...

11.09.2019 9:50     

   ຜົນກະທົບຈາກອິດທິພົນຂອງລົມພາຍຸໝຸນເຂດຮ້ອນໂພດູນ ແລະ ລົມພາຍຸດີເປຣເຊິນ ທີ່ພັດຜ່ານເຂົ້າມາ ສປປ ລາວ ໃນໄລຍະທ້າຍເດືອນສິງຫາ ຫາ ຕົ້ນເດືອນ ກັນຍາ 2019 ເຮັດໃຫ້ມີຝົນຕົກໜັກ ແລະ ເກີດນໍ້າຖ້ວມ ຢູ່ 6 ແຂວງ ຄື: ຄຳມ່ວນ, ສະຫວັນນະເຂດ, ສາລະວັນ, ຈຳປາສັກ, ເຊກອງ ແລະ ອັດຕະປື ສົ່ງຜົນກະທົບໂດຍກົງຕໍ່ປະຊາຊົນ ໃນ 47 ເມືອງ, 1.643 ບ້ານ, 150.415 ຄອບຄົວ, 458.017 ຄົນ ຖືກກະທົບ, ເສຍຊີວິດ 13 ຄົນ (ສະຫວັນນະເຂດ 3 ຄົນ, ສາລະວັນ 2 ຄົນ, ອັດຕະປື 4 ຄົນ ແລະ ຈໍາປາສັກ 4 ຄົນ), ສູນຫາຍ 1 ຄົນ ຢູ່ ແຂວງຈໍາປາສັກ, ປະຊາຊົນຍົກຍ້າຍ 14.328 ຄອບຄົວ, 102.416 ຄົນ ເປັນຍິງ 15.205 ຄົນ; ສົ່ງຜົນກະທົບ ແລະ ເສຍຫາຍ ຕໍ່ຂະແໜງການສັງຄົມ, ເສດຖະ ກິດ, ສິ່ງແວດລ້ອມ ແລະ ໂຄງລ່າງພື້ນຖານທີ່ສໍາຄັນ ເປັນຕົ້ນແມ່ນທີ່ຢູ່ອາໄສ ແລະ ບ້ານເຮືອນຂອງປະຊາຊົນ, ເສັ້ນ ທາງ, ຂົວ, ຫ້ອງການຂອງລັດ, ໂຮງຮຽນ, ໂຮງໝໍ, ສຸກສາລາ, ແຫຼ່ງນໍ້າດື່ມ ນໍ້າໃຊ້, ພື້ນທີ່ການຜະລິດ, ສັດລ້ຽງ, ຊົນລະປະ ທານ ແລະ ອື່ນໆ. ຈາກຜົນກະທົບທີ່ໄດ້ຮັບຄືແນວນັ້ນ, ຄວາມຕ້ອງການຮີບດ່ວນ ລວມມີ ເຕັ້ນພັກຊົ່ວຄາວ, ເຄື່ອງອຸປະໂພກບໍລິໂພກ ເປັນຕົ້ນ ອາຫານ, ນໍ້າດື່ມ, ເຄື່ອງໃຊ້ຄົວເຮືອນ, ເຄື່ອງນອນ, ເຮືອພ້ອມຄົນຂັບ ແລະ ງົບປະມານຮັບໃຊ້ອື່ນໆ. ທ່ານ ຄໍາແພງ ໄຊສົມແພງ ລັດຖະມົນຕີ ກະຊວງ ແຮງງານ ແລະ ສະຫວັດດີການສັງຄົມ (ຮສສ) ປະທານຄະນະກຳມະ ການປ້ອງກັນ ແລະ ຄວບຄຸມໄພພິບັດແຫ່ງຊາດ ໄດ້ຖະແຫຼງຂ່າວຕໍ່ສື່ມວນຊົນ ເມື່ອວັນທີ 10 ກັນຍາ ທີ່ກະຊວງຮສສວ່າ:ຕໍ່ກັບສະພາບຜົນກະທົບ ແລະ ຄວາມເສຍຫາຍທີ່ເກີດຂຶ້ນຈາກເຫດ ການໄພນໍ້າຖ້ວມໃນຄັ້ງນີ້, ອໍານາດການປົກຄອງ ແລະ ຄະນະກໍາມະການປ້ອງກັນ ແລະ ຄວບຄຸມໄພພິບັດຂັ້ນທ້ອງຖິ່ນ ໄດ້ປະຕິບັດໃຫ້ການຊ່ວຍເຫຼືອສຸກເສີນທັນທີ ໂດຍໄດ້ນໍາໃຊ້ກໍາລັງແຮງຂອງພະນັກງານ, ທະຫານ, ຕໍາຫຼວດ ແລະ ປະຊາຊົນພາຍໃນບ້ານ ປະຕິບັດການຍົກຍ້າຍ ທັງຄົນ ແລະ ຊັບສິນ ໄປບ່ອນທີ່ປອດໄພ, ຈັດສັນສະຖານ ທີ່ພັກເຊົາຊົ່ວຄາວ ແລະ ສະ ໜອງບັນເທົາທຸກສຸກເສີນຂັ້ນພື້ນຖານ ດ້ານເຄື່ອງອຸປະໂພກ, ບໍລິໂພກ ເປັນຕົ້ນ ອາຫານ, ນໍ້າດື່ມ, ເຄື່ອງໃຊ້ຄົວເຮືອນ, ຢາປົວພະຍາດ ແລະ ອື່ນໆ. ເພື່ອຮັບປະກັນໃຫ້ແກ່ການປະຕິ ບັດຊ່ວຍເຫຼືອແກ້ໄຂສຸກເສີນ ໃຫ້ທັນການ ແລະ ມີປະສິດ ທິພາບປະສິດທິຜົນ, ໃນວັນທີ 5 ກັນຍາ ຜ່ານມາ ລັດຖະບານໄດ້ຈັດກອງປະຊຸມສຸກເສີນຂຶ້ນ ໂດຍການເປັນປະທານ ຂອງ ທ່ານນາຍົກລັດຖະມົນຕີ ແລະ ມີບັນດາຄະນະນໍາຈາກບັນດາກະຊວງໃນຄະນະກໍາມະການປ້ອງກັນ ແລະ ຄວບຄຸມໄພພິ ບັດແຫ່ງຊາດເຂົ້າຮ່ວມ ຊຶ່ງໄດ້ຊີ້ນໍາໃຫ້ບັນດາຂະແໜງການທີ່ກ່ຽວ ຂ້ອງ ຮີບຮ້ອນລົງໄປຊ່ວຍ ເຫຼືອຕາມພາລະບົດບາດໜ້າທີ່ຂອງຕົນ. ພ້ອມກັນນີ້ ຄະນະພັກ ຄະນະນໍາ ຂັ້ນສູນກາງ ນໍາໂດຍ ທ່ານນາຍົກລັດຖະມົນຕີ, ຮອງນາຍົກລັດຖະມົນຕີ ພ້ອມດ້ວຍຄະນະ ກໍໄດ້ລົງໄປພື້ນທີ່ພາກສະໜາມຢູ່ບັນດາແຂວງທີ່ຖືກກະທົບ ເພື່ອຕິດຕາມ, ຊຸກຍູ້ການແກ້ໄຂສຸກເສີນ ແລະ ໃຫ້ກໍາລັງໃຈ, ຄວາມອົບອຸ່ນແກ່ປະຊາຊົນຜູ້ທີ່ໄດ້ຮັບຜົນກະທົບ ແລະ ພະນັກງານ, ນາຍ ແລະ ພົນທະຫານ, ຕໍາຫຼວດ ແລະ ພາກສ່ວນຕ່າງໆ ທີ່ປະຕິບັດໜ້າທີ່ກູ້ໄພ ແລະ ແກ້ໄຂສຸກເສີນ.ສະເພາະການປະຕິບັດໃຫ້ການຊ່ວຍເຫຼືອ ຂອງ ຄະນະກໍາມະການປ້ອງກັນ ແລະ ຄວບຄຸມໄພພິບັດແຫ່ງຊາດ, ກະຊວງແຮງງານ ແລະ ສະຫວັດດີການສັງຄົມ ໃນນາມ ປະທານ ຄະນະກໍາມະການປ້ອງກັນ ແລະ ຄວບຄຸມໄພພິບັດແຫ່ງຊາດ ໂດຍໄດ້ຮັບການມອບໝາຍຂອງຂັ້ນເທິງ ກໍໄດ້ປະສານງານຢ່າງໃກ້ຊິດກັບບັນດາແຂວງທີ່ຖືກກະທົບຈາກໄພພິບັດ ພ້ອມທັງໄດ້ປະຕິບັດໃຫ້ການຊ່ວຍເຫຼືອບັນເທົາທຸກສຸກເສີນ ເປັນຕົ້ນ ໄດ້ສົມທົບກັບກອງທັບ ນໍາໃຊ້ລົດ ແລະ ຍົນ ເພື່ອຈັດສົ່ງພາ ຫະນະ, ອຸປະກອນ ແລະ ເຄື່ອງຊ່ວຍເຫຼືອບັນເທົາທຸກສຸກເສີນ ໄປຊ່ວຍເຫຼືອປະຊາຊົນທີ່ຖືກກະທົບຢູ່ບັນດາແຂວງ ເຊັ່ນ: ເຮືອກູ້ໄພ ຈໍານວນ 39 ລໍາ ເພື່ອນໍາໃຊ້ເຂົ້າໃນການກູ້ໄພ ແລະ ຍົກຍ້າຍປະຊາຊົນ ພ້ອມທັງຊັບສິນຂອງເຂົາເຈົ້າ,ເຕັ້ນນອນຄອບຄົວ 120 ຊຸດ,ນໍ້າດື່ມ 3 ພັນກວ່າແພັກ, ເຄື່ອງໃຊ້ຄົວເຮືອນ 300 ກວ່າຊຸດ, ໄດ້ນໍາໃຊ້ເງິນທີ່ລັດຖະບານຈັດສັນໃຫ້ຈໍານວນ 5 ຕື້ກີບ ນໍາໄປຊ່ວຍເຫຼືອ ແລະ ມອບໃຫ້ບັນດາແຂວງທີ່ຖືກກະທົບຈາກໄພພິບັດນໍ້າຖ້ວມໃນຄັ້ງນີ້ ລວມທັງ ໄດ້ມອບເງິນໃນບ້ວງກອງທຶນແຮນໍ້າມັນສຸກເສີນ ໃຫ້ແຂວງລະ 50 ລ້ານກີບ ເພື່ອນໍາໃຊ້ເຂົ້າໃນການບໍ ລິຫານ ຂົນສົ່ງເຄື່ອງຊ່ວຍ ເຫຼືອບັນເທົາທຸກ ໄປໃຫ້ຜູ້ປະສົບໄພພິບັດ, ພ້ອມກັນນີ້ໂດຍໄດ້ຮັບການມອບໝາຍຈາກລັດ ຖະບານ, ກະຊວງ ຮສສ ກໍໄດ້ອອກແຈ້ງການລະດົມບໍລິຈາກນໍາສັງຄົມຜ່ານສື່ມວນຊົນ ຊຶ່ງໄດ້ເລີ່ມປະຕິບັດແຕ່ວັນທີ 7 ກັນຍາເປັນຕົ້ນມາ. ມາຮອດປັດຈຸບັນ ກໍໄດ້ມີຫຼາຍພາກສ່ວນທີ່ເຂົ້າມາໃຫ້ການຊ່ວຍເຫຼືອທັງເປັນເງິນ ແລະ ເຄື່ອງອຸປະໂພກ ບໍລິໂພກ, ປັດຈຸບັນ ໄດ້ຂົນສົ່ງເຄື່ອງອຸປະໂພກບໍລິໂພກ ທີ່ໄດ້ຮັບບໍລິຈາກ ເປັນຕົ້ນ ເຂົ້າກິນ, ນໍ້າດື່ມ, ເຄື່ອງນຸ່ງຫົ່ມ, ເຄື່ອງນອນ, ເຄື່ອງ ໃຊ້ຄົວເຮືອນອື່ນໆ ມູນຄ່າ 1 ຕື້ກີບ ນໍາໄປຊ່ວຍເຫຼືອຜູ້ປະສົບໄພພິບັດ ໃນບັນດາແຂວງຢູ່ພາກໃຕ້ແລ້ວ. ໃນວັນທີ 11 ກັນຍາ 2019 ນີ້ ໂດຍການປະສານສົມທົບຂອງກະຊວງ ຮສສ, ກໍຈະມີເຄື່ອງຊ່ວຍເຫຼືອບັນເທົາທຸກສຸກເສີນ ຈາກສູນປະສານງານຊ່ວຍເຫຼືອດ້ານມະ ນຸດສະທໍາອາຊຽນ ຫຼື ສູນອາຮາ ຈະຂົນສົ່ງເຄື່ອງມາດ້ວຍຍົນ ລົງສະໜາມບິນສາ ກົນປາກເຊ ເພື່ອນໍາເອົາເຄື່ອງຊ່ວຍເຫຼືອດັ່ງກ່າວຊ່ວຍເຫຼືອຜູ້ປະສົບໄພ ພິບັດ ຢູ່ ບັນດາແຂວງທີ່ຖືກກະ ທົບຈາກໄພນໍ້າຖ້ວມ. ປັດຈຸບັນ ຍັງມີເຄື່ອງອຸປະໂພກບໍລິໂພກ ຈໍານວນໜຶ່ງ ຢູ່ສາງກະຊວງ ຮສສ ແລະ ກໍາລັງປະສານກັບກອງທັບ ເພື່ອນໍາສົ່ງເຄື່ອງດັ່ງ ກ່າວໄປເພື່ອຊ່ວຍເຫຼືອຜູ້ປະສົບໄພພິບັດເປັນຕົ້ນ ເຄື່ອງໃຊ້ຄົວເຮືອນ, ເຄື່ອງນຸ່ງຫົ່ມ, ເຄື່ອງນອນ, ເຄື່ອງໃຊ້ສ່ວນຕົວ, ເຕັ້ນນອນຄອບຄົວ ແລະ ອື່ນໆ ນອກຈາກນີ້, ກະຊວງ ຮສສ ຍັງໄດ້ຈັດຕັ້ງສູນປະສານງານສຸກເສີນຂຶ້ນ ຢູ່ກົມສັງຄົມສົງ ເຄາະ ກະຊວງ ຮສສ ພ້ອມທັງໄດ້ອອກແຈ້ງການເຖິງບັນດາແຂວງ ເພື່ອຈັດຕັ້ງສູນປະສານງານຊ່ວຍເຫຼືອສຸກເສີນຢູ່ຂັ້ນແຂວງ ແລະ ເມືອງ ເພື່ອປະຕິ ບັດໃຫ້ການຊ່ວຍເຫຼືອສຸກເສີນ. ທັງນີ້ ກໍເພື່ອຮັບປະກັນໃຫ້ໄດ້ທາງດ້ານປະສິດທິພາບ ແລະ ປະສິດທິຜົນ ໃນການປະສານງານລວມສູນການຊ່ວຍເຫຼືອທັງໄລຍະສຸກເສີນ ແລະ ຟື້ນຟູຄືນຫຼັງໄພພິບັດ. ສ່ວນບັນດາຂະແໜງການອື່ນໆ ໃນຄະນະກໍາມະການປ້ອງກັນ ແລະ ຄວບຄຸມໄພພິບັດແຫ່ງຊາດ ໂດຍໄດ້ຮັບການລາຍງານຂອງກອງເລຂາ ຄະນະກໍາມະການປ້ອງກັນ ແລະ ຄວບຄຸມໄພພິບັດແຫ່ງຊາດ ກໍໄດ້ມີແຜນ ແລະ ດໍາເນີນໃຫ້ການຊ່ວຍເຫຼືອຢູ່ບັນດາແຂວງທີ່ຖືກກະທົບຈາກໄພພິບັດນໍ້າຖ້ວມ ເປັນຕົ້ນ ກະ ຊວງປ້ອງກັນປະເທດ ໄດ້ນໍາໃຊ້ກໍາລັງ ຫຼວງ ແລະ ກໍາລັງທ້ອງຖິິ່ນ ພ້ອມທັງ ພາຫະນະຂົນສົ່ງ, ເຮືອກູ້ໄພ, ຍົນ ເຂົ້າຊ່ວຍເຫຼືອ; ກະຊວງປ້ອງກັນຄວາມສະຫງົບ ກໍໄດ້ນໍາໃຊ້ທັງກໍາລັງ ແລະ ພາຫະນະຢູ່ສູນກາງ ແລະ ແຂວງ ເຂົ້າໄປຊ່ວຍ ເຫຼືອປ້ອງກັນເວນຍາມ, ການຮັກສາຄວາມສະຫງົບ ແລະ ຄວາມປອດໄພ ສິ່ງຂອງປະ ຊາຊົນ ລວມທັງ ການຊ່ວຍນໍາໃຊ້ລົດດັບເພີງເຂົ້າໄປລໍາລຽງນໍ້າໃຊ້ໃຫ້ປະຊາຊົນ ແລະ ຊ່ວຍອະນາໄມ; ກະຊວງ ສາທາລະ ນະສຸກ ກໍໄດ້ຈັດສົ່ງກໍາລັງ ທີມງານແພດ ພ້ອມຢາປົວພະຍາດ ລົງໄປຊ່ວຍເຫຼືອ ແລະ ປະຈໍາຢູ່ບັນດາແຂວງທີ່ຖືກກະທົບ; ກະ ຊວງ ໂຍທາທິການ ແລະ ຂົນສົ່ງ ກໍໄດ້ນໍາໃຊ້ກໍາລັງແຮງຂອງຕົນ ເຂົ້າໃນການສ້ອມແປງບັນດາເສັ້ນທາງ ແລະ ຂົວທີ່ຖືກເສຍຫາຍ ແລະ ຕັດຂາດ ໃຫ້ສາມາດນໍາໃຊ້ ເດີນທາງໄປມາໄດ້; ກະຊວງ ຊັບພະຍາກອນທໍາມະຊາດ ແລະ ສິ່ງແວດລ້ອມ ກໍໄດ້ຕິດຕາມສະພາບພະຍາກອນອາກາດ ແລະ ລະດັບນໍ້າ ຂຶ້ນລົງຢູ່ສາຍແມ່ນໍ້າຂອງ ແລະ ສາຂາຂອງແມ່ນໍ້າຂອງ ພ້ອມທັງໄດ້ອອກແຈ້ງຂ່າວເຕືອນໄພ ເປັນແຕ່ລະໄລຍະ ໃນແຕ່ລະວັນ; ກະຊວງຖະແຫຼງຂ່າວ, ວັດທະນະທໍາ ແລະ ທ່ອງທ່ຽວ ກໍໄດ້ປະສານ ແລະ ສົ່ງທີມງານຂ່າວ ລົງໄປຕິດຕາມສະພາບ ແລະ ເຮັດການລາຍງານຂ່າວ ໃນແຕ່ລະໄລຍະຂອງ ແຕ່ລະວັນ ລວມທັງການຕິດຕາມຄະນະພັກ ຄະນະນໍາ ທີ່ລົງໄປເຄື່ອນໄຫວຕິດຕາມ ແລະ ຊຸກຍູ້ໃຫ້ກໍາລັງໃຈ ຢູ່ ບັນດາແຂວງທີ່ຖືກກະທົບຈາກໄພພິບັດ; ອົງການຊາວໜຸ່ມ ແລະ ແມ່ຍິງ ກໍໄດ້ຈັດສົ່ງກໍາລັງ ແລະ ທີມງານ ທັງຢູ່ ສູນກາງ ແລະ ທ້ອງຖິ່ນ ເຂົ້າໄປຊ່ວຍເຫຼືອ; ຂະແໜງການອື່ນໆ ກໍໄດ້ລົງໄປຊຸກຍູ້ ປະຕິບັດໃຫ້ການຊ່ວຍເຫຼືອຕາມບົດບາດ ແລະ ໜ້າທີ່ຂອງຕົນ ຢ່າງຕັ້ງໜ້າ ແລະ ມີຄວາມຮັບຜິດຊອບ. ທ່ານກ່າວຕື່ມວ່າມາດຕະການຈັດຕັ້ງປະຕິບັດໃນຕໍ່ ໜ້າ,ສືບຕໍ່ການຕິດຕາມພະຍາ ກອນ ແລະ ແຈ້ງຂ່າວເຕືອນໄພ ລ່ວງໜ້າ ໃຫ້ທັນເວລານໍາໃຊ້ເຄື່ອງມືທີ່ມີຢູ່, ສືບຕໍ່ປະສານ ປະຕິບັດໃຫ້ການຊ່ວຍເຫຼືອສຸກເສີນ ແລະ ຟື້ນຟູຮີບດ່ວນ ລວມທັງ ການສົ່ງທີມປະເມີນສຸກເສີນ ເພື່ອເຮັດການປະເມີນຄວາມເສຍຫາຍ ແລະ ຄວາມຕ້ອງ ການ ເພື່ອສ້າງແຜນຊ່ວຍເຫຼືອ ແລະ ຟື້ນຟູຄືນຫຼັງໄພພິບັດ,ເລັ່ງສືບຕໍ່ສ້ອມແປງສິ່ງອໍານວຍຄວາມສະດວກ ແລະ ສະຖານທີ່ບໍລິການເປັນຕົ້ນ ເສັ້ນທາງ, ຂົວ, ໄຟຟ້າ, ນໍາປະປາ, ແຫຼ່ງນໍ້າກິນນໍ້າໃຊ້, ໂຮງຮຽນ, ໂຮງໝໍ, ສຸກສາລາ ແລະ ອື່ນໆ, ຮັບປະ ກັນໃຫ້ຜູ້ປະສົບໄພພິບັດທີ່ອາໄສຢູ່ສູນພັກເຊົາ ໄດ້ເຂົ້າເຖິງປັດໄຈອາຫານ, ນໍ້າດື່ມ, ການຢູ່ກິນທີ່ປອດໄພ, ສຸຂະອານາໄມ, ສຸຂະພາບ, ອື່ນໆ, ສືບຕໍ່ນໍາໃຊ້ກໍາລັງແຮງຂອງກອງທັບ, ຕໍາຫຼວດ, ຊາວໜຸ່ມ, ແມ່ຍິງ, ກາແດງ, ອາສາສະໝັກ ແລະ ອື່ນໆ ເພື່ອປະຕິບັດໃຫ້ການຊ່ວຍເຫຼືອສຸກເສີນ ແລະ ຟື້ນຟູຫຼັງໄພພິບັດ, ການຂໍນໍາໃຊ້ເຂົ້າສານໃນຂອບໂຄງການອາຊຽນບວກສາມ, ລວມທັງເຂົ້າໃນຄັງສະສົມຂອງ ກະຊວງການເງິນ ສະເໜີໃຫ້ປະສານກັນລະ ອຽດ ລວມທັງການມອບໂອນໂຄງການຄັງແຮເຂົ້າ ລະຫວ່າງ ກະຊວງ ການເງິນ ໃຫ້ ກະຊວງ ຮສສ. (ຂ່າວ:ສຳນານ)