ສະຫວັນນະເຂດ ຈັດງານຮ່ວມນ້ຳໃຈຊ່ວຍເຫຼືອຜູ້ປະສົບໄພນ້ຳຖ້ວມ


...

16.09.2019 8:51     

   ໃນຄໍ່າຄືນຂອງວັນທີ 11 ກັນຍາຜ່ານມາ ອຳນາດການປົກຄອງແຂວງ ຊຶ່ງນຳໂດຍ ທ່ານ ສັນຕິພາບ ພົມວິຫານ ເຈົ້າແຂວງສະຫວັນນະເຂດ ພ້ອມດ້ວຍບັນດາທ່ານຮອງເຈົ້າແຂວງ-ພະແນກການອ້ອມຂ້າງແຂວງຕະຫຼອດຮອດນັກທຸລະກິດເຂົ້າຮ່ວມ ໄດ້ພ້ອມກັນຈັດງານລະດົມທຶນ ຮ່ວມໃຈ ຊ່ວຍຜູ້ປະສົບໄພພິບັດ ນ້ຳຖ້ວມ ຊຶ່ງພິທີດັ່ງກ່າວ ໄດ້ຈັດຂຶ້ນທີ່ພັດຕະຄານດາວຮຸ່ງ 1, ນະຄອນໄກສອນ ພົມວິຫານ ແຂວງສະຫວັນນະເຂດ ທ່ານ ສັນຕິພາບ ພົມວິຫານ ໄດ້ກ່າວເປີດງານ ພ້ອມທັງລາຍງານສະພາບນ້ຳຖ້ວມ ຢູ່ພາຍໃນແຂວງສະຫວັນນະເຂດ ວ່າຍັງມີນ້ຳຖ້ວມສູງຢູ່ເຂດເມືອງສອງຄອນ, ຈຳພອນ ແລະ ຊົນນະບູລີ ເຮືອນຊານຂອງປະຊາຊົນຫຼາຍຫຼັງຄາເຮືອນ ຍັງຈົມຢູ່ໃຕ້ນ້ຳ ແລະ ຄາດວ່າຍັງອີກຫຼາຍມື້ ກວ່າທີ່ນ້ຳຈະຫຼຸດລົງເຂົ້າສູ່ປົກກະຕິ ຊຶ່ງຜົນເສຍຫາຍຈາກນ້ຳຖ້ວມໃນຄັ້ງນີ້ ມີຜົນກະທົບຕໍ່ບ່ອນຢູ່ອາໄສ ມີ 10 ເມືອງ, 165 ບ້ານ, 13.736 ຄອບຄົວ, 30.637 ຄົນ, ໃນນັ້ນ ຕ້ອງຍົກຍ້າຍປະຊາຊົນ ອອກໄປຢູ່ບ່ອນທີ່ປອດໄພມີ 81 ບ້ານ, 7.433 ຄອບຄົວ, 27.252 ຄົນ, ບາງຄອບຄົວໄດ້ສູນເສຍສະມາຊິກໃນຄອບຄົວ ຊຶ່ງມີຜູ້ເສຍຊີວິດຈາກເຫດການນີ້ 4 ຄົນ, ຜົນກະທົບຕໍ່ເນື້ອທີ່ທຳການຜະລິດ ຂອງປະຊາຊົນໃນ 14 ເມືອງ 1 ນະຄອນ ມີ 463 ບ້ານ, 34.910 ຄອບຄົວ, ເນື້ອທີ່ນາປີຖືກນ້ຳຖ້ວມ 49.274 ເຮັກຕາ, ເນື້ອທີ່ສວນປູກພືດ 2.585 ເຮັກຕາ, ອ່າງເກັບນ້ຳ 11 ແຫ່ງ, ຄູກັນນ້ຳ 4 ແຫ່ງ, ປະຕູນ້ຳ 12 ແຫ່ງ ແລະ ສະຖານີຈັກສູບນ້ຳ 9 ແຫ່ງ, ໜອງປາຖືກນ້ຳຖ້ວມ 1.819 ໜອງ, ສັດລ້ຽງຕາຍ ແລະ ສູນຫາຍ 3.202 ໂຕ ນອກຈາກນັ້ນ ກໍຍັງມີຜົນກະທົບຕໍ່ພື້ນຖານໂຄງລ່າງຄື: ເສັ້ນທາງເສຍຫາຍຫຼາຍກວ່າ 54 ເສັ້ນ, ບາງບ່ອນທາງຂາດ, ນ້ຳເຊາະເຈື່ອນ, ຂົວເປ່ເພຍຸບລົງ, ເສັ້ນທາງຫຼາຍບ່ອນຖືກຕັດຂາດ ບໍ່ສາມາດສັນຈອນໄປ-ມາໄດ້, ການເຂົ້າເຖິງປະຊາຊົນຜູ້ປະສົບໄພ ພົບຄວາມຫຍຸ້ງຍາກ, ມູນຄ່າຄວາມເສຍຫາຍເສັ້ນທາງ ແລະ ຂົວຫຼາຍກວ່າ 72 ຕື້ກີບ, ເສົາໄຟຟ້າຫຼາຍບ່ອນຫັກລົ້ມ ໃນບາງເຂດພື້ນທີ່ບໍ່ສາມາດກະຈາຍກະແສໄຟຟ້າໄດ້, ໝໍ້ແປງໄຟ, ກົງເຕີໄຟ, ເຄື່ອງໃຊ້ໄຟຟ້າຂອງປະຊາຊົນຈຳນວນຫຼາຍ ຖືກນ້ຳຖ້ວມເສຍຫາຍ ຊຶ່ງຍັງບໍ່ສາມາດສັງລວມຂໍ້ມູນໄດ້, ມີໂຮງຮຽນ 165 ແຫ່ງຖືກນ້ຳຖ້ວມ ແລະ 187 ໂຮງຮຽນບໍ່ສາມາດເປີດສົກຮຽນໃໝ່ທັນ, ມາຮອດປັດຈຸບັນມີ 81 ໂຮງຮຽນໃນບ່ອນທີ່ຖືກນ້ຳຖ້ວມ ບໍ່ສາມາດເປີດການຮຽນ-ການສອນໄດ້, ມີສຸກສາລາ 8 ແຫ່ງຖືກນ້ຳຖ້ວມບໍ່ສາມາດບໍລິການປະຊາຊົນໄດ້, ນ້ຳສ້າງ, ນ້ຳບາດານ 659 ໜ່ວຍ ແລະ ວິດຖ່າຍຫຼາຍພັນໜ່ວຍຖືກຖ້ວມ. ໃນງານຄັ້ງນີ້ ຜູ້ເຂົ້າຮ່ວມກໍໄດ້ຮັບຊົມການສະແດງສິ ລະປະວັນນະຄະດີ ແລະ ມີນັກຮ້ອງ, ນັກສິລະປິນຈາກຄ້າຍຕ່າງໆ ທີ່ສະໝັກໃຈເຂົ້າຮ່ວມໃນງານນີ້ ຫຼາຍກວ່າ 20 ຄົນ, ເພື່ອມາປະກອບສ່ວນສຽງເພງ ໃຫ້ແຂກທີ່ເຂົ້າຮ່ວມໄດ້ຜ່ອນຄາຍ, ສະຫຼັບດ້ວຍການ ມອບ-ຮັບ ເຄື່ອງບໍລິຈາກ ວັດຖຸ, ສິ່ງຂອງ, ເຄື່ອງອຸປະໂພກ-ບໍລິໂພກ ແລະເງິນ ຊ່ວຍເຫຼືອຜູ້ປະສົບໄພພິບັດນ້ຳຖ້ວມ ຈາກບໍລິສັດ, ຫ້າງຮ້ານ, ສ່ວນບຸກຄົນ ໄດ້ທັງໝົດ 2 ຕື້ 87 ລ້ານກວ່າກີບ ແລະ 52.000 ໂດລາ, ນອກນັ້ນ ເປັນວັດຖຸລວມມູນຄ່າ 211 ລ້ານກວ່າກີບ. ນີ້ຄືທານນ້ຳໃຈຂອງຊາວແຂວງສະຫວັນນະເຂດ, ໃນຍາມລຳບາກ ຕ້ອງໄດ້ມີການຊ່ວຍເຫຼືອຊຶ່ງກັນ ແລະກັນ. (ຂ່າວ: ຕຸກໆ)