ກະຊວງ ຮສສ ລາຍງານຜົນກະທົບ ແລະ ການແກ້ໄຂ ຊ່ວຍເຫຼືອສຸກເສີນຕໍ່ແຂວງພາກກາງ ແລະ ພາກໃຕ້


...

09.09.2019 10:16     

   ທ່ານ ວິໄລ ພົງສີສົມຫວັງວ່າການຫົວໜ້າກົມສັງຄົມສົງ ເຄາະ ກະຊວງແຮງງານ ແລະສະຫວັດດີການສັງຄົມ (ຮສສ) ໄດ້ຕາງໜ້າກອງເລຂາຄະນະກຳມະການປ້ອງກັນ ແລະ ຄວບຄຸມໄພພິບັດແຫ່ງຊາດຖະແຫຼງຂ່າວລາຍງານຜ່ານສື່ມວນຊົນກ່ຽວກັບສະພາບຜົນກະທົບ ແລະ ການແກ້ໄຂຊ່ວຍເຫຼືອສຸກເສີນຢູ່ບັນດາແຂວງພາກກາງ ແລະ ໃຕ້ຂອງລາວ ໃນວັນທີ 8 ກັນຍາ ທີ່ກະຊວງ ຮສສ, ທ່ານກ່າວວ່າ: ຕໍ່ກັບຜົນກະທົບຈາກອິດທິພົນຂອງລົມພາຍຸໜຸນເຂດຮ້ອນໂພດູ ແລະ ລົມພາຍຸດີເປຣເຊິນທີ່ພັດຜ່ານເຂົ້າມາ ສປປ ລາວ ໃນໄລຍະທ້າຍເດືອນສິງຫາ ຫາ ຕົ້ນເດືອນກັນຍາ 2019 ເຮັດໃຫ້ມີຝົນຕົກໜັກ ແລະ ເກີດນໍ້າຖ້ວມ ຢູ່ 6 ແຂວງຄື: ແຂວງຄຳມ່ວນ, ສະຫວັນນະເຂດ, ສາລະວັນ, ຈຳປາສັກ, ເຊກອງ ແລະ ແຂວງອັດຕະປື, ສົ່ງຜົນກະທົບໂດຍກົງຕໍ່ປະຊາຊົນ ໃນ 37 ເມືອງ, 1.187 ບ້ານ, ມີປະຊາຊົນໄດ້ຮັບຜົນກະທົບ 122.892 ຄອບຄົວ, 224.604 ຄົນ ຖືກກະທົບ ,ໃນນີ້ ມີຜູ້ເສຍຊີວິດ 10 ຄົນ (ແຂວງສະຫວັນນະເຂດ 3 ຄົນ, ສາລະວັນ 2 ຄົນ ແລະ ຈໍາປາສັກ 5 ຄົນ), ຍົກຍ້າຍ 7.559 ກວ່າຄອບຄົວ (64.022 ກວ່າຄົນ), ບ້ານເຮືອນຂອງປະຊາຊົນຈໍານວນຫຼາຍຖືກນໍ້າຖ້ວມ, ພື້ນທີ່ການຜະລິດກະສິກໍາເຊັ່ນ: ເນື້ອທີ່ນາ 139.829 ກວ່າເຮັກ ຕາ, ສວນ 251 ເຮັກຕາ, ໜອງປາ 1.922 ໜອງ, ສັດລ້ຽງຫຼາຍ ກວ່າ 300 ໂຕ ຖືກຍ້າຍໄປຢູ່ບ່ອນ ທີ່ປອດໄພ, ຊົນລະປະທານ 33 ແຫ່ງ, ອ່າງເກັບນໍ້າ 43 ແຫ່ງ, ຄອງເໝືອງ 64.025 ແມັດ, ເສັ້ນທາງຄົມມະນາຄົມຖືກຕັດ ຂາດຍ້ອນນໍ້າຖ້ວມ ໃນນີ້ມີຫຼາຍກວ່າ 252 ກມ, ຂົວ 12 ແຫ່ງ ຖືກນໍ້າຖ້ວມ, ໂຮງຮຽນ 215 ແຫ່ງ, ໂຮງໝໍ ແລະ ສຸກສາລາ 10 ແຫ່ງ ຊຶ່ງຄວາມຕ້ອງການຮີບ ດ່ວນ ລວມມີເຄື່ອງອຸປະໂພກ-ບໍລິໂພກ ເປັນຕົ້ນ ອາຫານ, ນໍ້າດື່ມ, ເຄື່ອງໃຊ້ຄົວເຮືອນ, ເຄື່ອງນອນ, ເຮືອພ້ອມຄົນຂັບ ແລະ ງົບປະມານຮັບໃຊ້ອື່ນໆ ຕໍ່ກັບສະພາບຜົນກະທົບ ແລະ ຄວາມເສຍຫາຍທີ່ເກີດຂຶ້ນຈາກເຫດການໄພນໍ້າຖ້ວມໃນຄັ້ງນີ້, ອໍານາດການປົກຄອງ ແລະ ຄະນະກໍາມະການປ້ອງກັນ ແລະ ຄວບຄຸມໄພພິບັດຂັ້ນທ້ອງຖິ່ນ ໄດ້ປະຕິບັດໃຫ້ການຊ່ວຍເຫຼືອສຸກເສີນທັນທີ ໂດຍໄດ້ນໍາໃຊ້ກໍາລັງແຮງຂອງພະນັກງານ, ທະຫານ, ຕໍາຫຼວດ ແລະ ປະຊາ ຊົນພາຍໃນບ້ານ ປະຕິບັດການຍົກຍ້າຍທັງຄົນ ແລະ ຊັບສິນ ໄປບ່ອນທີ່ປອດໄພ, ຈັດສັນສະ ຖານທີ່ພັກເຊົາຊົ່ວຄາວ ແລະ ສະ ໜອງບັນເທົາທຸກສຸກເສີນຂັ້ນ ພື້ນຖານດ້ານເຄື່ອງອຸປະໂພກ -ບໍລິໂພກ ເປັນຕົ້ນ ອາຫານ, ນໍ້າດື່ມ, ເຄື່ອງໃຊ້ຄົວເຮືອນ, ຢາປົວພະຍາດ, ອື່ນໆ.
ເພື່ອຮັບປະກັນໃຫ້ແກ່ການປະຕິບັດຊ່ວຍເຫຼືອແກ້ໄຂ ສຸກເສີນໃຫ້ທັນການ ແລະ ມີປະສິດທິພາບ ປະສິດທິຜົນ, ລັດຖະບານໄດ້ຈັດກອງປະຊຸມ ສຸກເສີນຂຶ້ນ ໂດຍການເປັນປະທານຂອງທ່ານນາຍົກລັດ ຖະມົນຕີ ແລະ ມີບັນດາຄະນະນໍາຈາກບັນດາກະຊວງໃນຄະນະກໍາມະການປ້ອງກັນ ແລະ ຄວບຄຸມໄພພິບັດແຫ່ງຊາດເຂົ້າຮ່ວມ ຊຶ່ງໄດ້ຊີ້ນໍາໃຫ້ບັນດາຂະແໜງການທີ່ກ່ຽວຂ້ອງຮີບຮ້ອນລົງໄປຊ່ວຍເຫຼືອຕາມພາ ລະບົດບາດ, ໜ້າທີ່ຂອງຕົນ. ພ້ອມກັນນີ້ ຄະນະພັກ ຄະນະນໍາ ຂັ້ນສູນກາງ ນໍາໂດຍທ່ານ ນາຍົກ, ຮອງນາຍົກລັດຖະມົນຕີ ພ້ອມດ້ວຍຄະນະກໍໄດ້ລົງໄປພື້ນທີ່ພາກສະໜາມຢູ່ບັນດາແຂວງທີ່ຖືກກະທົບ ເພື່ອຕິດ ຕາມ, ຊຸກຍູ້ການແກ້ໄຂສຸກເສີນ ແລະ ໃຫ້ກໍາລັງໃຈ, ຄວາມອົບອຸ່ນແກ່ປະຊາຊົນຜູ້ທີ່ໄດ້ຮັບຜົນ ກະທົບ ແລະ ພະນັກງານ, ນາຍ ແລະ ພົນທະຫານ, ຕໍາຫຼວດ ແລະ ພາກສ່ວນຕ່າງໆທີ່ປະຕິ ບັດໜ້າທີ່ກູ້ໄພ ແລະ ແກ້ໄຂສຸກເສີນ.
ສະເພາະການປະຕິບັດໃຫ້ການຊ່ວຍເຫຼືອສຸກເສີນ ຂອງ ກະຊວງແຮງງານ ແລະ ສະ ຫວັດດີການສັງຄົມ ໃນນາມຄະນະກໍາມະການປ້ອງກັນ ແລະ ຄວບຄຸມໄພພິບັດແຫ່ງຊາດ ໂດຍໄດ້ຮັບການມອບໝາຍຈາກຂັ້ນເທິງ ກໍໄດ້ປະສານງານຢ່າງໃກ້ຊິດກັບບັນດາແຂວງທີ່ຖືກກະທົບຈາກໄພພິບັດ ພ້ອມທັງໄດ້ປະຕິບັດໃຫ້ການຊ່ວຍເຫຼືອສຸກເສີນ ເປັນຕົ້ນໄດ້ ສົມທົບກັບກອງທັບ ນໍາໃຊ້ລົດ ແລະ ຍົນ ເພື່ອຈັດສົ່ງພາຫະນະ, ອຸປະກອນ ແລະ ເຄື່ອງຊ່ວຍ ເຫຼືອບັນເທົາທຸກສຸກເສີນ ໄປຊ່ວຍເຫຼືອປະຊາຊົນທີ່ຖືກກະ ທົບຢູ່ບັນດາແຂວງ ເປັນຕົ້ນ- ເຮືອກູ້ໄພ, ເຕັ້ນຄອບຄົວ, ນໍ້າດື່ມ, ເຄື່ອງໃຊ້ຄົວເຮືອນ ແລະ ອື່ນໆໄປໃຫ້ແຂວງຄໍາມ່ວນ, ສະຫວັນນະເຂດ, ສາລະວັນ, ຈໍາປາສັກ ແລະ ແຂວງເຊກອງ.
ພ້ອມກັນນີ້ ເພື່ອຮັບປະ ກັນໃນການປະສານງານໃຫ້ການຊ່ວຍເຫຼືອສຸກເສີນ, ກະຊວງ ຮສສ ໃນນາມປະທານຄະນະກໍາມະການປ້ອງກັນ ແລະ ຄວບຄຸມໄພພິບັດແຫ່ງຊາດ ກໍໄດ້ ຈັດຕັ້ງສູນປະສານງານສຸກເສີນຂຶ້ນ ຢູ່ ກົມສັງຄົມສົງເຄາະ ກະຊວງ ຮສສ ພ້ອມທັງໄດ້ອອກແຈ້ງການເຖິງບັນດາແຂວງ ເພື່ອຈັດຕັ້ງສູນປະສານງານຊ່ວຍເຫຼືອສຸກເສີນຢູ່ຂັ້ນແຂວງ ແລະ ເມືອງ ເພື່ອປະຕິບັດໃຫ້ການຊ່ວຍເຫຼືອສຸກເສີນ. ພ້ອມນີ້, ໂດຍໄດ້ມອບໝາຍຈາກລັດຖະບານ, ກະຊວງ ຮສສ ໄດ້ອອກແຈ້ງການລະດົມບໍລິຈາກນໍາສັງຄົມຜ່ານສື່ມວນຊົນ ຊຶ່ງຈະເລີ່ມປະຕິບັດແຕ່ວັນທີ 7 ກັນຍາ 2019 ເປັນຕົ້ນໄປ.
ສ່ວນບັນດາຂະແໜງ ການອື່ນໆ ໃນຄະນະກໍາມະການປ້ອງກັນ ແລະ ຄວບຄຸມໄພ ພິບັດແຫ່ງຊາດກໍໄດ້ມີແຜນ ແລະ ດໍາເດີນໃຫ້ການຊ່ວຍເຫຼືອຢູ່ບັນດາແຂວງທີ່ຖືກກະທົບຈາກໄພພິບັດນໍ້າຖ້ວມ ເປັນຕົ້ນ - ກະຊວງປ້ອງກັນປະເທດ ໄດ້ນໍາໃຊ້ກໍາລັງຫຼວງ ແລະ ກໍາລັງທ້ອງຖິີ່ນ ພ້ອມທັງພາຫະນະຂົນສົ່ງ, ເຮືອກູ້ໄພ, ຍົນເຂົ້າຊ່ວຍເຫຼືອ; ກະຊວງປ້ອງກັນຄວາມສະຫງົບກໍໄດ້ນໍາໃຊ້ທັງ ກໍາລັງ ແລະ ພາຫະນະຢູ່ ສູນ ກາງ ແລະ ແຂວງ ເຂົ້າໄປຊ່ວຍ ເຫຼືອປ້ອງກັນເວນຍາມ, ການຮັກສາຄວາມສະຫງົບ ແລະ ຄວາມປອດໄພສິ່ງຂອງປະ ຊາ ຊົນ ລວມທັງການຊ່ວຍນໍາໃຊ້ລົດດັບເພີງເຂົ້າໄປລໍາລຽງນໍ້າໃຊ້ໃຫ້ປະຊາຊົນ ແລະ ຊ່ວຍອະນາໄມ.
(ຂ່າວ-ພາບ: ພູວັນ)