ເມືອງທ່າແຕງ ໄດ້ຮັບຜົນເສຍຫາຍຈາກໄພນ້ຳຖ້ວມ 7 ຕື້ກວ່າກີບ


...

16.09.2019 9:06     

   ເມື່ອຕົ້ນເດືອນກັນຍາຜ່ານ ມາ ຝົນໄດ້ຕົກໜັກຕິດຕໍ່ກັນ ຫຼາຍວັນເຮັດໃຫ້ນໍ້າຖ້ວມບ້ານ, ເຮືອນ, ໄຮ່ນາ,ຮົ້ວສວນ, ສັດລ້ຽງ ແລະ ອື່ນໆຂອງປະຊາຊົນເມືອງ ທ່າແຕງ ແຂວງເຊກອງ ໄດ້ຮັບຜົນກະທົບ ແລະ ເສຍຫາຍ. ທ່ານ ສົມເພັດ ເອິດລັດ ດາ ວ່າການເຈົ້າເມືອງທ່າແຕງ ໄດ້ສໍາພາດຕໍ່ນັກຂ່າວເມື່ອວັນທີ 12 ກັນຍາຜ່ານມາວ່າ: ໃນໄລຍະວັນທີ 2-3 ກັນຍາ ນໍ້າໄດ້ຖ້ວມບ້ານຂອງພໍ່ແມ່ປະຊາຊົນ, ການນໍາເມືອງຂອງ ພວກເຮົາໄດ້ຈັດຕັ້ງ ພະນັກງານ ລົງຊ່ວຍເຫຼືອຜູ້ທີ່ໄດ້ຮັບຜົນ ກະທົບໃນເບື້ອງຕົ້ນໄດ້ທັນເຫດການ ແລະ ປອດໄພ, ຊຶ່ງໄດ້ສ້າງຄວາມເສຍຫາຍໃຫ້ແກ່ພື້ນຖານໂຄງລ່າງຂອງເມືອງ 7 ຕື້ກວ່າກີບ ເປັນຕົ້ນທາງຫຼວງແຫ່ງຊາດ 16E ຄື: ແຍກທາງ 16E ບ້ານທ່າແຕງ ຫາ ໜອງບົວໃສ ຫາ ໝື່ນກາງ ຫາ ຕຸ້ມຍໍ, ທາງຂາດລະຫວ່າງບ້ານແສນເໜືອ ຫາ ແສນໃຕ້, ທາງແຍກ 16E ກົກໄຮ ຫາ ຍົກທົງ ຫາ ປ່າໄລ, ທາງເຂົ້າການຜະລິດບ້ານຍິບ, ແຍກທາງ 1h ບ້ານປົງ ຫາ ບ້ານໝື່ກາງ, ແຍກທາງ 1h ບ້ານກົກພຸງ ຫາ ບ້ານຕະກ່ຽວ, ທາງສາມແຍກຈູງຮຸ່ງ ຫາ ບ້ານໂທດໃຫຍ່, ເສັ້ນທາງ 1h ໜ້າໂຮງເລື່ອຍ ຫາ ຕາດໄຟໄໝ້, ເສັ້ນທາງດິນແດງ ຫາ ສີ່ແຍກເຮືອນສາຍໂລຫິດ (ເສັ້ນທາງເປັນບວກ ເປັນຂຸມ), ເນື້ອທີ່ສວນມັນຕົ້ນ 159,8 ເຮັກຕາ, ສວນພືດຜັກ 103,6 ເຮັກຕາ, ເນື້ອທີ່ນາ 500,3 ເຮັກຕາ, ຄວາຍຕາຍ 27 ໂຕ, ງົວ 63 ໂຕ, ໝູ 167 ໂຕ, ໜອງປາທີ່ລ້ຽງເປັນເສດຖະກິດ 0,3 ເຮັກຕາ, ໜອງປາລ້ຽງເພື່ອສະບຽງອາຫານ 20 ເຮັກຕາ, ຊົນລະປະທານບ້ານຕອກລອກກັນດອນ, ໂຄງການຫ້ວຍຕິດປ່າໄລ່, ຫ້ວຍນ້ຳໃສ 2 ຫ້ວຍດໍາ, ຫ້ວຍຕະປູນ, ແລະ ໂຄງການຊົນລະປະທານ ຫ້ວຍຕິດບ້ານຈະຫຼາມ, ນອກນັ້ນ ຍັງມີໂຮງຮຽນ ແລະ ເຮືອນຂອງປະ ຊາຊົນຈໍານວນໜຶ່ງຖືກເສຍຫາຍ. ສໍາລັບວຽກງານຈຸດສຸມນັ້ນ ການນໍາເມືອງທ່າແຕງ ຈະສຸມ ໃສ່ຊຸກຍູ້ຊ່ວຍເຫຼືອປະຊາຊົນປູກພືດລະດູແລ້ງ, ລົງສໍາຫຼວດ ແລະ ສ້ອມແປງຊົນລະປະທານ, ສ້ອມແປງທາງໃຫ້ທຽວໄດ້ຊົ່ວ ຄາວ, ສ້ອມແປງນໍ້າລິນ ແລະ ວຽກງານອື່ນໆໃຫ້ກັບຄືນສູ່ສະ ພາບປົກກະຕິ. (ຂ່າວ: ບຸນທົງ)