ເຂດລະຫານ້ຳ-ສອງຄອນ ນ້ຳຖ້ວມໜັກ ຍົກຍ້າຍປະຊາຊົນ 1.600 ກວ່າຄອບຄົວ


...

11.09.2019 9:22     

   ນ້ຳຖ້ວມເມືອງສອງຄອນແຂວງສະຫວັນນະເຂດປີນີ້ ຖືວ່າໜັກທີ່ສຸດໃນປະຫວັດສາດ, ປະຊາຊົນ 1.600 ກວ່າຄອບ ຄົວ, ໃນ 11 ບ້ານຍົກຍ້າຍໄປຢູ່ບ່ອນປອດໄພ, ຂະນະທີ່ລະດັບນ້ຳໃນເວລາ 8:00 ໂມງ ຂອງວັນທີ 10 ກັນຍາໄດ້ຫຼຸດລົງປະມານ 10 ຊັງຕີແມັດເມື່ອທຽບກັບເວ ລາ 20:00 ໂມງຂອງວັນທີ 9 ກັນຍາ. ທ່ານ ພຸດທະວົງ ພົມມະ ຈັກ ຮອງເຈົ້າເມືອງໆສອງຄອນ ແຂວງສະຫວັນນະເຂດ, ປະ ທານຄະນະກຳມະການຄຸ້ມຄອງໄພພິບັດຂັ້ນເມືອງກ່າວວ່າ: ເມືອງສອງຄອນໄດ້ຖືກນ້ຳ ຖ້ວມທັງໝົດ 36 ບ້ານ, ໃນນັ້ນ ໜັກກວ່າໝູ່ແມ່ນ 11 ບ້ານຊຶ່ງ ຖືກຕັດຂາດ, ໃນຂະນະທີ່ປະ ຊາຊົນໄດ້ຍົກຍ້າຍໄປຢູ່ບ່ອນປອດໄພແລ້ວ, ຍັງເຫຼືອພຽງ ແຕ່ເຄື່ອງຂອງແລະ ສັດລ້ຽງຂອງປະຊາຊົນຈຳນວນໜຶ່ງເທົ່ານັ້ນທີ່ຈະໄດ້ສືບຕໍ່ຍົກຍ້າຍຫາກເຂົາເຈົ້າຮ້ອງຂໍຄວາມຊ່ວຍເຫຼື ອ. ທ່ານກ່າວອີກວ່າ: ທ້າຍເດືອນສິງຫາຜ່ານມາ, ນ້ຳໄດ້ຍື່ງຂຶ້ນສູງໄຫຼເຂົ້າເຮືອນປະຊາຊົນຈຳນວນໜຶ່ງ, ຫຼັງຈາກນັ້ນນ້ຳໄດ້ບົກແຫ້ງລົງແຕ່ພໍມາຮອດວັນທີີ 4-5 ກັນຍາເປັນຕົ້ນມາ, ນ້ຳໄດ້ຂຶ້ນຢ່າງໄວວາ, ເຮັດໃຫ້ປະຊາຊົນເກັບມ້ຽນເຄື່ອງຂອງ ແລະ ສັດລ້ຽງບໍ່ທັນຈຶ່ງເຮັດໃຫ້ພາຫະນະ, ເຄື່ອງຂອງ ແລະສັດລ້ຽງຈຳນວນໜຶ່ງຖືກນ້ຳ ຖ້ວມ. ສຳລັບປະຊາຊົນໄດ້ຍົກຍ້າຍໄປຢູ່ບ່ອນປອດໄພ 11 ສູນ, ບາງບ້ານຍົກຍ້າຍໄປຢູ່ປ່າເຂດບ້ານດົງສະຫວ່າງຊຶ່ງເປັນເຂດທີ່ສູງ,ເຖິງວ່າຈະມີສູນພັກເຊົາຊົ່ວຄາວແຕ່ປະຊາຊົນສ່ວນຫຼາຍຍ້າຍໄປຢູ່ນຳຍາດຕິພີ່ນ້ອງ, ເພື່ອນມິດສະຫາຍ. ສຳລັບການຊ່ວຍເຫຼືອຈາກສັງຄົມໄດ້ມີບຸກຄົນ, ບໍລິ ສັດຫ້າງຮ້ານ ແລະ ອົງການຈັດ ຕັ້ງນຳເຄື່ອງມາຊ່ວຍເຫຼືອມາມອບໃຫ້ຜູ້ປະສົບໄພຢ່າງຕໍ່ເນື່ອງແຕ່ກໍຍັງບໍ່ພຽງພໍກັບຄວາມຕ້ອງການເນື່ອງຈາກວ່າ ຜູ້ປະສົບໄພມີຈຳນວນຫຼວງຫຼາຍ. ທ່ານ ພັນໂທ ຄຳສາຮຽມຈຳປາພັນ ຫົວໜ້າການທະ ຫານກອງບັນຊາການທະຫານ ເມືອງສອງຄອນກ່າວວ່າ: ທະ ຫານເມືອງສອງຄອນໄດ້ຮ່ວມກັບກອງພັນທະຫານຮາບທີ 5 ແຂວງສະຫວັນນະເຂດໄດ້ມາຕັ້ງສູນບັນຊາຢູ່ພາກສະ ໜາມໂດຍໄດ້ເລີ່ມຍົກຍ້າຍປະ ຊາຊົນນັບແຕ່ຕົ້ນເດືອນກັນ ຍາເປັນຕົ້ນມາ, ມາຮອດວັນທີ 4-5 ກັນຍາ, ນ້ຳໄດ້ສູງຂຶ້ນໄວ ເຮັດໃຫ້ກຳລັງທະຫານຕ້ອງເລັ່ງຍົກຍ້າຍປະຊາຊົນອອກຈາກເຂດທີ່ມີຄວາມສ່ຽງໄປຢູ່ບ່ອນປອດໄພ ທ່ານ ບຸນເກີດ ຜິວໂສດາລິດ ຮອງນາຍບ້ານໆລະຫານ້ຳກ່າວວ່າ: ບ້ານລະຫານ້ຳມີ 460 ກວ່າຫຼັງຄາເຮືອນໄດ້ຖືກນ້ຳຖ້ວມທັງໝົດ, ບາງຈຸດນ້ຳເລິກເຖິງ 5-6 ແມັດ, ກ່ອນໜ້ານີ້ ປະມານທ້າຍເດືອນສິງຫາຜ່ານມາ, ນ້ຳໄດ້ສູງຂຶ້ນບໍ່ເຖິງ 2 ມື້, ນ້ຳໄດ້ບົກແຫ້ງລົງແຕ່ຄາດບໍ່ເຖິງມາຮອດວັນທີ 3-4 ກັນຍາເປັນຕົ້ນມາ, ນ້ຳໄດ້ສູງຂຶ້ນເລື້ອຍໆ ແລະ ໄຫຼເຂົ້າຖ້ວມບ້ານເຮືອນ, ຈົນມາຮອດວັນທີ 5 ກັນຍາ, ນ້ຳໄດ້ແຮງຂຶ້ນເຮັດຫຍັງນຳກໍບໍ່ທັນ. ທ່ານກ່າວອີກວ່າ: ມີພາ ຫະນະປະເພດລົດໄຖນາ, ລົດ ຈັກ, ລົດໃຫຍ່ ຈຳນວນໜຶ່ງຖືກ ນ້ຳຖ້ວມ, ນອກຈາກນີ້, ເຂົ້າ, ເຄື່ອງຂອງ ແລະ ສັດລ້ຽງປະ ເພດງົວຄວາຍຈົມໄປກັບນ້ຳຈຳ ນວນບໍ່ໜ້ອຍ. ທີມຂ່າວພວກເຮົາໄດ້ຂີ່ເຮືອລົງໄປສຳຫຼວດສະພາບນ້ຳຖ້ວມເຂດບ້ານລະຫານ້ຳ ແລະບ້ານທ່າຂາມລຽນຊຶ່ງເປັນໜຶ່ງ ໃນເຂດນ້ຳຖ້ວມຮ້າຍແຮງທີ່ສຸດພົບວ່າ: ເຂດດັ່ງກ່າວນີ້ ນ້ຳໄດ້ຖ້ວມສູງ, ບາງຈຸດເຮືອນຊັ້ນດຽວເກືອບບໍ່ເຫັນຮອດຫຼັງຄາ, ຖ້າເປັນເຮືອນສອງຊັ້ນ, ນ້ຳຖ້ວມເຖິງຊັ້ນທີ 2, ໃນຂະນະທີ່ປະຊາຊົນຈຳນວນໜຶ່ງເຖິງວ່າຍົກຍ້າຍອອກມາແຕ່ເວລາກາງເວັນໄດ້ກັບເຂົ້າໄປເບິ່ງເຮືອນເນື່ອງຈາກວ່າຢ້ານມີຄົນສວຍໂອກາດລັກເອົາເຄື່ອງຂອງ. ມາຮອດວັນທີ 10 ກັນຍາ, ກຳລັງທະຫານ ແລະ ຊາວບ້ານຍັງສືບຕໍ່ຍົກຍ້າຍເຄື່ອງຂອງແລະ ສັດລ້ຽງຂອງປະຊາຊົນເນື່ອງຈາກວ່າປະຊາຊົນສ່ວນໜຶ່ງບໍ່ໝັ້ນໃຈໃນຄວາມປອດໄພຂອງສັດລ້ຽງ. (ຂ່າວ: ຄຳເຮືອງ)