ນ້ຳຖ້ວມເມືອງວາປີ ເສັ້ນທາງເສຍຫາຍມີມູນຄ່າ 58,99 ຕື້ກວ່າກີບ


...

13.09.2019 9:43     

   ໃນໄລຍະນ້ຳໄດ້ເລີ່ມບົກແຫ້ງລົງ ແລະ ກັບເຂົ້າສູ່ສະ ພາບປົກກະຕິແລ້ວ ຄະນະກຳ ມະການຕ້ານໄພພິບັດເມືອງວາປີ ແຂວງສາລະວັນໄດ້ຂຸ້ນ ຂ້ຽວເອົາໃຈໃສ່ລົງເກັບກຳຂໍ້ມູນຄວາມເສຍຫາຍຈາກໄພນ້ຳຖ້ວມ ໃນແຕ່ລະບ້ານ, ຈຸດຕ່າງໆ ທີ່ໄດ້ຮັບຜົນກະທົບຢ່າງໜັກ ໂດຍສະເພາະແມ່ນບ້ານເຮືອນ, ວັດຖຸຊັບສິນຕ່າງໆຂອງພໍ່ແມ່ປະຊາຊົນ, ຖະໜົນຫົນທາງ, ໂຮງຮຽນ, ສຸກສາລາ, ລະບົບຊົນລະປະທານ ແລະ ເນື້ອທີ່ທໍາການຜະລິດຕ່າງໆຂອງປະຊາຊົນ. ທ່ານ ບຸນຍູ້ ຈັນທະລັງສີ ຮອງເຈົ້າເມືອງວາປີ ໄດ້ໃຫ້ສຳພາດໃນວັນທີ 10 ກັນຍາຜ່ານມາວ່າ: ໄພພິບັດນ້ຳຖ້ວມ ຄັ້ງນີ້ ໄດ້ສ້າງຄວາມເສຍຫາຍຢ່າງຫຼວງຫຼາຍຕໍ່ຊັບສິນ, ເນື້ອທີ່ທຳການຜະລິດ, ເຮືອນຊານຂອງປະຊາຊົນ, ພື້ນຖານໂຄງລ່າງເສດຖະກິດ-ວັດທະນະທຳສັງຄົມຂອງເມືອງ. ທົ່ວເມືອງມີ 55 ບ້ານ ຖືກນ້ຳຖ້ວມໝົດທຸກບ້ານ, ໃນນັ້ນຖືກນ້ຳຖ້ວມໜັກ 21 ບ້ານ ກວມເອົາ 3 ພັນກວ່າຄອບຄົວ ແລະ ໄດ້ເຮັດໃຫ້ເນື້ອທີ່ນາເສຍຫາຍ 12.100 ເຮັກຕາ, ໜອງປາ 1.330 ໜອງ, ສັດລ້ຽງ 10.645 ໂຕ, ໃນນັ້ນມີຄວາຍ 15 ໂຕ, ງົວ 310 ໂຕ, ໝູ 1 ພັນກວ່າໂຕ ແລະສັດປີກອີກ 9 ພັນກວ່າໂຕ, ລະບົບຊົນລະປະທານເສຍຫາຍ 3 ໂຄງການ ເປັນຕົ້ນອ່າງເກັບນ້ຳເປື້ອນ, ຝາຍນ້ຳລົ້ນ, ຈັກສູບນ້ຳດ້ວຍໄຟຟ້າ ມູນຄ່າເສຍຫາຍ 800 ລ້ານກວ່າກີບ, ເສັ້ນທາງ 23 ເສັ້ນ, ຍາວ 142 ກິໂລແມັດ, ຂົວ 3 ແຫ່ງ ມູນຄ່າເສຍຫາຍ 58,99 ຕື້ກວ່າກີບ, ໃນນັ້ນມີເສັ້ນທາງຫຼວງແຫ່ງຊາດ 15A ຕ້ອງໄດ້ຟື້ນຟູ 20 ກິໂລແມັດ ແລະເສັ້ນທາງອື່ນໆ, ສ່ວນໃນຂົງເຂດສຶກສາ ມີໂຮງຮຽນ 33 ແຫ່ງ ຍັງບໍ່ທັນສາມາດປະເມີນຄວາມເສຍຫາຍໄດ້. ນອກຈາກນັ້ນ, ຍັງມີວຽກງານອື່ນໆອີກ ທີ່ຈະໄດ້ສຸມໃສ່ເກັບກຳຂໍ້ມູນ ແລະ ແກ້ໄຂໃຫ້ທ່ວງທັນ ທີ່ຕິດພັນກັບການດຳລົງຊີວິດຂອງພໍ່ແມ່ປະຊາຊົນເຊັ່ນ: ລະບົບໄຟ ຟ້າ, ການສື່ສານ ແລະ ວຽກງານສາທາລະນະສຸກ ເພື່ອຟື້ນຟູໄພພິບັດນ້ຳຖ້ວມ ໃນຄັ້ງນີ້ໃຫ້ ກັບເຂົ້າສູ່ສະພາບປົກກະຕິ ແນ ໃສ່ແກ້ໄຂໂດຍໄວ ໃຫ້ກັບພໍ່ແມ່ປະຊາຊົນ ໃນແຕ່ລະບ້ານທີ່ໄດ້ ຮັບຜົນກະທົບ. ຈາກນັ້ນກໍ່ໄດ້ ແນະນຳໃຫ້ບັນດາອົງການປົກ ຄອງແຕ່ລະບ້ານ ທີ່ໄດ້ຮັບຜົນກະທົບເອົາໃຈໃສ່ເກັບກຳຂໍ້ມູນ ຄວາມເສຍຫາຍຕ່າງໆລາຍງານ ໃຫ້ຄະນະຮັບຜິດຊອບ. ສຳລັບເມືອງວາປີ ຄະນະຮັບຜິດຊອບທຸກພາກສ່ວນ ໄດ້ສົມທົບກັນສືບຕໍ່ຊ່ວຍເຫຼືອບັນເທົາທຸກໃຫ້ຜູ້ປະສົບໄພ, ນຳໃຊ້ກຳລັງ ປກສ-ປກຊ ນຳເອົາອາຫານ, ນ້ຳດື່ມ ແລະ ເຄື່ອງໃຊ້ທີ່ຈຳເປັນ ໄປມອບໃຫ້ປະຊາຊົນ ທີ່ໄດ້ຮັບຜົນກະທົບ ແລະ ໄດ້ຮັບການຊ່ວຍເຫຼືອຈາກອົງການຈັດຕັ້ງຕ່າງໆ ທັງພາກລັດ ແລະ ເອກະຊົນ, ບໍລິ ສັດ, ຫ້າງຮ້ານຢ່າງຕໍ່ເນື່ອງ. ມາຮອດປັດຈຸບັນ ລວມຍອດການຊ່ວຍເຫຼືອທັງໝົດ 672 ລ້ານກວ່າກີບ ໃນນັ້ນ ເງິນສົດ 136 ລ້ານກວ່າກີບ ແລະ ເຄື່ອງອຸປະໂພກ-ບໍລິໂພກຕ່າງໆ 500 ລ້ານກວ່າກີບ. (ຂ່າວ-ພາບ: ທິດລານີ ໂຄດໂຍທາ)