ຊາວບ້ານຫາດຊາຍສູງສາມັກຄີກັນ ປ້ານຄູກັນນ້ຳ


...

09.09.2019 11:55     

   ຊາວບ້ານຫາດຊາຍສູງເມືອງໄຊບູລີແຂວງສະຫວັນນະເຂດສາມັກຄີກັນຂົນກະສອບດິນ-ຊາຍປ້ານຄູກັນນ້ຳ, ຫຼັງນ້ຳເຊບັ້ງໄຟຍື່ງຂຶ້ນຖ້ວມບ້ານເຮືອນທີ່ຕັ້ງຢູ່ເບື້ອງລຽບແຄມເຊບັ້ງໄຟແລະໃກ້ຈະລົ້ນຄູກັນນ້ຳແລ້ວຍັງເຫຼືອບໍ່ເຖິງ 10 ຊັງຕີແມັດ, ຫາກບໍ່ດັ່ງນັ້ນນ້ຳຈະໄຫຼເຂົ້າຖ້ວມເນື້ອທີ່ນາເໝືອນກັບປີຜ່ານມາ.
    ພໍ່ຕູ້ໂລນອາຍຸ 67 ປີຊາວບ້ານຫາດຊາຍສູງ ໃຫ້ຮູ້ໃນວັນທີ 7 ກັນຍານີ້ວ່າ: ນ້ຳເຊບັ້ງໄຟໄດ້ຍື່ງຂຶ້ນຖ້ວມບ້ານຫາດຊາຍສູງນັບແຕ່ວັນທີ 4 ກັນຍາເປັນຕົ້ນມາແລະນ້ຳໄດ້ຖ້ວມສູງຂຶ້ນນັບມື້, ດັ່ງນັ້ນຈຶ່ງໄດ້ນຳພາລູກຫຼານພາຍໃນບ້ານສາມັກຄີກັນຂົນກະສອບດິນ-ຊາຍປ້ານຄູກັນນ້ຳເພື່ອບໍ່ໃຫ້ນ້ຳໄຫຼເຂົ້າຖ້ວມເນື້ອທີ່ນາ, ພ້ອມທັງຈັດແບ່ງເປັນຈຸເພື່ອເຝົ້າລະວັງນ້ຳຕິດຕາມນ້ຳຕະຫຼອດ 24 ຊົ່ວໂມງ, ຫາກເກີດເຫດສຸກເສີນຂຶ້ນມາຈະໄດ້ພ້ອມກັນຍົກຍ້າຍທັນ.
    ທັງນີ້ເຮືອນປະຊາຊົນທີ່ຕັ້ງຢູ່ລຽບຕາມແຄມເຊບັ້ງໄຟໄດ້ຖືກນ້ຳຖ້ວມທັງ 300 ຫຼັງຄາແລ້ວ,ຍັງເຫຼືອແຕ່ບໍ່ພໍເທົ່າໃດຫຼັງຄາເຮືອນທີ່ຕັ້ງຢູ່ລຸ່ມຄູກັນນ້ຳແຕ່ກໍນິ້ງນອນໃຈບໍ່ໄດ້, ສ່ວນປະຊາຊົນກໍໄດ້ເກັບເຄື່ອງຂອງເພື່ອກຽມພ້ອມຍົກຍ້າຍຫາກເກີດເຫດສຸກເສີນ, ໃນຂະນະທີ່ສັດລ້ຽງ, ພາຫະນະແມ່ນໄດ້ນຳໄປໄວ້ທີ່ປອດໄພແລ້ວ.
    ແນວໃດກໍຕາມປະຊາຊົນເກືອບທັງໝົດຍັງອາໃສຢູ່ເຮືອນເນື່ອງຈາກວ່າຊາວບ້ານເຂດນີ້ເຄີຍຊິນກັບນ້ຳຢູ່ແລ້ວເຖິງວ່ານ້ຳຈະຖ້ວມສູງແຕ່ກໍບໍ່ທັນຈຸພື້ນເຮືອນເພາະເປັນເຮືອນຮ້ານແລະອີກຢ່າງໜຶ່ງທຸກຫຼັງຄາເຮືອນມີເຮືອຈັກຫາງຍາວຢູ່ແລ້ວ, ຫາກນ້ຳຖ້ວມສູງຈຸພື້ນເຮືອນກໍຂຶ້ນເຮືອອອກຈາກເຮືອນທັນທີ, ປັດຈຸບັນຊາວບ້ານທີ່ຖືກນ້ຳຖ້ວມຕ້ອງໄດ້ໃຊ້ເຮືອຫາກຈະອອກຈາກເຮືອນ.
    ທ່ານວັນໄຊສີປັດໃຈຮອງຫົວໜ້າຫ້ອງການຍທຂເມືອງໄຊບູລີກ່າວວ່າ: ເມື່ອທ້າຍເດືອນກໍລະກົດ 2108 ຜ່ານມາ, ນ້ຳເຊບັ້ງໄຟໄດ້ໄຫຼເຂົ້າຖ້ວມບ້ານເຮືອນປະຊາຊົນແລະເຮັດໃຫ້ຄູກັນນ້ຳແຫ່ງນີ້ຂາດຢູ່ຈຸດບ້ານຫາດຊາຍສູງມີຄວາມຍາວເກືອບ400 ແມັດ, ເຮັດໃຫ້ນ້ຳໄຫຼຊຸເຮືອນປະຊາຊົນ 4 ຫຼັງແຕ່ໂຊກດີບໍ່ມີຜູ້ເສຍຊີວິດ, ໃນຂະນະນັ້ນທ່ານນາຍົກລັດຖະມົນຕີໄດ້ເດີນທາງມາຢ້ຽມຢາມແລ້ວສັ່ງໃຫ້ຍົກລະດັບຄູກັນນ້ຳສູງຂຶ້ນອີກ, ດັ່ງນັ້ນຍທຂແຂວງແລະເມືອງຈຶ່ງໄດ້ສຸມທຶນຮອນໃສ່ຍົກລະດັບຄູກັນນ້ຳແຫ່ງນີ້ສູງຂຶ້ນອີກປະມານ 1 ແມັດແຕ່ມາປີນີ້ນ້ຳເຊບັ້ງໄຟໄດ້ຍື່ງຂຶ້ນເກືອບລົ້ນຄູກັນນ້ຳແລ້ວ, ການນຳຂອງເມືອງຈຶ່ງລະດົມໃຫ້ປະຊາຊົນຂົນກະສອບຊາຍ-ດິນມາໃສ່ຄູກັນນ້ຳແຫ່ງນີ້ເພື່ອໃຫ້ສູງຂຶ້ນ, ໃນຂະນະທີ່ລະດັບນ້ຳເຊບັ້ງໄຟເມື່ອ 6 ໂມງ 00 ຂອງວັນທີ 8 ກັນຍາຈຸດວັດແທກທີ່ບ້ານຕົ້ນແຫນເມືອງໄຊບູລີຢູ່ໃນລະດັບ 15,05 ແມັດກາຍເຂດອັນຕະລາຍແລ້ວເພີ່ມຂຶ້ນຈາກວັນທີ 7 ກັນຍາ 5 ຊັງຕີແມັດ.
    ທ່ານກ່າວອີກວ່າ: ຄູກັນນ້ຳແຫ່ງນີ້ເປັນທັງເສັ້ນທາງຄົມມະນາຄົມ, ເປັນທັງຄອງຊົນລະປະທານ, ເປັນທັງບ່ອນລົບໄພຂອງປະຊາຊົນເຂດບ້ານບຶງເຊແລະຫາດຊາຍສູງ.
    ທ່ານສີວິໄລຈະອິນທະລືໄຊຫົວໜ້າຫ້ອງການກະສິກຳແລະປ່າໄມ້ເມືອງໄຊບູລີແຂວງສະຫວັນນະເຂດກ່າວວ່າ: ຫາກນ້ຳຖ້ວມຄູກັນນ້ຳແຫ່ງນີ້ຈະເຮັດໃຫ້ນ້ຳໄຫຼເຂົ້າຖ້ວມເນື້ອທີ່ນາຂອງປະຊາຊົນຫຼາຍເຖິງ 6 ພັນເຮັກຕາຊຶ່ງປີຜ່ານມາ, ຄູກັນນ້ຳແຕກກໍເຮັດໃຫ້ເຂົ້ານານາປະຊາຊົນເສຍຫາຍເປັນຈຳນວນຫຼວງຫຼາຍ, ດັ່ງນັ້ນເພື່ອບໍ່ໃຫ້ປະຫວັດສາດຊ້ຳຮອຍ, ຊາວບ້ານຈຶ່ງສາມັກຄີກັນຂົນກະສອບດິນ-ຊາຍໃສ່ປ້ານຄູກັນນ້ຳແຫ່ງນີ້ໃຫ້ສູງຂຶ້ນ.
    ທັງນີ້ມາຮອດວັນທີ 8 ກັນຍານີ້ເມືອງໄຊບູລີແຂວງສະຫວັນນະເຂດມີບ້ານຖືກນ້ຳຖ້ວມທັງໝົດ 6 ບ້ານ, ໃນຂະນະທີ່ເນື້ອທີ່ການຜະລິດໄດ້ຮັບຜົນກະທົບກວ່າ 4 ພັນເຮັກຕາ, ກວມເອົາ 29 ບ້ານ.