ ຈັນທອງ ສອນຕະອາດ ຮອງຫົວໜ້າກົມໃຫຍ່ເສນາທິການ ກະຊວງປ້ອງກັນປະເທດ ໄດ້ລາຍງານ ເມື່ອວັນທີ 5/9/2019 ໃຫ້ຮູ້ວ່າ: ຈາກສະພາບການດັ່ງກ່າວ ກົມໃຫຍ່ເສນາທິການ ໄດ້ຊີ້ນຳບັນດາກົມກອງທີ່ຕັ້ງຢູ່ແຕ່ລະທ້ອງຖິ່ນ ຈັດຕັ້ງກຳລັງ ແລະ ນຳໃຊ້ພາຫະນະອຸປະກອນຂອງບັນດາກົມກອງ ເຂົ້າໄປກອບກູ້ຊ່ວຍເຫຼືອ ຍົກຍ້າຍປະຊາຊົນອອກຈາກບ່ອນທີ່ໄດ້ຮັບຜົນກະທົບ ໄປບ່ອນທີ່ປອດໄພຢ່າງຮີບດ່ວນ ແລະ ປະກອບສ່ວນຊ່ວຍເຫຼືອປະຊາຊົນແກ້ໄຂຜົນກະທົບ, ໃນນັ້ນ ກອງພົນທີ 4 ໄດ້ນຳໃຊ້ກຳລັງຈຳນວນ 9 ຄົນ, ເຮືອທ້ອງແບນ 2 ລຳ, ລົດຂົນສົ່ງ 5 ຄັນ ໄປຊ່ວຍແຂວງສາລະວັນ. ນອກນັ້ນ ກອງພົນ ໄດ້ກະກຽມກຳລັງລໍຖ້າຢູ່ກອງພັນໃຫຍ່ 401 ຈຳນວນ 300 ຄົນ ແລະ ກະກຽມ 200 ຄົນ ຢູ່ບັນດາກອງພັນນ້ອຍ. ດ້ານພາຫະນະມີລົດ, ເຮືອເປເຕແອັດ 2 ລຳ, ເຮືອທ້ອງແບນ 1 ລຳ. ສ່ວນກອງພົນທີ 5 ນຳໃຊ້ກຳລັງ 400 ຄົນ, ເຮືອ 6 ລຳ, ລົດຂົນສົ່ງ 4 ຄັນ ໄປຊ່ວຍແຂວງຈຳປາສັກ ແລະ ສາລະວັນ. ສຳລັບກອງບັນຊາການທະຫານແຂວງຄຳມ່ວນ ໄດ້ນຳໃຊ້ກຳລັງກອງພັນນ້ອຍ ແລະ ກອງບັນຊາການບັນດາເມືອງຈຳນວນ 704 ຄົນ ພ້ອມລົດຂົນສົ່ງ 6 ຄັນ, ເຮືອ 4 ລຳ ໄປຊ່ວຍປະຊາຊົນຢູ່ 6 ເມືອງ ທີ່ຖືກນ້ຳຖ້ວມ. ດ້ານກອງບັນຊາການທະຫານແຂວງສະຫວັນນະເຂດ ໄດ້ນຳໃຊ້ກຳລັງກອງພັນນ້ອຍ ແລະ ກອງບັນຊາການບັນດາເມືອງ ຈຳນວນ 400 ຄົນ ພ້ອມລົດຂົນສົ່ງ 12 ຄັນ ໄປຊ່ວຍປະຊາຊົນຢູ່ 10 ເມືອງ ທີ່ຖືກນ້ຳຖ້ວມ. ຢູ່ສາລະວັນ, ກອງບັນຊາການທະຫານແຂວງ ໄດ້ນຳໃຊ້ກຳລັງກອງພັນນ້ອຍ ແລະ ກອງບັນຊາການບັນດາເມືອງ ຈຳນວນ 350 ຄົນ ພ້ອມລົດຂົນສົ່ງ 6 ຄັນ ສົມທົບກັບກອງພົນທີ 5 ແລະ ກອງພົນທີ 4 ໄປຊ່ວຍປະຊາຊົນໃນ 3 ເມືອງ ທີ່ຖືກນ້ຳຖ້ວມ. ຢູ່ຈຳປາສັກ, ກອງບັນຊາການແຂວງ ກໍໄດ້ນຳໃຊ້ກຳລັງກອງພັນນ້ອຍ ແລະ ກອງບັນຊາການບັນດາເມືອງ ຈຳນວນ 350 ຄົນ ພ້ອມລົດຂົນສົ່ງ 8 ຄັນ ສົມທົບ ກອງພົນທີ 5 ແລະ ໂຮງຮຽນນາຍສິບເລກ 2 ໄປຊ່ວຍປະຊາຊົນໃນ 10 ເມືອງ ທີ່ຖືກນ້ຳຖ້ວມ. ຢູ່ເຊກອງ, ກອງບັນຊາການແຂວງ ໄດ້ນຳໃຊ້ກຳລັງກອງພັນນ້ອຍ ແລະ ກອງບັນຊາການບັນດາເມືອງ ຈຳນວນ 250 ຄົນ ພ້ອມລົດຂົນສົ່ງ 6 ຄັນ ໄປຊ່ວຍປະຊາຊົນຢູ່ 4 ເມືອງທີ່ຖືກນ້ຳຖ້ວມ.
ສັງລວມ ການນຳໃຊ້ກຳລັງກອງທັບຊ່ວຍປະຊາຊົນ ທີ່ໄດ້ຮັບຜົນກະທົບຈາກໄພນ້ຳຖ້ວມທີ່ 6 ແຂວງ ລວມມີຈຳນວນພົນ 2.200 ກວ່າຄົນ. ປັດຈຸບັນໄດ້ກຽມກຳລັງໄວ້ມີ 5 ກອງພົນ ຢູ່ 17 ແຂວງ ລວມ 5.000 ຄົນ. ເຮືອທຸກຊະນິດ 40 ລຳ, ລົດຂົນສົ່ງ 50 ຄັນ ແລະ ຍົນຮັບໃຊ້ 4 ລຳ.
(ຂ່າວ: ລູກເຂົ້າໜຽວ)