ຜູ້ປະສົບໄພຊາວເມືອງຊະນະສົມບູນ ຍັງຕ້ອງການຄວາມຊ່ວຍເຫຼືອຈາກສັງຄົມ


...

16.09.2019 9:06     

   ຜູ້ປະສົບໄພນ້ຳຖ້ວມຢູ່ເມືອງຊະນະສົມບູນ ແຂວງຈຳປາສັກ ໄດ້ທະຍອຍກັນເກັບເຄື່ອງຂອງເຂົ້າສູ່ບ້ານເຮືອນຂອງຕົນເອງແລ້ວ, ຫຼັງຈາກທີ່ນ້ຳບົກແຫ້ງລົງຕັ້ງແຕ່ວັນທີ 9-10 ກັນຍາເປັນຕົ້ນມາ, ໃນຂະນະທີ່ປະຊາຊົນເປັນຈຳນວນຫຼວງຫຼາຍໂດຍສະເພາະແມ່ນບ້ານໂສໂລນ້ອຍ-ໂສໂລໃຫຍ່, ບ້ານເດື່ອ ແລະ ອີກຫຼາຍບ້ານຍັງຕ້ອງການເຂົ້າສານ, ອາຫານແລະ ນ້ຳດື່ມນ້ຳໃຊ້ເປັນຈຳ ນວນຫຼວງຫຼາຍ. ທ່ານ ວິໄລວັນ ທິເດດນາຍບ້ານໆໂສໂລນ້ອຍ ກ່າວວ່າ: ນັບແຕ່ກາງຄືນຂອງວັນທີ 1 ກັນຍາເປັນຕົ້ນມາ ໄດ້ເກີດມີຝົນຕົກໜັກຕິດຕໍ່ກັນຫຼາຍວັນເຮັດໃຫ້ນ້ຳຫ້ວຍ ແລະ ນ້ຳເຊໂດນ ຊຶ່ງຢູ່ຫ່າງຈາກບ້ານປະມານ 60 ແມັດໄດ້ຍື່ງຂຶ້ນຖ້ວມບ້ານໂສໂລນ້ອຍ ນັບແຕ່ວັນທີ 2 ກັນຍາ, ແຕ່ເບື້ອງຕົ້ນນ້ຳບໍ່ຂຶ້ນໄວປານໃດ, ປະຊາຊົນຈຶ່ງໄດ້ເລີ່ມເກັບເຄື່ອງຂອງແຕ່ບໍ່ໄດ້ຂົນຍ້າຍໄປໄວ້ບ່ອນປອດໄພເພາະຄິດວ່ານ້ຳຈະບໍ່ຖ້ວມສູງ, ຫຼັງຈາກນັ້ນຮອດວັນທີ 5 ກັນຍາ, ນ້ຳໄດ້ຍື່ງຂຶ້ນຖ້ວມຢ່າງໄວວາ ຈຶ່ງໄດ້ຕັດສິນໃຈບອກປະຊາຊົນຍົກຍ້າຍໄປຢູ່ບ່ອນສູງເພື່ອຄວາມປອດໄພ, ສ່ວນເຄື່ອງຂອງ, ສັດລ້ຽງແມ່ນເກັບນຳບໍ່ທັນ, ບາງຄົນບາງຄອບຄົວໄດ້ແຕ່ເຄື່ອງນຸ່ງຈຳນວນໜ້ອຍໜຶ່ງເທົ່ານັ້ນ. ບ້ານໂສໂລນ້ອຍ ມີທັງ ໝົດ 150 ຫຼັງຄາເຮືອນ, ມີ154 ຄອບຄົວ ຊຶ່ງເຫດການນ້ຳຖ້ວມ ຄັ້ງນີ້ ໄດ້ເຮັດໃຫ້ເຮືອນຂອງປະ ຊາຊົນ ຊຶ່ງສ່ວນໃຫຍ່ເປັນເຮືອນ ຮ້ານເສົາຕັ້ງໃສ່ຫີນຈຳນວນ 7 ຫຼັງ, ເລົ້າເຂົ້າ 22 ຫຼັງໄຫຼໄປກັບນ້ຳ, ອີກ 3 ຫຼັງຄາເຮືອນຖືກຍຸບຕົວລົງ ແລະ ເປ່ເພເສຍຫາຍ ຈຳນວນໜຶ່ງລວມທັງໝົດເປັນ 15 ຫຼັງ, ນອກຈາກນີ້ ເລົ້າເຂົ້າຂອງປະຊາຊົນຖືກນ້ຳຖ້ວມເສຍຫາຍເກືອບທັງໝົດ, ໃນຂະນະທີ່ເນື້ອທີ່ນາປີ 147 ກວ່າເຮັກຕາ ກໍຖືກນ້ຳຖ້ວມຕາມການປະເມີນເບື້ອງຕົ້ນຍັງປະມານ 5 ເຮັກຕາ ທີ່ອາດຈະໄດ້ເກັບກ່ຽວຜົນຜະລິດ. ມາຮອດວັນທີ 9-10 ກັນ ຍາຜ່ານມາ, ຊາວບ້ານໂສໂລນ້ອຍໄດ້ຍ້າຍເຂົ້າໄປຢູ່ບ້ານເຮືອນຂອງຕົນເກືອບທັງໝົດແລ້ວ, ສ່ວນຜູ້ທີ່ເຮືອນຖືກນ້ຳຊຸໄຫຼ ແລະ ເປ່ເພໄດ້ອາໄສຢູ່ກັບຍາດພີ່ນ້ອງພາຍໃນບ້ານ, ບາງຄອບຄົວກໍໄປອາໄສຢູ່ກັບຍາດພີ່ນ້ອງບ້ານອື່ນໄປກ່ອນ. ນາຍບ້ານໂສໂລນ້ອຍກ່າວອີກວ່າ: ຫຼັງຈາກນີ້ໄປຈະ ໄດ້ລະດົມປະຊາຊົນເຮັດນາ ແຊງເພື່ອທົດແທນຄວາມເສຍ ຫາຍຫາກບໍ່ດັ່ງນັ້ນຈະເຮັດໃຫ້ປະຊາຊົນຂາດເຂົ້າກິນຕະຫຼອດປີ, ແຕ່ຮຽກຮ້ອງໃຫ້ພາກສ່ວນກ່ຽວຂ້ອງຊ່ວຍສ້ອມແປງຊົນ ລະປະທານທີ່ເປ່ເພຈາກໄພນ້ຳຖ້ວມ, ລວມທັງສະໜອງແນວພັນເຂົ້າເພື່ອໃຫ້ໄດ້ລົງມືເຮັດນາແຊງທັນຕາມລະດູການ. ສ່ວນການຊ່ວຍເຫຼືອຈາກ ສັງຄົມໄດ້ມີບຸກຄົນ ແລະ ອົງ ການຈັດຕັ້ງຕ່າງໆ ໄດ້ທະຍອຍນຳເອົາເຂົ້າສານອາຫານແຫ້ງແລະ ນ້ຳດື່ມນ້ຳໃຊ້ເຂົ້າໄປຊ່ວຍ ເຫຼືອແຕ່ກໍຍັງບໍ່ພຽງພໍກັບຄວາມຕ້ອງການໂດຍສະເພາະແມ່ນອາຫານການກິນ ແລະ ນ້ຳດື່ມ ນ້ຳໃຊ້, ຫຼ້າສຸດເມື່ອວັນທີ 11 ກັນຍາຜ່ານມາ, ໂຮງງານນ້ຳດື່ມບ້ານບຸ່ງຄ້າ ເມືອງຊະນະສົມບູນ ໄດ້ນຳນ້ຳດື່ມຕຸກໃຫຍ່ໄປຊ່ວຍປະຊາຊົນ ຊຶ່ງເຫັນວ່າປະຊາຊົນຈຳນວນຫຼວງຫຼາຍໄດ້ນຳເອົາຕຸກນ້ຳດື່ມມາຮ່າຍເອົານ້ຳເພື່ອໄວ້ດື່ມ, ສ່ວນຜູ້ທີ່ບໍ່ມີຕຸກ, ໂຮງງານດັ່ງກ່າວກໍໄດ້ໃຫ້ຢືມຕຸກກ່ອນຈຶ່ງເຮັດໃຫ້ປະຊາຊົນບ້ານໂສໂລນ້ອຍ ມີນ້ຳໄວ້ດື່ມກັນທຸກຖ້ວນໜ້າ. ສຳລັບເມືອງຊະນະສົມ ບູນ ແຂວງຈຳປາສັກ ຖືກນ້ຳຖ້ວມທັງໝົດ 34 ບ້ານ, 7,6 ພັນກວ່າຄອບຄົວ, ໃນນັ້ນມີ 16 ບ້ານຖືກຖ້ວມໜັກຍົກຍ້າຍປະຊາຊົນ 1.860 ຄອບຄົວ ຊຶ່ງປັດຈຸບັນຍັງຕ້ອງການຄວາມຊ່ວຍເຫຼືອຈາກສັງຄົມ ເປັນຕົ້ນແມ່ນບ້ານໂສໂລໃຫຍ່, ໂສໂລ ນ້ອຍ, ບ້ານເດື່ອ ແລະ ອີກ 10 ກວ່າບ້ານ ເນື່ອງຈາກໄລຍະ ຜ່ານມາເຖິງວ່າມີຫຼາຍພາກ ສ່ວນໃຫ້ການຊ່ວຍເຫຼືອແຕ່ຍັງບໍ່ພຽງພໍກັບຄວາມຕ້ອງການ. (ຂ່າວ: ຄຳເຮືອງ)