93 ຄອບຄົວ ບ້ານຫ້ວຍບັງລຽງ ໄດ້ຮັບການຊ່ວຍເຫຼືອ


...

16.09.2019 9:06     

   ຫວ່າງບໍ່ດົນຜ່ານມາ ທ່ານ ສີທົນ ແກ້ວພູວົງ ຄະນະປະຈໍາພັກແຂວງ ປະທານແນວລາວສ້າງຊາດແຂວງ ຜູ້ຊີ້ນໍາວຽກງານອົງການຈັດຕັ້ງມະຫາຊົນ ທັງເປັນປະທານມູນນິທິຊ່ວຍເຫຼືອຄົນທຸກຍາກ 1623 ແຂວງຈໍາປາສັກ, ໄດ້ປະສານກັບທ່ານ ເຈົ້າເມືອງໆປະທຸມພອນໃນການຊ່ວຍເຫຼືອຜູ້ປະສົບໄພນໍ້າຖ້ວມ ຢູ່ບ້ານຫ້ວຍບັງລຽງ ເມືອງ ປະທຸມພອນ ແຂວງຈຳປາສັກ. ໃນການຊ່ວຍເຫຼືອຄັ້ງນີ້ ແມ່ນໄດ້ນໍາເອົາເຂົ້າສານ, ອາ ຫານແຫ້ງ, ນໍ້າດື່ມຈໍານວນໜຶ່ງ ທີ່ໄດ້ຮັບການປະກອບສ່ວນ ຊ່ວຍເຫຼືອມາຈາກຫຼາຍພາກ ສ່ວນລວມມູນຄ່າ 8.500.000 ກີບ ເພື່ອເປັນການແບ່ງເບົາຊ່ວຍເຫຼືອໃນຂັ້ນເບື້ອງຕົ້ນໄດ້ ນໍາໄປມອບໃຫ້ກັບພໍ່ແມ່ປະ ຊາ ຊົນບ້ານຫ້ວຍບັງລຽງ ທີ່ຖືກຜົນກະທົບຈາກໄພນໍ້າຖ້ວມ ພ້ອມທັງໄດ້ຮັບຟັງການລາຍງານ ສະພາບລວມຜົນເສຍຫາຍທີ່ໄດ້ເກີດຂຶ້ນໃຫ້ຮູ້ວ່າ: ບ້ານຫ້ວຍບັງລຽງ ທີ່ຂຶ້ນກັບເມືອງປະທຸມພອນ ແມ່ນໄດ້ມີຜົນກະທົບເສຍຫາຍຢູ່ 93 ຄອບຄົວ ລວມທັງຊັບສິນ, ເຮືອນຊານ, ໄຮ່ນາຮົ້ວສວນ, ສັດລ້ຽງ, ຂະ ໜາດນ້ອຍ, ຂະໜາດໃຫ່ຍບາງ ຈໍານວນແມ່ນໄດ້ຖືກກະແສນໍ້າທີ່ໄຫຼແຮງພັດໄຫຼໄປ ໂດຍ ໄດ້ສ້າງຄວາມເສຍຫາຍຢ່າງ ໜັກໜ່ວງພໍສົມຄວນຕໍ່ກັບເຫດ ການດັ່ງກ່າວ, ແມ່ນໄດ້ເຮັດໃຫ້ ພໍ່ແມ່ປະຊາຊົນທີ່ອາໄສຢູ່ເຂດ ບ້ານຫ້ວຍບັງລຽງບໍສາ ມາດອາໄສຢູ່ໄດ້ ຈຶ່ງຈໍາເປັນຕ້ອງໄດ້ອົບພະຍົບຍົກຍ້າຍເຄື່ອງຂອງຈໍານວນໜຶ່ງ ແລະ ພໍ່ແມ່ປະຊາຊົນຂຶ້ນຢູ່ເຂດທີ່ປອດໄພ ໂດຍໄດ້ອາໄສຢູ່ຊົ່ວຄາວກໍຄື: ຈໍານວນໜຶ່ງແມ່ນໄດ້ໄປພັກອາໄສຢູ່ນໍາພີ່ນ້ອງແຕ່ບາງຈໍານວນກໍໄດ້ອາໄສຢູ່ປ່າທີ່ເຫັນວ່າປອດໄພຈົນກວ່າວ່ານໍ້າຈະບົກແຫ້ງສູ່ສະພາບປົກກະຕິ, ໂອກາດດຽວກັນທ່ານນາຍບ້ານຍັງໄດ້ຕາງໜ້າໃຫ້ພໍ່ແມ່ປະຊາຊົນທີ່່ໄດ້ຮັບການຊ່ວຍເຫຼືອໃນຄັ້ງນີ້ ໂດຍທ່ານໄດ້ກ່າວຄໍາຂອບໃຈຕໍ່ທາງປະທານແນວລາວສ້າງຊາດແຂວງ ທັງເປັນປະທານມູນນິທິຊ່ວຍເຫຼືອຄົນທຸກຍາກ 1623 ຂອງແຂວງຈໍາປາສັກ, ທ່ານເຈົ້າເມືອງ, ອົງການຈັດຕັ້ງທັງພາກລັດ ແລະ ເອກະຊົນ, ພໍ່ຄ້າຊາວຂາຍທີ່ມີຄວາມເປັນຫ່ວງເປັນໄຍຕໍ່ກັບພໍ່ແມ່ປະຊາຊົນບ້ານຫ້ວຍບັງລຽງ, ໃນເວລາທີ່ມີຄວາມຫຍຸ້ງຍາກ ສັບສົນນີ້. ຈາກນັ້ນ, ທ່ານ ສີທົນ ແກ້ວພູວົງ ກໍໄດ້ໃຫ້ກຽດກ່າວຄໍາໂອ້ລົມຕໍ່ພໍ່ແມ່ປະຊາຊົນ ເພື່ອເປັນກໍາລັງໃຈໃຫ້ກັບຄອບຄົວທີ່ໄດ້ຮັບຜົນກະທົບໃນຄັ້ງນີ້ ໂດຍ ທ່ານໄດ້ກ່າວໃຫ້ກຳລັງໃຈຈົ່ງພ້ອມກັນມີຄວາມເຂັ້ມແຂງພ້ອມກັນບຸກບືນຜ່ານຜ່າເຫດການອັນເປັນວິກິດໃນຄັ້ງນີ້ໃຫ້ຜ່ານພົ້ນໄປພ້ອມໆກັນ. (ຂ່າວ ນ. ດອນດີ້ ສີດາວົງ)